Library / Tipiṭaka / তিপিটক • Tipiṭaka / মহানিদ্দেসপাল়ি • Mahāniddesapāḷi

১৪. তুৰট্টকসুত্তনিদ্দেসো

14. Tuvaṭṭakasuttaniddeso

অথ তুৰট্টকসুত্তনিদ্দেসং ৰক্খতি –

Atha tuvaṭṭakasuttaniddesaṃ vakkhati –

১৫০.

150.

পুচ্ছামি তং আদিচ্চবন্ধু, ¹ ৰিৰেকং সন্তিপদঞ্চ মহেসি ² ।

Pucchāmitaṃ ādiccabandhu,³vivekaṃ santipadañca mahesi⁴;

কথং দিস্ৰা নিব্বাতি ভিক্খু, অনুপাদিযানো লোকস্মিং কিঞ্চি॥

Kathaṃ disvā nibbāti bhikkhu, anupādiyāno lokasmiṃ kiñci.

পুচ্ছামি তং আদিচ্চবন্ধূতি। পুচ্ছাতি তিস্সো পুচ্ছা – অদিট্ঠজোতনা পুচ্ছা, দিট্ঠসংসন্দনা পুচ্ছা, ৰিমতিচ্ছেদনা পুচ্ছা। কতমা অদিট্ঠজোতনা পুচ্ছা? পকতিযা লক্খণং অঞ্ঞাতং হোতি অদিট্ঠং অতুলিতং অতীরিতং অৰিভূতং অৰিভাৰিতং, তস্স ঞাণায দস্সনায তুলনায তীরণায ৰিভাৰনায পঞ্হং পুচ্ছতি – অযং অদিট্ঠজোতনা পুচ্ছা। কতমা দিট্ঠসংসন্দনা পুচ্ছা? পকতিযা লক্খণং ঞাতং হোতি দিট্ঠং তুলিতং তীরিতং ৰিভূতং ৰিভাৰিতং, অঞ্ঞেহি পণ্ডিতেহি সদ্ধিং সংসন্দনত্থায পঞ্হং পুচ্ছতি – অযং দিট্ঠসংসন্দনা পুচ্ছা। কতমা ৰিমতিচ্ছেদনা পুচ্ছা? পকতিযা সংসযপক্খন্দো ⁵ হোতি ৰিমতিপক্খন্দো দ্ৰেল়্হকজাতো, ‘‘এৰং নু খো, ন নু খো, কিং নু খো, কথং নু খো’’তি সো ৰিমতিচ্ছেদনত্থায পঞ্হং পুচ্ছতি – অযং ৰিমতিচ্ছেদনা পুচ্ছা। ইমা তিস্সো পুচ্ছা।

Pucchāmi taṃ ādiccabandhūti. Pucchāti tisso pucchā – adiṭṭhajotanā pucchā, diṭṭhasaṃsandanā pucchā, vimaticchedanā pucchā. Katamā adiṭṭhajotanā pucchā? Pakatiyā lakkhaṇaṃ aññātaṃ hoti adiṭṭhaṃ atulitaṃ atīritaṃ avibhūtaṃ avibhāvitaṃ, tassa ñāṇāya dassanāya tulanāya tīraṇāya vibhāvanāya pañhaṃ pucchati – ayaṃ adiṭṭhajotanā pucchā. Katamā diṭṭhasaṃsandanā pucchā? Pakatiyā lakkhaṇaṃ ñātaṃ hoti diṭṭhaṃ tulitaṃ tīritaṃ vibhūtaṃ vibhāvitaṃ, aññehi paṇḍitehi saddhiṃ saṃsandanatthāya pañhaṃ pucchati – ayaṃ diṭṭhasaṃsandanā pucchā. Katamā vimaticchedanā pucchā? Pakatiyā saṃsayapakkhando ⁶ hoti vimatipakkhando dveḷhakajāto, ‘‘evaṃ nu kho, na nu kho, kiṃ nu kho, kathaṃ nu kho’’ti so vimaticchedanatthāya pañhaṃ pucchati – ayaṃ vimaticchedanā pucchā. Imā tisso pucchā.

অপরাপি তিস্সো পুচ্ছা – মনুস্সপুচ্ছা, অমনুস্সপুচ্ছা, নিম্মিতপুচ্ছা। কতমা মনুস্সপুচ্ছা? মনুস্সা বুদ্ধং ভগৰন্তং উপসঙ্কমিত্ৰা পঞ্হং পুচ্ছন্তি, ভিক্খূ পুচ্ছন্তি, ভিক্খুনিযো পুচ্ছন্তি, উপাসকা পুচ্ছন্তি, উপাসিকাযো পুচ্ছন্তি, রাজানো পুচ্ছন্তি, খত্তিযা পুচ্ছন্তি, ব্রাহ্মণা পুচ্ছন্তি, ৰেস্সা পুচ্ছন্তি, সুদ্দা পুচ্ছন্তি, গহট্ঠা পুচ্ছন্তি, পব্বজিতা পুচ্ছন্তি – অযং মনুস্সপুচ্ছা। কতমা অমনুস্সপুচ্ছা? অমনুস্সা বুদ্ধং ভগৰন্তং উপসঙ্কমিত্ৰা পঞ্হং পুচ্ছন্তি, নাগা পুচ্ছন্তি, সুপণ্ণা পুচ্ছন্তি, যক্খা পুচ্ছন্তি, অসুরা পুচ্ছন্তি, গন্ধব্বা পুচ্ছন্তি, মহারাজানো পুচ্ছন্তি, ইন্দা পুচ্ছন্তি, ব্রহ্মানো পুচ্ছন্তি, দেৰতাযো পুচ্ছন্তি – অযং অমনুস্সপুচ্ছা। কতমা নিম্মিতপুচ্ছা? যং ভগৰা রূপং অভিনিম্মিনাতি মনোমযং সব্বঙ্গপচ্চঙ্গং অহীনিন্দ্রিযং তং সো নিম্মিতো বুদ্ধং ভগৰন্তং উপসঙ্কমিত্ৰা পঞ্হং পুচ্ছতি, ভগৰা তস্স ⁷ ৰিসজ্জেতি – অযং নিম্মিতপুচ্ছা। ইমা তিস্সো পুচ্ছা।

Aparāpi tisso pucchā – manussapucchā, amanussapucchā, nimmitapucchā. Katamā manussapucchā? Manussā buddhaṃ bhagavantaṃ upasaṅkamitvā pañhaṃ pucchanti, bhikkhū pucchanti, bhikkhuniyo pucchanti, upāsakā pucchanti, upāsikāyo pucchanti, rājāno pucchanti, khattiyā pucchanti, brāhmaṇā pucchanti, vessā pucchanti, suddā pucchanti, gahaṭṭhā pucchanti, pabbajitā pucchanti – ayaṃ manussapucchā. Katamā amanussapucchā? Amanussā buddhaṃ bhagavantaṃ upasaṅkamitvā pañhaṃ pucchanti, nāgā pucchanti, supaṇṇā pucchanti, yakkhā pucchanti, asurā pucchanti, gandhabbā pucchanti, mahārājāno pucchanti, indā pucchanti, brahmāno pucchanti, devatāyo pucchanti – ayaṃ amanussapucchā. Katamā nimmitapucchā? Yaṃ bhagavā rūpaṃ abhinimmināti manomayaṃ sabbaṅgapaccaṅgaṃ ahīnindriyaṃ taṃ so nimmito buddhaṃ bhagavantaṃ upasaṅkamitvā pañhaṃ pucchati, bhagavā tassa ⁸ visajjeti – ayaṃ nimmitapucchā. Imā tisso pucchā.

অপরাপি তিস্সো পুচ্ছা – অত্তত্থপুচ্ছা, পরত্থপুচ্ছা, উভযত্থপুচ্ছা। অপরাপি তিস্সো পুচ্ছা – দিট্ঠধম্মিকত্থপুচ্ছা, সম্পরাযিকত্থপুচ্ছা, পরমত্থপুচ্ছা। অপরাপি তিস্সো পুচ্ছা – অনৰজ্জত্থপুচ্ছা, নিক্কিলেসত্থপুচ্ছা ⁹, ৰোদানত্থপুচ্ছা। অপরাপি তিস্সো পুচ্ছা – অতীতপুচ্ছা, অনাগতপুচ্ছা, পচ্চুপ্পন্নপুচ্ছা। অপরাপি তিস্সো পুচ্ছা – অজ্ঝত্তপুচ্ছা, বহিদ্ধাপুচ্ছা, অজ্ঝত্তবহিদ্ধাপুচ্ছা। অপরাপি তিস্সো পুচ্ছা – কুসলপুচ্ছা, অকুসলপুচ্ছা, অব্যাকতপুচ্ছা। অপরাপি তিস্সো পুচ্ছা – খন্ধপুচ্ছা, ধাতুপুচ্ছা, আযতনপুচ্ছা। অপরাপি তিস্সো পুচ্ছা – সতিপট্ঠানপুচ্ছা, সম্মপ্পধানপুচ্ছা, ইদ্ধিপাদপুচ্ছা। অপরাপি তিস্সো পুচ্ছা – ইন্দ্রিযপুচ্ছা, বলপুচ্ছা, বোজ্ঝঙ্গপুচ্ছা। অপরাপি তিস্সো পুচ্ছা – মগ্গপুচ্ছা, ফলপুচ্ছা, নিব্বানপুচ্ছা।

Aparāpi tisso pucchā – attatthapucchā, paratthapucchā, ubhayatthapucchā. Aparāpi tisso pucchā – diṭṭhadhammikatthapucchā, samparāyikatthapucchā, paramatthapucchā. Aparāpi tisso pucchā – anavajjatthapucchā, nikkilesatthapucchā ¹⁰, vodānatthapucchā. Aparāpi tisso pucchā – atītapucchā, anāgatapucchā, paccuppannapucchā. Aparāpi tisso pucchā – ajjhattapucchā, bahiddhāpucchā, ajjhattabahiddhāpucchā. Aparāpi tisso pucchā – kusalapucchā, akusalapucchā, abyākatapucchā. Aparāpi tisso pucchā – khandhapucchā, dhātupucchā, āyatanapucchā. Aparāpi tisso pucchā – satipaṭṭhānapucchā, sammappadhānapucchā, iddhipādapucchā. Aparāpi tisso pucchā – indriyapucchā, balapucchā, bojjhaṅgapucchā. Aparāpi tisso pucchā – maggapucchā, phalapucchā, nibbānapucchā.

পুচ্ছামি তন্তি পুচ্ছামি তং যাচামি তং অজ্ঝেসামি তং পসাদেমি তং, ‘‘কথযস্সু মে’’তি – পুচ্ছামি তং। আদিচ্চবন্ধূতি। আদিচ্চো ৰুচ্চতি সূরিযো ¹¹। সূরিযো গোতমো গোত্তেন, ভগৰাপি গোতমো গোত্তেন, ভগৰা সূরিযস্স গোত্তঞাতকো গোত্তবন্ধু; তস্মা বুদ্ধো আদিচ্চবন্ধূতি – পুচ্ছামি তং আদিচ্চবন্ধু।

Pucchāmi tanti pucchāmi taṃ yācāmi taṃ ajjhesāmi taṃ pasādemi taṃ, ‘‘kathayassu me’’ti – pucchāmi taṃ. Ādiccabandhūti. Ādicco vuccati sūriyo ¹². Sūriyo gotamo gottena, bhagavāpi gotamo gottena, bhagavā sūriyassa gottañātako gottabandhu; tasmā buddho ādiccabandhūti – pucchāmi taṃ ādiccabandhu.

ৰিৰেকং সন্তিপদঞ্চ মহেসীতি। ৰিৰেকাতি তযো ৰিৰেকা – কাযৰিৰেকো , চিত্তৰিৰেকো, উপধিৰিৰেকো। কতমো কাযৰিৰেকো? ইধ ভিক্খু ৰিৰিত্তং সেনাসনং ভজতি অরঞ্ঞং রুক্খমূলং পব্বতং কন্দরং গিরিগুহং সুসানং ৰনপত্থং অব্ভোকাসং পলালপুঞ্জং কাযেন ৰিৰিত্তেন ৰিহরতি। সো একো গচ্ছতি, একো তিট্ঠতি, একো নিসীদতি, একো সেয্যং কপ্পেতি, একো গামং পিণ্ডায পৰিসতি, একো পটিক্কমতি, একো রহো নিসীদতি, একো চঙ্কমং অধিট্ঠাতি, একো চরতি ৰিহরতি ইরিযতি ৰত্ততি পালেতি যপেতি যাপেতি – অযং কাযৰিৰেকো।

Vivekaṃ santipadañca mahesīti. Vivekāti tayo vivekā – kāyaviveko , cittaviveko, upadhiviveko. Katamo kāyaviveko? Idha bhikkhu vivittaṃ senāsanaṃ bhajati araññaṃ rukkhamūlaṃ pabbataṃ kandaraṃ giriguhaṃ susānaṃ vanapatthaṃ abbhokāsaṃ palālapuñjaṃ kāyena vivittena viharati. So eko gacchati, eko tiṭṭhati, eko nisīdati, eko seyyaṃ kappeti, eko gāmaṃ piṇḍāya pavisati, eko paṭikkamati, eko raho nisīdati, eko caṅkamaṃ adhiṭṭhāti, eko carati viharati iriyati vattati pāleti yapeti yāpeti – ayaṃ kāyaviveko.

কতমো চিত্তৰিৰেকো? পঠমং ঝানং সমাপন্নস্স নীৰরণেহি চিত্তং ৰিৰিত্তং হোতি, দুতিযং ঝানং সমাপন্নস্স ৰিতক্কৰিচারেহি চিত্তং ৰিৰিত্তং হোতি, ততিযং ঝানং সমাপন্নস্স পীতিযা চিত্তং ৰিৰিত্তং হোতি, চতুত্থং ঝানং সমাপন্নস্স সুখদুক্খেহি চিত্তং ৰিৰিত্তং হোতি, আকাসানঞ্চাযতনং সমাপন্নস্স রূপসঞ্ঞায পটিঘসঞ্ঞায নানত্তসঞ্ঞায চিত্তং ৰিৰিত্তং হোতি, ৰিঞ্ঞাণঞ্চাযতনং সমাপন্নস্স আকাসানঞ্চাযতনসঞ্ঞায চিত্তং ৰিৰিত্তং হোতি, আকিঞ্চঞ্ঞাযতনং সমাপন্নস্স ৰিঞ্ঞাণঞ্চাযতনসঞ্ঞায চিত্তং ৰিৰিত্তং হোতি , নেৰসঞ্ঞানাসঞ্ঞাযতনং সমাপন্নস্স আকিঞ্চঞ্ঞাযতনসঞ্ঞায চিত্তং ৰিৰিত্তং হোতি। সোতাপন্নস্স সক্কাযদিট্ঠিযা ৰিচিকিচ্ছায সীলব্বতপরামাসা দিট্ঠানুসযা ৰিচিকিচ্ছানুসযা, তদেকট্ঠেহি চ কিলেসেহি চিত্তং ৰিৰিত্তং হোতি। সকদাগামিস্স ওল়ারিকা কামরাগসঞ্ঞোজনা পটিঘসঞ্ঞোজনা ওল়ারিকা কামরাগানুসযা পটিঘানুসযা, তদেকট্ঠেহি চ কিলেসেহি চিত্তং ৰিৰিত্তং হোতি। অনাগামিস্স অনুসহগতা কামরাগসঞ্ঞোজনা পটিঘসঞ্ঞোজনা অনুসহগতা কামরাগানুসযা পটিঘানুসযা, তদেকট্ঠেহি চ কিলেসেহি চিত্তং ৰিৰিত্তং হোতি। অরহতো রূপরাগা অরূপরাগা মানা উদ্ধচ্চা অৰিজ্জায মানানুসযা ভৰরাগানুসযা অৰিজ্জানুসযা, তদেকট্ঠেহি চ কিলেসেহি বহিদ্ধা চ সব্বনিমিত্তেহি চিত্তং ৰিৰিত্তং হোতি – অযং চিত্তৰিৰেকো।

Katamo cittaviveko? Paṭhamaṃ jhānaṃ samāpannassa nīvaraṇehi cittaṃ vivittaṃ hoti, dutiyaṃ jhānaṃ samāpannassa vitakkavicārehi cittaṃ vivittaṃ hoti, tatiyaṃ jhānaṃ samāpannassa pītiyā cittaṃ vivittaṃ hoti, catutthaṃ jhānaṃ samāpannassa sukhadukkhehi cittaṃ vivittaṃ hoti, ākāsānañcāyatanaṃ samāpannassa rūpasaññāya paṭighasaññāya nānattasaññāya cittaṃ vivittaṃ hoti, viññāṇañcāyatanaṃ samāpannassa ākāsānañcāyatanasaññāya cittaṃ vivittaṃ hoti, ākiñcaññāyatanaṃ samāpannassa viññāṇañcāyatanasaññāya cittaṃ vivittaṃ hoti , nevasaññānāsaññāyatanaṃ samāpannassa ākiñcaññāyatanasaññāya cittaṃ vivittaṃ hoti. Sotāpannassa sakkāyadiṭṭhiyā vicikicchāya sīlabbataparāmāsā diṭṭhānusayā vicikicchānusayā, tadekaṭṭhehi ca kilesehi cittaṃ vivittaṃ hoti. Sakadāgāmissa oḷārikā kāmarāgasaññojanā paṭighasaññojanā oḷārikā kāmarāgānusayā paṭighānusayā, tadekaṭṭhehi ca kilesehi cittaṃ vivittaṃ hoti. Anāgāmissa anusahagatā kāmarāgasaññojanā paṭighasaññojanā anusahagatā kāmarāgānusayā paṭighānusayā, tadekaṭṭhehi ca kilesehi cittaṃ vivittaṃ hoti. Arahato rūparāgā arūparāgā mānā uddhaccā avijjāya mānānusayā bhavarāgānusayā avijjānusayā, tadekaṭṭhehi ca kilesehi bahiddhā ca sabbanimittehi cittaṃ vivittaṃ hoti – ayaṃ cittaviveko.

