| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
14. துவடகஸுத்தவண்ணனா
14. Tuvaṭakasuttavaṇṇanā
922. புச்சா²மி தந்தி துவடகஸுத்தங். கா உப்பத்தி? இத³ம்பி தஸ்மிங்யேவ மஹாஸமயே ‘‘கா நு கோ² அரஹத்தப்பத்தியா படிபத்தீ’’தி உப்பன்னசித்தானங் ஏகச்சானங் தே³வதானங் தமத்த²ங் பகாஸேதுங் புரிமனயேனேவ நிம்மிதபு³த்³தே⁴ன அத்தானங் புச்சா²பெத்வா வுத்தங்.
922.Pucchāmitanti tuvaṭakasuttaṃ. Kā uppatti? Idampi tasmiṃyeva mahāsamaye ‘‘kā nu kho arahattappattiyā paṭipattī’’ti uppannacittānaṃ ekaccānaṃ devatānaṃ tamatthaṃ pakāsetuṃ purimanayeneva nimmitabuddhena attānaṃ pucchāpetvā vuttaṃ.
தத்த² ஆதி³கா³தா²ய தாவ புச்சா²மீதி எத்த² அதி³ட்ட²ஜோதனாதி³வஸேன புச்சா² விப⁴ஜிதா. ஆதி³ச்சப³ந்து⁴ந்தி ஆதி³ச்சஸ்ஸ கொ³த்தப³ந்து⁴ங். விவேகங் ஸந்திபத³ஞ்சாதி விவேகஞ்ச ஸந்திபத³ஞ்ச. கத²ங் தி³ஸ்வாதி கேன காரணேன தி³ஸ்வா, கத²ங் பவத்தத³ஸ்ஸனோ ஹுத்வாதி வுத்தங் ஹோதி.
Tattha ādigāthāya tāva pucchāmīti ettha adiṭṭhajotanādivasena pucchā vibhajitā. Ādiccabandhunti ādiccassa gottabandhuṃ. Vivekaṃ santipadañcāti vivekañca santipadañca. Kathaṃ disvāti kena kāraṇena disvā, kathaṃ pavattadassano hutvāti vuttaṃ hoti.
923. அத² ப⁴க³வா யஸ்மா யதா² பஸ்ஸந்தோ கிலேஸே உபருந்த⁴தி, ததா² பவத்தத³ஸ்ஸனோ ஹுத்வா பரினிப்³பா³தி, தஸ்மா தமத்த²ங் ஆவிகரொந்தோ நானப்பகாரேன தங் தே³வபரிஸங் கிலேஸப்பஹானே நியோஜெந்தோ ‘‘மூலங் பபஞ்சஸங்கா²யா’’தி ஆரபி⁴த்வா பஞ்ச கா³தா² அபா⁴ஸி.
923. Atha bhagavā yasmā yathā passanto kilese uparundhati, tathā pavattadassano hutvā parinibbāti, tasmā tamatthaṃ āvikaronto nānappakārena taṃ devaparisaṃ kilesappahāne niyojento ‘‘mūlaṃ papañcasaṅkhāyā’’ti ārabhitvā pañca gāthā abhāsi.
தத்த² ஆதி³கா³தா²ய தாவ ஸங்கே²பத்தோ² – பபஞ்சாதி ஸங்கா²தத்தா பபஞ்சா ஏவ பபஞ்சஸங்கா². தஸ்ஸா அவிஜ்ஜாத³யோ கிலேஸா மூலங், தங் பபஞ்சஸங்கா²ய மூலங் அஸ்மீதி பவத்தமானஞ்ச ஸப்³ப³ங் மந்தாய உபருந்தே⁴. யா காசி அஜ்ஜ²த்தங் தண்ஹா உபஜ்ஜெய்யுங், தாஸங் வினயா ஸதா³ ஸதோ ஸிக்கே² உபட்டி²தஸ்ஸதி ஹுத்வா ஸிக்கெ²ய்யாதி.
