| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৯. তুরূব্রহ্মসুত্তৰণ্ণনা
9. Turūbrahmasuttavaṇṇanā
১৮০. আবাধো এতস্স অত্থীতি আবাধিকো। অনন্তরসুত্তেতি অনাগতানন্তরে সুত্তে। ৰরাকোতি অনুগ্গহৰচনমেৰ, ন নিপ্পরিযাযেন ৰুত্তৰচনং। পিযসীলাতি ইমিনা এতস্মিং অত্থে নিরুত্তিনযেন ‘‘পেসলা’’তি পদসিদ্ধীতি দস্সেতি। কবরক্খীনীতি ব্যাধিবলেন পরিভিন্নৰণ্ণতায কবরভূতানি অক্খীনি। যত্তকন্তি যং ত্ৰং ভগৰতো ৰচনং অঞ্ঞথা করোসি, তত্তকং তযা অপরদ্ধং, তস্স পমাণং নত্থীতি অত্থো। যস্মা অনাগামিনো নাম কামচ্ছন্দব্যাপাদা পহীনা হোন্তি, ত্ৰঞ্চ দিট্ঠো কামচ্ছন্দব্যাপাদৰসেন ইধাগতো, তস্মা যাৰ তে ইদং অপরদ্ধন্তি অযমেৰেত্থ অত্থো দট্ঠব্বো।
180. Ābādho etassa atthīti ābādhiko. Anantarasutteti anāgatānantare sutte. Varākoti anuggahavacanameva, na nippariyāyena vuttavacanaṃ. Piyasīlāti iminā etasmiṃ atthe niruttinayena ‘‘pesalā’’ti padasiddhīti dasseti. Kabarakkhīnīti byādhibalena paribhinnavaṇṇatāya kabarabhūtāni akkhīni. Yattakanti yaṃ tvaṃ bhagavato vacanaṃ aññathā karosi, tattakaṃ tayā aparaddhaṃ, tassa pamāṇaṃ natthīti attho. Yasmā anāgāmino nāma kāmacchandabyāpādā pahīnā honti, tvañca diṭṭho kāmacchandabyāpādavasena idhāgato, tasmā yāva te idaṃ aparaddhanti ayamevettha attho daṭṭhabbo.
অদিট্ঠিপ্পত্তোতি অপ্পত্তদিট্ঠিনিমিত্তো। গিলৰিসো ৰিয ৰিসং গিলিত্ৰা ঠিতো ৰিয। কুঠারিসদিসা মূলপচ্ছিন্দনট্ঠেন। উত্তমত্থেতি অরহত্তে। খীণাসৰোতি ৰদতি সুনক্খত্তো ৰিয অচেলং কোরক্খত্তিযং। যো অগ্গসাৰকো ৰিয পসংসিতব্বো খীণাসৰো, তং ‘‘দুস্সীলো অয’’ন্তি যো ৰা ৰদতি। সমকোৰ ৰিপাকোতি পসংসিযনিন্দা ৰিজ্জমানগুণপরিধংসনৰসেন পৰত্তা যাৰ মহাসাৰজ্জতায কটুকতরৰিপাকা, তাৰ নিন্দিযপসংসাপি মহাসাৰজ্জতায সমৰিপাকা তত্থ অৰিজ্জমানগুণসমারোপনেন অত্তনো পরেসং মিচ্ছাপটিপত্তিহেতুভাৰতো পসংসিযেন তস্স সমভাৰকরণতো চ। লোকেপি হি অযং পুরে সমণগারয্হো হোতি, পগেৰ দুপ্পটিপন্নদুপ্পটিপন্নোতি সমং করোন্তীতি।
Adiṭṭhippattoti appattadiṭṭhinimitto. Gilaviso viya visaṃ gilitvā ṭhito viya. Kuṭhārisadisā mūlapacchindanaṭṭhena. Uttamattheti arahatte. Khīṇāsavoti vadati sunakkhatto viya acelaṃ korakkhattiyaṃ. Yo aggasāvako viya pasaṃsitabbo khīṇāsavo, taṃ ‘‘dussīlo aya’’nti yo vā vadati. Samakova vipākoti pasaṃsiyanindā vijjamānaguṇaparidhaṃsanavasena pavattā yāva mahāsāvajjatāya kaṭukataravipākā, tāva nindiyapasaṃsāpi mahāsāvajjatāya samavipākā tattha avijjamānaguṇasamāropanena attano paresaṃ micchāpaṭipattihetubhāvato pasaṃsiyena tassa samabhāvakaraṇato ca. Lokepi hi ayaṃ pure samaṇagārayho hoti, pageva duppaṭipannaduppaṭipannoti samaṃ karontīti.
সকেনাতি অত্তনো সাপতেয্যেন। অযং অপ্পমত্তকো অপরাধো দিট্ঠধম্মিকত্তা সপ্পতিকারত্তা চ তস্স। অযং মহন্ততরো কলি কতূপচিতস্স সম্পরাযিকত্তা অপ্পতিকারত্তা চ।
Sakenāti attano sāpateyyena. Ayaṃ appamattako aparādho diṭṭhadhammikattā sappatikārattā ca tassa. Ayaṃ mahantataro kali katūpacitassa samparāyikattā appatikārattā ca.
‘‘নিরব্বুদো’’তি গণনাৰিসেসো একোতি আহ ‘‘নিরব্বুদগণনাযা’’তি, সতসহস্সং নিরব্বুদানন্তি অত্থো। নিরব্বুদপরিগণনং পন হেট্ঠা ৰুত্তমেৰ। যমরিযগরহী নিরযং উপেতীতি এত্থ যথাৰুত্তং আযুপ্পমাণং পাকতিকেন অরিযূপৰাদিনা ৰুত্তন্তি ৰেদিতব্বং। ‘‘অগ্গসাৰকানং পন গুণমহন্ততায ততোপি অতিৰিয মহন্ততরা এৰা’’তি ৰদন্তি।
‘‘Nirabbudo’’ti gaṇanāviseso ekoti āha ‘‘nirabbudagaṇanāyā’’ti, satasahassaṃ nirabbudānanti attho. Nirabbudaparigaṇanaṃ pana heṭṭhā vuttameva. Yamariyagarahī nirayaṃ upetīti ettha yathāvuttaṃ āyuppamāṇaṃ pākatikena ariyūpavādinā vuttanti veditabbaṃ. ‘‘Aggasāvakānaṃ pana guṇamahantatāya tatopi ativiya mahantatarā evā’’ti vadanti.
তুরূব্রহ্মসুত্তৰণ্ণনা নিট্ঠিতা।
Turūbrahmasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৯. তুরূব্রহ্মসুত্তং • 9. Turūbrahmasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. তুরূব্রহ্মসুত্তৰণ্ণনা • 9. Turūbrahmasuttavaṇṇanā
