| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៩. តុរូព្រហ្មសុត្តវណ្ណនា
9. Turūbrahmasuttavaṇṇanā
១៨០. អាពាធោ ឯតស្ស អត្ថីតិ អាពាធិកោ។ អនន្តរសុត្តេតិ អនាគតានន្តរេ សុត្តេ។ វរាកោតិ អនុគ្គហវចនមេវ, ន និប្បរិយាយេន វុត្តវចនំ។ បិយសីលាតិ ឥមិនា ឯតស្មិំ អត្ថេ និរុត្តិនយេន ‘‘បេសលា’’តិ បទសិទ្ធីតិ ទស្សេតិ។ កពរក្ខីនីតិ ព្យាធិពលេន បរិភិន្នវណ្ណតាយ កពរភូតានិ អក្ខីនិ។ យត្តកន្តិ យំ ត្វំ ភគវតោ វចនំ អញ្ញថា ករោសិ, តត្តកំ តយា អបរទ្ធំ, តស្ស បមាណំ នត្ថីតិ អត្ថោ។ យស្មា អនាគាមិនោ នាម កាមច្ឆន្ទព្យាបាទា បហីនា ហោន្តិ, ត្វញ្ច ទិដ្ឋោ កាមច្ឆន្ទព្យាបាទវសេន ឥធាគតោ, តស្មា យាវ តេ ឥទំ អបរទ្ធន្តិ អយមេវេត្ថ អត្ថោ ទដ្ឋព្ពោ។
180. Ābādho etassa atthīti ābādhiko. Anantarasutteti anāgatānantare sutte. Varākoti anuggahavacanameva, na nippariyāyena vuttavacanaṃ. Piyasīlāti iminā etasmiṃ atthe niruttinayena ‘‘pesalā’’ti padasiddhīti dasseti. Kabarakkhīnīti byādhibalena paribhinnavaṇṇatāya kabarabhūtāni akkhīni. Yattakanti yaṃ tvaṃ bhagavato vacanaṃ aññathā karosi, tattakaṃ tayā aparaddhaṃ, tassa pamāṇaṃ natthīti attho. Yasmā anāgāmino nāma kāmacchandabyāpādā pahīnā honti, tvañca diṭṭho kāmacchandabyāpādavasena idhāgato, tasmā yāva te idaṃ aparaddhanti ayamevettha attho daṭṭhabbo.
អទិដ្ឋិប្បត្តោតិ អប្បត្តទិដ្ឋិនិមិត្តោ។ គិលវិសោ វិយ វិសំ គិលិត្វា ឋិតោ វិយ។ កុឋារិសទិសា មូលបច្ឆិន្ទនដ្ឋេន។ ឧត្តមត្ថេតិ អរហត្តេ។ ខីណាសវោតិ វទតិ សុនក្ខត្តោ វិយ អចេលំ កោរក្ខត្តិយំ។ យោ អគ្គសាវកោ វិយ បសំសិតព្ពោ ខីណាសវោ, តំ ‘‘ទុស្សីលោ អយ’’ន្តិ យោ វា វទតិ។ សមកោវ វិបាកោតិ បសំសិយនិន្ទា វិជ្ជមានគុណបរិធំសនវសេន បវត្តា យាវ មហាសាវជ្ជតាយ កដុកតរវិបាកា, តាវ និន្ទិយបសំសាបិ មហាសាវជ្ជតាយ សមវិបាកា តត្ថ អវិជ្ជមានគុណសមារោបនេន អត្តនោ បរេសំ មិច្ឆាបដិបត្តិហេតុភាវតោ បសំសិយេន តស្ស សមភាវករណតោ ច។ លោកេបិ ហិ អយំ បុរេ សមណគារយ្ហោ ហោតិ, បគេវ ទុប្បដិបន្នទុប្បដិបន្នោតិ សមំ ករោន្តីតិ។
Adiṭṭhippattoti appattadiṭṭhinimitto. Gilaviso viya visaṃ gilitvā ṭhito viya. Kuṭhārisadisā mūlapacchindanaṭṭhena. Uttamattheti arahatte. Khīṇāsavoti vadati sunakkhatto viya acelaṃ korakkhattiyaṃ. Yo aggasāvako viya pasaṃsitabbo khīṇāsavo, taṃ ‘‘dussīlo aya’’nti yo vā vadati. Samakova vipākoti pasaṃsiyanindā vijjamānaguṇaparidhaṃsanavasena pavattā yāva mahāsāvajjatāya kaṭukataravipākā, tāva nindiyapasaṃsāpi mahāsāvajjatāya samavipākā tattha avijjamānaguṇasamāropanena attano paresaṃ micchāpaṭipattihetubhāvato pasaṃsiyena tassa samabhāvakaraṇato ca. Lokepi hi ayaṃ pure samaṇagārayho hoti, pageva duppaṭipannaduppaṭipannoti samaṃ karontīti.
សកេនាតិ អត្តនោ សាបតេយ្យេន។ អយំ អប្បមត្តកោ អបរាធោ ទិដ្ឋធម្មិកត្តា សប្បតិការត្តា ច តស្ស។ អយំ មហន្តតរោ កលិ កតូបចិតស្ស សម្បរាយិកត្តា អប្បតិការត្តា ច។
Sakenāti attano sāpateyyena. Ayaṃ appamattako aparādho diṭṭhadhammikattā sappatikārattā ca tassa. Ayaṃ mahantataro kali katūpacitassa samparāyikattā appatikārattā ca.
‘‘និរព្ពុទោ’’តិ គណនាវិសេសោ ឯកោតិ អាហ ‘‘និរព្ពុទគណនាយា’’តិ, សតសហស្សំ និរព្ពុទានន្តិ អត្ថោ។ និរព្ពុទបរិគណនំ បន ហេដ្ឋា វុត្តមេវ។ យមរិយគរហី និរយំ ឧបេតីតិ ឯត្ថ យថាវុត្តំ អាយុប្បមាណំ បាកតិកេន អរិយូបវាទិនា វុត្តន្តិ វេទិតព្ពំ។ ‘‘អគ្គសាវកានំ បន គុណមហន្តតាយ តតោបិ អតិវិយ មហន្តតរា ឯវា’’តិ វទន្តិ។
‘‘Nirabbudo’’ti gaṇanāviseso ekoti āha ‘‘nirabbudagaṇanāyā’’ti, satasahassaṃ nirabbudānanti attho. Nirabbudaparigaṇanaṃ pana heṭṭhā vuttameva. Yamariyagarahī nirayaṃ upetīti ettha yathāvuttaṃ āyuppamāṇaṃ pākatikena ariyūpavādinā vuttanti veditabbaṃ. ‘‘Aggasāvakānaṃ pana guṇamahantatāya tatopi ativiya mahantatarā evā’’ti vadanti.
តុរូព្រហ្មសុត្តវណ្ណនា និដ្ឋិតា។
Turūbrahmasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៩. តុរូព្រហ្មសុត្តំ • 9. Turūbrahmasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៩. តុរូព្រហ្មសុត្តវណ្ណនា • 9. Turūbrahmasuttavaṇṇanā
