| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
9. துரூப்³ரஹ்மஸுத்தவண்ணனா
9. Turūbrahmasuttavaṇṇanā
180. நவமே ஆபா³தி⁴கோதி ‘‘ஸாஸபமத்தீஹி பீளகாஹீ’’திஆதி³னா நயேன அனந்தரஸுத்தே ஆக³தேன ஆபா³தே⁴ன ஆபா³தி⁴கோ. பா³ள்ஹகி³லானோதி அதி⁴மத்தகி³லானோ. துரூதி கோகாலிகஸ்ஸ உபஜ்ஜா²யோ துருத்தே²ரோ நாம அனாகா³மிப²லங் பத்வா ப்³ரஹ்மலோகே நிப்³ப³த்தோ. ஸோ பூ⁴மட்ட²கதே³வதா ஆதி³ங் கத்வா, ‘‘அயுத்தங் கோகாலிகேன கதங் அக்³க³ஸாவகே அந்திமவத்து²னா அப்³பா⁴சிக்க²ந்தேனா’’தி பரம்பராய ப்³ரஹ்மலோகஸம்பத்தங் கோகாலிகஸ்ஸ பாபகம்மங் ஸுத்வா – ‘‘மா மய்ஹங் பஸ்ஸந்தஸ்ஸேவ வராகோ நஸ்ஸி, ஓவதி³ஸ்ஸாமி நங் தே²ரேஸு சித்தபஸாத³த்தா²யா’’தி ஆக³ந்த்வா தஸ்ஸ புரதோ அட்டா²ஸி. தங் ஸந்தா⁴ய வுத்தங் ‘‘துரூ பச்சேகப்³ரஹ்மா’’தி. பேஸலாதி பியஸீலா. கோஸி த்வங், ஆவுஸோதி நிபன்னகோவ கப³ரக்கீ²னி உம்மீலெத்வா ஏவமாஹ. பஸ்ஸ யாவஞ்ச தேதி பஸ்ஸ யத்தகங் தயா அபரத்³த⁴ங், அத்தனோ நலாடே மஹாக³ண்ட³ங் அபஸ்ஸந்தோ ஸாஸபமத்தாய பீளகாய மங் சோதே³தப்³ப³ங் மஞ்ஞஸீதி ஆஹ.
180. Navame ābādhikoti ‘‘sāsapamattīhi pīḷakāhī’’tiādinā nayena anantarasutte āgatena ābādhena ābādhiko. Bāḷhagilānoti adhimattagilāno. Turūti kokālikassa upajjhāyo turutthero nāma anāgāmiphalaṃ patvā brahmaloke nibbatto. So bhūmaṭṭhakadevatā ādiṃ katvā, ‘‘ayuttaṃ kokālikena kataṃ aggasāvake antimavatthunā abbhācikkhantenā’’ti paramparāya brahmalokasampattaṃ kokālikassa pāpakammaṃ sutvā – ‘‘mā mayhaṃ passantasseva varāko nassi, ovadissāmi naṃ theresu cittapasādatthāyā’’ti āgantvā tassa purato aṭṭhāsi. Taṃ sandhāya vuttaṃ ‘‘turū paccekabrahmā’’ti. Pesalāti piyasīlā. Kosi tvaṃ, āvusoti nipannakova kabarakkhīni ummīletvā evamāha. Passa yāvañca teti passa yattakaṃ tayā aparaddhaṃ, attano nalāṭe mahāgaṇḍaṃ apassanto sāsapamattāya pīḷakāya maṃ codetabbaṃ maññasīti āha.