কতমো উপধিৰিৰেকো? উপধি ৰুচ্চতি কিলেসা চ খন্ধা চ অভিসঙ্খারা চ। উপধিৰিৰেকো ৰুচ্চতি অমতং নিব্বানং। যো সো সব্বসঙ্খারসমথো সব্বূপধিপটিনিস্সগ্গো তণ্হক্খযো ৰিরাগো নিরোধো নিব্বানং – অযং উপধিৰিৰেকো। কাযৰিৰেকো চ ৰিৰেকট্ঠকাযানং ¹³ নেক্খম্মাভিরতানং, চিত্তৰিৰেকো চ পরিসুদ্ধচিত্তানং পরমৰোদানপত্তানং, উপধিৰিৰেকো চ নিরুপধীনং পুগ্গলানং ৰিসঙ্খারগতানং। সন্তীতি একেন আকারেন সন্তিপি সন্তিপদম্পি তংযেৰ অমতং নিব্বানং, যো সো সব্বসঙ্খারসমথো সব্বূপধিপটিনিস্সগ্গো তণ্হক্খযো ৰিরাগো নিরোধো নিব্বানং। ৰুত্তঞ্হেতং ভগৰতা – ‘‘সন্তমেতং পদং, পণীতমেতং পদং, যদিদং সব্বসঙ্খারসমথো সব্বূপধিপটিনিস্সগ্গো তণ্হক্খযো ৰিরাগো নিরোধো নিব্বান’’ন্তি। অথ অপরেন আকারেন যে ধম্মা সন্তাধিগমায সন্তিফুসনায সন্তিসচ্ছিকিরিযায সংৰত্তন্তি, সেয্যথিদং – চত্তারো সতিপট্ঠানা, চত্তারো সম্মপ্পধানা, চত্তারো ইদ্ধিপাদা, পঞ্চিন্দ্রিযানি, পঞ্চ বলানি, সত্ত বোজ্ঝঙ্গা, অরিযো অট্ঠঙ্গিকো মগ্গো – ইমে ৰুচ্চন্তি সন্তিপদং তাণপদং লেণপদং সরণপদং অভযপদং অচ্চুতপদং অমতপদং নিব্বানপদং।

Katamo upadhiviveko? Upadhi vuccati kilesā ca khandhā ca abhisaṅkhārā ca. Upadhiviveko vuccati amataṃ nibbānaṃ. Yo so sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānaṃ – ayaṃ upadhiviveko. Kāyaviveko ca vivekaṭṭhakāyānaṃ ¹⁴ nekkhammābhiratānaṃ, cittaviveko ca parisuddhacittānaṃ paramavodānapattānaṃ, upadhiviveko ca nirupadhīnaṃ puggalānaṃ visaṅkhāragatānaṃ. Santīti ekena ākārena santipi santipadampi taṃyeva amataṃ nibbānaṃ, yo so sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānaṃ. Vuttañhetaṃ bhagavatā – ‘‘santametaṃ padaṃ, paṇītametaṃ padaṃ, yadidaṃ sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbāna’’nti. Atha aparena ākārena ye dhammā santādhigamāya santiphusanāya santisacchikiriyāya saṃvattanti, seyyathidaṃ – cattāro satipaṭṭhānā, cattāro sammappadhānā, cattāro iddhipādā, pañcindriyāni, pañca balāni, satta bojjhaṅgā, ariyo aṭṭhaṅgiko maggo – ime vuccanti santipadaṃ tāṇapadaṃ leṇapadaṃ saraṇapadaṃ abhayapadaṃ accutapadaṃ amatapadaṃ nibbānapadaṃ.

মহেসীতি মহেসি ভগৰা। মহন্তং সীলক্খন্ধং এসী গৰেসী পরিযেসীতি মহেসি, মহন্তং সমাধিক্খন্ধং…পে॰… মহন্তং পঞ্ঞাক্খন্ধং… মহন্তং ৰিমুত্তিক্খন্ধং… মহন্তং ৰিমুত্তিঞাণদস্সনক্খন্ধং এসী গৰেসী পরিযেসীতি মহেসি; মহতো তমোকাযস্স পদালনং, মহতো ৰিপল্লাসস্স ভেদনং, মহতো তণ্হাসল্লস্স অব্বহনং ¹⁵, মহতো দিট্ঠিসঙ্ঘাতস্স ৰিনিৰেঠনং, মহতো মানধজস্স পপাতনং ¹⁶, মহতো অভিসঙ্খারস্স ৰূপসমং, মহতো ওঘস্স নিত্থরণং, মহতো ভারস্স নিক্খেপনং, মহতো সংসারৰট্টস্স উপচ্ছেদং, মহতো সন্তাপস্স নিব্বাপনং , মহতো পরিল়াহস্স পটিপস্সদ্ধিং, মহতো ধম্মধজস্স উস্সাপনং এসী গৰেসী পরিযেসীতি মহেসি, মহন্তে সতিপট্ঠানে মহন্তে সম্মপ্পধানে মহন্তে ইদ্ধিপাদে মহন্তানি ইন্দ্রিযানি মহন্তানি বলানি মহন্তে বোজ্ঝঙ্গে মহন্তং অরিযং অট্ঠঙ্গিকং মগ্গং মহন্তং পরমত্থং অমতং নিব্বানং এসী গৰেসী পরিযেসীতি মহেসি; মহেসক্খেহি ৰা সত্তেহি এসিতো গৰেসিতো পরিযেসিতো কহং বুদ্ধো কহং ভগৰা কহং দেৰদেৰো কহং নরাসভোতি মহেসীতি – ৰিৰেকং সন্তিপদঞ্চ মহেসি।

Mahesīti mahesi bhagavā. Mahantaṃ sīlakkhandhaṃ esī gavesī pariyesīti mahesi, mahantaṃ samādhikkhandhaṃ…pe… mahantaṃ paññākkhandhaṃ… mahantaṃ vimuttikkhandhaṃ… mahantaṃ vimuttiñāṇadassanakkhandhaṃ esī gavesī pariyesīti mahesi; mahato tamokāyassa padālanaṃ, mahato vipallāsassa bhedanaṃ, mahato taṇhāsallassa abbahanaṃ ¹⁷, mahato diṭṭhisaṅghātassa viniveṭhanaṃ, mahato mānadhajassa papātanaṃ ¹⁸, mahato abhisaṅkhārassa vūpasamaṃ, mahato oghassa nittharaṇaṃ, mahato bhārassa nikkhepanaṃ, mahato saṃsāravaṭṭassa upacchedaṃ, mahato santāpassa nibbāpanaṃ , mahato pariḷāhassa paṭipassaddhiṃ, mahato dhammadhajassa ussāpanaṃ esī gavesī pariyesīti mahesi, mahante satipaṭṭhāne mahante sammappadhāne mahante iddhipāde mahantāni indriyāni mahantāni balāni mahante bojjhaṅge mahantaṃ ariyaṃ aṭṭhaṅgikaṃ maggaṃ mahantaṃ paramatthaṃ amataṃ nibbānaṃ esī gavesī pariyesīti mahesi; mahesakkhehi vā sattehi esito gavesito pariyesito kahaṃ buddho kahaṃ bhagavā kahaṃ devadevo kahaṃ narāsabhoti mahesīti – vivekaṃ santipadañca mahesi.

কথং দিস্ৰা নিব্বাতি ভিক্খূতি। কথং দিস্ৰা পস্সিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰা অত্তনো রাগং নিব্বাপেতি, দোসং নিব্বাপেতি, মোহং নিব্বাপেতি, কোধং…পে॰… উপনাহং… মক্খং… পল়াসং… ইস্সং… মচ্ছরিযং… মাযং… সাঠেয্যং… থম্ভং… সারম্ভং… মানং… অতিমানং… মদং… পমাদং… সব্বে কিলেসে… সব্বে দুচ্চরিতে… সব্বে দরথে… সব্বে পরিল়াহে… সব্বে সন্তাপে … সব্বাকুসলাভিসঙ্খারে নিব্বাপেতি সমেতি উপসমেতি ৰূপসমেতি পটিপস্সম্ভেতি। ভিক্খূতি পুথুজ্জনকল্যাণকো ৰা ভিক্খু সেখো ৰা ভিক্খূতি – কথং দিস্ৰা নিব্বাতি ভিক্খু।

Kathaṃ disvā nibbāti bhikkhūti. Kathaṃ disvā passitvā tulayitvā tīrayitvā vibhāvayitvā vibhūtaṃ katvā attano rāgaṃ nibbāpeti, dosaṃ nibbāpeti, mohaṃ nibbāpeti, kodhaṃ…pe… upanāhaṃ… makkhaṃ… paḷāsaṃ… issaṃ… macchariyaṃ… māyaṃ… sāṭheyyaṃ… thambhaṃ… sārambhaṃ… mānaṃ… atimānaṃ… madaṃ… pamādaṃ… sabbe kilese… sabbe duccarite… sabbe darathe… sabbe pariḷāhe… sabbe santāpe … sabbākusalābhisaṅkhāre nibbāpeti sameti upasameti vūpasameti paṭipassambheti. Bhikkhūti puthujjanakalyāṇako vā bhikkhu sekho vā bhikkhūti – kathaṃ disvā nibbāti bhikkhu.

অনুপাদিযানো লোকস্মিং কিঞ্চীতি। চতূহি উপাদানেহি অনুপাদিযমানো অগণ্হযমানো অপরামসমানো অনভিনিৰিসমানো। লোকস্মিন্তি অপাযলোকে মনুস্সলোকে দেৰলোকে, খন্ধলোকে ধাতুলোকে আযতনলোকে। কিঞ্চীতি কিঞ্চি রূপগতং ৰেদনাগতং সঞ্ঞাগতং সঙ্খারগতং ৰিঞ্ঞাণগতন্তি – অনুপাদিযানো লোকস্মিং কিঞ্চি।

Anupādiyāno lokasmiṃ kiñcīti. Catūhi upādānehi anupādiyamāno agaṇhayamāno aparāmasamāno anabhinivisamāno. Lokasminti apāyaloke manussaloke devaloke, khandhaloke dhātuloke āyatanaloke. Kiñcīti kiñci rūpagataṃ vedanāgataṃ saññāgataṃ saṅkhāragataṃ viññāṇagatanti – anupādiyāno lokasmiṃ kiñci.

তেনাহ সো নিম্মিতো –

Tenāha so nimmito –

‘‘পুচ্ছামি তং আদিচ্চবন্ধু, ৰিৰেকং সন্তিপদঞ্চ মহেসি।

‘‘Pucchāmi taṃ ādiccabandhu, vivekaṃ santipadañca mahesi;

কথং দিস্ৰা নিব্বাতি ভিক্খু, অনুপাদিযানো লোকস্মিং কিঞ্চী’’তি॥

Kathaṃ disvā nibbāti bhikkhu, anupādiyāno lokasmiṃ kiñcī’’ti.

১৫১.

151.

মূলং পপঞ্চসঙ্খায, [ইতি ভগৰা]

Mūlaṃpapañcasaṅkhāya, [iti bhagavā]

মন্তা অস্মীতি সব্বমুপরুন্ধে ¹⁹ ।

Mantā asmīti sabbamuparundhe²⁰;

যা কাচি তণ্হা অজ্ঝত্তং, তাসং ৰিনযা সদা সতো সিক্খে॥

Yā kāci taṇhā ajjhattaṃ, tāsaṃ vinayā sadā sato sikkhe.

মূলং পপঞ্চসঙ্খায, [ইতি ভগৰা] মন্তা অস্মীতি সব্বমুপরুন্ধেতি। পপঞ্চাযেৰ পপঞ্চসঙ্খা। তণ্হাপপঞ্চসঙ্খা দিট্ঠিপপঞ্চসঙ্খা। কতমং তণ্হাপপঞ্চস্স মূলং? অৰিজ্জামূলং, অযোনিসোমনসিকারো মূলং, অস্মিমানো মূলং, অহিরিকং মূলং , অনোত্তপ্পং মূলং, উদ্ধচ্চং মূলং – ইদং তণ্হাপপঞ্চস্স মূলং। কতমং দিট্ঠিপপঞ্চস্স মূলং? অৰিজ্জামূলং, অযোনিসোমনসিকারো মূলং, অস্মিমানো মূলং, অহিরিকং মূলং, অনোত্তপ্পং মূলং, উদ্ধচ্চং মূলং – ইদং দিট্ঠিপপঞ্চস্স মূলং।

Mūlaṃ papañcasaṅkhāya, [iti bhagavā] mantā asmīti sabbamuparundheti. Papañcāyeva papañcasaṅkhā. Taṇhāpapañcasaṅkhā diṭṭhipapañcasaṅkhā. Katamaṃ taṇhāpapañcassa mūlaṃ? Avijjāmūlaṃ, ayonisomanasikāro mūlaṃ, asmimāno mūlaṃ, ahirikaṃ mūlaṃ , anottappaṃ mūlaṃ, uddhaccaṃ mūlaṃ – idaṃ taṇhāpapañcassa mūlaṃ. Katamaṃ diṭṭhipapañcassa mūlaṃ? Avijjāmūlaṃ, ayonisomanasikāro mūlaṃ, asmimāno mūlaṃ, ahirikaṃ mūlaṃ, anottappaṃ mūlaṃ, uddhaccaṃ mūlaṃ – idaṃ diṭṭhipapañcassa mūlaṃ.

ভগৰাতি গারৰাধিৰচনং। অপি চ ভগ্গরাগোতি ভগৰা, ভগ্গদোসোতি ভগৰা, ভগ্গমোহোতি ভগৰা, ভগ্গমানোতি ভগৰা, ভগ্গদিট্ঠীতি ভগৰা, ভগ্গকণ্ডকোতি ভগৰা, ভগ্গকিলেসোতি ভগৰা, ভজি ৰিভজি পৰিভজি ধম্মরতনন্তি ভগৰা, ভৰানং অন্তকরোতি ভগৰা, ভাৰিতকাযো ভাৰিতসীলো ভাৰিতচিত্তো ভাৰিতপঞ্ঞোতি ভগৰা; ভাগী ৰা ভগৰা অরঞ্ঞৰনপত্থানি পন্তানি সেনাসনানি অপ্পসদ্দানি অপ্পনিগ্ঘোসানি ৰিজনৰাতানি মনুস্সরাহস্সেয্যকানি পটিসল্লানসারুপ্পানীতি ভগৰা, ভাগী ৰা ভগৰা চীৰরপিণ্ডপাতসেনাসনগিলানপচ্চযভেসজ্জপরিক্খারানন্তি ভগৰা, ভাগী ৰা ভগৰা অত্থরসস্স ধম্মরসস্স ৰিমুত্তিরসস্স অধিসীলস্স অধিচিত্তস্স অধিপঞ্ঞাযাতি ভগৰা, ভাগী ৰা ভগৰা চতুন্নং ঝানানং চতুন্নং অপ্পমঞ্ঞানং চতুন্নং অরূপসমাপত্তীনন্তি ভগৰা, ভাগী ৰা ভগৰা অট্ঠন্নং ৰিমোক্খানং অট্ঠন্নং অভিভাযতনানং নৰন্নং অনুপুব্বৰিহারসমাপত্তীনন্তি ভগৰা, ভাগী ৰা ভগৰা দসন্নং সঞ্ঞাভাৰনানং দসন্নং কসিণসমাপত্তীনং আনাপানস্সতিসমাধিস্স অসুভসমাপত্তিযাতি ভগৰা, ভাগী ৰা ভগৰা চতুন্নং সতিপট্ঠানানং চতুন্নং সম্মপ্পধানানং চতুন্নং ইদ্ধিপাদানং পঞ্চন্নং ইন্দ্রিযানং পঞ্চন্নং বলানং সত্তন্নং বোজ্ঝঙ্গানং অরিযস্স অট্ঠঙ্গিকস্স মগ্গস্সাতি ভগৰা, ভাগী ৰা ভগৰা দসন্নং তথাগতবলানং চতুন্নং ৰেসারজ্জানং চতুন্নং পটিসম্ভিদানং ছন্নং অভিঞ্ঞানং ছন্নং বুদ্ধধম্মানন্তি ভগৰা, ভগৰাতি নেতং নামং মাতরা কতং ন পিতরা কতং ন ভাতরা কতং ন ভগিনিযা কতং ন মিত্তামচ্চেহি কতং ন ঞাতিসালোহিতেহি কতং ন সমণব্রাহ্মণেহি কতং ন দেৰতাহি কতং; ৰিমোক্খন্তিকমেতং বুদ্ধানং ভগৰন্তানং বোধিযা মূলে সহ সব্বঞ্ঞুতঞাণস্স পটিলাভা সচ্ছিকা পঞ্ঞত্তি যদিদং ভগৰাতি – মূলং পপঞ্চসঙ্খায ইতি ভগৰা।

Bhagavāti gāravādhivacanaṃ. Api ca bhaggarāgoti bhagavā, bhaggadosoti bhagavā, bhaggamohoti bhagavā, bhaggamānoti bhagavā, bhaggadiṭṭhīti bhagavā, bhaggakaṇḍakoti bhagavā, bhaggakilesoti bhagavā, bhaji vibhaji pavibhaji dhammaratananti bhagavā, bhavānaṃ antakaroti bhagavā, bhāvitakāyo bhāvitasīlo bhāvitacitto bhāvitapaññoti bhagavā; bhāgī vā bhagavā araññavanapatthāni pantāni senāsanāni appasaddāni appanigghosāni vijanavātāni manussarāhasseyyakāni paṭisallānasāruppānīti bhagavā, bhāgī vā bhagavā cīvarapiṇḍapātasenāsanagilānapaccayabhesajjaparikkhārānanti bhagavā, bhāgī vā bhagavā attharasassa dhammarasassa vimuttirasassa adhisīlassa adhicittassa adhipaññāyāti bhagavā, bhāgī vā bhagavā catunnaṃ jhānānaṃ catunnaṃ appamaññānaṃ catunnaṃ arūpasamāpattīnanti bhagavā, bhāgī vā bhagavā aṭṭhannaṃ vimokkhānaṃ aṭṭhannaṃ abhibhāyatanānaṃ navannaṃ anupubbavihārasamāpattīnanti bhagavā, bhāgī vā bhagavā dasannaṃ saññābhāvanānaṃ dasannaṃ kasiṇasamāpattīnaṃ ānāpānassatisamādhissa asubhasamāpattiyāti bhagavā, bhāgī vā bhagavā catunnaṃ satipaṭṭhānānaṃ catunnaṃ sammappadhānānaṃ catunnaṃ iddhipādānaṃ pañcannaṃ indriyānaṃ pañcannaṃ balānaṃ sattannaṃ bojjhaṅgānaṃ ariyassa aṭṭhaṅgikassa maggassāti bhagavā, bhāgī vā bhagavā dasannaṃ tathāgatabalānaṃ catunnaṃ vesārajjānaṃ catunnaṃ paṭisambhidānaṃ channaṃ abhiññānaṃ channaṃ buddhadhammānanti bhagavā, bhagavāti netaṃ nāmaṃ mātarā kataṃ na pitarā kataṃ na bhātarā kataṃ na bhaginiyā kataṃ na mittāmaccehi kataṃ na ñātisālohitehi kataṃ na samaṇabrāhmaṇehi kataṃ na devatāhi kataṃ; vimokkhantikametaṃ buddhānaṃ bhagavantānaṃ bodhiyā mūle saha sabbaññutañāṇassa paṭilābhā sacchikā paññatti yadidaṃ bhagavāti – mūlaṃ papañcasaṅkhāya iti bhagavā.

মন্তা অস্মীতি সব্বমুপরুন্ধেতি। মন্তা ৰুচ্চতি পঞ্ঞা। যা পঞ্ঞা পজাননা…পে॰… অমোহো ধম্মৰিচযো সম্মাদিট্ঠি। অস্মীতি রূপে অস্মীতি মানো অস্মীতি ছন্দো অস্মীতি অনুসযো; ৰেদনায… সঞ্ঞায… সঙ্খারেসু… ৰিঞ্ঞাণে অস্মীতি মানো অস্মীতি ছন্দো অস্মীতি অনুসযোতি। মূলং পপঞ্চসঙ্খায ইতি ভগৰা। মন্তা অস্মীতি সব্বমুপরুন্ধেতি। পপঞ্চসঙ্খায মূলঞ্চ অস্মিমানঞ্চ মন্তায সব্বং রুন্ধেয্য উপরুন্ধেয্য নিরোধেয্য ৰূপসমেয্য অত্থঙ্গমেয্য পটিপস্সম্ভেয্যাতি – মূলং পপঞ্চসঙ্খায ইতি ভগৰা, মন্তা অস্মীতি সব্বমুপরুন্ধে।

Mantā asmīti sabbamuparundheti. Mantā vuccati paññā. Yā paññā pajānanā…pe… amoho dhammavicayo sammādiṭṭhi. Asmīti rūpe asmīti māno asmīti chando asmīti anusayo; vedanāya… saññāya… saṅkhāresu… viññāṇe asmīti māno asmīti chando asmīti anusayoti. Mūlaṃ papañcasaṅkhāya iti bhagavā. Mantā asmīti sabbamuparundheti. Papañcasaṅkhāya mūlañca asmimānañca mantāya sabbaṃ rundheyya uparundheyya nirodheyya vūpasameyya atthaṅgameyya paṭipassambheyyāti – mūlaṃ papañcasaṅkhāya iti bhagavā, mantā asmīti sabbamuparundhe.

