| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
9. තුරූබ්‍රහ්‌මසුත්‌තවණ්‌ණනා
9. Turūbrahmasuttavaṇṇanā
180. නවමෙ ආබාධිකොති ‘‘සාසපමත්‌තීහි පීළකාහී’’තිආදිනා නයෙන අනන්‌තරසුත්‌තෙ ආගතෙන ආබාධෙන ආබාධිකො. බාළ්‌හගිලානොති අධිමත්‌තගිලානො. තුරූති කොකාලිකස්‌ස උපජ්‌ඣායො තුරුත්‌ථෙරො නාම අනාගාමිඵලං පත්‌වා බ්‍රහ්‌මලොකෙ නිබ්‌බත්‌තො. සො භූමට්‌ඨකදෙවතා ආදිං කත්‌වා, ‘‘අයුත්‌තං කොකාලිකෙන කතං අග්‌ගසාවකෙ අන්‌තිමවත්‌ථුනා අබ්‌භාචික්‌ඛන්‌තෙනා’’ති පරම්‌පරාය බ්‍රහ්‌මලොකසම්‌පත්‌තං කොකාලිකස්‌ස පාපකම්‌මං සුත්‌වා – ‘‘මා මය්‌හං පස්‌සන්‌තස්‌සෙව වරාකො නස්‌සි, ඔවදිස්‌සාමි නං ථෙරෙසු චිත්‌තපසාදත්‌ථායා’’ති ආගන්‌ත්‌වා තස්‌ස පුරතො අට්‌ඨාසි. තං සන්‌ධාය වුත්‌තං ‘‘තුරූ පච්‌චෙකබ්‍රහ්‌මා’’ති. පෙසලාති පියසීලා. කොසි ත්‌වං, ආවුසොති නිපන්‌නකොව කබරක්‌ඛීනි උම්‌මීලෙත්‌වා එවමාහ. පස්‌ස යාවඤ්‌ච තෙති පස්‌ස යත්‌තකං තයා අපරද්‌ධං, අත්‌තනො නලාටෙ මහාගණ්‌ඩං අපස්‌සන්‌තො සාසපමත්‌තාය පීළකාය මං චොදෙතබ්‌බං මඤ්‌ඤසීති ආහ.
180. Navame ābādhikoti ‘‘sāsapamattīhi pīḷakāhī’’tiādinā nayena anantarasutte āgatena ābādhena ābādhiko. Bāḷhagilānoti adhimattagilāno. Turūti kokālikassa upajjhāyo turutthero nāma anāgāmiphalaṃ patvā brahmaloke nibbatto. So bhūmaṭṭhakadevatā ādiṃ katvā, ‘‘ayuttaṃ kokālikena kataṃ aggasāvake antimavatthunā abbhācikkhantenā’’ti paramparāya brahmalokasampattaṃ kokālikassa pāpakammaṃ sutvā – ‘‘mā mayhaṃ passantasseva varāko nassi, ovadissāmi naṃ theresu cittapasādatthāyā’’ti āgantvā tassa purato aṭṭhāsi. Taṃ sandhāya vuttaṃ ‘‘turū paccekabrahmā’’ti. Pesalāti piyasīlā. Kosi tvaṃ, āvusoti nipannakova kabarakkhīni ummīletvā evamāha. Passa yāvañca teti passa yattakaṃ tayā aparaddhaṃ, attano nalāṭe mahāgaṇḍaṃ apassanto sāsapamattāya pīḷakāya maṃ codetabbaṃ maññasīti āha.