அத² நங் ‘‘அதி³ட்டி²ப்பத்தோ அயங் வராகோ, கி³லவிஸோ விய கஸ்ஸசி வசனங் ந கரிஸ்ஸதீ’’தி ஞத்வா புரிஸஸ்ஸ ஹீதிஆதி³மாஹ. தத்த² குடா²ரீதி குடா²ரிஸதி³ஸா ப²ருஸா வாசா. சி²ந்த³தீதி குஸலமூலஸங்கா²தே மூலேயேவ நிகந்ததி. நிந்தி³யந்தி நிந்தி³தப்³ப³ங் து³ஸ்ஸீலபுக்³க³லங். பஸங்ஸதீதி உத்தமத்தே² ஸம்பா⁴வெத்வா கீ²ணாஸவோதி வத³தி. தங் வா நிந்த³தி யோ பஸங்ஸியோதி , யோ வா பஸங்ஸிதப்³போ³ கீ²ணாஸவோ, தங் அந்திமவத்து²னா சோதெ³ந்தோ ‘‘து³ஸ்ஸீலோ அய’’ந்தி வத³தி. வசினாதி முகே²ன ஸோ கலிந்தி, ஸோ தங் அபராத⁴ங் முகே²ன விசினாதி நாம. கலினா தேனாதி தேன அபராதே⁴ன ஸுக²ங் ந விந்த³தி. நிந்தி³யபஸங்ஸாய ஹி பஸங்ஸியனிந்தா³ய ச ஸமகோவ விபாகோ.
Atha naṃ ‘‘adiṭṭhippatto ayaṃ varāko, gilaviso viya kassaci vacanaṃ na karissatī’’ti ñatvā purisassa hītiādimāha. Tattha kuṭhārīti kuṭhārisadisā pharusā vācā. Chindatīti kusalamūlasaṅkhāte mūleyeva nikantati. Nindiyanti ninditabbaṃ dussīlapuggalaṃ. Pasaṃsatīti uttamatthe sambhāvetvā khīṇāsavoti vadati. Taṃ vā nindati yo pasaṃsiyoti , yo vā pasaṃsitabbo khīṇāsavo, taṃ antimavatthunā codento ‘‘dussīlo aya’’nti vadati. Vacināti mukhena so kalinti, so taṃ aparādhaṃ mukhena vicināti nāma. Kalinā tenāti tena aparādhena sukhaṃ na vindati. Nindiyapasaṃsāya hi pasaṃsiyanindāya ca samakova vipāko.
ஸப்³ப³ஸ்ஸாபி ஸஹாபி அத்தனாதி ஸப்³பே³ன ஸகேனபி அத்தனாபி ஸத்³தி⁴ங் யோ அக்கே²ஸு த⁴னபராஜயோ நாம, அயங் அப்பமத்தகோ அபராதோ⁴. யோ ஸுக³தேஸூதி யோ பன ஸம்மக்³க³தேஸு புக்³க³லேஸு சித்தங் பது³ஸ்ஸெய்ய, அயங் சித்தபதோ³ஸோவ ததோ கலிதோ மஹந்ததரோ கலி.
Sabbassāpisahāpi attanāti sabbena sakenapi attanāpi saddhiṃ yo akkhesu dhanaparājayo nāma, ayaṃ appamattako aparādho. Yosugatesūti yo pana sammaggatesu puggalesu cittaṃ padusseyya, ayaṃ cittapadosova tato kalito mahantataro kali.
இதா³னி தஸ்ஸ மஹந்ததரபா⁴வங் த³ஸ்ஸெந்தோ ஸதங் ஸஹஸ்ஸானந்திஆதி³மாஹ. தத்த² ஸதங் ஸஹஸ்ஸானந்தி நிரப்³பு³த³க³ணனாய ஸதஸஹஸ்ஸங். ச²த்திங்ஸதீதி அபரானி ச²த்திங்ஸதி நிரப்³பு³தா³னி. பஞ்ச சாதி அப்³பு³த³க³ணனாய பஞ்ச அப்³பு³தா³னி. யமரியக³ரஹீதி யங் அரியே க³ரஹந்தோ நிரயங் உபபஜ்ஜதி, தத்த² எத்தகங் ஆயுப்பமாணந்தி. நவமங்.
Idāni tassa mahantatarabhāvaṃ dassento sataṃ sahassānantiādimāha. Tattha sataṃ sahassānanti nirabbudagaṇanāya satasahassaṃ. Chattiṃsatīti aparāni chattiṃsati nirabbudāni. Pañca cāti abbudagaṇanāya pañca abbudāni. Yamariyagarahīti yaṃ ariye garahanto nirayaṃ upapajjati, tattha ettakaṃ āyuppamāṇanti. Navamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. துரூப்³ரஹ்மஸுத்தங் • 9. Turūbrahmasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. துரூப்³ரஹ்மஸுத்தவண்ணனா • 9. Turūbrahmasuttavaṇṇanā