Tattha ādigāthāya tāva saṅkhepattho – papañcāti saṅkhātattā papañcā eva papañcasaṅkhā. Tassā avijjādayo kilesā mūlaṃ, taṃ papañcasaṅkhāya mūlaṃ asmīti pavattamānañca sabbaṃ mantāya uparundhe. Yā kāci ajjhattaṃ taṇhā upajjeyyuṃ, tāsaṃ vinayā sadā sato sikkhe upaṭṭhitassati hutvā sikkheyyāti.
924. ஏவங் தாவ பட²மகா³தா²ய ஏவ திஸிக்கா²யுத்தங் தே³ஸனங் அரஹத்தனிகூடேன தே³ஸெத்வா புன மானப்பஹானவஸேன தே³ஸேதுங் ‘‘யங் கிஞ்சீ’’தி கா³த²மாஹ. தத்த² யங் கிஞ்சி த⁴ம்மமபி⁴ஜஞ்ஞா அஜ்ஜ²த்தந்தி யங் கிஞ்சி உச்சாகுலீனதாதி³கங் அத்தனோ கு³ணங் ஜானெய்ய அத² வாபி ப³ஹித்³தா⁴தி அத² வா ப³ஹித்³தா⁴பி ஆசரியுபஜ்ஜா²யானங் வா கு³ணங் ஜானெய்ய. ந தேன தா²மங் குப்³பே³தா²தி தேன கு³ணேன தா²மங் ந கரெய்ய.
924. Evaṃ tāva paṭhamagāthāya eva tisikkhāyuttaṃ desanaṃ arahattanikūṭena desetvā puna mānappahānavasena desetuṃ ‘‘yaṃ kiñcī’’ti gāthamāha. Tattha yaṃ kiñci dhammamabhijaññā ajjhattanti yaṃ kiñci uccākulīnatādikaṃ attano guṇaṃ jāneyya atha vāpi bahiddhāti atha vā bahiddhāpi ācariyupajjhāyānaṃ vā guṇaṃ jāneyya. Na tena thāmaṃ kubbethāti tena guṇena thāmaṃ na kareyya.
925. இதா³னிஸ்ஸ அகரணவிதி⁴ங் த³ஸ்ஸெந்தோ ‘‘ஸெய்யோ ந தேனா’’தி கா³த²மாஹ. தஸ்ஸத்தோ² – தேன ச மானேன ‘‘ஸெய்யோஹ’’ந்தி வா ‘‘நீசோஹ’’ந்தி வா ‘‘ஸரிக்கோ²ஹ’’ந்தி வாபி ந மஞ்ஞெய்ய, தேஹி ச உச்சாகுலீனதாதீ³ஹி கு³ணேஹி பு²ட்டோ² அனேகரூபேஹி ‘‘அஹங் உச்சாகுலா பப்³ப³ஜிதோ’’திஆதி³னா நயேன அத்தானங் விகப்பெந்தோ ந திட்டெ²ய்ய.
925. Idānissa akaraṇavidhiṃ dassento ‘‘seyyo na tenā’’ti gāthamāha. Tassattho – tena ca mānena ‘‘seyyoha’’nti vā ‘‘nīcoha’’nti vā ‘‘sarikkhoha’’nti vāpi na maññeyya, tehi ca uccākulīnatādīhi guṇehi phuṭṭho anekarūpehi ‘‘ahaṃ uccākulā pabbajito’’tiādinā nayena attānaṃ vikappento na tiṭṭheyya.
926. ஏவங் மானப்பஹானவஸேனபி தே³ஸெத்வா இதா³னி ஸப்³ப³கிலேஸூபஸமவஸேனபி தே³ஸேதுங் ‘‘அஜ்ஜ²த்தமேவா’’தி கா³த²மாஹ. தத்த² அஜ்ஜ²த்தமேவுபஸமேதி அத்தனி ஏவ ராகா³தி³ஸப்³ப³கிலேஸே உபஸமெய்ய. ந அஞ்ஞதோ பி⁴க்கு² ஸந்திமேஸெய்யாதி ட²பெத்வா ச ஸதிபட்டா²னாதீ³னி அஞ்ஞேன உபாயேன ஸந்திங் ந பரியேஸெய்ய. குதோ நிரத்தா வாதி நிரத்தா குதோ ஏவ.
