| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੯. ਤੁਰੂਬ੍ਰਹ੍ਮਸੁਤ੍ਤવਣ੍ਣਨਾ
9. Turūbrahmasuttavaṇṇanā
੧੮੦. ਨવਮੇ ਆਬਾਧਿਕੋਤਿ ‘‘ਸਾਸਪਮਤ੍ਤੀਹਿ ਪੀਲ਼ਕਾਹੀ’’ਤਿਆਦਿਨਾ ਨਯੇਨ ਅਨਨ੍ਤਰਸੁਤ੍ਤੇ ਆਗਤੇਨ ਆਬਾਧੇਨ ਆਬਾਧਿਕੋ। ਬਾਲ਼੍ਹਗਿਲਾਨੋਤਿ ਅਧਿਮਤ੍ਤਗਿਲਾਨੋ। ਤੁਰੂਤਿ ਕੋਕਾਲਿਕਸ੍ਸ ਉਪਜ੍ਝਾਯੋ ਤੁਰੁਤ੍ਥੇਰੋ ਨਾਮ ਅਨਾਗਾਮਿਫਲਂ ਪਤ੍વਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤੋ। ਸੋ ਭੂਮਟ੍ਠਕਦੇવਤਾ ਆਦਿਂ ਕਤ੍વਾ, ‘‘ਅਯੁਤ੍ਤਂ ਕੋਕਾਲਿਕੇਨ ਕਤਂ ਅਗ੍ਗਸਾવਕੇ ਅਨ੍ਤਿਮવਤ੍ਥੁਨਾ ਅਬ੍ਭਾਚਿਕ੍ਖਨ੍ਤੇਨਾ’’ਤਿ ਪਰਮ੍ਪਰਾਯ ਬ੍ਰਹ੍ਮਲੋਕਸਮ੍ਪਤ੍ਤਂ ਕੋਕਾਲਿਕਸ੍ਸ ਪਾਪਕਮ੍ਮਂ ਸੁਤ੍વਾ – ‘‘ਮਾ ਮਯ੍ਹਂ ਪਸ੍ਸਨ੍ਤਸ੍ਸੇવ વਰਾਕੋ ਨਸ੍ਸਿ, ਓવਦਿਸ੍ਸਾਮਿ ਨਂ ਥੇਰੇਸੁ ਚਿਤ੍ਤਪਸਾਦਤ੍ਥਾਯਾ’’ਤਿ ਆਗਨ੍ਤ੍વਾ ਤਸ੍ਸ ਪੁਰਤੋ ਅਟ੍ਠਾਸਿ। ਤਂ ਸਨ੍ਧਾਯ વੁਤ੍ਤਂ ‘‘ਤੁਰੂ ਪਚ੍ਚੇਕਬ੍ਰਹ੍ਮਾ’’ਤਿ। ਪੇਸਲਾਤਿ ਪਿਯਸੀਲਾ। ਕੋਸਿ ਤ੍વਂ, ਆવੁਸੋਤਿ ਨਿਪਨ੍ਨਕੋવ ਕਬਰਕ੍ਖੀਨਿ ਉਮ੍ਮੀਲੇਤ੍વਾ ਏવਮਾਹ। ਪਸ੍ਸ ਯਾવਞ੍ਚ ਤੇਤਿ ਪਸ੍ਸ ਯਤ੍ਤਕਂ ਤਯਾ ਅਪਰਦ੍ਧਂ, ਅਤ੍ਤਨੋ ਨਲਾਟੇ ਮਹਾਗਣ੍ਡਂ ਅਪਸ੍ਸਨ੍ਤੋ ਸਾਸਪਮਤ੍ਤਾਯ ਪੀਲ਼ਕਾਯ ਮਂ ਚੋਦੇਤਬ੍ਬਂ ਮਞ੍ਞਸੀਤਿ ਆਹ।
180. Navame ābādhikoti ‘‘sāsapamattīhi pīḷakāhī’’tiādinā nayena anantarasutte āgatena ābādhena ābādhiko. Bāḷhagilānoti adhimattagilāno. Turūti kokālikassa upajjhāyo turutthero nāma anāgāmiphalaṃ patvā brahmaloke nibbatto. So bhūmaṭṭhakadevatā ādiṃ katvā, ‘‘ayuttaṃ kokālikena kataṃ aggasāvake antimavatthunā abbhācikkhantenā’’ti paramparāya brahmalokasampattaṃ kokālikassa pāpakammaṃ sutvā – ‘‘mā mayhaṃ passantasseva varāko nassi, ovadissāmi naṃ theresu cittapasādatthāyā’’ti āgantvā tassa purato aṭṭhāsi. Taṃ sandhāya vuttaṃ ‘‘turū paccekabrahmā’’ti. Pesalāti piyasīlā. Kosi tvaṃ, āvusoti nipannakova kabarakkhīni ummīletvā evamāha. Passa yāvañca teti passa yattakaṃ tayā aparaddhaṃ, attano nalāṭe mahāgaṇḍaṃ apassanto sāsapamattāya pīḷakāya maṃ codetabbaṃ maññasīti āha.
