| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
৬. তূলোনদ্ধসিক্খাপদৰণ্ণনা
6. Tūlonaddhasikkhāpadavaṇṇanā
চিমিলিকং পত্থরিত্ৰা তূলং পক্খিপিত্ৰাতি মঞ্চপীঠানং উপরি চিমিলিকং পত্থরিত্ৰা তস্স উপরি তূলং পক্খিপিত্ৰাতি অত্থো। উপরি চিমিলিকাযাতি উপরিমভাগে চিমিলিকায।
Cimilikaṃpattharitvā tūlaṃ pakkhipitvāti mañcapīṭhānaṃ upari cimilikaṃ pattharitvā tassa upari tūlaṃ pakkhipitvāti attho. Upari cimilikāyāti uparimabhāge cimilikāya.
সীসপ্পমাণন্তি (চূল়ৰ॰ অট্ঠ॰ ২৯৭; সারত্থ॰ টী॰ চূল়ৰগ্গ ৩.২৯৭) যত্থ গলৰাটকতো পট্ঠায সব্বসীসং উপদহন্তি, তং সীসপ্পমাণং। তঞ্চ উক্কট্ঠপরিচ্ছেদতো তিরিযং মুট্ঠিরতনং হোতি, দীঘতো দ্ৰিরতনন্তি দস্সেতুং ‘‘যস্স ৰিত্থারতো তীসু কোণেসূ’’তিআদিমাহ। দ্ৰিন্নং অন্তরং ৰিদত্থি চতুরঙ্গুলং হোতীতি দ্ৰিন্নং কোণানং অন্তরং মিনিযমানং ৰিদত্থি চেৰ চতুরঙ্গুলঞ্চ হোতি। মজ্ঝে মুট্ঠিরতনন্তি বিব্বোহনস্স মজ্ঝং তিরিযতো মুট্ঠিরতনপ্পমাণং হোতি। অযঞ্হি সীসপ্পমাণস্স উক্কট্ঠপরিচ্ছেদো। ততো উদ্ধং ন ৰট্টতি, হেট্ঠা ৰট্টতি। অগিলানস্স সীসূপধানঞ্চ পাদূপধানঞ্চাতি দ্ৰযমেৰ ৰট্টতি। গিলানস্স বিব্বোহনানি সন্থরিত্ৰা উপরি পচ্চত্থরণং দত্ৰা নিপজ্জিতুম্পি ৰট্টতি।
Sīsappamāṇanti (cūḷava. aṭṭha. 297; sārattha. ṭī. cūḷavagga 3.297) yattha galavāṭakato paṭṭhāya sabbasīsaṃ upadahanti, taṃ sīsappamāṇaṃ. Tañca ukkaṭṭhaparicchedato tiriyaṃ muṭṭhiratanaṃ hoti, dīghato dviratananti dassetuṃ ‘‘yassa vitthārato tīsu koṇesū’’tiādimāha. Dvinnaṃ antaraṃ vidatthi caturaṅgulaṃ hotīti dvinnaṃ koṇānaṃ antaraṃ miniyamānaṃ vidatthi ceva caturaṅgulañca hoti. Majjhe muṭṭhiratananti bibbohanassa majjhaṃ tiriyato muṭṭhiratanappamāṇaṃ hoti. Ayañhi sīsappamāṇassa ukkaṭṭhaparicchedo. Tato uddhaṃ na vaṭṭati, heṭṭhā vaṭṭati. Agilānassa sīsūpadhānañca pādūpadhānañcāti dvayameva vaṭṭati. Gilānassa bibbohanāni santharitvā upari paccattharaṇaṃ datvā nipajjitumpi vaṭṭati.
তূলোনদ্ধসিক্খাপদৰণ্ণনা নিট্ঠিতা।
Tūlonaddhasikkhāpadavaṇṇanā niṭṭhitā.