926. Evaṃ mānappahānavasenapi desetvā idāni sabbakilesūpasamavasenapi desetuṃ ‘‘ajjhattamevā’’ti gāthamāha. Tattha ajjhattamevupasameti attani eva rāgādisabbakilese upasameyya. Na aññato bhikkhu santimeseyyāti ṭhapetvā ca satipaṭṭhānādīni aññena upāyena santiṃ na pariyeseyya. Kuto nirattā vāti nirattā kuto eva.
927. இதா³னி அஜ்ஜ²த்தங் உபஸந்தஸ்ஸ கீ²ணாஸவஸ்ஸ தாதி³பா⁴வங் த³ஸ்ஸெந்தோ ‘‘மஜ்ஜே² யதா²’’தி கா³த²மாஹ. தஸ்ஸத்தோ² – யதா² மஹாஸமுத்³த³ஸ்ஸ உபரிமஹெட்டி²மபா⁴கா³னங் வேமஜ்ஜ²ஸங்கா²தே சதுயோஜனஸஹஸ்ஸப்பமாணே மஜ்ஜே² பப்³ப³தந்தரே டி²தஸ்ஸ வா மஜ்ஜே² ஸமுத்³த³ஸ்ஸ ஊமி ந ஜாயதி, டி²தோவ ஸோ ஹோதி அவிகம்பமானோ, ஏவங் அனேஜோ கீ²ணாஸவோ லாபா⁴தீ³ஸு டி²தோ அஸ்ஸ அவிகம்பமானோ, ஸோ தாதி³ஸோ ராகா³தி³உஸ்ஸத³ங் பி⁴க்கு² ந கரெய்ய குஹிஞ்சீதி.
927. Idāni ajjhattaṃ upasantassa khīṇāsavassa tādibhāvaṃ dassento ‘‘majjhe yathā’’ti gāthamāha. Tassattho – yathā mahāsamuddassa uparimaheṭṭhimabhāgānaṃ vemajjhasaṅkhāte catuyojanasahassappamāṇe majjhe pabbatantare ṭhitassa vā majjhe samuddassa ūmi na jāyati, ṭhitova so hoti avikampamāno, evaṃ anejo khīṇāsavo lābhādīsu ṭhito assa avikampamāno, so tādiso rāgādiussadaṃ bhikkhu na kareyya kuhiñcīti.
928. இதா³னி ஏதங் அரஹத்தனிகூடேன தே³ஸிதங் த⁴ம்மதே³ஸனங் அப்³ப⁴னுமோத³ந்தோ தஸ்ஸ ச அரஹத்தஸ்ஸ ஆதி³படிபத³ங் புச்ச²ந்தோ நிம்மிதபு³த்³தோ⁴ ‘‘அகித்தயீ’’தி கா³த²மாஹ. தத்த² அகித்தயீதி ஆசிக்கி². விவடசக்கூ²தி விவடேஹி அனாவரணேஹி பஞ்சஹி சக்கூ²ஹி ஸமன்னாக³தோ. ஸக்கி²த⁴ம்மந்தி ஸயங் அபி⁴ஞ்ஞாதங் அத்தபச்சக்க²ங் த⁴ம்மங். பரிஸ்ஸயவினயந்தி பரிஸ்ஸயவினயனங். படிபத³ங் வதே³ஹீதி இதா³னி படிபத்திங் வதே³ஹி. ப⁴த்³த³ந்தேதி ‘‘ப⁴த்³த³ங் தவ அத்தூ²’’தி ப⁴க³வந்தங் ஆலபந்தோ ஆஹ. அத² வா ப⁴த்³த³ங் ஸுந்த³ரங் தவ படிபத³ங் வதே³ஹீதி வுத்தங் ஹோதி. பாதிமொக்க²ங் அத² வாபி ஸமாதி⁴ந்தி தமேவ படிபத³ங் பி⁴ந்தி³த்வா புச்ச²தி. படிபத³ந்தி ஏதேன வா மக்³க³ங் புச்ச²தி. இதரேஹி ஸீலங் ஸமாதி⁴ஞ்ச புச்ச²தி.