যা কাচি তণ্হা অজ্ঝত্তন্তি। যা কাচীতি সব্বেন সব্বং সব্বথা সব্বং অসেসং নিস্সেসং পরিযাদিযনৰচনমেতং – যা কাচীতি। তণ্হাতি রূপতণ্হা…পে॰… ধম্মতণ্হা। অজ্ঝত্তন্তি অজ্ঝত্তসমুট্ঠানা ৰা ²¹ সা তণ্হাতি – অজ্ঝত্তং । অথ ৰা অজ্ঝত্তিকং ৰুচ্চতি চিত্তং। যং চিত্তং মনো মানসং হদযং পণ্ডরং মনো মনাযতনং মনিন্দ্রিযং ৰিঞ্ঞাণং ৰিঞ্ঞাণক্খন্ধো তজ্জা মনোৰিঞ্ঞাণধাতু। চিত্তেন সা তণ্হা সহগতা সহজাতা সংসট্ঠা সম্পযুত্তা একুপ্পাদা একনিরোধা একৰত্থুকা একারম্মণাতিপি অজ্ঝত্তন্তি – যা কাচি তণ্হা অজ্ঝত্তং।

Yā kāci taṇhā ajjhattanti. Yā kācīti sabbena sabbaṃ sabbathā sabbaṃ asesaṃ nissesaṃ pariyādiyanavacanametaṃ – yā kācīti. Taṇhāti rūpataṇhā…pe… dhammataṇhā. Ajjhattanti ajjhattasamuṭṭhānā vā ²² sā taṇhāti – ajjhattaṃ . Atha vā ajjhattikaṃ vuccati cittaṃ. Yaṃ cittaṃ mano mānasaṃ hadayaṃ paṇḍaraṃ mano manāyatanaṃ manindriyaṃ viññāṇaṃ viññāṇakkhandho tajjā manoviññāṇadhātu. Cittena sā taṇhā sahagatā sahajātā saṃsaṭṭhā sampayuttā ekuppādā ekanirodhā ekavatthukā ekārammaṇātipi ajjhattanti – yā kāci taṇhā ajjhattaṃ.

তাসং ৰিনযা সদা সতো সিক্খেতি। সদাতি সদা সব্বদা সব্বকালং নিচ্চকালং ধুৰকালং, সততং সমিতং অব্বোকিণ্ণং পোঙ্খানুপোঙ্খং উদকূমিগজাতং অৰীচিসন্ততিসহিতং ফুসিতং, পুরেভত্তং পচ্ছাভত্তং , পুরিমং যামং মজ্ঝিমং যামং পচ্ছিমং যামং, কাল়ে জুণ্হে, ৰস্সে হেমন্তে গিম্হে, পুরিমে ৰযোখন্ধে মজ্ঝিমে ৰযোখন্ধে পচ্ছিমে ৰযোখন্ধে। সতোতি চতূহি কারণেহি সতো – কাযে কাযানুপস্সনাসতিপট্ঠানং ভাৰেন্তো সতো, ৰেদনাসু…পে॰… চিত্তে…পে॰… ধম্মেসু ধম্মানুপস্সনাসতিপট্ঠানং ভাৰেন্তো সতো। অপরেহিপি চতূহি কারণেহি সতো – অসতি পরিৰজ্জনায সতো, সতিকরণীযানং ধম্মানং কতত্তা সতো, সতিপটিপক্খানং ধম্মানং হতত্তা সতো, সতিনিমিত্তানং অসম্মুট্ঠত্তা সতো। অপরেহিপি চতূহি কারণেহি সতো – সতিযা সমন্নাগতত্তা সতো, সতিযা ৰসিতত্তা সতো, সতিযা পাগুঞ্ঞতায সতো, সতিযা অপচ্চোরোহনতায সতো। অপরেহিপি চতূহি কারণেহি সতো – সত্তত্তা সতো, সন্তত্তা সতো, সমিতত্তা সতো, সন্তধম্মসমন্নাগতত্তা সতো। বুদ্ধানুস্সতিযা সতো, ধম্মানুস্সতিযা সতো, সঙ্ঘানুস্সতিযা সতো, সীলানুস্সতিযা সতো, চাগানুস্সতিযা সতো, দেৰতানুস্সতিযা সতো, আনাপানস্সতিযা সতো, মরণস্সতিযা সতো, কাযগতাসতিযা সতো, উপসমানুস্সতিযা সতো। যা সতি অনুস্সতি পটিস্সতি, সতি সরণতা ধারণতা অপিলাপনতা অসম্মুস্সনতা, সতি সতিন্দ্রিযং সতিবলং সম্মাসতি সতিসম্বোজ্ঝঙ্গো একাযনমগ্গো – অযং ৰুচ্চতি সতি। ইমায সতিযা উপেতো সমুপেতো, উপগতো সমুপগতো, উপপন্নো সমুপপন্নো, সমন্নাগতো সো ৰুচ্চতি সতো।

Tāsaṃ vinayā sadā sato sikkheti. Sadāti sadā sabbadā sabbakālaṃ niccakālaṃ dhuvakālaṃ, satataṃ samitaṃ abbokiṇṇaṃ poṅkhānupoṅkhaṃ udakūmigajātaṃ avīcisantatisahitaṃ phusitaṃ, purebhattaṃ pacchābhattaṃ , purimaṃ yāmaṃ majjhimaṃ yāmaṃ pacchimaṃ yāmaṃ, kāḷe juṇhe, vasse hemante gimhe, purime vayokhandhe majjhime vayokhandhe pacchime vayokhandhe. Satoti catūhi kāraṇehi sato – kāye kāyānupassanāsatipaṭṭhānaṃ bhāvento sato, vedanāsu…pe… citte…pe… dhammesu dhammānupassanāsatipaṭṭhānaṃ bhāvento sato. Aparehipi catūhi kāraṇehi sato – asati parivajjanāya sato, satikaraṇīyānaṃ dhammānaṃ katattā sato, satipaṭipakkhānaṃ dhammānaṃ hatattā sato, satinimittānaṃ asammuṭṭhattā sato. Aparehipi catūhi kāraṇehi sato – satiyā samannāgatattā sato, satiyā vasitattā sato, satiyā pāguññatāya sato, satiyā apaccorohanatāya sato. Aparehipi catūhi kāraṇehi sato – sattattā sato, santattā sato, samitattā sato, santadhammasamannāgatattā sato. Buddhānussatiyā sato, dhammānussatiyā sato, saṅghānussatiyā sato, sīlānussatiyā sato, cāgānussatiyā sato, devatānussatiyā sato, ānāpānassatiyā sato, maraṇassatiyā sato, kāyagatāsatiyā sato, upasamānussatiyā sato. Yā sati anussati paṭissati, sati saraṇatā dhāraṇatā apilāpanatā asammussanatā, sati satindriyaṃ satibalaṃ sammāsati satisambojjhaṅgo ekāyanamaggo – ayaṃ vuccati sati. Imāya satiyā upeto samupeto, upagato samupagato, upapanno samupapanno, samannāgato so vuccati sato.

সিক্খেতি তিস্সো সিক্খা – অধিসীলসিক্খা, অধিচিত্তসিক্খা, অধিপঞ্ঞাসিক্খা। কতমা অধিসীলসিক্খা? ইধ ভিক্খু সীলৰা হোতি, পাতিমোক্খসংৰরসংৰুতো ৰিহরতি আচারগোচরসম্পন্নো, অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু, খুদ্দকো সীলক্খন্ধো… মহন্তো সীলক্খন্ধো, সীলং পতিট্ঠা আদি চরণং সংযমো সংৰরো মুখং পমুখং কুসলানং ধম্মানং সমাপত্তিযা – অযং অধিসীলসিক্খা।

Sikkheti tisso sikkhā – adhisīlasikkhā, adhicittasikkhā, adhipaññāsikkhā. Katamā adhisīlasikkhā? Idha bhikkhu sīlavā hoti, pātimokkhasaṃvarasaṃvuto viharati ācāragocarasampanno, aṇumattesu vajjesu bhayadassāvī, samādāya sikkhati sikkhāpadesu, khuddako sīlakkhandho… mahanto sīlakkhandho, sīlaṃ patiṭṭhā ādi caraṇaṃ saṃyamo saṃvaro mukhaṃ pamukhaṃ kusalānaṃ dhammānaṃ samāpattiyā – ayaṃ adhisīlasikkhā.

কতমা অধিচিত্তসিক্খা? ইধ ভিক্খু ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি। ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরতি। পীতিযা চ ৰিরাগা উপেক্খকো চ ৰিহরতি সতো চ সম্পজানো সুখঞ্চ কাযেন পটিসংৰেদেতি, যং তং অরিযা আচিক্খন্তি ‘‘উপেক্খকো সতিমা সুখৰিহারী’’তি ততিযং ঝানং উপসম্পজ্জ ৰিহরতি। সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরতি – অযং অধিচিত্তসিক্খা।

Katamā adhicittasikkhā? Idha bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati. Vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja viharati. Pītiyā ca virāgā upekkhako ca viharati sato ca sampajāno sukhañca kāyena paṭisaṃvedeti, yaṃ taṃ ariyā ācikkhanti ‘‘upekkhako satimā sukhavihārī’’ti tatiyaṃ jhānaṃ upasampajja viharati. Sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthaṃ jhānaṃ upasampajja viharati – ayaṃ adhicittasikkhā.

কতমা অধিপঞ্ঞাসিক্খা? ইধ ভিক্খু পঞ্ঞৰা হোতি, উদযত্থগামিনিযা পঞ্ঞায সমন্নাগতো অরিযায নিব্বেধিকায সম্মাদুক্খক্খযগামিনিযা। সো ইদং দুক্খন্তি যথাভূতং পজানাতি, অযং দুক্খসমুদযোতি যথাভূতং পজানাতি, অযং দুক্খনিরোধোতি যথাভূতং পজানাতি , অযং দুক্খনিরোধগামিনী পটিপদাতি যথাভূতং পজানাতি, ইমে আসৰাতি যথাভূতং পজানাতি, অযং আসৰসমুদযোতি যথাভূতং পজানাতি, অযং আসৰনিরোধোতি যথাভূতং পজানাতি, অযং আসৰনিরোধগামিনী পটিপদাতি যথাভূতং পজানাতি – অযং অধিপঞ্ঞাসিক্খা।

Katamā adhipaññāsikkhā? Idha bhikkhu paññavā hoti, udayatthagāminiyā paññāya samannāgato ariyāya nibbedhikāya sammādukkhakkhayagāminiyā. So idaṃ dukkhanti yathābhūtaṃ pajānāti, ayaṃ dukkhasamudayoti yathābhūtaṃ pajānāti, ayaṃ dukkhanirodhoti yathābhūtaṃ pajānāti , ayaṃ dukkhanirodhagāminī paṭipadāti yathābhūtaṃ pajānāti, ime āsavāti yathābhūtaṃ pajānāti, ayaṃ āsavasamudayoti yathābhūtaṃ pajānāti, ayaṃ āsavanirodhoti yathābhūtaṃ pajānāti, ayaṃ āsavanirodhagāminī paṭipadāti yathābhūtaṃ pajānāti – ayaṃ adhipaññāsikkhā.

তাসং ৰিনযা সদা সতো সিক্খেতি। তাসং তণ্হানং ৰিনযায পটিৰিনযায পহানায ৰূপসমায পটিনিস্সগ্গায পটিপস্সদ্ধিযা অধিসীলম্পি সিক্খেয্য, অধিচিত্তম্পি সিক্খেয্য, অধিপঞ্ঞম্পি সিক্খেয্য; ইমা তিস্সো সিক্খাযো আৰজ্জন্তো সিক্খেয্য, পজানন্তো সিক্খেয্য, পস্সন্তো সিক্খেয্য, পচ্চৰেক্খন্তো সিক্খেয্য, চিত্তং অধিট্ঠহন্তো সিক্খেয্য, সদ্ধায অধিমুচ্চন্তো সিক্খেয্য, ৰীরিযং পগ্গণ্হন্তো সিক্খেয্য, সতিং উপট্ঠপেন্তো সিক্খেয্য, চিত্তং সমাদহন্তো সিক্খেয্য, পঞ্ঞায পজানন্তো সিক্খেয্য, অভিঞ্ঞেয্যং অভিজানন্তো সিক্খেয্য, পরিঞ্ঞেয্যং পরিজানন্তো সিক্খেয্য, পহাতব্বং পজহন্তো সিক্খেয্য, ভাৰেতব্বং ভাৰেন্তো সিক্খেয্য, সচ্ছিকাতব্বং সচ্ছিকরোন্তো সিক্খেয্য আচরেয্য সমাচরেয্য সমাদায ৰত্তেয্যাতি – তাসং ৰিনযা সদা সতো সিক্খে।

Tāsaṃ vinayā sadā sato sikkheti. Tāsaṃ taṇhānaṃ vinayāya paṭivinayāya pahānāya vūpasamāya paṭinissaggāya paṭipassaddhiyā adhisīlampi sikkheyya, adhicittampi sikkheyya, adhipaññampi sikkheyya; imā tisso sikkhāyo āvajjanto sikkheyya, pajānanto sikkheyya, passanto sikkheyya, paccavekkhanto sikkheyya, cittaṃ adhiṭṭhahanto sikkheyya, saddhāya adhimuccanto sikkheyya, vīriyaṃ paggaṇhanto sikkheyya, satiṃ upaṭṭhapento sikkheyya, cittaṃ samādahanto sikkheyya, paññāya pajānanto sikkheyya, abhiññeyyaṃ abhijānanto sikkheyya, pariññeyyaṃ parijānanto sikkheyya, pahātabbaṃ pajahanto sikkheyya, bhāvetabbaṃ bhāvento sikkheyya, sacchikātabbaṃ sacchikaronto sikkheyya ācareyya samācareyya samādāya vatteyyāti – tāsaṃ vinayā sadā sato sikkhe.

তেনাহ ভগৰা –

Tenāha bhagavā –

‘‘মূলং পপঞ্চসঙ্খায, [ইতি ভগৰা]

‘‘Mūlaṃ papañcasaṅkhāya, [iti bhagavā]

মন্তা অস্মীতি সব্বমুপরুন্ধে।

Mantā asmīti sabbamuparundhe;

যা কাচি তণ্হা অজ্ঝত্তং, তাসং ৰিনযা সদা সতো সিক্খে’’তি॥

Yā kāci taṇhā ajjhattaṃ, tāsaṃ vinayā sadā sato sikkhe’’ti.

১৫২.

152.

যং কিঞ্চি ধম্মমভিজঞ্ঞা, অজ্ঝত্তং অথ ৰাপি বহিদ্ধা।

Yaṃkiñci dhammamabhijaññā, ajjhattaṃ atha vāpi bahiddhā;

ন তেন থামং কুব্বেথ, ন হি সা নিব্বুতি সতং ৰুত্তা॥

Na tena thāmaṃ kubbetha, na hi sā nibbuti sataṃ vuttā.

যং কিঞ্চি ধম্মমভিজঞ্ঞা অজ্ঝত্তন্তি। যং কিঞ্চি অত্তনো গুণং জানেয্য কুসলে ৰা ধম্মে অব্যাকতে ৰা ধম্মে। কতমে অত্তনো গুণা? উচ্চা কুলা পব্বজিতো ৰা অস্সং ²³, মহাভোগকুলা পব্বজিতো ৰা অস্সং, উল়ারভোগকুলা পব্বজিতো ৰা অস্সং, ঞাতো যসস্সী সগহট্ঠপব্বজিতানন্তি ৰা অস্সং, লাভিম্হি চীৰরপিণ্ডপাতসেনাসনগিলানপচ্চযভেসজ্জপরিক্খারানন্তি ৰা অস্সং, সুত্তন্তিকো ৰা অস্সং, ৰিনযধরো ৰা অস্সং, ধম্মকথিকো ৰা অস্সং, আরঞ্ঞিকো ৰা অস্সং, পিণ্ডপাতিকো ৰা অস্সং, পংসুকূলিকো ৰা অস্সং, তেচীৰরিকো ৰা অস্সং, সপদানচারিকো ৰা অস্সং, খলুপচ্ছাভত্তিকো ৰা অস্সং, নেসজ্জিকো ৰা অস্সং, যথাসন্থতিকো ৰা অস্সং, পঠমস্স ঝানস্স লাভীতি ৰা অস্সং, দুতিযস্স ঝানস্স লাভীতি ৰা অস্সং, ততিযস্স ঝানস্স লাভীতি ৰা অস্সং, চতুত্থস্স ঝানস্স লাভীতি ৰা অস্সং, আকাসানঞ্চাযতনসমাপত্তিযা লাভীতি ৰা অস্সং, ৰিঞ্ঞাণঞ্চাযতনসমাপত্তিযা… আকিঞ্চঞ্ঞাযতনসমাপত্তিযা… নেৰসঞ্ঞানাসঞ্ঞাযতনসমাপত্তিযা লাভীতি ৰা অস্সং – ইমে ৰুচ্চন্তি অত্তনো গুণা । যং কিঞ্চি অত্তনো গুণং জানেয্য আজানেয্য ৰিজানেয্য পটিৰিজানেয্য পটিৰিজ্ঝেয্যাতি – যং কিঞ্চি ধম্মমভিজঞ্ঞা অজ্ঝত্তং। অথ ৰাপি বহিদ্ধাতি। উপজ্ঝাযস্স ৰা আচরিযস্স ৰা তে গুণা অস্সূতি ²⁴ – অথ ৰাপি বহিদ্ধা।

Yaṃ kiñci dhammamabhijaññā ajjhattanti. Yaṃ kiñci attano guṇaṃ jāneyya kusale vā dhamme abyākate vā dhamme. Katame attano guṇā? Uccā kulā pabbajito vā assaṃ ²⁵, mahābhogakulā pabbajito vā assaṃ, uḷārabhogakulā pabbajito vā assaṃ, ñāto yasassī sagahaṭṭhapabbajitānanti vā assaṃ, lābhimhi cīvarapiṇḍapātasenāsanagilānapaccayabhesajjaparikkhārānanti vā assaṃ, suttantiko vā assaṃ, vinayadharo vā assaṃ, dhammakathiko vā assaṃ, āraññiko vā assaṃ, piṇḍapātiko vā assaṃ, paṃsukūliko vā assaṃ, tecīvariko vā assaṃ, sapadānacāriko vā assaṃ, khalupacchābhattiko vā assaṃ, nesajjiko vā assaṃ, yathāsanthatiko vā assaṃ, paṭhamassa jhānassa lābhīti vā assaṃ, dutiyassa jhānassa lābhīti vā assaṃ, tatiyassa jhānassa lābhīti vā assaṃ, catutthassa jhānassa lābhīti vā assaṃ, ākāsānañcāyatanasamāpattiyā lābhīti vā assaṃ, viññāṇañcāyatanasamāpattiyā… ākiñcaññāyatanasamāpattiyā… nevasaññānāsaññāyatanasamāpattiyā lābhīti vā assaṃ – ime vuccanti attano guṇā . Yaṃ kiñci attano guṇaṃ jāneyya ājāneyya vijāneyya paṭivijāneyya paṭivijjheyyāti – yaṃ kiñci dhammamabhijaññā ajjhattaṃ. Atha vāpi bahiddhāti. Upajjhāyassa vā ācariyassa vā te guṇā assūti ²⁶ – atha vāpi bahiddhā.