අථ නං ‘‘අදිට්‌ඨිප්‌පත්‌තො අයං වරාකො, ගිලවිසො විය කස්‌සචි වචනං න කරිස්‌සතී’’ති ඤත්‌වා පුරිසස්‌ස හීතිආදිමාහ. තත්‌ථ කුඨාරීති කුඨාරිසදිසා ඵරුසා වාචා. ඡින්‌දතීති කුසලමූලසඞ්‌ඛාතෙ මූලෙයෙව නිකන්‌තති. නින්‌දියන්‌ති නින්‌දිතබ්‌බං දුස්‌සීලපුග්‌ගලං. පසංසතීති උත්‌තමත්‌ථෙ සම්‌භාවෙත්‌වා ඛීණාසවොති වදති. තං වා නින්‌දති යො පසංසියොති , යො වා පසංසිතබ්‌බො ඛීණාසවො, තං අන්‌තිමවත්‌ථුනා චොදෙන්‌තො ‘‘දුස්‌සීලො අය’’න්‌ති වදති. වචිනාති මුඛෙන සො කලින්‌ති, සො තං අපරාධං මුඛෙන විචිනාති නාම. කලිනා තෙනාති තෙන අපරාධෙන සුඛං න වින්‌දති. නින්‌දියපසංසාය හි පසංසියනින්‌දාය ච සමකොව විපාකො.
Atha naṃ ‘‘adiṭṭhippatto ayaṃ varāko, gilaviso viya kassaci vacanaṃ na karissatī’’ti ñatvā purisassa hītiādimāha. Tattha kuṭhārīti kuṭhārisadisā pharusā vācā. Chindatīti kusalamūlasaṅkhāte mūleyeva nikantati. Nindiyanti ninditabbaṃ dussīlapuggalaṃ. Pasaṃsatīti uttamatthe sambhāvetvā khīṇāsavoti vadati. Taṃ vā nindati yo pasaṃsiyoti , yo vā pasaṃsitabbo khīṇāsavo, taṃ antimavatthunā codento ‘‘dussīlo aya’’nti vadati. Vacināti mukhena so kalinti, so taṃ aparādhaṃ mukhena vicināti nāma. Kalinā tenāti tena aparādhena sukhaṃ na vindati. Nindiyapasaṃsāya hi pasaṃsiyanindāya ca samakova vipāko.
සබ්‌බස්‌සාපි සහාපි අත්‌තනාති සබ්‌බෙන සකෙනපි අත්‌තනාපි සද්‌ධිං යො අක්‌ඛෙසු ධනපරාජයො නාම, අයං අප්‌පමත්‌තකො අපරාධො. යො සුගතෙසූති යො පන සම්‌මග්‌ගතෙසු පුග්‌ගලෙසු චිත්‌තං පදුස්‌සෙය්‍ය, අයං චිත්‌තපදොසොව තතො කලිතො මහන්‌තතරො කලි.
Sabbassāpisahāpi attanāti sabbena sakenapi attanāpi saddhiṃ yo akkhesu dhanaparājayo nāma, ayaṃ appamattako aparādho. Yosugatesūti yo pana sammaggatesu puggalesu cittaṃ padusseyya, ayaṃ cittapadosova tato kalito mahantataro kali.
ඉදානි තස්‌ස මහන්‌තතරභාවං දස්‌සෙන්‌තො සතං සහස්‌සානන්‌තිආදිමාහ. තත්‌ථ සතං සහස්‌සානන්‌ති නිරබ්‌බුදගණනාය සතසහස්‌සං. ඡත්‌තිංසතීති අපරානි ඡත්‌තිංසති නිරබ්‌බුදානි. පඤ්‌ච චාති අබ්‌බුදගණනාය පඤ්‌ච අබ්‌බුදානි. යමරියගරහීති යං අරියෙ ගරහන්‌තො නිරයං උපපජ්‌ජති, තත්‌ථ එත්‌තකං ආයුප්‌පමාණන්‌ති. නවමං.
Idāni tassa mahantatarabhāvaṃ dassento sataṃ sahassānantiādimāha. Tattha sataṃ sahassānanti nirabbudagaṇanāya satasahassaṃ. Chattiṃsatīti aparāni chattiṃsati nirabbudāni. Pañca cāti abbudagaṇanāya pañca abbudāni. Yamariyagarahīti yaṃ ariye garahanto nirayaṃ upapajjati, tattha ettakaṃ āyuppamāṇanti. Navamaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 9. තුරූබ්‍රහ්‌මසුත්‌තං • 9. Turūbrahmasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 9. තුරූබ්‍රහ්‌මසුත්‌තවණ්‌ණනා • 9. Turūbrahmasuttavaṇṇanā
