| Library / Tipiṭaka / තිපිටක • Tipiṭaka / සාරත්‌ථදීපනී-ටීකා • Sāratthadīpanī-ṭīkā |
6. තූලොනද්‌ධසික්‌ඛාපදවණ්‌ණනා
6. Tūlonaddhasikkhāpadavaṇṇanā
526. ඡට්‌ඨෙ තූලං පක්‌ඛිපිත්‌වාති හෙට්‌ඨා චිමිලිකං පත්‌ථරිත්‌වා තස්‌ස උපරි තූලං පක්‌ඛිපිත්‌වාති අත්‌ථො. පොටකිතූලන්‌ති එරකතූලාදි යංකිඤ්‌චි තිණජාතීනං තූලං. සෙසමෙත්‌ථ උත්‌තානමෙව. තූලොනද්‌ධමඤ්‌චපීඨතා, අත්‌තනො අත්‌ථාය කරණං වා කාරාපෙත්‌වා වා පටිලාභොති ඉමානි පනෙත්‌ථ ද්‌වෙ අඞ්‌ගානි. අත්‌තනා කාරාපිතස්‌ස හි පටිලාභමත්‌තෙනෙව පාචිත්‌තියං. තෙනෙව පදභාජනෙ ‘‘පටිලාභෙන උද්‌දාලෙත්‌වා පාචිත්‌තියං දෙසෙතබ්‌බ’’න්‌ති වුත්‌තං. කෙනචි පන ‘‘පටිලාභෙන උද්‌දාලෙත්‌වා පාචිත්‌තියං දෙසෙතබ්‌බන්‌ති එත්‌ථ කිඤ්‌චාපි පටිලාභමත්‌තෙනෙව පාචිත්‌තියං විය දිස්‌සති, පරිභොගෙයෙව ආපත්‌ති දට්‌ඨබ්‌බා. ‘අඤ්‌ඤෙන කතං පටිලභිත්‌වා පරිභුඤ්‌ජති, ආපත්‌ති දුක්‌කටස්‌සා’ති වචනං එත්‌ථ සාධක’’න්‌ති වුත්‌තං, තං තස්‌ස මතිමත්‌තං. න හි ‘‘අඤ්‌ඤෙන කතං පටිලභිත්‌වා පරිභුඤ්‌ජති, ආපත්‌ති දුක්‌කටස්‌සා’’ති ඉදං අත්‌තනා කාරාපිතං සන්‌ධාය වුත්‌තං, කරණකාරාපනපච්‌චයා ච ඉමිනා සික්‌ඛාපදෙන පාචිත්‌තියං වුත්‌තං, න පරිභොගපච්‌චයා. ‘‘න, භික්‌ඛවෙ, තූලොනද්‌ධං මඤ්‌චං වා පීඨං වා පරිභුඤ්‌ජිතබ්‌බං, යො පරිභුඤ්‌ජෙය්‍ය, ආපත්‌ති දුක්‌කටස්‌සා’’ති හි ඛන්‌ධකෙ වුත්‌තත්‌තා අත්‌තනා වා කතං හොතු අඤ්‌ඤෙන වා, පරිභුඤ්‌ජන්‌තස්‌ස පරිභොගපච්‌චයා දුක්‌කටමෙව, න පාචිත්‌තියං.
526. Chaṭṭhe tūlaṃ pakkhipitvāti heṭṭhā cimilikaṃ pattharitvā tassa upari tūlaṃ pakkhipitvāti attho. Poṭakitūlanti erakatūlādi yaṃkiñci tiṇajātīnaṃ tūlaṃ. Sesamettha uttānameva. Tūlonaddhamañcapīṭhatā, attano atthāya karaṇaṃ vā kārāpetvā vā paṭilābhoti imāni panettha dve aṅgāni. Attanā kārāpitassa hi paṭilābhamatteneva pācittiyaṃ. Teneva padabhājane ‘‘paṭilābhena uddāletvā pācittiyaṃ desetabba’’nti vuttaṃ. Kenaci pana ‘‘paṭilābhena uddāletvā pācittiyaṃ desetabbanti ettha kiñcāpi paṭilābhamatteneva pācittiyaṃ viya dissati, paribhogeyeva āpatti daṭṭhabbā. ‘Aññena kataṃ paṭilabhitvā paribhuñjati, āpatti dukkaṭassā’ti vacanaṃ ettha sādhaka’’nti vuttaṃ, taṃ tassa matimattaṃ. Na hi ‘‘aññena kataṃ paṭilabhitvā paribhuñjati, āpatti dukkaṭassā’’ti idaṃ attanā kārāpitaṃ sandhāya vuttaṃ, karaṇakārāpanapaccayā ca iminā sikkhāpadena pācittiyaṃ vuttaṃ, na paribhogapaccayā. ‘‘Na, bhikkhave, tūlonaddhaṃ mañcaṃ vā pīṭhaṃ vā paribhuñjitabbaṃ, yo paribhuñjeyya, āpatti dukkaṭassā’’ti hi khandhake vuttattā attanā vā kataṃ hotu aññena vā, paribhuñjantassa paribhogapaccayā dukkaṭameva, na pācittiyaṃ.
තූලොනද්‌ධසික්‌ඛාපදවණ්‌ණනා නිට්‌ඨිතා.
Tūlonaddhasikkhāpadavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 9. රතනවග්‌ගො • 9. Ratanavaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 6. තූලොනද්‌ධසික්‌ඛාපදවණ්‌ණනා • 6. Tūlonaddhasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 6. තූලොනද්‌ධසික්‌ඛාපදවණ්‌ණනා • 6. Tūlonaddhasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 6. තූලොනද්‌ධසික්‌ඛාපදං • 6. Tūlonaddhasikkhāpadaṃ