ন তেন থামং কুব্বেথাতি। অত্তনো ৰা গুণেন পরেসং ৰা গুণেন থামং ন করেয্য, থম্ভং ন করেয্য, মানং ন করেয্য, উন্নতিং ন করেয্য, উন্নমং ন করেয্য, ন তেন মানং জনেয্য, ন তেন থদ্ধো অস্স পত্থদ্ধো পগ্গহিতসিরোতি – ন তেন থামং কুব্বেথ।

Natena thāmaṃ kubbethāti. Attano vā guṇena paresaṃ vā guṇena thāmaṃ na kareyya, thambhaṃ na kareyya, mānaṃ na kareyya, unnatiṃ na kareyya, unnamaṃ na kareyya, na tena mānaṃ janeyya, na tena thaddho assa patthaddho paggahitasiroti – na tena thāmaṃ kubbetha.

ন হি সা নিব্বুতি সতং ৰুত্তাতি। সতানং সন্তানং সপ্পুরিসানং বুদ্ধানং বুদ্ধসাৰকানং পচ্চেকবুদ্ধানং সা নিব্বুতীতি ন ৰুত্তা ন পৰুত্তা ন আচিক্খিতা ন দেসিতা ন পঞ্ঞপিতা ন পট্ঠপিতা ন ৰিৰটা ন ৰিভত্তা ন উত্তানীকতা নপ্পকাসিতাতি – ন হি সা নিব্বুতি সতং ৰুত্তা।

Na hi sā nibbuti sataṃ vuttāti. Satānaṃ santānaṃ sappurisānaṃ buddhānaṃ buddhasāvakānaṃ paccekabuddhānaṃ sā nibbutīti na vuttā na pavuttā na ācikkhitā na desitā na paññapitā na paṭṭhapitā na vivaṭā na vibhattā na uttānīkatā nappakāsitāti – na hi sā nibbuti sataṃ vuttā.

তেনাহ ভগৰা –

Tenāha bhagavā –

‘‘যং কিঞ্চি ধম্মমভিজঞ্ঞা, অজ্ঝত্তং অথ ৰাপি বহিদ্ধা।

‘‘Yaṃ kiñci dhammamabhijaññā, ajjhattaṃ atha vāpi bahiddhā;

ন তেন থামং কুব্বেথ, ন হি সা নিব্বুতি সতং ৰুত্তা’’তি॥

Na tena thāmaṃ kubbetha, na hi sā nibbuti sataṃ vuttā’’ti.

১৫৩.

153.

সেয্যো ন তেন মঞ্ঞেয্য, নীচেয্যো অথ ৰাপি সরিক্খো।

Seyyo na tena maññeyya, nīceyyo atha vāpi sarikkho;

ফুট্ঠো অনেকরূপেহি, নাতুমানং ৰিকপ্পযং তিট্ঠে॥

Phuṭṭhoanekarūpehi, nātumānaṃ vikappayaṃ tiṭṭhe.

সেয্যো ন তেন মঞ্ঞেয্যাতি। ‘‘সেয্যোহমস্মী’’তি অতিমানং ন জনেয্য জাতিযা ৰা গোত্তেন ৰা কোলপুত্তিযেন ৰা ৰণ্ণপোক্খরতায ৰা ধনেন ৰা অজ্ঝেনেন ৰা কম্মাযতনেন ৰা সিপ্পাযতনেন ৰা ৰিজ্জাট্ঠানেন ৰা সুতেন ৰা পটিভানেন ৰা অঞ্ঞতরঞ্ঞতরেন ৰা ৰত্থুনাতি – সেয্যো ন তেন মঞ্ঞেয্য।

Seyyo na tena maññeyyāti. ‘‘Seyyohamasmī’’ti atimānaṃ na janeyya jātiyā vā gottena vā kolaputtiyena vā vaṇṇapokkharatāya vā dhanena vā ajjhenena vā kammāyatanena vā sippāyatanena vā vijjāṭṭhānena vā sutena vā paṭibhānena vā aññataraññatarena vā vatthunāti – seyyo na tena maññeyya.

নীচেয্যো অথ ৰাপি সরিক্খোতি। ‘‘হীনোহমস্মী’’তি ওমানং ন জনেয্য জাতিযা ৰা গোত্তেন ৰা…পে॰… অঞ্ঞতরঞ্ঞতরেন ৰা ৰত্থুনা। ‘‘সদিসোহমস্মী’’তি মানং ন জনেয্য জাতিযা ৰা গোত্তেন ৰা কোলপুত্তিযেন ৰা ৰণ্ণপোক্খরতায ৰা ধনেন ৰা অজ্ঝেনেন ৰা কম্মাযতনেন ৰা সিপ্পাযতনেন ৰা ৰিজ্জাট্ঠানেন ৰা সুতেন ৰা পটিভানেন ৰা অঞ্ঞতরঞ্ঞতরেন ৰা ৰত্থুনাতি – নীচেয্যো অথ ৰাপি সরিক্খো।

Nīceyyo atha vāpi sarikkhoti. ‘‘Hīnohamasmī’’ti omānaṃ na janeyya jātiyā vā gottena vā…pe… aññataraññatarena vā vatthunā. ‘‘Sadisohamasmī’’ti mānaṃ na janeyya jātiyā vā gottena vā kolaputtiyena vā vaṇṇapokkharatāya vā dhanena vā ajjhenena vā kammāyatanena vā sippāyatanena vā vijjāṭṭhānena vā sutena vā paṭibhānena vā aññataraññatarena vā vatthunāti – nīceyyo atha vāpi sarikkho.

ফুট্ঠো অনেকরূপেহীতি। অনেকৰিধেহি আকারেহি ফুট্ঠো পরেতো সমোহিতো সমন্নাগতোতি – ফুট্ঠো অনেকরূপেহি।

Phuṭṭho anekarūpehīti. Anekavidhehi ākārehi phuṭṭho pareto samohito samannāgatoti – phuṭṭho anekarūpehi.

নাতুমানং ৰিকপ্পযং তিট্ঠেতি। আতুমা ৰুচ্চতি অত্তা। অত্তানং কপ্পেন্তো ৰিকপ্পেন্তো ৰিকপ্পং আপজ্জন্তো ন তিট্ঠেয্যাতি – নাতুমানং ৰিকপ্পযং তিট্ঠে।

Nātumānaṃvikappayaṃ tiṭṭheti. Ātumā vuccati attā. Attānaṃ kappento vikappento vikappaṃ āpajjanto na tiṭṭheyyāti – nātumānaṃ vikappayaṃ tiṭṭhe.

তেনাহ ভগৰা –

Tenāha bhagavā –

‘‘সেয্যো ন তেন মঞ্ঞেয্য, নীচেয্যো অথ ৰাপি সরিক্খো।

‘‘Seyyo na tena maññeyya, nīceyyo atha vāpi sarikkho;

ফুট্ঠো অনেকরূপেহি, নাতুমানং ৰিকপ্পযং তিট্ঠে’’তি॥

Phuṭṭho anekarūpehi, nātumānaṃ vikappayaṃ tiṭṭhe’’ti.

১৫৪.

154.

অজ্ঝত্তমেৰুপসমে , ন অঞ্ঞতো ভিক্খু সন্তিমেসেয্য।

Ajjhattamevupasame , na aññato bhikkhu santimeseyya;

অজ্ঝত্তং উপসন্তস্স, নত্থি অত্তা ²⁷ কুতো নিরত্তা ²⁸ ৰা॥

Ajjhattaṃ upasantassa, natthi attā²⁹kuto nirattā³⁰vā.

অজ্ঝত্তমেৰুপসমেতি। অজ্ঝত্তং রাগং সমেয্য, দোসং সমেয্য, মোহং সমেয্য, কোধং…পে॰… উপনাহং… মক্খং… পল়াসং… ইস্সং… মচ্ছরিযং… মাযং… সাঠেয্যং… থম্ভং… সারম্ভং … মানং… অতিমানং… মদং… পমাদং… সব্বে কিলেসে… সব্বে দুচ্চরিতে… সব্বে দরথে… সব্বে পরিল়াহে… সব্বে সন্তাপে… সব্বাকুসলাভিসঙ্খারে সমেয্য উপসমেয্য ৰূপসমেয্য নিব্বাপেয্য পটিপস্সম্ভেয্যাতি – অজ্ঝত্তমেৰুপসমে।

Ajjhattamevupasameti. Ajjhattaṃ rāgaṃ sameyya, dosaṃ sameyya, mohaṃ sameyya, kodhaṃ…pe… upanāhaṃ… makkhaṃ… paḷāsaṃ… issaṃ… macchariyaṃ… māyaṃ… sāṭheyyaṃ… thambhaṃ… sārambhaṃ … mānaṃ… atimānaṃ… madaṃ… pamādaṃ… sabbe kilese… sabbe duccarite… sabbe darathe… sabbe pariḷāhe… sabbe santāpe… sabbākusalābhisaṅkhāre sameyya upasameyya vūpasameyya nibbāpeyya paṭipassambheyyāti – ajjhattamevupasame.

ন অঞ্ঞতো ভিক্খু সন্তিমেসেয্যাতি। অঞ্ঞতো অসুদ্ধিমগ্গেন, মিচ্ছাপটিপদায, অনিয্যানপতেন, অঞ্ঞত্র সতিপট্ঠানেহি, অঞ্ঞত্র সম্মপ্পধানেহি, অঞ্ঞত্র ইদ্ধিপাদেহি, অঞ্ঞত্র ইন্দ্রিযেহি, অঞ্ঞত্র বলেহি, অঞ্ঞত্র বোজ্ঝঙ্গেহি, অঞ্ঞত্র অরিযা অট্ঠঙ্গিকা মগ্গা সন্তিং উপসন্তিং ৰূপসন্তিং নিব্বুতিং পটিপস্সদ্ধিং ন এসেয্য ন গৰেসেয্য ন পরিযেসেয্যাতি – ন অঞ্ঞতো ভিক্খু সন্তিমেসেয্য।

Na aññato bhikkhu santimeseyyāti. Aññato asuddhimaggena, micchāpaṭipadāya, aniyyānapatena, aññatra satipaṭṭhānehi, aññatra sammappadhānehi, aññatra iddhipādehi, aññatra indriyehi, aññatra balehi, aññatra bojjhaṅgehi, aññatra ariyā aṭṭhaṅgikā maggā santiṃ upasantiṃ vūpasantiṃ nibbutiṃ paṭipassaddhiṃ na eseyya na gaveseyya na pariyeseyyāti – na aññato bhikkhu santimeseyya.

অজ্ঝত্তং উপসন্তস্সাতি। অজ্ঝত্তং রাগং সন্তস্স, দোসং সন্তস্স, মোহং সন্তস্স…পে॰… সব্বাকুসলাভিসঙ্খারে সন্তস্স উপসন্তস্স ৰূপসন্তস্স নিব্বুতস্স পটিপস্সদ্ধিযাতি – অজ্ঝত্তং উপসন্তস্স।

Ajjhattaṃupasantassāti. Ajjhattaṃ rāgaṃ santassa, dosaṃ santassa, mohaṃ santassa…pe… sabbākusalābhisaṅkhāre santassa upasantassa vūpasantassa nibbutassa paṭipassaddhiyāti – ajjhattaṃ upasantassa.

নত্থি অত্তা কুতো নিরত্তা ৰাতি। নত্থীতি পটিক্খেপো। অত্তাতি অত্তদিট্ঠি নত্থি; নিরত্তাতি উচ্ছেদদিট্ঠি নত্থি। অত্তাতি গহিতং নত্থি; নিরত্তাতি মুঞ্চিতব্বং নত্থি। যস্সত্থি গহিতং, তস্সত্থি মুঞ্চিতব্বং। তস্স গহিতং গাহং মুঞ্চনং সমতিক্কন্তো অরহা ৰুদ্ধিপারিহানিৰীতিৰত্তো। সো ৰুট্ঠৰাসো চিণ্ণচরণো…পে॰… জাতিমরণসংসারো, নত্থি তস্স পুনব্ভৰোতি – নত্থি অত্তা কুতো নিরত্তা ৰা।

Natthi attā kuto nirattā vāti. Natthīti paṭikkhepo. Attāti attadiṭṭhi natthi; nirattāti ucchedadiṭṭhi natthi. Attāti gahitaṃ natthi; nirattāti muñcitabbaṃ natthi. Yassatthi gahitaṃ, tassatthi muñcitabbaṃ. Tassa gahitaṃ gāhaṃ muñcanaṃ samatikkanto arahā vuddhipārihānivītivatto. So vuṭṭhavāso ciṇṇacaraṇo…pe… jātimaraṇasaṃsāro, natthi tassa punabbhavoti – natthi attā kuto nirattā vā.

তেনাহ ভগৰা –

Tenāha bhagavā –

‘‘অজ্ঝত্তমেৰুপসমে, ন অঞ্ঞতো ভিক্খু সন্তিমেসেয্য।

‘‘Ajjhattamevupasame, na aññato bhikkhu santimeseyya;

অজ্ঝত্তং উপসন্তস্স, নত্থি অত্তা কুতো নিরত্তা ৰা’’তি॥

Ajjhattaṃ upasantassa, natthi attā kuto nirattā vā’’ti.

১৫৫.

155.

মজ্ঝে যথা সমুদ্দস্স, ঊমি নো জাযতী ঠিতো হোতি।

Majjheyathā samuddassa, ūmi no jāyatī ṭhito hoti;

এৰং ঠিতো অনেজস্স, উস্সদং ভিক্খু ন করেয্য ³¹ কুহিঞ্চি॥

Evaṃ ṭhito anejassa, ussadaṃ bhikkhu na kareyya³²kuhiñci.

মজ্ঝে যথা সমুদ্দস্স, ঊমি নো জাযতী ঠিতো হোতীতি। সমুদ্দো চতুরাসীতিযোজনসহস্সানি উব্বেধেন গম্ভীরো। হেট্ঠা চত্তারীসযোজনসহস্সানি উদকং মচ্ছকচ্ছপেহি কম্পতি। উপরি চত্তারীসযোজনসহস্সানি উদকং ৰাতেহি কম্পতি। মজ্ঝে চত্তারীসযোজনসহস্সানি উদকং ন কম্পতি ন ৰিকম্পতি ন চলতি ন ৰেধতি নপ্পৰেধতি ন সম্পৰেধতি। অনেরিতো অঘট্টিতো অচলিতো অলুল়িতো অভন্তো ৰূপসন্তো তত্র ঊমি নো জাযতি, ঠিতো হোতি সমুদ্দোতি। এৰম্পি মজ্ঝে যথা সমুদ্দস্স ঊমি নো জাযতী ঠিতো হোতি।

Majjhe yathā samuddassa, ūmi no jāyatī ṭhito hotīti. Samuddo caturāsītiyojanasahassāni ubbedhena gambhīro. Heṭṭhā cattārīsayojanasahassāni udakaṃ macchakacchapehi kampati. Upari cattārīsayojanasahassāni udakaṃ vātehi kampati. Majjhe cattārīsayojanasahassāni udakaṃ na kampati na vikampati na calati na vedhati nappavedhati na sampavedhati. Anerito aghaṭṭito acalito aluḷito abhanto vūpasanto tatra ūmi no jāyati, ṭhito hoti samuddoti. Evampi majjhe yathā samuddassa ūmi no jāyatī ṭhito hoti.

অথ ৰা সত্তন্নং পব্বতানং অন্তরিকাসু সত্তসীদন্তরা মহাসমুদ্দা। ³³ তত্র উদকং ন কম্পতি ন ৰিকম্পতি ন চলতি ন ৰেধতি নপ্পৰেধতি ন সম্পৰেধতি। অনেরিতো অঘট্টিতো অচলিতো অলুল়িতো অভন্তো ৰূপসন্তো তত্র ঊমি নো জাযতি, ঠিতো হোতি সমুদ্দোতি। এৰম্পি মজ্ঝে যথা সমুদ্দস্স ঊমি নো জাযতী ঠিতো হোতি।

Atha vā sattannaṃ pabbatānaṃ antarikāsu sattasīdantarā mahāsamuddā. ³⁴ Tatra udakaṃ na kampati na vikampati na calati na vedhati nappavedhati na sampavedhati. Anerito aghaṭṭito acalito aluḷito abhanto vūpasanto tatra ūmi no jāyati, ṭhito hoti samuddoti. Evampi majjhe yathā samuddassa ūmi no jāyatī ṭhito hoti.

এৰং ঠিতো অনেজস্সাতি। এৰন্তি ওপম্মসম্পটিপাদনং। ঠিতোতি লাভেপি ন কম্পতি, অলাভেপি ন কম্পতি, যসেপি ন কম্পতি, অযসেপি ন কম্পতি, পসংসাযপি ন কম্পতি, নিন্দাযপি ন কম্পতি, সুখেপি ন কম্পতি, দুক্খেপি ন কম্পতি ন ৰিকম্পতি ন চলতি ন ৰেধতি নপ্পৰেধতি ন সম্পৰেধতীতি – এৰং ঠিতো। অনেজস্সাতি এজা ৰুচ্চতি তণ্হা। যো রাগো সারাগো…পে॰… অভিজ্ঝা লোভো অকুসলমূলং। যস্সেসা এজা তণ্হা পহীনা উচ্ছিন্না সমুচ্ছিন্না ৰূপসন্তা পটিপস্সদ্ধা অভব্বুপ্পত্তিকা ঞাণগ্গিনা দড্ঢা, সো ৰুচ্চতি অনেজো। এজায পহীনত্তা অনেজো ; সো লাভেপি ন ইঞ্জতি, অলাভেপি ন ইঞ্জতি, যসেপি ন ইঞ্জতি, অযসেপি ন ইঞ্জতি, পসংসাযপি ন ইঞ্জতি, নিন্দাযপি ন ইঞ্জতি, সুখেপি ন ইঞ্জতি, দুক্খেপি ন ইঞ্জতি, ন চলতি ন ৰেধতি নপ্পৰেধতি ন সম্পৰেধতীতি – এৰং ঠিতো অনেজস্স।

Evaṃ ṭhito anejassāti. Evanti opammasampaṭipādanaṃ. Ṭhitoti lābhepi na kampati, alābhepi na kampati, yasepi na kampati, ayasepi na kampati, pasaṃsāyapi na kampati, nindāyapi na kampati, sukhepi na kampati, dukkhepi na kampati na vikampati na calati na vedhati nappavedhati na sampavedhatīti – evaṃ ṭhito. Anejassāti ejā vuccati taṇhā. Yo rāgo sārāgo…pe… abhijjhā lobho akusalamūlaṃ. Yassesā ejā taṇhā pahīnā ucchinnā samucchinnā vūpasantā paṭipassaddhā abhabbuppattikā ñāṇagginā daḍḍhā, so vuccati anejo. Ejāya pahīnattā anejo ; so lābhepi na iñjati, alābhepi na iñjati, yasepi na iñjati, ayasepi na iñjati, pasaṃsāyapi na iñjati, nindāyapi na iñjati, sukhepi na iñjati, dukkhepi na iñjati, na calati na vedhati nappavedhati na sampavedhatīti – evaṃ ṭhito anejassa.