928. Idāni etaṃ arahattanikūṭena desitaṃ dhammadesanaṃ abbhanumodanto tassa ca arahattassa ādipaṭipadaṃ pucchanto nimmitabuddho ‘‘akittayī’’ti gāthamāha. Tattha akittayīti ācikkhi. Vivaṭacakkhūti vivaṭehi anāvaraṇehi pañcahi cakkhūhi samannāgato. Sakkhidhammanti sayaṃ abhiññātaṃ attapaccakkhaṃ dhammaṃ. Parissayavinayanti parissayavinayanaṃ. Paṭipadaṃ vadehīti idāni paṭipattiṃ vadehi. Bhaddanteti ‘‘bhaddaṃ tava atthū’’ti bhagavantaṃ ālapanto āha. Atha vā bhaddaṃ sundaraṃ tava paṭipadaṃ vadehīti vuttaṃ hoti. Pātimokkhaṃ atha vāpi samādhinti tameva paṭipadaṃ bhinditvā pucchati. Paṭipadanti etena vā maggaṃ pucchati. Itarehi sīlaṃ samādhiñca pucchati.
929-30. அத²ஸ்ஸ ப⁴க³வா யஸ்மா இந்த்³ரியஸங்வரோ ஸீலஸ்ஸ ரக்கா² , யஸ்மா வா இமினா அனுக்கமேன தே³ஸியமானா அயங் தே³ஸனா தாஸங் தே³வதானங் ஸப்பாயா, தஸ்மா இந்த்³ரியஸங்வரதோ பபு⁴தி படிபத³ங் த³ஸ்ஸெந்தோ ‘‘சக்கூ²ஹீ’’திஆதி³மாரத்³தோ⁴. தத்த² சக்கூ²ஹி நேவ லோலஸ்ஸாதி அதி³ட்ட²த³க்கி²தப்³பா³தி³வஸேன சக்கூ²ஹி லோலோ நேவஸ்ஸ. கா³மகதா²ய ஆவரயே ஸோதந்தி திரச்சா²னகதா²தோ ஸோதங் ஆவரெய்ய. ப²ஸ்ஸேனாதி ரோக³ப²ஸ்ஸேன. ப⁴வஞ்ச நாபி⁴ஜப்பெய்யாதி தஸ்ஸ ப²ஸ்ஸஸ்ஸ வினோத³னத்தா²ய காமப⁴வாதி³ப⁴வஞ்ச ந பத்தெ²ய்ய. பே⁴ரவேஸு ச ந ஸம்பவேதெ⁴ய்யாதி தஸ்ஸ ப²ஸ்ஸஸ்ஸ பச்சயபூ⁴தேஸு ஸீஹப்³யக்³கா⁴தீ³ஸு பே⁴ரவேஸு ச ந ஸம்பவேதெ⁴ய்ய, அவஸேஸேஸு வா கா⁴னிந்த்³ரியமனிந்த்³ரியவிஸயேஸு நப்பவேதெ⁴ய்ய. ஏவங் பரிபூரோ இந்த்³ரியஸங்வரோ வுத்தோ ஹோதி. புரிமேஹி வா இந்த்³ரியஸங்வரங் த³ஸ்ஸெத்வா இமினா ‘‘அரஞ்ஞே வஸதா பே⁴ரவங் தி³ஸ்வா வா ஸுத்வா வா ந வேதி⁴தப்³ப³’’ந்தி த³ஸ்ஸேதி.