ਅਥ ਨਂ ‘‘ਅਦਿਟ੍ਠਿਪ੍ਪਤ੍ਤੋ ਅਯਂ વਰਾਕੋ, ਗਿਲવਿਸੋ વਿਯ ਕਸ੍ਸਚਿ વਚਨਂ ਨ ਕਰਿਸ੍ਸਤੀ’’ਤਿ ਞਤ੍વਾ ਪੁਰਿਸਸ੍ਸ ਹੀਤਿਆਦਿਮਾਹ। ਤਤ੍ਥ ਕੁਠਾਰੀਤਿ ਕੁਠਾਰਿਸਦਿਸਾ ਫਰੁਸਾ વਾਚਾ। ਛਿਨ੍ਦਤੀਤਿ ਕੁਸਲਮੂਲਸਙ੍ਖਾਤੇ ਮੂਲੇਯੇવ ਨਿਕਨ੍ਤਤਿ। ਨਿਨ੍ਦਿਯਨ੍ਤਿ ਨਿਨ੍ਦਿਤਬ੍ਬਂ ਦੁਸ੍ਸੀਲਪੁਗ੍ਗਲਂ। ਪਸਂਸਤੀਤਿ ਉਤ੍ਤਮਤ੍ਥੇ ਸਮ੍ਭਾવੇਤ੍વਾ ਖੀਣਾਸવੋਤਿ વਦਤਿ। ਤਂ વਾ ਨਿਨ੍ਦਤਿ ਯੋ ਪਸਂਸਿਯੋਤਿ , ਯੋ વਾ ਪਸਂਸਿਤਬ੍ਬੋ ਖੀਣਾਸવੋ, ਤਂ ਅਨ੍ਤਿਮવਤ੍ਥੁਨਾ ਚੋਦੇਨ੍ਤੋ ‘‘ਦੁਸ੍ਸੀਲੋ ਅਯ’’ਨ੍ਤਿ વਦਤਿ। વਚਿਨਾਤਿ ਮੁਖੇਨ ਸੋ ਕਲਿਨ੍ਤਿ, ਸੋ ਤਂ ਅਪਰਾਧਂ ਮੁਖੇਨ વਿਚਿਨਾਤਿ ਨਾਮ। ਕਲਿਨਾ ਤੇਨਾਤਿ ਤੇਨ ਅਪਰਾਧੇਨ ਸੁਖਂ ਨ વਿਨ੍ਦਤਿ। ਨਿਨ੍ਦਿਯਪਸਂਸਾਯ ਹਿ ਪਸਂਸਿਯਨਿਨ੍ਦਾਯ ਚ ਸਮਕੋવ વਿਪਾਕੋ।
Atha naṃ ‘‘adiṭṭhippatto ayaṃ varāko, gilaviso viya kassaci vacanaṃ na karissatī’’ti ñatvā purisassa hītiādimāha. Tattha kuṭhārīti kuṭhārisadisā pharusā vācā. Chindatīti kusalamūlasaṅkhāte mūleyeva nikantati. Nindiyanti ninditabbaṃ dussīlapuggalaṃ. Pasaṃsatīti uttamatthe sambhāvetvā khīṇāsavoti vadati. Taṃ vā nindati yo pasaṃsiyoti , yo vā pasaṃsitabbo khīṇāsavo, taṃ antimavatthunā codento ‘‘dussīlo aya’’nti vadati. Vacināti mukhena so kalinti, so taṃ aparādhaṃ mukhena vicināti nāma. Kalinā tenāti tena aparādhena sukhaṃ na vindati. Nindiyapasaṃsāya hi pasaṃsiyanindāya ca samakova vipāko.