উস্সদং ভিক্খু ন করেয্য কুহিঞ্চীতি। উস্সদাতি সত্তুস্সদা – রাগুস্সদং ³⁵, দোসুস্সদং, মোহুস্সদং, মানুস্সদং, দিট্ঠুস্সদং, কিলেসুস্সদং, কম্মুস্সদং ন করেয্য ন জনেয্য ন সঞ্জনেয্য ন নিব্বত্তেয্য নাভিনিব্বত্তেয্য। কুহিঞ্চীতি কুহিঞ্চি কিস্মিঞ্চি কত্থচি অজ্ঝত্তং ৰা বহিদ্ধা ৰা অজ্ঝত্তবহিদ্ধা ৰাতি – উস্সদং ভিক্খু ন করেয্য কুহিঞ্চি।

Ussadaṃ bhikkhu na kareyya kuhiñcīti. Ussadāti sattussadā – rāgussadaṃ ³⁶, dosussadaṃ, mohussadaṃ, mānussadaṃ, diṭṭhussadaṃ, kilesussadaṃ, kammussadaṃ na kareyya na janeyya na sañjaneyya na nibbatteyya nābhinibbatteyya. Kuhiñcīti kuhiñci kismiñci katthaci ajjhattaṃ vā bahiddhā vā ajjhattabahiddhā vāti – ussadaṃ bhikkhu na kareyya kuhiñci.

তেনাহ ভগৰা –

Tenāha bhagavā –

‘‘মজ্ঝে যথা সমুদ্দস্স, ঊমি নো জাযতী ঠিতো হোতি।

‘‘Majjhe yathā samuddassa, ūmi no jāyatī ṭhito hoti;

এৰং ঠিতো অনেজস্স, উস্সদং ভিক্খু ন করেয্য কুহিঞ্চী’’তি॥

Evaṃ ṭhito anejassa, ussadaṃ bhikkhu na kareyya kuhiñcī’’ti.

১৫৬.

156.

অকিত্তযী ৰিৰটচক্খু, সক্খিধম্মং পরিস্সযৰিনযং।

Akittayī vivaṭacakkhu, sakkhidhammaṃ parissayavinayaṃ;

পটিপদং ৰদেহি ভদ্দন্তে, পাতিমোক্খং অথ ৰাপি সমাধিং॥

Paṭipadaṃ vadehi bhaddante, pātimokkhaṃ atha vāpi samādhiṃ.

অকিত্তযী ৰিৰটচক্খূতি। অকিত্তযীতি কিত্তিতং আচিক্খিতং দেসিতং পঞ্ঞপিতং পট্ঠপিতং ৰিৰটং ৰিভত্তং উত্তানীকতং পকাসিতন্তি – অকিত্তযি ³⁷। ৰিৰটচক্খূতি ভগৰা পঞ্চহি চক্খূহি ৰিৰটচক্খু – মংসচক্খুনাপি ৰিৰটচক্খু, দিব্বেন চক্খুনাপি ৰিৰটচক্খু, পঞ্ঞাচক্খুনাপি ৰিৰটচক্খু, বুদ্ধচক্খুনাপি ৰিৰটচক্খু, সমন্তচক্খুনাপি ৰিৰটচক্খু।

Akittayī vivaṭacakkhūti. Akittayīti kittitaṃ ācikkhitaṃ desitaṃ paññapitaṃ paṭṭhapitaṃ vivaṭaṃ vibhattaṃ uttānīkataṃ pakāsitanti – akittayi ³⁸. Vivaṭacakkhūti bhagavā pañcahi cakkhūhi vivaṭacakkhu – maṃsacakkhunāpi vivaṭacakkhu, dibbena cakkhunāpi vivaṭacakkhu, paññācakkhunāpi vivaṭacakkhu, buddhacakkhunāpi vivaṭacakkhu, samantacakkhunāpi vivaṭacakkhu.

কথং ভগৰা মংসচক্খুনাপি ৰিৰটচক্খু? মংসচক্খুম্হিপি ভগৰতো পঞ্চ ৰণ্ণা সংৰিজ্জন্তি – নীলো চ ৰণ্ণো, পীতকো চ ৰণ্ণো, লোহিতকো চ ৰণ্ণো, কণ্হো চ ৰণ্ণো, ওদাতো চ ৰণ্ণো। অক্খিলোমানি চ ভগৰতো যত্থ চ অক্খিলোমানি পতিট্ঠিতানি তং নীলং হোতি সুনীলং পাসাদিকং দস্সনেয্যং উমাপুপ্ফসমানং ³⁹। তস্স পরতো পীতকং হোতি সুপীতকং সুৰণ্ণৰণ্ণং পাসাদিকং দস্সনেয্যং কণিকারপুপ্ফসমানং। উভযতো চ অক্খিকূটানি ভগৰতো লোহিতকানি হোন্তি সুলোহিতকানি পাসাদিকানি দস্সনেয্যানি ইন্দগোপকসমানানি। মজ্ঝে কণ্হং হোতি সুকণ্হং অলূখং সিনিদ্ধং পাসাদিকং দস্সনেয্যং অদ্দারিট্ঠকসমানং ⁴⁰। তস্স পরতো ওদাতং হোতি সুওদাতং সেতং পণ্ডরং পাসাদিকং দস্সনেয্যং ওসধিতারকসমানং। তেন ভগৰা পাকতিকেন মংসচক্খুনা অত্তভাৰপরিযাপন্নেন পুরিমসুচরিতকম্মাভিনিব্বত্তেন সমন্তা যোজনং পস্সতি দিৰা চেৰ রত্তিঞ্চ। যদা হিপি চতুরঙ্গসমন্নাগতো অন্ধকারো হোতি। সূরিযো ৰা অত্থঙ্গতো হোতি। কাল়পক্খো চ উপোসথো হোতি। তিব্বো চ ৰনসণ্ডো হোতি। মহা চ কাল়মেঘো ⁴¹ অব্ভুট্ঠিতো হোতি। এৰরূপেপি চতুরঙ্গসমন্নাগতে অন্ধকারে সমন্তা যোজনং পস্সতি। নত্থি সো কুট্টো ⁴² ৰা কৰাটং ৰা পাকারো ৰা পব্বতো ৰা গচ্ছো ৰা লতা ৰা আৰরণং রূপানং দস্সনায। একঞ্চে তিলফলং নিমিত্তং কত্ৰা তিলৰাহে পক্খিপেয্য। তঞ্ঞেৰ তিলফলং উদ্ধরেয্য। এৰং পরিসুদ্ধং ভগৰতো পাকতিকং মংসচক্খু। এৰং ভগৰা মংসচক্খুনাপি ৰিৰটচক্খু।

Kathaṃ bhagavā maṃsacakkhunāpi vivaṭacakkhu? Maṃsacakkhumhipi bhagavato pañca vaṇṇā saṃvijjanti – nīlo ca vaṇṇo, pītako ca vaṇṇo, lohitako ca vaṇṇo, kaṇho ca vaṇṇo, odāto ca vaṇṇo. Akkhilomāni ca bhagavato yattha ca akkhilomāni patiṭṭhitāni taṃ nīlaṃ hoti sunīlaṃ pāsādikaṃ dassaneyyaṃ umāpupphasamānaṃ ⁴³. Tassa parato pītakaṃ hoti supītakaṃ suvaṇṇavaṇṇaṃ pāsādikaṃ dassaneyyaṃ kaṇikārapupphasamānaṃ. Ubhayato ca akkhikūṭāni bhagavato lohitakāni honti sulohitakāni pāsādikāni dassaneyyāni indagopakasamānāni. Majjhe kaṇhaṃ hoti sukaṇhaṃ alūkhaṃ siniddhaṃ pāsādikaṃ dassaneyyaṃ addāriṭṭhakasamānaṃ ⁴⁴. Tassa parato odātaṃ hoti suodātaṃ setaṃ paṇḍaraṃ pāsādikaṃ dassaneyyaṃ osadhitārakasamānaṃ. Tena bhagavā pākatikena maṃsacakkhunā attabhāvapariyāpannena purimasucaritakammābhinibbattena samantā yojanaṃ passati divā ceva rattiñca. Yadā hipi caturaṅgasamannāgato andhakāro hoti. Sūriyo vā atthaṅgato hoti. Kāḷapakkho ca uposatho hoti. Tibbo ca vanasaṇḍo hoti. Mahā ca kāḷamegho ⁴⁵ abbhuṭṭhito hoti. Evarūpepi caturaṅgasamannāgate andhakāre samantā yojanaṃ passati. Natthi so kuṭṭo ⁴⁶ vā kavāṭaṃ vā pākāro vā pabbato vā gaccho vā latā vā āvaraṇaṃ rūpānaṃ dassanāya. Ekañce tilaphalaṃ nimittaṃ katvā tilavāhe pakkhipeyya. Taññeva tilaphalaṃ uddhareyya. Evaṃ parisuddhaṃ bhagavato pākatikaṃ maṃsacakkhu. Evaṃ bhagavā maṃsacakkhunāpi vivaṭacakkhu.

কথং ভগৰা দিব্বেন চক্খুনাপি ৰিৰটচক্খু? ভগৰা দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে। যথাকম্মূপগে সত্তে পজানাতি – ‘‘ইমে ৰত ভোন্তো সত্তা কাযদুচ্চরিতেন সমন্নাগতা ৰচীদুচ্চরিতেন সমন্নাগতা মনোদুচ্চরিতেন সমন্নাগতা অরিযানং উপৰাদকা মিচ্ছাদিট্ঠিকা মিচ্ছাদিট্ঠিকম্মসমাদানা , তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্না। ইমে ৰা পন ভোন্তো সত্তা কাযসুচরিতেন সমন্নাগতা ৰচীসুচরিতেন সমন্নাগতা মনোসুচরিতেন সমন্নাগতা অরিযানং অনুপৰাদকা সম্মাদিট্ঠিকা সম্মাদিট্ঠিকম্মসমাদানা, তে কাযস্স ভেদা পরং মরণা সুগতিং সগ্গং লোকং উপপন্না’’তি । ইতি দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে; যথাকম্মূপগে সত্তে পজানাতি। আকঙ্খমানো চ ভগৰা একম্পি লোকধাতুং পস্সেয্য, দ্ৰেপি লোকধাতুযো পস্সেয্য, তিস্সোপি লোকধাতুযো পস্সেয্য, চতস্সোপি লোকধাতুযো পস্সেয্য, পঞ্চপি লোকধাতুযো পস্সেয্য, দসপি লোকধাতুযো পস্সেয্য, ৰীসম্পি লোকধাতুযো পস্সেয্য, তিংসম্পি লোকধাতুযো পস্সেয্য, চত্তালীসম্পি লোকধাতুযো পস্সেয্য, পঞ্ঞাসম্পি লোকধাতুযো পস্সেয্য, সতম্পি লোকধাতুযো পস্সেয্য, সহস্সিম্পি চূল়নিকং লোকধাতুং পস্সেয্য, দ্ৰিসহস্সিম্পি মজ্ঝিমিকং লোকধাতুং পস্সেয্য, তিসহস্সিম্পি লোকধাতুং পস্সেয্য, মহাসহস্সিম্পি ⁴⁷ লোকধাতুং পস্সেয্য। যাৰতকং ৰা পন আকঙ্খেয্য তাৰতকং পস্সেয্য। এৰং পরিসুদ্ধং ভগৰতো দিব্বচক্খু। এৰং ভগৰা দিব্বেন চক্খুনাপি ৰিৰটচক্খু।

Kathaṃ bhagavā dibbena cakkhunāpi vivaṭacakkhu? Bhagavā dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate. Yathākammūpage satte pajānāti – ‘‘ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṃ upavādakā micchādiṭṭhikā micchādiṭṭhikammasamādānā , te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā. Ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṃ anupavādakā sammādiṭṭhikā sammādiṭṭhikammasamādānā, te kāyassa bhedā paraṃ maraṇā sugatiṃ saggaṃ lokaṃ upapannā’’ti . Iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate; yathākammūpage satte pajānāti. Ākaṅkhamāno ca bhagavā ekampi lokadhātuṃ passeyya, dvepi lokadhātuyo passeyya, tissopi lokadhātuyo passeyya, catassopi lokadhātuyo passeyya, pañcapi lokadhātuyo passeyya, dasapi lokadhātuyo passeyya, vīsampi lokadhātuyo passeyya, tiṃsampi lokadhātuyo passeyya, cattālīsampi lokadhātuyo passeyya, paññāsampi lokadhātuyo passeyya, satampi lokadhātuyo passeyya, sahassimpi cūḷanikaṃ lokadhātuṃ passeyya, dvisahassimpi majjhimikaṃ lokadhātuṃ passeyya, tisahassimpi lokadhātuṃ passeyya, mahāsahassimpi ⁴⁸ lokadhātuṃ passeyya. Yāvatakaṃ vā pana ākaṅkheyya tāvatakaṃ passeyya. Evaṃ parisuddhaṃ bhagavato dibbacakkhu. Evaṃ bhagavā dibbena cakkhunāpi vivaṭacakkhu.

কথং ভগৰা পঞ্ঞাচক্খুনাপি ৰিৰটচক্খু? ভগৰা মহাপঞ্ঞো পুথুপঞ্ঞো হাসপঞ্ঞো জৰনপঞ্ঞো তিক্খপঞ্ঞো নিব্বেধিকপঞ্ঞো পঞ্ঞাপভেদকুসলো পভিন্নঞাণো অধিগতপটিসম্ভিদো চতুৰেসারজ্জপ্পত্তো দসবলধারী পুরিসাসভো পুরিসসীহো পুরিসনাগো পুরিসাজঞ্ঞো পুরিসধোরয্হো অনন্তঞাণো অনন্ততেজো অনন্তযসো অড্ঢো মহদ্ধনো ধনৰা নেতা ৰিনেতা অনুনেতা পঞ্ঞাপেতা অনিজ্ঝাপেতা পেক্খেতা পসাদেতা। সো হি ভগৰা অনুপ্পন্নস্স মগ্গস্স উপ্পাদেতা, অসঞ্জাতস্স মগ্গস্স সঞ্জনেতা, অনক্খাতস্স মগ্গস্স অক্খাতা, মগ্গঞ্ঞূ মগ্গৰিদূ মগ্গকোৰিদো মগ্গানুগা চ পন এতরহি সাৰকা ৰিহরন্তি পচ্ছা সমন্নাগতা।

Kathaṃ bhagavā paññācakkhunāpi vivaṭacakkhu? Bhagavā mahāpañño puthupañño hāsapañño javanapañño tikkhapañño nibbedhikapañño paññāpabhedakusalo pabhinnañāṇo adhigatapaṭisambhido catuvesārajjappatto dasabaladhārī purisāsabho purisasīho purisanāgo purisājañño purisadhorayho anantañāṇo anantatejo anantayaso aḍḍho mahaddhano dhanavā netā vinetā anunetā paññāpetā anijjhāpetā pekkhetā pasādetā. So hi bhagavā anuppannassa maggassa uppādetā, asañjātassa maggassa sañjanetā, anakkhātassa maggassa akkhātā, maggaññū maggavidū maggakovido maggānugā ca pana etarahi sāvakā viharanti pacchā samannāgatā.

সো হি ভগৰা জানং জানাতি পস্সং পস্সতি, চক্খুভূতো ঞাণভূতো ধম্মভূতো ব্রহ্মভূতো ৰত্তা পৰত্তা অত্থস্স নিন্নেতা অমতস্স দাতা ধম্মস্সামী তথাগতো। নত্থি তস্স ভগৰতো অঞ্ঞাতং অদিট্ঠং অৰিদিতং অসচ্ছিকতং অফস্সিতং পঞ্ঞায। অতীতং অনাগতং পচ্চুপ্পন্নং ⁴⁹ উপাদায সব্বে ধম্মা সব্বাকারেন বুদ্ধস্স ভগৰতো ঞাণমুখে আপাথং আগচ্ছন্তি। যং কিঞ্চি নেয্যং নাম অত্থি জানিতব্বং ⁵⁰ অত্তত্থো ৰা পরত্থো ৰা উভযত্থো ৰা দিট্ঠধম্মিকো ৰা অত্থো সম্পরাযিকো ৰা অত্থো উত্তানো ৰা অত্থো গম্ভীরো ৰা অত্থো গূল়্হো ৰা অত্থো পটিচ্ছন্নো ৰা অত্থো নেয্যো ৰা অত্থো নীতো ৰা অত্থো অনৰজ্জো ৰা অত্থো নিক্কিলেসো ৰা অত্থো ৰোদানো ৰা অত্থো পরমত্থো ৰা অত্থো, সব্বং তং ⁵¹ অন্তোবুদ্ধঞাণে পরিৰত্ততি।

So hi bhagavā jānaṃ jānāti passaṃ passati, cakkhubhūto ñāṇabhūto dhammabhūto brahmabhūto vattā pavattā atthassa ninnetā amatassa dātā dhammassāmī tathāgato. Natthi tassa bhagavato aññātaṃ adiṭṭhaṃ aviditaṃ asacchikataṃ aphassitaṃ paññāya. Atītaṃ anāgataṃ paccuppannaṃ ⁵² upādāya sabbe dhammā sabbākārena buddhassa bhagavato ñāṇamukhe āpāthaṃ āgacchanti. Yaṃ kiñci neyyaṃ nāma atthi jānitabbaṃ ⁵³ attattho vā parattho vā ubhayattho vā diṭṭhadhammiko vā attho samparāyiko vā attho uttāno vā attho gambhīro vā attho gūḷho vā attho paṭicchanno vā attho neyyo vā attho nīto vā attho anavajjo vā attho nikkileso vā attho vodāno vā attho paramattho vā attho, sabbaṃ taṃ ⁵⁴ antobuddhañāṇe parivattati.

সব্বং কাযকম্মং বুদ্ধস্স ভগৰতো ঞাণানুপরিৰত্তি সব্বং ৰচীকম্মং… সব্বং মনোকম্মং… অতীতে বুদ্ধস্স ভগৰতো অপ্পটিহতং ঞাণং, অনাগতে পচ্চুপ্পন্নে অপ্পটিহতং ঞাণং। যাৰতকং নেয্যং তাৰতকং ঞাণং, যাৰতকং ঞাণং তাৰতকং নেয্যং; নেয্যপরিযন্তিকং ঞাণং ঞাণপরিযন্তিকং নেয্যং, নেয্যং অতিক্কমিত্ৰা ঞাণং নপ্পৰত্ততি, ঞাণং অতিক্কমিত্ৰা নেয্যপথো নত্থি। অঞ্ঞমঞ্ঞপরিযন্তট্ঠাযিনো তে ধম্মা। যথা দ্ৰিন্নং সমুগ্গপটলানং সম্মাফুসিতানং হেট্ঠিমং সমুগ্গপটলং উপরিমং নাতিৰত্ততি, উপরিমং সমুগ্গপটলং হেট্ঠিমং নাতিৰত্ততি, অঞ্ঞমঞ্ঞপরিযন্তট্ঠাযিনো; এৰমেৰ বুদ্ধস্স ভগৰতো নেয্যঞ্চ ঞাণঞ্চ অঞ্ঞমঞ্ঞপরিযন্তট্ঠাযিনো। যাৰতকং নেয্যং তাৰতকং ঞাণং, যাৰতকং ঞাণং তাৰতকং নেয্যং; নেয্যপরিযন্তিকং ঞাণং ঞাণপরিযন্তিকং নেয্যং। নেয্যং অতিক্কমিত্ৰা ঞাণং নপ্পৰত্ততি, ঞাণং অতিক্কমিত্ৰা নেয্যপথো নত্থি। অঞ্ঞমঞ্ঞপরিযন্তট্ঠাযিনো তে ধম্মা।

Sabbaṃ kāyakammaṃ buddhassa bhagavato ñāṇānuparivatti sabbaṃ vacīkammaṃ… sabbaṃ manokammaṃ… atīte buddhassa bhagavato appaṭihataṃ ñāṇaṃ, anāgate paccuppanne appaṭihataṃ ñāṇaṃ. Yāvatakaṃ neyyaṃ tāvatakaṃ ñāṇaṃ, yāvatakaṃ ñāṇaṃ tāvatakaṃ neyyaṃ; neyyapariyantikaṃ ñāṇaṃ ñāṇapariyantikaṃ neyyaṃ, neyyaṃ atikkamitvā ñāṇaṃ nappavattati, ñāṇaṃ atikkamitvā neyyapatho natthi. Aññamaññapariyantaṭṭhāyino te dhammā. Yathā dvinnaṃ samuggapaṭalānaṃ sammāphusitānaṃ heṭṭhimaṃ samuggapaṭalaṃ uparimaṃ nātivattati, uparimaṃ samuggapaṭalaṃ heṭṭhimaṃ nātivattati, aññamaññapariyantaṭṭhāyino; evameva buddhassa bhagavato neyyañca ñāṇañca aññamaññapariyantaṭṭhāyino. Yāvatakaṃ neyyaṃ tāvatakaṃ ñāṇaṃ, yāvatakaṃ ñāṇaṃ tāvatakaṃ neyyaṃ; neyyapariyantikaṃ ñāṇaṃ ñāṇapariyantikaṃ neyyaṃ. Neyyaṃ atikkamitvā ñāṇaṃ nappavattati, ñāṇaṃ atikkamitvā neyyapatho natthi. Aññamaññapariyantaṭṭhāyino te dhammā.