929-30. Athassa bhagavā yasmā indriyasaṃvaro sīlassa rakkhā , yasmā vā iminā anukkamena desiyamānā ayaṃ desanā tāsaṃ devatānaṃ sappāyā, tasmā indriyasaṃvarato pabhuti paṭipadaṃ dassento ‘‘cakkhūhī’’tiādimāraddho. Tattha cakkhūhi neva lolassāti adiṭṭhadakkhitabbādivasena cakkhūhi lolo nevassa. Gāmakathāya āvaraye sotanti tiracchānakathāto sotaṃ āvareyya. Phassenāti rogaphassena. Bhavañcanābhijappeyyāti tassa phassassa vinodanatthāya kāmabhavādibhavañca na pattheyya. Bheravesu ca na sampavedheyyāti tassa phassassa paccayabhūtesu sīhabyagghādīsu bheravesu ca na sampavedheyya, avasesesu vā ghānindriyamanindriyavisayesu nappavedheyya. Evaṃ paripūro indriyasaṃvaro vutto hoti. Purimehi vā indriyasaṃvaraṃ dassetvā iminā ‘‘araññe vasatā bheravaṃ disvā vā sutvā vā na vedhitabba’’nti dasseti.
931. லத்³தா⁴ ந ஸன்னிதி⁴ங் கயிராதி ஏதேஸங் அன்னாதீ³னங் யங்கிஞ்சி த⁴ம்மேன லபி⁴த்வா ‘‘அரஞ்ஞே ச ஸேனாஸனே வஸதா ஸதா³ து³ல்லப⁴’’ந்தி சிந்தெத்வா ஸன்னிதி⁴ங் ந கரெய்ய.
931.Laddhā na sannidhiṃ kayirāti etesaṃ annādīnaṃ yaṃkiñci dhammena labhitvā ‘‘araññe ca senāsane vasatā sadā dullabha’’nti cintetvā sannidhiṃ na kareyya.
932. ஜா²யீ ந பாத³லோலஸ்ஸாதி ஜா²னாபி⁴ரதோ ச ந பாத³லோலோ அஸ்ஸ. விரமே குக்குச்சா நப்பமஜ்ஜெய்யாதி ஹத்த²குக்குச்சாதி³குக்குச்சங் வினோதெ³ய்ய. ஸக்கச்சகாரிதாய செத்த² நப்பமஜ்ஜெய்ய.
932.Jhāyīna pādalolassāti jhānābhirato ca na pādalolo assa. Virame kukkuccā nappamajjeyyāti hatthakukkuccādikukkuccaṃ vinodeyya. Sakkaccakāritāya cettha nappamajjeyya.
933. தந்தி³ங் மாயங் ஹஸ்ஸங் கி²ட்³ட³ந்தி ஆலஸியஞ்ச மாயஞ்ச ஹஸ்ஸஞ்ச காயிகசேதஸிககி²ட்³ட³ஞ்ச. ஸவிபூ⁴ஸந்தி ஸத்³தி⁴ங் விபூ⁴ஸாய.
933.Tandiṃ māyaṃ hassaṃ khiḍḍanti ālasiyañca māyañca hassañca kāyikacetasikakhiḍḍañca. Savibhūsanti saddhiṃ vibhūsāya.
934-7. ஆத²ப்³ப³ணந்தி ஆத²ப்³ப³ணிகமந்தப்பயோக³ங். ஸுபினந்தி ஸுபினஸத்த²ங். லக்க²ணந்தி மணிலக்க²ணாதி³ங். நோ வித³ஹேதி நப்பயோஜெய்ய. விருதந்தி மிகா³தீ³னங் வஸ்ஸிதங். பேஸுணியந்தி பேஸுஞ்ஞங். கயவிக்கயேதி பஞ்சஹி ஸஹத⁴ம்மிகேஹி ஸத்³தி⁴ங் வஞ்சனாவஸேன வா உத³யபத்த²னாவஸேன வா ந திட்டெ²ய்ய. உபவாத³ங் பி⁴க்கு² ந கரெய்யாதி உபவாத³கரே கிலேஸே அனிப்³ப³த்தெந்தோ அத்தனி பரேஹி ஸமணப்³ராஹ்மணேஹி உபவாத³ங் ந ஜனெய்ய. கா³மே ச நாபி⁴ஸஜ்ஜெய்யாதி கா³மே ச கி³ஹிஸங்ஸக்³கா³தீ³ஹி நாபி⁴ஸஜ்ஜெய்ய. லாப⁴கம்யா ஜனங் ந லபயெய்யாதி லாப⁴காமதாய ஜனங் நாலபயெய்ய. பயுத்தந்தி சீவராதீ³ஹி ஸம்பயுத்தங் , தத³த்த²ங் வா பயோஜிதங்.
