| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
6. தூலோனத்³த⁴ஸிக்கா²பத³வண்ணனா
6. Tūlonaddhasikkhāpadavaṇṇanā
526. ச²ட்டே² தூலங் பக்கி²பித்வாதி ஹெட்டா² சிமிலிகங் பத்த²ரித்வா தஸ்ஸ உபரி தூலங் பக்கி²பித்வாதி அத்தோ². போடகிதூலந்தி ஏரகதூலாதி³ யங்கிஞ்சி திணஜாதீனங் தூலங். ஸேஸமெத்த² உத்தானமேவ. தூலோனத்³த⁴மஞ்சபீட²தா, அத்தனோ அத்தா²ய கரணங் வா காராபெத்வா வா படிலாபோ⁴தி இமானி பனெத்த² த்³வே அங்கா³னி. அத்தனா காராபிதஸ்ஸ ஹி படிலாப⁴மத்தேனேவ பாசித்தியங். தேனேவ பத³பா⁴ஜனே ‘‘படிலாபே⁴ன உத்³தா³லெத்வா பாசித்தியங் தே³ஸேதப்³ப³’’ந்தி வுத்தங். கேனசி பன ‘‘படிலாபே⁴ன உத்³தா³லெத்வா பாசித்தியங் தே³ஸேதப்³ப³ந்தி எத்த² கிஞ்சாபி படிலாப⁴மத்தேனேவ பாசித்தியங் விய தி³ஸ்ஸதி, பரிபோ⁴கே³யேவ ஆபத்தி த³ட்ட²ப்³பா³. ‘அஞ்ஞேன கதங் படிலபி⁴த்வா பரிபு⁴ஞ்ஜதி, ஆபத்தி து³க்கடஸ்ஸா’தி வசனங் எத்த² ஸாத⁴க’’ந்தி வுத்தங், தங் தஸ்ஸ மதிமத்தங். ந ஹி ‘‘அஞ்ஞேன கதங் படிலபி⁴த்வா பரிபு⁴ஞ்ஜதி, ஆபத்தி து³க்கடஸ்ஸா’’தி இத³ங் அத்தனா காராபிதங் ஸந்தா⁴ய வுத்தங், கரணகாராபனபச்சயா ச இமினா ஸிக்கா²பதே³ன பாசித்தியங் வுத்தங், ந பரிபோ⁴க³பச்சயா. ‘‘ந, பி⁴க்க²வே, தூலோனத்³த⁴ங் மஞ்சங் வா பீட²ங் வா பரிபு⁴ஞ்ஜிதப்³ப³ங், யோ பரிபு⁴ஞ்ஜெய்ய, ஆபத்தி து³க்கடஸ்ஸா’’தி ஹி க²ந்த⁴கே வுத்தத்தா அத்தனா வா கதங் ஹோது அஞ்ஞேன வா, பரிபு⁴ஞ்ஜந்தஸ்ஸ பரிபோ⁴க³பச்சயா து³க்கடமேவ, ந பாசித்தியங்.
526. Chaṭṭhe tūlaṃ pakkhipitvāti heṭṭhā cimilikaṃ pattharitvā tassa upari tūlaṃ pakkhipitvāti attho. Poṭakitūlanti erakatūlādi yaṃkiñci tiṇajātīnaṃ tūlaṃ. Sesamettha uttānameva. Tūlonaddhamañcapīṭhatā, attano atthāya karaṇaṃ vā kārāpetvā vā paṭilābhoti imāni panettha dve aṅgāni. Attanā kārāpitassa hi paṭilābhamatteneva pācittiyaṃ. Teneva padabhājane ‘‘paṭilābhena uddāletvā pācittiyaṃ desetabba’’nti vuttaṃ. Kenaci pana ‘‘paṭilābhena uddāletvā pācittiyaṃ desetabbanti ettha kiñcāpi paṭilābhamatteneva pācittiyaṃ viya dissati, paribhogeyeva āpatti daṭṭhabbā. ‘Aññena kataṃ paṭilabhitvā paribhuñjati, āpatti dukkaṭassā’ti vacanaṃ ettha sādhaka’’nti vuttaṃ, taṃ tassa matimattaṃ. Na hi ‘‘aññena kataṃ paṭilabhitvā paribhuñjati, āpatti dukkaṭassā’’ti idaṃ attanā kārāpitaṃ sandhāya vuttaṃ, karaṇakārāpanapaccayā ca iminā sikkhāpadena pācittiyaṃ vuttaṃ, na paribhogapaccayā. ‘‘Na, bhikkhave, tūlonaddhaṃ mañcaṃ vā pīṭhaṃ vā paribhuñjitabbaṃ, yo paribhuñjeyya, āpatti dukkaṭassā’’ti hi khandhake vuttattā attanā vā kataṃ hotu aññena vā, paribhuñjantassa paribhogapaccayā dukkaṭameva, na pācittiyaṃ.
தூலோனத்³த⁴ஸிக்கா²பத³வண்ணனா நிட்டி²தா.
Tūlonaddhasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 9. ரதனவக்³கோ³ • 9. Ratanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 6. தூலோனத்³த⁴ஸிக்கா²பத³வண்ணனா • 6. Tūlonaddhasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 6. தூலோனத்³த⁴ஸிக்கா²பத³வண்ணனா • 6. Tūlonaddhasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 6. தூலோனத்³த⁴ஸிக்கா²பத³ங் • 6. Tūlonaddhasikkhāpadaṃ
