| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
25. තුවරදායකවග්‌ගො
25. Tuvaradāyakavaggo
1-10. තුවරදායකත්‌ථෙරඅපදානාදිවණ්‌ණනා
1-10. Tuvaradāyakattheraapadānādivaṇṇanā
1. පඤ්‌චවීසතිමෙ වග්‌ගෙ පඨමාපදානෙ භරිත්‌වා තුවරමාදායාති තුවරඅට්‌ඨිං මුග්‌ගකලයසදිසං තුවරට්‌ඨිං භජ්‌ජිත්‌වා පුප්‌ඵෙත්‌වා භාජනෙන ආදාය සඞ්‌ඝස්‌ස වනමජ්‌ඣොගාහකස්‌ස අදදිං අදාසින්‌ති අත්‌ථො.
1. Pañcavīsatime vagge paṭhamāpadāne bharitvā tuvaramādāyāti tuvaraaṭṭhiṃ muggakalayasadisaṃ tuvaraṭṭhiṃ bhajjitvā pupphetvā bhājanena ādāya saṅghassa vanamajjhogāhakassa adadiṃ adāsinti attho.
4-5. දුතියාපදානෙ ධනුං අද්‌වෙජ්‌ඣං කත්‌වානාති මිගාදීනං මාරණත්‌ථාය ධනුං සන්‌නය්‌හිත්‌වා චරමානො කෙසරං ඔගතං දිස්‌වාති සුපුප්‌ඵිතං ඛුද්‌දකසරං දිස්‌වා බුද්‌ධස්‌ස අභිරොපෙසින්‌ති අහං චිත්‌තං පසාදෙත්‌වා වනං සම්‌පත්‌තස්‌ස තිස්‌සස්‌ස භගවතො අභිරොපයිං පූජෙසින්‌ති අත්‌ථො.
4-5. Dutiyāpadāne dhanuṃ advejjhaṃ katvānāti migādīnaṃ māraṇatthāya dhanuṃ sannayhitvā caramāno kesaraṃ ogataṃ disvāti supupphitaṃ khuddakasaraṃ disvā buddhassa abhiropesinti ahaṃ cittaṃ pasādetvā vanaṃ sampattassa tissassa bhagavato abhiropayiṃ pūjesinti attho.
9-10. තතියාපදානෙ ජලකුක්‌කුටොති ජාතස්‌සරෙ චරමානකුක්‌කුටො. තුණ්‌ඩෙන කෙසරිං ගය්‌හාති පදුමපුප්‌ඵං මුඛතුණ්‌ඩෙන ඩංසිත්‌වා ආකාසෙන ගච්‌ඡන්‌තස්‌ස තිස්‌සස්‌ස භගවතො අභිරොපෙසිං පූජෙසින්‌ති අත්‌ථො.
9-10. Tatiyāpadāne jalakukkuṭoti jātassare caramānakukkuṭo. Tuṇḍena kesariṃ gayhāti padumapupphaṃ mukhatuṇḍena ḍaṃsitvā ākāsena gacchantassa tissassa bhagavato abhiropesiṃ pūjesinti attho.
14. චතුත්‌ථාපදානෙ විරවපුප්‌ඵමාදායාති විවිධං රවති සද්‌දං කරොතීති විරවං, සද්‌දකරණවෙලායං විකසනතො ‘‘විරව’’න්‌ති ලද්‌ධනාමං පුප්‌ඵසමූහං ආදාය ගහෙත්‌වා සිද්‌ධත්‌ථස්‌ස බුද්‌ධස්‌ස අභිරොපයිං පූජෙසින්‌ති අත්‌ථො.
14. Catutthāpadāne viravapupphamādāyāti vividhaṃ ravati saddaṃ karotīti viravaṃ, saddakaraṇavelāyaṃ vikasanato ‘‘virava’’nti laddhanāmaṃ pupphasamūhaṃ ādāya gahetvā siddhatthassa buddhassa abhiropayiṃ pūjesinti attho.