সব্বধম্মেসু বুদ্ধস্স ভগৰতো ঞাণং পৰত্ততি। সব্বে ধম্মা বুদ্ধস্স ভগৰতো আৰজ্জনপটিবদ্ধা আকঙ্খপটিবদ্ধা মনসিকারপটিবদ্ধা চিত্তুপ্পাদপটিবদ্ধা। সব্বসত্তেসু বুদ্ধস্স ভগৰতো ঞাণং পৰত্ততি। সব্বেসং সত্তানং ভগৰা আসযং জানাতি, অনুসযং জানাতি, চরিতং জানাতি, অধিমুত্তিং জানাতি, অপ্পরজক্খে মহারজক্খে তিক্খিন্দ্রিযে মুদিন্দ্রিযে স্ৰাকারে দ্ৰাকারে সুৰিঞ্ঞাপযে দুৰিঞ্ঞাপযে ভব্বাভব্বে সত্তে পজানাতি। সদেৰকো লোকো সমারকো সব্রহ্মকো সস্সমণব্রাহ্মণী পজা সদেৰমনুস্সা অন্তোবুদ্ধঞাণে পরিৰত্ততি ⁵⁵।

Sabbadhammesu buddhassa bhagavato ñāṇaṃ pavattati. Sabbe dhammā buddhassa bhagavato āvajjanapaṭibaddhā ākaṅkhapaṭibaddhā manasikārapaṭibaddhā cittuppādapaṭibaddhā. Sabbasattesu buddhassa bhagavato ñāṇaṃ pavattati. Sabbesaṃ sattānaṃ bhagavā āsayaṃ jānāti, anusayaṃ jānāti, caritaṃ jānāti, adhimuttiṃ jānāti, apparajakkhe mahārajakkhe tikkhindriye mudindriye svākāre dvākāre suviññāpaye duviññāpaye bhabbābhabbe satte pajānāti. Sadevako loko samārako sabrahmako sassamaṇabrāhmaṇī pajā sadevamanussā antobuddhañāṇe parivattati ⁵⁶.

যথা যে কেচি মচ্ছকচ্ছপা অন্তমসো তিমিতিমিঙ্গলং উপাদায অন্তোমহাসমুদ্দে পরিৰত্তন্তি; এৰমেৰ সদেৰকো লোকো সমারকো সব্রহ্মকো সস্সমণব্রাহ্মণী পজা সদেৰমনুস্সা অন্তোবুদ্ধঞাণে পরিৰত্ততি ⁵⁷। যথা যে কেচি পক্খী অন্তমসো গরুল়ং ৰেনতেয্যং উপাদায আকাসস্স পদেসে পরিৰত্তন্তি; এৰমেৰ যেপি তে সারিপুত্তসমা পঞ্ঞায তেপি বুদ্ধঞাণস্স পদেসে পরিৰত্তন্তি; বুদ্ধঞাণং দেৰমনুস্সানং পঞ্ঞং ফরিত্ৰা অভিভৰিত্ৰা তিট্ঠতি। যেপি তে খত্তিযপণ্ডিতা ব্রাহ্মণপণ্ডিতা গহপতিপণ্ডিতা সমণপণ্ডিতা নিপুণা কতপরপ্পৰাদা ৰালৰেধিরূপা ৰোভিন্দন্তা মঞ্ঞে চরন্তি পঞ্ঞাগতেন দিট্ঠিগতানি, তে পঞ্হং অভিসঙ্খরিত্ৰা অভিসঙ্খরিত্ৰা তথাগতং উপসঙ্কমিত্ৰা পুচ্ছন্তি গূল়্হানি চ পটিচ্ছন্নানি চ। কথিতা ৰিসজ্জিতা চ তে পঞ্হা ভগৰতা হোন্তি নিদ্দিট্ঠকারণা। উপক্খিত্তকা চ তে ভগৰতো সম্পজ্জন্তি। অথ খো ভগৰা তত্থ অতিরোচতি যদিদং পঞ্ঞাযাতি। এৰং ভগৰা পঞ্ঞাচক্খুনাপি ৰিৰটচক্খু।

Yathā ye keci macchakacchapā antamaso timitimiṅgalaṃ upādāya antomahāsamudde parivattanti; evameva sadevako loko samārako sabrahmako sassamaṇabrāhmaṇī pajā sadevamanussā antobuddhañāṇe parivattati ⁵⁸. Yathā ye keci pakkhī antamaso garuḷaṃ venateyyaṃ upādāya ākāsassa padese parivattanti; evameva yepi te sāriputtasamā paññāya tepi buddhañāṇassa padese parivattanti; buddhañāṇaṃ devamanussānaṃ paññaṃ pharitvā abhibhavitvā tiṭṭhati. Yepi te khattiyapaṇḍitā brāhmaṇapaṇḍitā gahapatipaṇḍitā samaṇapaṇḍitā nipuṇā kataparappavādā vālavedhirūpā vobhindantā maññe caranti paññāgatena diṭṭhigatāni, te pañhaṃ abhisaṅkharitvā abhisaṅkharitvā tathāgataṃ upasaṅkamitvā pucchanti gūḷhāni ca paṭicchannāni ca. Kathitā visajjitā ca te pañhā bhagavatā honti niddiṭṭhakāraṇā. Upakkhittakā ca te bhagavato sampajjanti. Atha kho bhagavā tattha atirocati yadidaṃ paññāyāti. Evaṃ bhagavā paññācakkhunāpi vivaṭacakkhu.

কথং ভগৰা বুদ্ধচক্খুনাপি ৰিৰটচক্খু? ভগৰা বুদ্ধচক্খুনা লোকং ৰোলোকেন্তো অদ্দস সত্তে অপ্পরজক্খে মহারজক্খে তিক্খিন্দ্রিযে মুদিন্দ্রিযে স্ৰাকারে দ্ৰাকারে সুৰিঞ্ঞাপযে দুৰিঞ্ঞাপযে অপ্পেকচ্চে পরলোকৰজ্জভযদস্সাৰিনো ৰিহরন্তে, অপ্পেকচ্চে ন পরলোকৰজ্জভযদস্সাৰিনো ৰিহরন্তে। সেয্যথাপি নাম উপ্পলিনিযং ৰা পদুমিনিযং ৰা পুণ্ডরীকিনিযং ৰা অপ্পেকচ্চানি উপ্পলানি ৰা পদুমানি ৰা পুণ্ডরীকানি ৰা উদকে জাতানি উদকে সংৰড্ঢানি উদকা অনুগ্গতানি অন্তোনিমুগ্গপোসীনি, অপ্পেকচ্চানি উপ্পলানি ৰা পদুমানি ৰা পুণ্ডরীকানি ৰা উদকে জাতানি উদকে সংৰড্ঢানি সমোদকং ঠিতানি, অপ্পেকচ্চানি উপ্পলানি ৰা পদুমানি ৰা পুণ্ডরীকানি ৰা উদকে জাতানি উদকে সংৰড্ঢানি উদকা অচ্চুগ্গম্ম তিট্ঠন্তি অনুপলিত্তানি উদকেন; এৰমেৰ ভগৰা বুদ্ধচক্খুনা লোকং ৰোলোকেন্তো অদ্দস সত্তে অপ্পরজক্খে মহারজক্খে তিক্খিন্দ্রিযে মুদিন্দ্রিযে স্ৰাকারে দ্ৰাকারে সুৰিঞ্ঞাপযে দুৰিঞ্ঞাপযে অপ্পেকচ্চে পরলোকৰজ্জভযদস্সাৰিনো ৰিহরন্তে, অপ্পেকচ্চে ন পরলোকৰজ্জভযদস্সাৰিনো ৰিহরন্তে। জানাতি ভগৰা – ‘‘অযং পুগ্গলো রাগচরিতো, অযং দোসচরিতো, অযং মোহচরিতো, অযং ৰিতক্কচরিতো, অযং সদ্ধাচরিতো, অযং ঞাণচরিতো’’তি। রাগচরিতস্স ভগৰা পুগ্গলস্স অসুভকথং কথেতি; দোসচরিতস্স ভগৰা পুগ্গলস্স মেত্তাভাৰনং আচিক্খতি; মোহচরিতস্স ভগৰা পুগ্গলস্স উদ্দেসে পরিপুচ্ছায কালেন ধম্মস্সৰনে কালেন ধম্মসাকচ্ছায গরুসংৰাসে নিৰেসেতি; ৰিতক্কচরিতস্স ভগৰা পুগ্গলস্স আনাপানস্সতিং আচিক্খতি; সদ্ধাচরিতস্স ভগৰা পুগ্গলস্স পসাদনীযং নিমিত্তং আচিক্খতি বুদ্ধসুবোধিং ⁵⁹ ধম্মসুধম্মতং সঙ্ঘসুপ্পটিপত্তিং সীলানি চ; অত্তনো ঞাণচরিতস্স ভগৰা পুগ্গলস্স আচিক্খতি ৰিপস্সনানিমিত্তং অনিচ্চাকারং দুক্খাকারং অনত্তাকারং।

Kathaṃ bhagavā buddhacakkhunāpi vivaṭacakkhu? Bhagavā buddhacakkhunā lokaṃ volokento addasa satte apparajakkhe mahārajakkhe tikkhindriye mudindriye svākāre dvākāre suviññāpaye duviññāpaye appekacce paralokavajjabhayadassāvino viharante, appekacce na paralokavajjabhayadassāvino viharante. Seyyathāpi nāma uppaliniyaṃ vā paduminiyaṃ vā puṇḍarīkiniyaṃ vā appekaccāni uppalāni vā padumāni vā puṇḍarīkāni vā udake jātāni udake saṃvaḍḍhāni udakā anuggatāni antonimuggaposīni, appekaccāni uppalāni vā padumāni vā puṇḍarīkāni vā udake jātāni udake saṃvaḍḍhāni samodakaṃ ṭhitāni, appekaccāni uppalāni vā padumāni vā puṇḍarīkāni vā udake jātāni udake saṃvaḍḍhāni udakā accuggamma tiṭṭhanti anupalittāni udakena; evameva bhagavā buddhacakkhunā lokaṃ volokento addasa satte apparajakkhe mahārajakkhe tikkhindriye mudindriye svākāre dvākāre suviññāpaye duviññāpaye appekacce paralokavajjabhayadassāvino viharante, appekacce na paralokavajjabhayadassāvino viharante. Jānāti bhagavā – ‘‘ayaṃ puggalo rāgacarito, ayaṃ dosacarito, ayaṃ mohacarito, ayaṃ vitakkacarito, ayaṃ saddhācarito, ayaṃ ñāṇacarito’’ti. Rāgacaritassa bhagavā puggalassa asubhakathaṃ katheti; dosacaritassa bhagavā puggalassa mettābhāvanaṃ ācikkhati; mohacaritassa bhagavā puggalassa uddese paripucchāya kālena dhammassavane kālena dhammasākacchāya garusaṃvāse niveseti; vitakkacaritassa bhagavā puggalassa ānāpānassatiṃ ācikkhati; saddhācaritassa bhagavā puggalassa pasādanīyaṃ nimittaṃ ācikkhati buddhasubodhiṃ ⁶⁰ dhammasudhammataṃ saṅghasuppaṭipattiṃ sīlāni ca; attano ñāṇacaritassa bhagavā puggalassa ācikkhati vipassanānimittaṃ aniccākāraṃ dukkhākāraṃ anattākāraṃ.

‘‘সেলে যথা পব্বতমুদ্ধনিট্ঠিতো, যথাপি পস্সে জনতং সমন্ততো।

‘‘Sele yathā pabbatamuddhaniṭṭhito, yathāpi passe janataṃ samantato;

তথূপমং ধম্মমযং সুমেধ, পাসাদমারুয্হ সমন্তচক্খু।

Tathūpamaṃ dhammamayaṃ sumedha, pāsādamāruyha samantacakkhu;

সোকাৰতিণ্ণং জনতমপেতসোকো, অৰেক্খস্সু জাতিজরাভিভূত’’ন্তি॥

Sokāvatiṇṇaṃ janatamapetasoko, avekkhassu jātijarābhibhūta’’nti.

এৰং ভগৰা বুদ্ধচক্খুনাপি ৰিৰটচক্খু।

Evaṃ bhagavā buddhacakkhunāpi vivaṭacakkhu.

কথং ভগৰা সমন্তচক্খুনাপি ৰিৰটচক্খু? সমন্তচক্খু ৰুচ্চতি সব্বঞ্ঞুতঞাণং। ভগৰা সব্বঞ্ঞুতঞাণেন উপেতো সমুপেতো উপগতো সমুপগতো উপপন্নো সমুপপন্নো সমন্নাগতো।

Kathaṃ bhagavā samantacakkhunāpi vivaṭacakkhu? Samantacakkhu vuccati sabbaññutañāṇaṃ. Bhagavā sabbaññutañāṇena upeto samupeto upagato samupagato upapanno samupapanno samannāgato.

‘‘ন তস্স অদিট্ঠমিধত্থি কিঞ্চি, অথো অৰিঞ্ঞাতমজানিতব্বং।

‘‘Na tassa adiṭṭhamidhatthi kiñci, atho aviññātamajānitabbaṃ;

সব্বং অভিঞ্ঞাসি যদত্থি নেয্যং, তথাগতো তেন সমন্তচক্খূ’’তি॥

Sabbaṃ abhiññāsi yadatthi neyyaṃ, tathāgato tena samantacakkhū’’ti.

এৰং ভগৰা সমন্তচক্খুনাপি ৰিৰটচক্খূতি – অকিত্তযি ৰিৰটচক্খু।

Evaṃ bhagavā samantacakkhunāpi vivaṭacakkhūti – akittayi vivaṭacakkhu.

সক্খিধম্মং পরিস্সযৰিনযন্তি। সক্খিধম্মন্তি ন ইতিহিতিহং, ন ইতিকিরায, ন পরম্পরায, ন পিটকসম্পদায, ন তক্কহেতু, ন নযহেতু, ন আকারপরিৰিতক্কেন, ন দিট্ঠিনিজ্ঝানক্খন্তিযা সামং সযমভিঞ্ঞাতং অত্তপচ্চক্খং ধম্মন্তি – সক্খিধম্মং। পরিস্সযৰিনযন্তি। পরিস্সযাতি দ্ৰে পরিস্সযা – পাকটপরিস্সযা চ পটিচ্ছন্নপরিস্সযা চ। কতমে পাকটপরিস্সযা? সীহা ব্যগ্ঘা দীপী অচ্ছা তরচ্ছা কোকা মহিংসা ⁶¹ হত্থী অহি ৰিচ্ছিকা সতপদী, চোরা ৰা অস্সু মানৰা ৰা কতকম্মা ৰা অকতকম্মা ৰা, চক্খুরোগো সোতরোগো ঘানরোগো জিৰ্হারোগো কাযরোগো সীসরোগো কণ্ণরোগো মুখরোগো দন্তরোগো কাসো সাসো পিনাসো ডাহো ⁶² জরো কুচ্ছিরোগো মুচ্ছা পক্খন্দিকা সূলা ৰিসূচিকা কুট্ঠং গণ্ডো কিলাসো সোসো অপমারো দদ্দু কণ্ডু কচ্ছু রখসা ৰিতচ্ছিকা লোহিতপিত্তং ⁶³ মধুমেহো অংসা পিল়কা ভগন্দলা, পিত্তসমুট্ঠানা আবাধা সেম্হসমুট্ঠানা আবাধা ৰাতসমুট্ঠানা আবাধা সন্নিপাতিকা আবাধা উতুপরিণামজা আবাধা ৰিসমপরিহারজা আবাধা ওপক্কমিকা আবাধা কম্মৰিপাকজা আবাধা, সীতং উণ্হং জিঘচ্ছা পিপাসা উচ্চারো পস্সাৰো ডংসমকসৰাতাতপসরীসপসম্ফস্সা ইতি ৰা – ইমে ৰুচ্চন্তি পাকটপরিস্সযা।

Sakkhidhammaṃ parissayavinayanti. Sakkhidhammanti na itihitihaṃ, na itikirāya, na paramparāya, na piṭakasampadāya, na takkahetu, na nayahetu, na ākāraparivitakkena, na diṭṭhinijjhānakkhantiyā sāmaṃ sayamabhiññātaṃ attapaccakkhaṃ dhammanti – sakkhidhammaṃ. Parissayavinayanti. Parissayāti dve parissayā – pākaṭaparissayā ca paṭicchannaparissayā ca. Katame pākaṭaparissayā? Sīhā byagghā dīpī acchā taracchā kokā mahiṃsā ⁶⁴ hatthī ahi vicchikā satapadī, corā vā assu mānavā vā katakammā vā akatakammā vā, cakkhurogo sotarogo ghānarogo jivhārogo kāyarogo sīsarogo kaṇṇarogo mukharogo dantarogo kāso sāso pināso ḍāho ⁶⁵ jaro kucchirogo mucchā pakkhandikā sūlā visūcikā kuṭṭhaṃ gaṇḍo kilāso soso apamāro daddu kaṇḍu kacchu rakhasā vitacchikā lohitapittaṃ ⁶⁶ madhumeho aṃsā piḷakā bhagandalā, pittasamuṭṭhānā ābādhā semhasamuṭṭhānā ābādhā vātasamuṭṭhānā ābādhā sannipātikā ābādhā utupariṇāmajā ābādhā visamaparihārajā ābādhā opakkamikā ābādhā kammavipākajā ābādhā, sītaṃ uṇhaṃ jighacchā pipāsā uccāro passāvo ḍaṃsamakasavātātapasarīsapasamphassā iti vā – ime vuccanti pākaṭaparissayā.

কতমে পটিচ্ছন্নপরিস্সযা? কাযদুচ্চরিতং ৰচীদুচ্চরিতং মনোদুচ্চরিতং কামচ্ছন্দনীৰরণং ব্যাপাদনীৰরণং থিনমিদ্ধনীৰরণং উদ্ধচ্চকুক্কুচ্চনীৰরণং ৰিচিকিচ্ছানীৰরণং রাগো দোসো মোহো কোধো উপনাহো মক্খো পল়াসো ইস্সা মচ্ছরিযং মাযা সাঠেয্যং থম্ভো সারম্ভো মানো অতিমানো মদো পমাদো, সব্বে কিলেসা সব্বে দুচ্চরিতা সব্বে দরথা সব্বে পরিল়াহা সব্বে সন্তাপা সব্বাকুসলাভিসঙ্খারা – ইমে ৰুচ্চন্তি পটিচ্ছন্নপরিস্সযা।

Katame paṭicchannaparissayā? Kāyaduccaritaṃ vacīduccaritaṃ manoduccaritaṃ kāmacchandanīvaraṇaṃ byāpādanīvaraṇaṃ thinamiddhanīvaraṇaṃ uddhaccakukkuccanīvaraṇaṃ vicikicchānīvaraṇaṃ rāgo doso moho kodho upanāho makkho paḷāso issā macchariyaṃ māyā sāṭheyyaṃ thambho sārambho māno atimāno mado pamādo, sabbe kilesā sabbe duccaritā sabbe darathā sabbe pariḷāhā sabbe santāpā sabbākusalābhisaṅkhārā – ime vuccanti paṭicchannaparissayā.