934-7.Āthabbaṇanti āthabbaṇikamantappayogaṃ. Supinanti supinasatthaṃ. Lakkhaṇanti maṇilakkhaṇādiṃ. No vidaheti nappayojeyya. Virutanti migādīnaṃ vassitaṃ. Pesuṇiyanti pesuññaṃ. Kayavikkayeti pañcahi sahadhammikehi saddhiṃ vañcanāvasena vā udayapatthanāvasena vā na tiṭṭheyya. Upavādaṃ bhikkhu na kareyyāti upavādakare kilese anibbattento attani parehi samaṇabrāhmaṇehi upavādaṃ na janeyya. Gāme ca nābhisajjeyyāti gāme ca gihisaṃsaggādīhi nābhisajjeyya. Lābhakamyā janaṃ na lapayeyyāti lābhakāmatāya janaṃ nālapayeyya. Payuttanti cīvarādīhi sampayuttaṃ , tadatthaṃ vā payojitaṃ.
938-9. மோஸவஜ்ஜே ந நீயேதா²தி முஸாவாதே³ ந நீயேத². ஜீவிதேனாதி ஜீவிகாய. ஸுத்வா ருஸிதோ ப³ஹுங் வாசங், ஸமணானங் வா புது²ஜனானந்தி ருஸிதோ க⁴ட்டிதோ பரேஹி தேஸ ஸமணானங் வா க²த்தியாதி³பே⁴தா³னங் வா அஞ்ஞேஸங் புது²ஜனானங் ப³ஹும்பி அனிட்ட²வாசங் ஸுத்வா. ந படிவஜ்ஜாதி ந படிவதெ³ய்ய. கிங் காரணங்? ந ஹி ஸந்தோ படிஸேனிகரொந்தி.
938-9.Mosavajje na nīyethāti musāvāde na nīyetha. Jīvitenāti jīvikāya. Sutvā rusito bahuṃ vācaṃ, samaṇānaṃ vā puthujanānanti rusito ghaṭṭito parehi tesa samaṇānaṃ vā khattiyādibhedānaṃ vā aññesaṃ puthujanānaṃ bahumpi aniṭṭhavācaṃ sutvā. Na paṭivajjāti na paṭivadeyya. Kiṃ kāraṇaṃ? Na hi santo paṭisenikaronti.
940. ஏதஞ்ச த⁴ம்மமஞ்ஞாயாதி ஸப்³ப³மேதங் யதா²வுத்தங் த⁴ம்மங் ஞத்வா. விசினந்தி விசினந்தோ. ஸந்தீதி நிப்³பு³திங் ஞத்வாதி நிப்³பு³திங் ராகா³தீ³னங் ஸந்தீதி ஞத்வா.
940.Etañca dhammamaññāyāti sabbametaṃ yathāvuttaṃ dhammaṃ ñatvā. Vicinanti vicinanto. Santīti nibbutiṃ ñatvāti nibbutiṃ rāgādīnaṃ santīti ñatvā.
941. கிங்காரணா நப்பமஜ்ஜேஇதி சே – அபி⁴பூ⁴ ஹி ஸோதி கா³தா². தத்த² அபி⁴பூ⁴தி ரூபாதீ³னங் அபி⁴ப⁴விதா. அனபி⁴பூ⁴தோதி தேஹி அனபி⁴பூ⁴தோ. ஸக்கி²த⁴ம்மமனீதிஹமத³ஸ்ஸீதி பச்சக்க²மேவ அனீதிஹங் த⁴ம்மமத்³த³க்கி². ஸதா³ நமஸ்ஸமனுஸிக்கே²தி ஸதா³ நமஸ்ஸந்தோ திஸ்ஸோ ஸிக்கா²யோ ஸிக்கெ²ய்ய. ஸேஸங் ஸப்³ப³த்த² பாகடமேவ.
