| Library / Tipiṭaka / തിപിടക • Tipiṭaka / സംയുത്തനികായ (ടീകാ) • Saṃyuttanikāya (ṭīkā) |
൪. തുലാകൂടസുത്തവണ്ണനാ
4. Tulākūṭasuttavaṇṇanā
൧൧൬൪. രൂപകൂടം സരൂപേന സദിസേന ഛലവോഹാരോ. അങ്ഗകൂടം അത്തനോ ഹത്ഥാദിനാ അങ്ഗാനം ഛലകരണം . ഗഹണകൂടം മാനേസു ഗഹണവസേന. പടിച്ഛന്നകൂടം അയചുണ്ണാദിനാ പടിച്ഛന്നേന ഛലകരണം. മഹതിയാ തുലായ. പച്ഛാഭാഗേതി തുലായ പച്ഛിമഭാഗേ. ഹത്ഥേനാതി ഹത്ഥപദേസേന. അക്കമതീതി ഉട്ഠാതും അദേന്തോ ഗണ്ഹാതി. ദദന്തോ പുബ്ബഭാഗേതി പരേസം ദദന്തോ പുബ്ബഭാഗേ ഹത്ഥേന തുലം അക്കമതി. തന്തി അയചുണ്ണം.
1164.Rūpakūṭaṃ sarūpena sadisena chalavohāro. Aṅgakūṭaṃ attano hatthādinā aṅgānaṃ chalakaraṇaṃ . Gahaṇakūṭaṃ mānesu gahaṇavasena. Paṭicchannakūṭaṃ ayacuṇṇādinā paṭicchannena chalakaraṇaṃ. Mahatiyā tulāya. Pacchābhāgeti tulāya pacchimabhāge. Hatthenāti hatthapadesena. Akkamatīti uṭṭhātuṃ adento gaṇhāti. Dadanto pubbabhāgeti paresaṃ dadanto pubbabhāge hatthena tulaṃ akkamati. Tanti ayacuṇṇaṃ.
ലോഹപാതിയോതി തമ്ബലോഹപാതിയോ. സുവണ്ണവണ്ണാ കരോന്തീതി അസനിഖാദസുവണ്ണകനകലിമ്പിതാ സുവണ്ണവണ്ണാ കരോന്തി. മാനഭാജനസ്സ ഹദയഭൂതസ്സ അബ്ഭന്തരസ്സ ഭിന്നം ഹദയഭേദോ. നിമിയമാനസ്സ തിലതണ്ഡുലാദികസ്സ സിഖായ അഗ്ഗകോടിയാ ഭിന്നം സിഖാഭേദോ. ഖേത്താദീനം മിനനരജ്ജുയാ അഞ്ഞഥാകരണം രജ്ജുഭേദോ. രജ്ജുഗഹണേനേവ ചേത്ഥ ദണ്ഡകസ്സ ഗഹണം കതമേവാതി ദട്ഠബ്ബം.
Lohapātiyoti tambalohapātiyo. Suvaṇṇavaṇṇā karontīti asanikhādasuvaṇṇakanakalimpitā suvaṇṇavaṇṇā karonti. Mānabhājanassa hadayabhūtassa abbhantarassa bhinnaṃ hadayabhedo. Nimiyamānassa tilataṇḍulādikassa sikhāya aggakoṭiyā bhinnaṃ sikhābhedo. Khettādīnaṃ minanarajjuyā aññathākaraṇaṃ rajjubhedo. Rajjugahaṇeneva cettha daṇḍakassa gahaṇaṃ katamevāti daṭṭhabbaṃ.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൪. തുലാകൂടസുത്തം • 4. Tulākūṭasuttaṃ
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൪. തുലാകൂടസുത്തവണ്ണനാ • 4. Tulākūṭasuttavaṇṇanā