পরিস্সযাতি কেনট্ঠেন পরিস্সযা? পরিসহন্তীতি পরিস্সযা, পরিহানায সংৰত্তন্তীতি পরিস্সযা, তত্রাসযাতি পরিস্সযা। কথং পরিসহন্তীতি পরিস্সযা? তে পরিস্সযা তং পুগ্গলং সহন্তি পরিসহন্তি অভিভৰন্তি অজ্ঝোত্থরন্তি পরিযাদিযন্তি মদ্দন্তি। এৰং পরিসহন্তীতি – পরিস্সযা।

Parissayāti kenaṭṭhena parissayā? Parisahantīti parissayā, parihānāya saṃvattantīti parissayā, tatrāsayāti parissayā. Kathaṃ parisahantīti parissayā? Te parissayā taṃ puggalaṃ sahanti parisahanti abhibhavanti ajjhottharanti pariyādiyanti maddanti. Evaṃ parisahantīti – parissayā.

কথং পরিহানায সংৰত্তন্তীতি পরিস্সযা? তে পরিস্সযা কুসলানং ধম্মানং অন্তরাযায পরিহানায সংৰত্তন্তি। কতমেসং কুসলানং ধম্মানং? সম্মাপটিপদায অনুলোমপটিপদায অপচ্চনীকপটিপদায অৰিরুদ্ধপটিপদায অন্ৰত্থপটিপদায ধম্মানুধম্মপটিপদায সীলেসু পরিপূরকারিতায ইন্দ্রিযেসু গুত্তদ্ৰারতায ভোজনে মত্তঞ্ঞুতায জাগরিযানুযোগস্স সতিসম্পজঞ্ঞস্স চতুন্নং সতিপট্ঠানানং ভাৰনানুযোগস্স চতুন্নং সম্মপ্পধানানং চতুন্নং ইদ্ধিপাদানং পঞ্চন্নং ইন্দ্রিযানং পঞ্চন্নং বলানং সত্তন্নং বোজ্ঝঙ্গানং অরিযস্স অট্ঠঙ্গিকস্স মগ্গস্স ভাৰনানুযোগস্স – ইমেসং কুসলানং ধম্মানং অন্তরাযায পরিহানায সংৰত্তন্তি। এৰম্পি পরিহানায সংৰত্তন্তীতি – পরিস্সযা।

Kathaṃ parihānāya saṃvattantīti parissayā? Te parissayā kusalānaṃ dhammānaṃ antarāyāya parihānāya saṃvattanti. Katamesaṃ kusalānaṃ dhammānaṃ? Sammāpaṭipadāya anulomapaṭipadāya apaccanīkapaṭipadāya aviruddhapaṭipadāya anvatthapaṭipadāya dhammānudhammapaṭipadāya sīlesu paripūrakāritāya indriyesu guttadvāratāya bhojane mattaññutāya jāgariyānuyogassa satisampajaññassa catunnaṃ satipaṭṭhānānaṃ bhāvanānuyogassa catunnaṃ sammappadhānānaṃ catunnaṃ iddhipādānaṃ pañcannaṃ indriyānaṃ pañcannaṃ balānaṃ sattannaṃ bojjhaṅgānaṃ ariyassa aṭṭhaṅgikassa maggassa bhāvanānuyogassa – imesaṃ kusalānaṃ dhammānaṃ antarāyāya parihānāya saṃvattanti. Evampi parihānāya saṃvattantīti – parissayā.

কথং তত্রাসযাতি পরিস্সযা? তত্থেতে পাপকা অকুসলা ধম্মা উপ্পজ্জন্তি অত্তভাৰসন্নিস্সযা। যথা বিলে বিলাসযা পাণা সযন্তি, দকে দকাসযা পাণা সযন্তি, ৰনে ৰনাসযা পাণা সযন্তি, রুক্খে রুক্খাসযা পাণা সযন্তি; এৰমেৰ তত্থেতে পাপকা অকুসলা ধম্মা উপ্পজ্জন্তি অত্তভাৰসন্নিস্সযাতি। এৰম্পি তত্রাসযাতি – পরিস্সযা।

Kathaṃ tatrāsayāti parissayā? Tatthete pāpakā akusalā dhammā uppajjanti attabhāvasannissayā. Yathā bile bilāsayā pāṇā sayanti, dake dakāsayā pāṇā sayanti, vane vanāsayā pāṇā sayanti, rukkhe rukkhāsayā pāṇā sayanti; evameva tatthete pāpakā akusalā dhammā uppajjanti attabhāvasannissayāti. Evampi tatrāsayāti – parissayā.

ৰুত্তঞ্হেতং ভগৰতা – ‘‘সান্তেৰাসিকো, ভিক্খৰে, ভিক্খু সাচরিযকো দুক্খং ন ফাসু ৰিহরতি। কথঞ্চ, ভিক্খৰে, ভিক্খু সান্তেৰাসিকো সাচরিযকো দুক্খং ন ফাসু ৰিহরতি? ইধ, ভিক্খৰে, ভিক্খুনো চক্খুনা রূপং দিস্ৰা উপ্পজ্জন্তি পাপকা অকুসলা ধম্মা সরসঙ্কপ্পা সঞ্ঞোজনিযা, ত্যস্স অন্তো ৰসন্তি অন্ৰাস্সৰন্তি পাপকা অকুসলা ধম্মাতি। তস্মা সান্তেৰাসিকোতি ৰুচ্চতি। তে নং সমুদাচরন্তি, সমুদাচরন্তি ⁶⁷ নং পাপকা অকুসলা ধম্মাতি। তস্মা সাচরিযকোতি ৰুচ্চতি।

Vuttañhetaṃ bhagavatā – ‘‘sāntevāsiko, bhikkhave, bhikkhu sācariyako dukkhaṃ na phāsu viharati. Kathañca, bhikkhave, bhikkhu sāntevāsiko sācariyako dukkhaṃ na phāsu viharati? Idha, bhikkhave, bhikkhuno cakkhunā rūpaṃ disvā uppajjanti pāpakā akusalā dhammā sarasaṅkappā saññojaniyā, tyassa anto vasanti anvāssavanti pāpakā akusalā dhammāti. Tasmā sāntevāsikoti vuccati. Te naṃ samudācaranti, samudācaranti ⁶⁸ naṃ pāpakā akusalā dhammāti. Tasmā sācariyakoti vuccati.

‘‘পুন চপরং, ভিক্খৰে, ভিক্খুনো সোতেন সদ্দং সুত্ৰা…পে॰… ঘানেন গন্ধং ঘাযিত্ৰা… জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা … মনসা ধম্মং ৰিঞ্ঞায উপ্পজ্জন্তি পাপকা অকুসলা ধম্মা সরসঙ্কপ্পা সঞ্ঞোজনিযা, ত্যস্স অন্তো ৰসন্তি অন্ৰাস্সৰন্তি পাপকা অকুসলা ধম্মাতি। তস্মা সান্তেৰাসিকোতি ৰুচ্চতি। তে নং সমুদাচরন্তি, সমুদাচরন্তি নং পাপকা অকুসলা ধম্মাতি। তস্মা সাচরিযকোতি ৰুচ্চতি। এৰং খো, ভিক্খৰে, ভিক্খু সান্তেৰাসিকো সাচরিযকো দুক্খং ন ফাসু ৰিহরতী’’তি। এৰম্পি তত্রাসযাতি – পরিস্সযা।

‘‘Puna caparaṃ, bhikkhave, bhikkhuno sotena saddaṃ sutvā…pe… ghānena gandhaṃ ghāyitvā… jivhāya rasaṃ sāyitvā… kāyena phoṭṭhabbaṃ phusitvā … manasā dhammaṃ viññāya uppajjanti pāpakā akusalā dhammā sarasaṅkappā saññojaniyā, tyassa anto vasanti anvāssavanti pāpakā akusalā dhammāti. Tasmā sāntevāsikoti vuccati. Te naṃ samudācaranti, samudācaranti naṃ pāpakā akusalā dhammāti. Tasmā sācariyakoti vuccati. Evaṃ kho, bhikkhave, bhikkhu sāntevāsiko sācariyako dukkhaṃ na phāsu viharatī’’ti. Evampi tatrāsayāti – parissayā.

ৰুত্তঞ্হেতং ভগৰতা – ‘‘তযোমে, ভিক্খৰে, অন্তরামলা অন্তরাঅমিত্তা অন্তরাসপত্তা অন্তরাৰধকা অন্তরাপচ্চত্থিকা। কতমে তযো? লোভো, ভিক্খৰে, অন্তরামলো ⁶⁹ অন্তরাঅমিত্তো অন্তরাসপত্তো অন্তরাৰধকো অন্তরাপচ্চত্থিকো; দোসো, ভিক্খৰে…পে॰… মোহো, ভিক্খৰে, অন্তরামলো অন্তরাঅমিত্তো অন্তরাসপত্তো অন্তরাৰধকো অন্তরাপচ্চত্থিকো। ইমে খো, ভিক্খৰে, তযো অন্তরামলা অন্তরাঅমিত্তা অন্তরাসপত্তা অন্তরাৰধকা অন্তরাপচ্চত্থিকা’’তি।

Vuttañhetaṃ bhagavatā – ‘‘tayome, bhikkhave, antarāmalā antarāamittā antarāsapattā antarāvadhakā antarāpaccatthikā. Katame tayo? Lobho, bhikkhave, antarāmalo ⁷⁰ antarāamitto antarāsapatto antarāvadhako antarāpaccatthiko; doso, bhikkhave…pe… moho, bhikkhave, antarāmalo antarāamitto antarāsapatto antarāvadhako antarāpaccatthiko. Ime kho, bhikkhave, tayo antarāmalā antarāamittā antarāsapattā antarāvadhakā antarāpaccatthikā’’ti.

‘‘অনত্থজননো লোভো, লোভো চিত্তপ্পকোপনো।

‘‘Anatthajanano lobho, lobho cittappakopano;

ভযমন্তরতো জাতং, তং জনো নাৰবুজ্ঝতি॥

Bhayamantarato jātaṃ, taṃ jano nāvabujjhati.

‘‘লুদ্ধো অত্থং ন জানাতি, লুদ্ধো ধম্মং ন পস্সতি।

‘‘Luddho atthaṃ na jānāti, luddho dhammaṃ na passati;

অন্ধন্তমং ⁷¹ তদা হোতি, যং লোভো সহতে নরং॥

Andhantamaṃ ⁷² tadā hoti, yaṃ lobho sahate naraṃ.

‘‘অনত্থজননো দোসো, দোসো চিত্তপ্পকোপনো।

‘‘Anatthajanano doso, doso cittappakopano;

ভযমন্তরতো জাতং, তং জনো নাৰবুজ্ঝতি॥

Bhayamantarato jātaṃ, taṃ jano nāvabujjhati.

‘‘কুদ্ধো অত্থং ন জানাতি, কুদ্ধো ধম্মং ন পস্সতি।

‘‘Kuddho atthaṃ na jānāti, kuddho dhammaṃ na passati;

অন্ধন্তমং তদা হোতি, যং দোসো সহতে নরং॥

Andhantamaṃ tadā hoti, yaṃ doso sahate naraṃ.

‘‘অনত্থজননো মোহো, মোহো চিত্তপ্পকোপনো।

‘‘Anatthajanano moho, moho cittappakopano;

ভযমন্তরতো জাতং, তং জনো নাৰবুজ্ঝতি॥

Bhayamantarato jātaṃ, taṃ jano nāvabujjhati.

‘‘মূল়্হো অত্থং ন জানাতি, মূল়্হো ধম্মং ন পস্সতি।

‘‘Mūḷho atthaṃ na jānāti, mūḷho dhammaṃ na passati;

অন্ধন্তমং তদা হোতি, যং মোহো সহতে নর’’ন্তি॥

Andhantamaṃ tadā hoti, yaṃ moho sahate nara’’nti.

এৰম্পি তত্রাসযাতি – পরিস্সযা।

Evampi tatrāsayāti – parissayā.

ৰুত্তঞ্হেতং ভগৰতা – ‘‘তযো খো, মহারাজ, পুরিসস্স ধম্মা অজ্ঝত্তং উপ্পজ্জমানা উপ্পজ্জন্তি অহিতায দুক্খায অফাসুৰিহারায। কতমে তযো? লোভো খো, মহারাজ, পুরিসস্স ধম্মো অজ্ঝত্তং উপ্পজ্জমানো উপ্পজ্জতি অহিতায দুক্খায অফাসুৰিহারায; দোসো খো, মহারাজ…পে॰… মোহো খো, মহারাজ, পুরিসস্স ধম্মো অজ্ঝত্তং উপ্পজ্জমানো উপ্পজ্জতি অহিতায দুক্খায অফাসুৰিহারায। ইমে খো, মহারাজ, তযো পুরিসস্স ধম্মা অজ্ঝত্তং উপ্পজ্জমানা উপ্পজ্জন্তি অহিতায দুক্খায অফাসুৰিহারায।

Vuttañhetaṃ bhagavatā – ‘‘tayo kho, mahārāja, purisassa dhammā ajjhattaṃ uppajjamānā uppajjanti ahitāya dukkhāya aphāsuvihārāya. Katame tayo? Lobho kho, mahārāja, purisassa dhammo ajjhattaṃ uppajjamāno uppajjati ahitāya dukkhāya aphāsuvihārāya; doso kho, mahārāja…pe… moho kho, mahārāja, purisassa dhammo ajjhattaṃ uppajjamāno uppajjati ahitāya dukkhāya aphāsuvihārāya. Ime kho, mahārāja, tayo purisassa dhammā ajjhattaṃ uppajjamānā uppajjanti ahitāya dukkhāya aphāsuvihārāya.

‘‘লোভো দোসো চ মোহো চ, পুরিসং পাপচেতসং।

‘‘Lobho doso ca moho ca, purisaṃ pāpacetasaṃ;

হিংসন্তি অত্তসম্ভূতা, তচসারংৰ সম্ফল’’ন্তি॥

Hiṃsanti attasambhūtā, tacasāraṃva samphala’’nti.

এৰম্পি তত্রাসযাতি – পরিস্সযা।

Evampi tatrāsayāti – parissayā.

ৰুত্তঞ্হেতং ভগৰতা –

Vuttañhetaṃ bhagavatā –

‘‘রাগো চ দোসো চ ইতো নিদানা, অরতী রতী লোমহংসো ইতোজা।

‘‘Rāgo ca doso ca ito nidānā, aratī ratī lomahaṃso itojā;

ইতো সমুট্ঠায মনোৰিতক্কা, কুমারকা ধঙ্কমিৰোস্সজন্তী’’তি॥

Ito samuṭṭhāya manovitakkā, kumārakā dhaṅkamivossajantī’’ti.

এৰম্পি তত্রাসযাতি – পরিস্সযা।

Evampi tatrāsayāti – parissayā.

পরিস্সযৰিনযন্তি পরিস্সযৰিনযং পরিস্সযপ্পহানং পরিস্সযৰূপসমং পরিস্সযপটিনিস্সগ্গং পরিস্সযপটিপস্সদ্ধিং অমতং নিব্বানন্তি – সক্খিধম্মং পরিস্সযৰিনযং।

Parissayavinayanti parissayavinayaṃ parissayappahānaṃ parissayavūpasamaṃ parissayapaṭinissaggaṃ parissayapaṭipassaddhiṃ amataṃ nibbānanti – sakkhidhammaṃ parissayavinayaṃ.

পটিপদং ৰদেহি ভদ্দন্তেতি। পটিপদং ৰদেহি – সম্মাপটিপদং অনুলোমপটিপদং অপচ্চনীকপটিপদং অৰিরুদ্ধপটিপদং অন্ৰত্থপটিপদং ধম্মানুধম্মপটিপদং সীলেসু পরিপূরকারিতং ইন্দ্রিযেসু গুত্তদ্ৰারতং ভোজনে মত্তঞ্ঞুতং জাগরিযানুযোগং সতিসম্পজঞ্ঞং চত্তারো সতিপট্ঠানে চত্তারো সম্মপ্পধানে চত্তারো ইদ্ধিপাদে পঞ্চিন্দ্রিযানি পঞ্চ বলানি সত্ত বোজ্ঝঙ্গে অরিযং অট্ঠঙ্গিকং মগ্গং নিব্বানঞ্চ নিব্বানগামিনিঞ্চ পটিপদং ৰদেহি আচিক্খ দেসেহি পঞ্ঞপেহি পট্ঠপেহি ৰিৰর ৰিভজ উত্তানীকরোহি পকাসেহীতি – পটিপদং ৰদেহি। ভদ্দন্তেতি সো নিম্মিতো বুদ্ধং ভগৰন্তং আলপতি। অথ ৰা যং ত্ৰং ধম্মং আচিক্খসি দেসেসি পঞ্ঞপেসি পট্ঠপেসি ৰিৰরি ৰিভজি উত্তানীঅকাসি পকাসেসি সব্বং তং সুন্দরং ভদ্দকং কল্যাণং অনৰজ্জং সেৰিতব্বন্তি – পটিপদং ৰদেহি ভদ্দন্তে।

Paṭipadaṃ vadehi bhaddanteti. Paṭipadaṃ vadehi – sammāpaṭipadaṃ anulomapaṭipadaṃ apaccanīkapaṭipadaṃ aviruddhapaṭipadaṃ anvatthapaṭipadaṃ dhammānudhammapaṭipadaṃ sīlesu paripūrakāritaṃ indriyesu guttadvārataṃ bhojane mattaññutaṃ jāgariyānuyogaṃ satisampajaññaṃ cattāro satipaṭṭhāne cattāro sammappadhāne cattāro iddhipāde pañcindriyāni pañca balāni satta bojjhaṅge ariyaṃ aṭṭhaṅgikaṃ maggaṃ nibbānañca nibbānagāminiñca paṭipadaṃ vadehi ācikkha desehi paññapehi paṭṭhapehi vivara vibhaja uttānīkarohi pakāsehīti – paṭipadaṃ vadehi. Bhaddanteti so nimmito buddhaṃ bhagavantaṃ ālapati. Atha vā yaṃ tvaṃ dhammaṃ ācikkhasi desesi paññapesi paṭṭhapesi vivari vibhaji uttānīakāsi pakāsesi sabbaṃ taṃ sundaraṃ bhaddakaṃ kalyāṇaṃ anavajjaṃ sevitabbanti – paṭipadaṃ vadehi bhaddante.

পাতিমোক্খং অথ ৰাপি সমাধিন্তি। পাতিমোক্খন্তি সীলং পতিট্ঠা আদি চরণং সংযমো সংৰরো মুখং পমুখং কুসলানং ধম্মানং সমাপত্তিযা। অথ ৰাপি সমাধিন্তি যা চিত্তস্স ঠিতি সণ্ঠিতি অৰট্ঠিতি অৰিসাহারো অৰিক্খেপো অৰিসাহতমানসতা সমথো সমাধিন্দ্রিযং সমাধিবলং সম্মাসমাধীতি – পাতিমোক্খং অথ ৰাপি সমাধিং।

Pātimokkhaṃ atha vāpi samādhinti. Pātimokkhanti sīlaṃ patiṭṭhā ādi caraṇaṃ saṃyamo saṃvaro mukhaṃ pamukhaṃ kusalānaṃ dhammānaṃ samāpattiyā. Atha vāpi samādhinti yā cittassa ṭhiti saṇṭhiti avaṭṭhiti avisāhāro avikkhepo avisāhatamānasatā samatho samādhindriyaṃ samādhibalaṃ sammāsamādhīti – pātimokkhaṃ atha vāpi samādhiṃ.