941. Kiṃkāraṇā nappamajjeiti ce – abhibhū hi soti gāthā. Tattha abhibhūti rūpādīnaṃ abhibhavitā. Anabhibhūtoti tehi anabhibhūto. Sakkhidhammamanītihamadassīti paccakkhameva anītihaṃ dhammamaddakkhi. Sadā namassamanusikkheti sadā namassanto tisso sikkhāyo sikkheyya. Sesaṃ sabbattha pākaṭameva.
கேவலங் பன எத்த² ‘‘சக்கூ²ஹி நேவ லோலோ’’திஆதீ³ஹி இந்த்³ரியஸங்வரோ, ‘‘அன்னானமதோ² பானான’’ந்திஆதீ³ஹி ஸன்னிதி⁴படிக்கே²பமுகே²ன பச்சயபடிஸேவனஸீலங், மேது²னமோஸவஜ்ஜபேஸுணியாதீ³ஹி பாதிமொக்க²ஸங்வரஸீலங், ‘‘ஆத²ப்³ப³ணங் ஸுபினங் லக்க²ண’’ந்திஆதீ³ஹி ஆஜீவபாரிஸுத்³தி⁴ஸீலங், ‘‘ஜா²யீ அஸ்ஸா’’தி இமினா ஸமாதி⁴, ‘‘விசினங் பி⁴க்கூ²’’தி இமினா பஞ்ஞா, ‘‘ஸதா³ ஸதோ ஸிக்கே²’’தி இமினா புன ஸங்கே²பதோ திஸ்ஸோபி ஸிக்கா², ‘‘அத² ஆஸனேஸு ஸயனேஸு, அப்பஸத்³தே³ஸு பி⁴க்கு² விஹரெய்ய, நித்³த³ங் ந ப³ஹுலீகரெய்யா’’திஆதீ³ஹி ஸீலஸமாதி⁴பஞ்ஞானங் உபகாராபகாரஸங்க³ண்ஹனவினோத³னானி வுத்தானீதி. ஏவங் ப⁴க³வா நிம்மிதஸ்ஸ பரிபுண்ணபடிபத³ங் வத்வா அரஹத்தனிகூடேன தே³ஸனங் நிட்டா²பேஸி, தே³ஸனாபரியோஸானே புராபே⁴த³ஸுத்தே வுத்தஸதி³ஸோயேவாபி⁴ஸமயோ அஹோஸீதி.
Kevalaṃ pana ettha ‘‘cakkhūhi neva lolo’’tiādīhi indriyasaṃvaro, ‘‘annānamatho pānāna’’ntiādīhi sannidhipaṭikkhepamukhena paccayapaṭisevanasīlaṃ, methunamosavajjapesuṇiyādīhi pātimokkhasaṃvarasīlaṃ, ‘‘āthabbaṇaṃ supinaṃ lakkhaṇa’’ntiādīhi ājīvapārisuddhisīlaṃ, ‘‘jhāyī assā’’ti iminā samādhi, ‘‘vicinaṃ bhikkhū’’ti iminā paññā, ‘‘sadā sato sikkhe’’ti iminā puna saṅkhepato tissopi sikkhā, ‘‘atha āsanesu sayanesu, appasaddesu bhikkhu vihareyya, niddaṃ na bahulīkareyyā’’tiādīhi sīlasamādhipaññānaṃ upakārāpakārasaṅgaṇhanavinodanāni vuttānīti. Evaṃ bhagavā nimmitassa paripuṇṇapaṭipadaṃ vatvā arahattanikūṭena desanaṃ niṭṭhāpesi, desanāpariyosāne purābhedasutte vuttasadisoyevābhisamayo ahosīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய துவடகஸுத்தவண்ணனா நிட்டி²தா.
Suttanipāta-aṭṭhakathāya tuvaṭakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 14. துவடகஸுத்தங் • 14. Tuvaṭakasuttaṃ