17. පඤ්‌චමාපදානෙ කුටිගොපකොති සෙනාසනපාලකො. කාලෙන කාලං ධූපෙසින්‌ති සම්‌පත්‌තසම්‌පත්‌තකාලානුකාලෙ ධූපෙසිං, ධූපෙන සුගන්‌ධං අකාසින්‌ති අත්‌ථො. සිද්‌ධත්‌ථස්‌ස භගවතො ගන්‌ධකුටිකාලානුසාරිධූපෙන ධූපෙසිං වාසෙසින්‌ති අත්‌ථො.
17. Pañcamāpadāne kuṭigopakoti senāsanapālako. Kālena kālaṃ dhūpesinti sampattasampattakālānukāle dhūpesiṃ, dhūpena sugandhaṃ akāsinti attho. Siddhatthassa bhagavato gandhakuṭikālānusāridhūpena dhūpesiṃ vāsesinti attho.
ඡට්‌ඨසත්‌තමාපදානානි උත්‌තානත්‌ථානෙව.
Chaṭṭhasattamāpadānāni uttānatthāneva.
27. අට්‌ඨමාපදානෙ සත්‌ත සත්‌තලිපුප්‌ඵානීති සත්‌තලිසඞ්‌ඛාතානි, සත්‌ත පුප්‌ඵානි සීසෙනාදාය වෙස්‌සභුස්‌ස භගවතො අභිරොපෙසිං පූජෙසින්‌ති අත්‌ථො.
27. Aṭṭhamāpadāne satta sattalipupphānīti sattalisaṅkhātāni, satta pupphāni sīsenādāya vessabhussa bhagavato abhiropesiṃ pūjesinti attho.
31. නවමාපදානෙ බිම්‌බිජාලකපුප්‌ඵානීති රත්‌තඞ්‌කුරවකපුප්‌ඵානි සිද්‌ධත්‌ථස්‌ස භගවතො පූජෙසින්‌ති අත්‌ථො.
31. Navamāpadāne bimbijālakapupphānīti rattaṅkuravakapupphāni siddhatthassa bhagavato pūjesinti attho.
35. දසමාපදානෙ උද්‌දාලකං ගහෙත්‌වානාති ජාතස්‌සරෙ විහඞ්‌ගසොබ්‌භෙ ජාතං උද්‌දාලකපුප්‌ඵං ඔචිනිත්‌වා කකුසන්‌ධස්‌ස භගවතො පූජෙසින්‌ති අත්‌ථො. සෙසං සුවිඤ්‌ඤෙය්‍යමෙවාති.
35. Dasamāpadāne uddālakaṃ gahetvānāti jātassare vihaṅgasobbhe jātaṃ uddālakapupphaṃ ocinitvā kakusandhassa bhagavato pūjesinti attho. Sesaṃ suviññeyyamevāti.
පඤ්‌චවීසතිමවග්‌ගවණ්‌ණනා සමත්‌තා.
Pañcavīsatimavaggavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi
1. තුවරදායකත්‌ථෙරඅපදානං • 1. Tuvaradāyakattheraapadānaṃ
2. නාගකෙසරියත්‌ථෙරඅපදානං • 2. Nāgakesariyattheraapadānaṃ
3. නළිනකෙසරියත්‌ථෙරඅපදානං • 3. Naḷinakesariyattheraapadānaṃ
4. විරවපුප්‌ඵියත්‌ථෙරඅපදානං • 4. Viravapupphiyattheraapadānaṃ
5. කුටිධූපකත්‌ථෙරඅපදානං • 5. Kuṭidhūpakattheraapadānaṃ
8. සත්‌තලිපුප්‌ඵපූජකත්‌ථෙරඅපදානං • 8. Sattalipupphapūjakattheraapadānaṃ
9. බිම්‌බිජාලියත්‌ථෙරඅපදානං • 9. Bimbijāliyattheraapadānaṃ
10. උද්‌දාලකදායකත්‌ථෙරඅපදානං • 10. Uddālakadāyakattheraapadānaṃ