ਸਬ੍ਬਸ੍ਸਾਪਿ ਸਹਾਪਿ ਅਤ੍ਤਨਾਤਿ ਸਬ੍ਬੇਨ ਸਕੇਨਪਿ ਅਤ੍ਤਨਾਪਿ ਸਦ੍ਧਿਂ ਯੋ ਅਕ੍ਖੇਸੁ ਧਨਪਰਾਜਯੋ ਨਾਮ, ਅਯਂ ਅਪ੍ਪਮਤ੍ਤਕੋ ਅਪਰਾਧੋ। ਯੋ ਸੁਗਤੇਸੂਤਿ ਯੋ ਪਨ ਸਮ੍ਮਗ੍ਗਤੇਸੁ ਪੁਗ੍ਗਲੇਸੁ ਚਿਤ੍ਤਂ ਪਦੁਸ੍ਸੇਯ੍ਯ, ਅਯਂ ਚਿਤ੍ਤਪਦੋਸੋવ ਤਤੋ ਕਲਿਤੋ ਮਹਨ੍ਤਤਰੋ ਕਲਿ।
Sabbassāpisahāpi attanāti sabbena sakenapi attanāpi saddhiṃ yo akkhesu dhanaparājayo nāma, ayaṃ appamattako aparādho. Yosugatesūti yo pana sammaggatesu puggalesu cittaṃ padusseyya, ayaṃ cittapadosova tato kalito mahantataro kali.
ਇਦਾਨਿ ਤਸ੍ਸ ਮਹਨ੍ਤਤਰਭਾવਂ ਦਸ੍ਸੇਨ੍ਤੋ ਸਤਂ ਸਹਸ੍ਸਾਨਨ੍ਤਿਆਦਿਮਾਹ। ਤਤ੍ਥ ਸਤਂ ਸਹਸ੍ਸਾਨਨ੍ਤਿ ਨਿਰਬ੍ਬੁਦਗਣਨਾਯ ਸਤਸਹਸ੍ਸਂ। ਛਤ੍ਤਿਂਸਤੀਤਿ ਅਪਰਾਨਿ ਛਤ੍ਤਿਂਸਤਿ ਨਿਰਬ੍ਬੁਦਾਨਿ। ਪਞ੍ਚ ਚਾਤਿ ਅਬ੍ਬੁਦਗਣਨਾਯ ਪਞ੍ਚ ਅਬ੍ਬੁਦਾਨਿ। ਯਮਰਿਯਗਰਹੀਤਿ ਯਂ ਅਰਿਯੇ ਗਰਹਨ੍ਤੋ ਨਿਰਯਂ ਉਪਪਜ੍ਜਤਿ, ਤਤ੍ਥ ਏਤ੍ਤਕਂ ਆਯੁਪ੍ਪਮਾਣਨ੍ਤਿ। ਨવਮਂ।
Idāni tassa mahantatarabhāvaṃ dassento sataṃ sahassānantiādimāha. Tattha sataṃ sahassānanti nirabbudagaṇanāya satasahassaṃ. Chattiṃsatīti aparāni chattiṃsati nirabbudāni. Pañca cāti abbudagaṇanāya pañca abbudāni. Yamariyagarahīti yaṃ ariye garahanto nirayaṃ upapajjati, tattha ettakaṃ āyuppamāṇanti. Navamaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੯. ਤੁਰੂਬ੍ਰਹ੍ਮਸੁਤ੍ਤਂ • 9. Turūbrahmasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੯. ਤੁਰੂਬ੍ਰਹ੍ਮਸੁਤ੍ਤવਣ੍ਣਨਾ • 9. Turūbrahmasuttavaṇṇanā
