| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
9. තුරූබ්‍රහ්‌මසුත්‌තවණ්‌ණනා
9. Turūbrahmasuttavaṇṇanā
180. ආබාධො එතස්‌ස අත්‌ථීති ආබාධිකො. අනන්‌තරසුත්‌තෙති අනාගතානන්‌තරෙ සුත්‌තෙ. වරාකොති අනුග්‌ගහවචනමෙව, න නිප්‌පරියායෙන වුත්‌තවචනං. පියසීලාති ඉමිනා එතස්‌මිං අත්‌ථෙ නිරුත්‌තිනයෙන ‘‘පෙසලා’’ති පදසිද්‌ධීති දස්‌සෙති. කබරක්‌ඛීනීති බ්‍යාධිබලෙන පරිභින්‌නවණ්‌ණතාය කබරභූතානි අක්‌ඛීනි. යත්‌තකන්‌ති යං ත්‌වං භගවතො වචනං අඤ්‌ඤථා කරොසි, තත්‌තකං තයා අපරද්‌ධං, තස්‌ස පමාණං නත්‌ථීති අත්‌ථො. යස්‌මා අනාගාමිනො නාම කාමච්‌ඡන්‌දබ්‍යාපාදා පහීනා හොන්‌ති, ත්‌වඤ්‌ච දිට්‌ඨො කාමච්‌ඡන්‌දබ්‍යාපාදවසෙන ඉධාගතො, තස්‌මා යාව තෙ ඉදං අපරද්‌ධන්‌ති අයමෙවෙත්‌ථ අත්‌ථො දට්‌ඨබ්‌බො.
180. Ābādho etassa atthīti ābādhiko. Anantarasutteti anāgatānantare sutte. Varākoti anuggahavacanameva, na nippariyāyena vuttavacanaṃ. Piyasīlāti iminā etasmiṃ atthe niruttinayena ‘‘pesalā’’ti padasiddhīti dasseti. Kabarakkhīnīti byādhibalena paribhinnavaṇṇatāya kabarabhūtāni akkhīni. Yattakanti yaṃ tvaṃ bhagavato vacanaṃ aññathā karosi, tattakaṃ tayā aparaddhaṃ, tassa pamāṇaṃ natthīti attho. Yasmā anāgāmino nāma kāmacchandabyāpādā pahīnā honti, tvañca diṭṭho kāmacchandabyāpādavasena idhāgato, tasmā yāva te idaṃ aparaddhanti ayamevettha attho daṭṭhabbo.
අදිට්‌ඨිප්‌පත්‌තොති අප්‌පත්‌තදිට්‌ඨිනිමිත්‌තො. ගිලවිසො විය විසං ගිලිත්‌වා ඨිතො විය. කුඨාරිසදිසා මූලපච්‌ඡින්‌දනට්‌ඨෙන. උත්‌තමත්‌ථෙති අරහත්‌තෙ. ඛීණාසවොති වදති සුනක්‌ඛත්‌තො විය අචෙලං කොරක්‌ඛත්‌තියං. යො අග්‌ගසාවකො විය පසංසිතබ්‌බො ඛීණාසවො, තං ‘‘දුස්‌සීලො අය’’න්‌ති යො වා වදති. සමකොව විපාකොති පසංසියනින්‌දා විජ්‌ජමානගුණපරිධංසනවසෙන පවත්‌තා යාව මහාසාවජ්‌ජතාය කටුකතරවිපාකා, තාව නින්‌දියපසංසාපි මහාසාවජ්‌ජතාය සමවිපාකා තත්‌ථ අවිජ්‌ජමානගුණසමාරොපනෙන අත්‌තනො පරෙසං මිච්‌ඡාපටිපත්‌තිහෙතුභාවතො පසංසියෙන තස්‌ස සමභාවකරණතො ච. ලොකෙපි හි අයං පුරෙ සමණගාරය්‌හො හොති, පගෙව දුප්‌පටිපන්‌නදුප්‌පටිපන්‌නොති සමං කරොන්‌තීති.
Adiṭṭhippattoti appattadiṭṭhinimitto. Gilaviso viya visaṃ gilitvā ṭhito viya. Kuṭhārisadisā mūlapacchindanaṭṭhena. Uttamattheti arahatte. Khīṇāsavoti vadati sunakkhatto viya acelaṃ korakkhattiyaṃ. Yo aggasāvako viya pasaṃsitabbo khīṇāsavo, taṃ ‘‘dussīlo aya’’nti yo vā vadati. Samakova vipākoti pasaṃsiyanindā vijjamānaguṇaparidhaṃsanavasena pavattā yāva mahāsāvajjatāya kaṭukataravipākā, tāva nindiyapasaṃsāpi mahāsāvajjatāya samavipākā tattha avijjamānaguṇasamāropanena attano paresaṃ micchāpaṭipattihetubhāvato pasaṃsiyena tassa samabhāvakaraṇato ca. Lokepi hi ayaṃ pure samaṇagārayho hoti, pageva duppaṭipannaduppaṭipannoti samaṃ karontīti.
සකෙනාති අත්‌තනො සාපතෙය්‍යෙන. අයං අප්‌පමත්‌තකො අපරාධො දිට්‌ඨධම්‌මිකත්‌තා සප්‌පතිකාරත්‌තා ච තස්‌ස. අයං මහන්‌තතරො කලි කතූපචිතස්‌ස සම්‌පරායිකත්‌තා අප්‌පතිකාරත්‌තා ච.
Sakenāti attano sāpateyyena. Ayaṃ appamattako aparādho diṭṭhadhammikattā sappatikārattā ca tassa. Ayaṃ mahantataro kali katūpacitassa samparāyikattā appatikārattā ca.
‘‘නිරබ්‌බුදො’’ති ගණනාවිසෙසො එකොති ආහ ‘‘නිරබ්‌බුදගණනායා’’ති, සතසහස්‌සං නිරබ්‌බුදානන්‌ති අත්‌ථො. නිරබ්‌බුදපරිගණනං පන හෙට්‌ඨා වුත්‌තමෙව. යමරියගරහී නිරයං උපෙතීති එත්‌ථ යථාවුත්‌තං ආයුප්‌පමාණං පාකතිකෙන අරියූපවාදිනා වුත්‌තන්‌ති වෙදිතබ්‌බං. ‘‘අග්‌ගසාවකානං පන ගුණමහන්‌තතාය තතොපි අතිවිය මහන්‌තතරා එවා’’ති වදන්‌ති.
‘‘Nirabbudo’’ti gaṇanāviseso ekoti āha ‘‘nirabbudagaṇanāyā’’ti, satasahassaṃ nirabbudānanti attho. Nirabbudaparigaṇanaṃ pana heṭṭhā vuttameva. Yamariyagarahī nirayaṃ upetīti ettha yathāvuttaṃ āyuppamāṇaṃ pākatikena ariyūpavādinā vuttanti veditabbaṃ. ‘‘Aggasāvakānaṃ pana guṇamahantatāya tatopi ativiya mahantatarā evā’’ti vadanti.
තුරූබ්‍රහ්‌මසුත්‌තවණ්‌ණනා නිට්‌ඨිතා.
Turūbrahmasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 9. තුරූබ්‍රහ්‌මසුත්‌තං • 9. Turūbrahmasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 9. තුරූබ්‍රහ්‌මසුත්‌තවණ්‌ණනා • 9. Turūbrahmasuttavaṇṇanā
