| Library / Tipiṭaka / तिपिटक • Tipiṭaka / अपदान-अट्ठकथा • Apadāna-aṭṭhakathā |
२५. तुवरदायकवग्गो
25. Tuvaradāyakavaggo
१-१०. तुवरदायकत्थेरअपदानादिवण्णना
1-10. Tuvaradāyakattheraapadānādivaṇṇanā
१. पञ्चवीसतिमे वग्गे पठमापदाने भरित्वा तुवरमादायाति तुवरअट्ठिं मुग्गकलयसदिसं तुवरट्ठिं भज्जित्वा पुप्फेत्वा भाजनेन आदाय सङ्घस्स वनमज्झोगाहकस्स अददिं अदासिन्ति अत्थो।
1. Pañcavīsatime vagge paṭhamāpadāne bharitvā tuvaramādāyāti tuvaraaṭṭhiṃ muggakalayasadisaṃ tuvaraṭṭhiṃ bhajjitvā pupphetvā bhājanena ādāya saṅghassa vanamajjhogāhakassa adadiṃ adāsinti attho.
४-५. दुतियापदाने धनुं अद्वेज्झं कत्वानाति मिगादीनं मारणत्थाय धनुं सन्नय्हित्वा चरमानो केसरं ओगतं दिस्वाति सुपुप्फितं खुद्दकसरं दिस्वा बुद्धस्स अभिरोपेसिन्ति अहं चित्तं पसादेत्वा वनं सम्पत्तस्स तिस्सस्स भगवतो अभिरोपयिं पूजेसिन्ति अत्थो।
4-5. Dutiyāpadāne dhanuṃ advejjhaṃ katvānāti migādīnaṃ māraṇatthāya dhanuṃ sannayhitvā caramāno kesaraṃ ogataṃ disvāti supupphitaṃ khuddakasaraṃ disvā buddhassa abhiropesinti ahaṃ cittaṃ pasādetvā vanaṃ sampattassa tissassa bhagavato abhiropayiṃ pūjesinti attho.
९-१०. ततियापदाने जलकुक्कुटोति जातस्सरे चरमानकुक्कुटो। तुण्डेन केसरिं गय्हाति पदुमपुप्फं मुखतुण्डेन डंसित्वा आकासेन गच्छन्तस्स तिस्सस्स भगवतो अभिरोपेसिं पूजेसिन्ति अत्थो।
9-10. Tatiyāpadāne jalakukkuṭoti jātassare caramānakukkuṭo. Tuṇḍena kesariṃ gayhāti padumapupphaṃ mukhatuṇḍena ḍaṃsitvā ākāsena gacchantassa tissassa bhagavato abhiropesiṃ pūjesinti attho.
१४. चतुत्थापदाने विरवपुप्फमादायाति विविधं रवति सद्दं करोतीति विरवं, सद्दकरणवेलायं विकसनतो ‘‘विरव’’न्ति लद्धनामं पुप्फसमूहं आदाय गहेत्वा सिद्धत्थस्स बुद्धस्स अभिरोपयिं पूजेसिन्ति अत्थो।
14. Catutthāpadāne viravapupphamādāyāti vividhaṃ ravati saddaṃ karotīti viravaṃ, saddakaraṇavelāyaṃ vikasanato ‘‘virava’’nti laddhanāmaṃ pupphasamūhaṃ ādāya gahetvā siddhatthassa buddhassa abhiropayiṃ pūjesinti attho.
१७. पञ्चमापदाने कुटिगोपकोति सेनासनपालको। कालेन कालं धूपेसिन्ति सम्पत्तसम्पत्तकालानुकाले धूपेसिं, धूपेन सुगन्धं अकासिन्ति अत्थो। सिद्धत्थस्स भगवतो गन्धकुटिकालानुसारिधूपेन धूपेसिं वासेसिन्ति अत्थो।
17. Pañcamāpadāne kuṭigopakoti senāsanapālako. Kālena kālaṃ dhūpesinti sampattasampattakālānukāle dhūpesiṃ, dhūpena sugandhaṃ akāsinti attho. Siddhatthassa bhagavato gandhakuṭikālānusāridhūpena dhūpesiṃ vāsesinti attho.
छट्ठसत्तमापदानानि उत्तानत्थानेव।
Chaṭṭhasattamāpadānāni uttānatthāneva.
२७. अट्ठमापदाने सत्त सत्तलिपुप्फानीति सत्तलिसङ्खातानि, सत्त पुप्फानि सीसेनादाय वेस्सभुस्स भगवतो अभिरोपेसिं पूजेसिन्ति अत्थो।
27. Aṭṭhamāpadāne satta sattalipupphānīti sattalisaṅkhātāni, satta pupphāni sīsenādāya vessabhussa bhagavato abhiropesiṃ pūjesinti attho.
३१. नवमापदाने बिम्बिजालकपुप्फानीति रत्तङ्कुरवकपुप्फानि सिद्धत्थस्स भगवतो पूजेसिन्ति अत्थो।
31. Navamāpadāne bimbijālakapupphānīti rattaṅkuravakapupphāni siddhatthassa bhagavato pūjesinti attho.
३५. दसमापदाने उद्दालकं गहेत्वानाति जातस्सरे विहङ्गसोब्भे जातं उद्दालकपुप्फं ओचिनित्वा ककुसन्धस्स भगवतो पूजेसिन्ति अत्थो। सेसं सुविञ्ञेय्यमेवाति।
35. Dasamāpadāne uddālakaṃ gahetvānāti jātassare vihaṅgasobbhe jātaṃ uddālakapupphaṃ ocinitvā kakusandhassa bhagavato pūjesinti attho. Sesaṃ suviññeyyamevāti.
पञ्चवीसतिमवग्गवण्णना समत्ता।
Pañcavīsatimavaggavaṇṇanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / अपदानपाळि • Apadānapāḷi
१. तुवरदायकत्थेरअपदानं • 1. Tuvaradāyakattheraapadānaṃ
२. नागकेसरियत्थेरअपदानं • 2. Nāgakesariyattheraapadānaṃ
३. नळिनकेसरियत्थेरअपदानं • 3. Naḷinakesariyattheraapadānaṃ
४. विरवपुप्फियत्थेरअपदानं • 4. Viravapupphiyattheraapadānaṃ
५. कुटिधूपकत्थेरअपदानं • 5. Kuṭidhūpakattheraapadānaṃ
८. सत्तलिपुप्फपूजकत्थेरअपदानं • 8. Sattalipupphapūjakattheraapadānaṃ
९. बिम्बिजालियत्थेरअपदानं • 9. Bimbijāliyattheraapadānaṃ
१०. उद्दालकदायकत्थेरअपदानं • 10. Uddālakadāyakattheraapadānaṃ