তেনাহ সো নিম্মিতো –

Tenāha so nimmito –

‘‘অকিত্তযী ৰিৰটচক্খু, সক্খিধম্মং পরিস্সযৰিনযং।

‘‘Akittayī vivaṭacakkhu, sakkhidhammaṃ parissayavinayaṃ;

পটিপদং ৰদেহি ভদ্দন্তে, পাতিমোক্খং অথ ৰাপি সমাধি’’ন্তি॥

Paṭipadaṃ vadehi bhaddante, pātimokkhaṃ atha vāpi samādhi’’nti.

১৫৭.

157.

চক্খূহি নেৰ লোলস্স, গামকথায আৰরযে সোতং।

Cakkhūhineva lolassa, gāmakathāya āvaraye sotaṃ;

রসে চ নানুগিজ্ঝেয্য, ন চ মমাযেথ কিঞ্চি লোকস্মিং॥

Rase ca nānugijjheyya, na ca mamāyetha kiñci lokasmiṃ.

চক্খূহি নেৰ লোলস্সাতি। কথং চক্খুলোলোতি? ইধেকচ্চো চক্খুলোলিযেন সমন্নাগতো হোতি – ‘‘অদিট্ঠং দক্খিতব্বং , দিট্ঠং সমতিক্কমিতব্ব’’ন্তি আরামেন আরামং উয্যানেন উয্যানং গামেন গামং নিগমেন নিগমং নগরেন নগরং রট্ঠেন রট্ঠং জনপদেন জনপদং দীঘচারিকং অনৰট্ঠিতচারিকং ⁷³ অনুযুত্তো চ হোতি রূপস্স দস্সনায। এৰম্পি চক্খুলোলো হোতি।

Cakkhūhineva lolassāti. Kathaṃ cakkhuloloti? Idhekacco cakkhuloliyena samannāgato hoti – ‘‘adiṭṭhaṃ dakkhitabbaṃ , diṭṭhaṃ samatikkamitabba’’nti ārāmena ārāmaṃ uyyānena uyyānaṃ gāmena gāmaṃ nigamena nigamaṃ nagarena nagaraṃ raṭṭhena raṭṭhaṃ janapadena janapadaṃ dīghacārikaṃ anavaṭṭhitacārikaṃ ⁷⁴ anuyutto ca hoti rūpassa dassanāya. Evampi cakkhulolo hoti.

অথ ৰা ভিক্খু অন্তরঘরং পৰিট্ঠো ৰীথিং পটিপন্নো অসংৰুতো গচ্ছতি হত্থিং ওলোকেন্তো, অস্সং ওলোকেন্তো, রথং ওলোকেন্তো, পত্তিং ওলোকেন্তো, ইত্থিযো ওলোকেন্তো, পুরিসে ওলোকেন্তো, কুমারকে ওলোকেন্তো, কুমারিকাযো ওলোকেন্তো, অন্তরাপণং ওলোকেন্তো , ঘরমুখানি ওলোকেন্তো, উদ্ধং ওলোকেন্তো, অধো ওলোকেন্তো, দিসাৰিদিসং ৰিপেক্খমানো গচ্ছতি। এৰম্পি চক্খুলোলো হোতি।

Atha vā bhikkhu antaragharaṃ paviṭṭho vīthiṃ paṭipanno asaṃvuto gacchati hatthiṃ olokento, assaṃ olokento, rathaṃ olokento, pattiṃ olokento, itthiyo olokento, purise olokento, kumārake olokento, kumārikāyo olokento, antarāpaṇaṃ olokento , gharamukhāni olokento, uddhaṃ olokento, adho olokento, disāvidisaṃ vipekkhamāno gacchati. Evampi cakkhulolo hoti.

অথ ৰা ভিক্খু চক্খুনা রূপং দিস্ৰা নিমিত্তগ্গাহী হোতি অনুব্যঞ্জনগ্গাহী। যত্ৰাধিকরণমেনং চক্খুন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায ন পটিপজ্জতি, ন রক্খতি চক্খুন্দ্রিযং, চক্খুন্দ্রিযে ন সংৰরং আপজ্জতি। এৰম্পি চক্খুলোলো হোতি।

Atha vā bhikkhu cakkhunā rūpaṃ disvā nimittaggāhī hoti anubyañjanaggāhī. Yatvādhikaraṇamenaṃ cakkhundriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ, tassa saṃvarāya na paṭipajjati, na rakkhati cakkhundriyaṃ, cakkhundriye na saṃvaraṃ āpajjati. Evampi cakkhulolo hoti.

যথা ৰা পনেকে ভোন্তো সমণব্রাহ্মণা সদ্ধাদেয্যানি ভোজনানি ভুঞ্জিত্ৰা তে এৰরূপং ৰিসূকদস্সনং অনুযুত্তা ৰিহরন্তি, সেয্যথিদং – নচ্চং গীতং ৰাদিতং পেক্খং অক্খানং পাণিস্সরং ৰেতাল়ং কুম্ভথূণং ⁷⁵ সোভনকং ⁷⁶ চণ্ডালং ৰংসং ধোৰনং হত্থিযুদ্ধং অস্সযুদ্ধং মহিংসযুদ্ধং ⁷⁷ উসভযুদ্ধং অজযুদ্ধং মেণ্ডযুদ্ধং কুক্কুটযুদ্ধং ৰট্টকযুদ্ধং দণ্ডযুদ্ধং মুট্ঠিযুদ্ধং নিব্বুদ্ধং উয্যোধিকং বলগ্গং সেনাব্যূহং অনীকদস্সনং ইতি ৰা । এৰম্পি চক্খুলোলো হোতি।

Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpaṃ visūkadassanaṃ anuyuttā viharanti, seyyathidaṃ – naccaṃ gītaṃ vāditaṃ pekkhaṃ akkhānaṃ pāṇissaraṃ vetāḷaṃ kumbhathūṇaṃ ⁷⁸ sobhanakaṃ ⁷⁹ caṇḍālaṃ vaṃsaṃ dhovanaṃ hatthiyuddhaṃ assayuddhaṃ mahiṃsayuddhaṃ ⁸⁰ usabhayuddhaṃ ajayuddhaṃ meṇḍayuddhaṃ kukkuṭayuddhaṃ vaṭṭakayuddhaṃ daṇḍayuddhaṃ muṭṭhiyuddhaṃ nibbuddhaṃ uyyodhikaṃ balaggaṃ senābyūhaṃ anīkadassanaṃ iti vā . Evampi cakkhulolo hoti.

কথং ন চক্খুলোলো হোতি? ইধ ভিক্খু অন্তরঘরং পৰিট্ঠো ৰীথিং পটিপন্নো সংৰুতো গচ্ছতি ন হত্থিং ওলোকেন্তো, ন অস্সং ওলোকেন্তো, ন রথং ওলোকেন্তো, ন পত্তিং ওলোকেন্তো, ন ইত্থিযো ওলোকেন্তো, ন পুরিসে ওলোকেন্তো, ন কুমারকে ওলোকেন্তো, ন কুমারিকাযো ওলোকেন্তো, ন অন্তরাপণং ওলোকেন্তো, ন ঘরমুখানি ওলোকেন্তো, ন উদ্ধং ওলোকেন্তো, ন অধো ওলোকেন্তো, ন দিসাৰিদিসাৰিপেক্খমানো গচ্ছতি। এৰম্পি ন চক্খুলোলো হোতি।

Kathaṃ na cakkhulolo hoti? Idha bhikkhu antaragharaṃ paviṭṭho vīthiṃ paṭipanno saṃvuto gacchati na hatthiṃ olokento, na assaṃ olokento, na rathaṃ olokento, na pattiṃ olokento, na itthiyo olokento, na purise olokento, na kumārake olokento, na kumārikāyo olokento, na antarāpaṇaṃ olokento, na gharamukhāni olokento, na uddhaṃ olokento, na adho olokento, na disāvidisāvipekkhamāno gacchati. Evampi na cakkhulolo hoti.

অথ ৰা ভিক্খু চক্খুনা রূপং দিস্ৰা ন নিমিত্তগ্গাহী হোতি নানুব্যঞ্জনগ্গাহী। যত্ৰাধিকরণমেনং চক্খুন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায পটিপজ্জতি, রক্খতি চক্খুন্দ্রিযং, চক্খুন্দ্রিযে সংৰরং আপজ্জতি। এৰম্পি ন চক্খুলোলো হোতি।

Atha vā bhikkhu cakkhunā rūpaṃ disvā na nimittaggāhī hoti nānubyañjanaggāhī. Yatvādhikaraṇamenaṃ cakkhundriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ, tassa saṃvarāya paṭipajjati, rakkhati cakkhundriyaṃ, cakkhundriye saṃvaraṃ āpajjati. Evampi na cakkhulolo hoti.

যথা ৰা পনেকে ভোন্তো সমণব্রাহ্মণা সদ্ধাদেয্যানি ভোজনানি ভুঞ্জিত্ৰা তে এৰরূপং ৰিসূকদস্সনং অননুযুত্তা ৰিহরন্তি, সেয্যথিদং – নচ্চং গীতং ৰাদিতং পেক্খং অক্খানং…পে॰… অনীকদস্সনং ইতি ৰা। এৰরূপা ৰিসূকদস্সনা পটিৰিরতো হোতি। এৰম্পি ন চক্খুলোলো হোতি।

Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpaṃ visūkadassanaṃ ananuyuttā viharanti, seyyathidaṃ – naccaṃ gītaṃ vāditaṃ pekkhaṃ akkhānaṃ…pe… anīkadassanaṃ iti vā. Evarūpā visūkadassanā paṭivirato hoti. Evampi na cakkhulolo hoti.

চক্খূহি নেৰ লোলস্সাতি। চক্খুলোলিযং পজহেয্য ৰিনোদেয্য ব্যন্তিং করেয্য অনভাৰং গমেয্য, চক্খুলোলিযা আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরেয্যাতি – চক্খূহি নেৰ লোলস্স।

Cakkhūhineva lolassāti. Cakkhuloliyaṃ pajaheyya vinodeyya byantiṃ kareyya anabhāvaṃ gameyya, cakkhuloliyā ārato assa virato paṭivirato nikkhanto nissaṭo vippamutto visaññutto vimariyādikatena cetasā vihareyyāti – cakkhūhi neva lolassa.

গামকথায আৰরযে সোতন্তি। গামকথা ৰুচ্চতি বাত্তিংস তিরচ্ছানকথা, সেয্যথিদং – রাজকথা চোরকথা মহামত্তকথা সেনাকথা ভযকথা যুদ্ধকথা অন্নকথা পানকথা ৰত্থকথা যানকথা সযনকথা মালাকথা গন্ধকথা ঞাতিকথা গামকথা নিগমকথা নগরকথা জনপদকথা ইত্থিকথা ⁸¹ সূরকথা ৰিসিখাকথা কুম্ভট্ঠানকথা পুব্বপেতকথা নানত্তকথা লোকক্খাযিকা সমুদ্দক্খাযিকা ইতিভৰাভৰকথা ইতি ৰা। গামকথায আৰরযে সোতন্তি । গামকথায সোতং আৰরেয্য নিৰারেয্য সংৰরেয্য রক্খেয্য গোপেয্য পিদহেয্য পচ্ছিন্দেয্যাতি – গামকথায আৰরযে সোতং।

Gāmakathāya āvaraye sotanti. Gāmakathā vuccati bāttiṃsa tiracchānakathā, seyyathidaṃ – rājakathā corakathā mahāmattakathā senākathā bhayakathā yuddhakathā annakathā pānakathā vatthakathā yānakathā sayanakathā mālākathā gandhakathā ñātikathā gāmakathā nigamakathā nagarakathā janapadakathā itthikathā ⁸² sūrakathā visikhākathā kumbhaṭṭhānakathā pubbapetakathā nānattakathā lokakkhāyikā samuddakkhāyikā itibhavābhavakathā iti vā. Gāmakathāya āvaraye sotanti . Gāmakathāya sotaṃ āvareyya nivāreyya saṃvareyya rakkheyya gopeyya pidaheyya pacchindeyyāti – gāmakathāya āvaraye sotaṃ.

রসে চ নানুগিজ্ঝেয্যাতি। রসে চাতি মূলরসো খন্ধরসো তচরসো পত্তরসো পুপ্ফরসো ফলরসো অম্বিলং মধুরং তিত্তকং কটুকং লোণিকং খারিকং লম্বিকং কসাৰো সাদু অসাদু সীতং উণ্হং। সন্তেকে সমণব্রাহ্মণা রসগিদ্ধা; তে জিৰ্হগ্গেন রসগ্গানি পরিযেসন্তা আহিণ্ডন্তি, তে অম্বিলং লভিত্ৰা অনম্বিলং পরিযেসন্তি, অনম্বিলং লভিত্ৰা অম্বিলং পরিযেসন্তি…পে॰… সীতং লভিত্ৰা উণ্হং পরিযেসন্তি, উণ্হং লভিত্ৰা সীতং পরিযেসন্তি। তে যং যং লভিত্ৰা তেন তেন ন তুস্সন্তি, অপরাপরং পরিযেসন্তি, মনাপিকেসু রসেসু রত্তা গিদ্ধা গধিতা মুচ্ছিতা অজ্ঝোসন্না লগ্গা লগ্গিতা পলিবুদ্ধা। যস্সেসা রসতণ্হা পহীনা সমুচ্ছিন্না…পে॰… ঞাণগ্গিনা দড্ঢা, সো পটিসঙ্খা যোনিসো আহারং আহারেতি নেৰ দৰায…পে॰… অনৰজ্জতা চ ফাসুৰিহারো চাতি।

Rase ca nānugijjheyyāti. Rase cāti mūlaraso khandharaso tacaraso pattaraso puppharaso phalaraso ambilaṃ madhuraṃ tittakaṃ kaṭukaṃ loṇikaṃ khārikaṃ lambikaṃ kasāvo sādu asādu sītaṃ uṇhaṃ. Santeke samaṇabrāhmaṇā rasagiddhā; te jivhaggena rasaggāni pariyesantā āhiṇḍanti, te ambilaṃ labhitvā anambilaṃ pariyesanti, anambilaṃ labhitvā ambilaṃ pariyesanti…pe… sītaṃ labhitvā uṇhaṃ pariyesanti, uṇhaṃ labhitvā sītaṃ pariyesanti. Te yaṃ yaṃ labhitvā tena tena na tussanti, aparāparaṃ pariyesanti, manāpikesu rasesu rattā giddhā gadhitā mucchitā ajjhosannā laggā laggitā palibuddhā. Yassesā rasataṇhā pahīnā samucchinnā…pe… ñāṇagginā daḍḍhā, so paṭisaṅkhā yoniso āhāraṃ āhāreti neva davāya…pe… anavajjatā ca phāsuvihāro cāti.

যথা ৰণং আলিম্পেয্য যাৰদেৰ আরুহণত্থায ⁸³, যথা ৰা পন অক্খং অব্ভঞ্জেয্য যাৰদেৰ ভারস্স নিত্থরণত্থায, যথা ৰা পুত্তমংসং আহারং আহারেয্য যাৰদেৰ কন্তারস্স নিত্থরণত্থায; এৰমেৰং ভিক্খু পটিসঙ্খা যোনিসো আহারং আহারেতি নেৰ দৰায…পে॰… অনৰজ্জতা চ ফাসুৰিহারো চাতি রসতণ্হং পজহেয্য ৰিনোদেয্য ব্যন্তিং করেয্য অনভাৰং গমেয্য, রসতণ্হায আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরেয্যাতি – রসে চ নানুগিজ্ঝেয্য।

Yathā vaṇaṃ ālimpeyya yāvadeva āruhaṇatthāya ⁸⁴, yathā vā pana akkhaṃ abbhañjeyya yāvadeva bhārassa nittharaṇatthāya, yathā vā puttamaṃsaṃ āhāraṃ āhāreyya yāvadeva kantārassa nittharaṇatthāya; evamevaṃ bhikkhu paṭisaṅkhā yoniso āhāraṃ āhāreti neva davāya…pe… anavajjatā ca phāsuvihāro cāti rasataṇhaṃ pajaheyya vinodeyya byantiṃ kareyya anabhāvaṃ gameyya, rasataṇhāya ārato assa virato paṭivirato nikkhanto nissaṭo vippamutto visaññutto vimariyādikatena cetasā vihareyyāti – rase ca nānugijjheyya.

ন চ মমাযেথ কিঞ্চি লোকস্মিন্তি। মমত্তাতি দ্ৰে মমত্তা – তণ্হামমত্তঞ্চ দিট্ঠিমমত্তঞ্চ …পে॰… ইদং তণ্হামমত্তং…পে॰… ইদং দিট্ঠিমমত্তং। তণ্হামমত্তং পহায দিট্ঠিমমত্তং পটিনিস্সজ্জিত্ৰা চক্খুং ন মমাযেয্য ন গণ্হেয্য ন পরামসেয্য নাভিনিৰিসেয্য; সোতং… ঘানং… জিৰ্হং… কাযং… রূপে… সদ্দে… গন্ধে… রসে… ফোট্ঠব্বে… কুলং… গণং… আৰাসং… লাভং… যসং… পসংসং… সুখং… চীৰরং… পিণ্ডপাতং… সেনাসনং… গিলানপচ্চযভেসজ্জপরিক্খারং… কামধাতুং… রূপধাতুং… অরূপধাতুং… কামভৰং… রূপভৰং… অরূপভৰং… সঞ্ঞাভৰং… অসঞ্ঞাভৰং… নেৰসঞ্ঞানাসঞ্ঞাভৰং … একৰোকারভৰং… চতুৰোকারভৰং… পঞ্চৰোকারভৰং … অতীতং… অনাগতং… পচ্চুপ্পন্নং… দিট্ঠসুতমুতৰিঞ্ঞাতব্বে ধম্মে ন মমাযেয্য ন গণ্হেয্য ন পরামসেয্য নাভিনিৰিসেয্য। কিঞ্চীতি কিঞ্চি রূপগতং ৰেদনাগতং সঞ্ঞাগতং সঙ্খারগতং ৰিঞ্ঞাণগতং। লোকস্মিন্তি অপাযলোকে…পে॰… আযতনলোকেতি – ন চ মমাযেথ কিঞ্চি লোকস্মিং।

Na ca mamāyetha kiñci lokasminti. Mamattāti dve mamattā – taṇhāmamattañca diṭṭhimamattañca …pe… idaṃ taṇhāmamattaṃ…pe… idaṃ diṭṭhimamattaṃ. Taṇhāmamattaṃ pahāya diṭṭhimamattaṃ paṭinissajjitvā cakkhuṃ na mamāyeyya na gaṇheyya na parāmaseyya nābhiniviseyya; sotaṃ… ghānaṃ… jivhaṃ… kāyaṃ… rūpe… sadde… gandhe… rase… phoṭṭhabbe… kulaṃ… gaṇaṃ… āvāsaṃ… lābhaṃ… yasaṃ… pasaṃsaṃ… sukhaṃ… cīvaraṃ… piṇḍapātaṃ… senāsanaṃ… gilānapaccayabhesajjaparikkhāraṃ… kāmadhātuṃ… rūpadhātuṃ… arūpadhātuṃ… kāmabhavaṃ… rūpabhavaṃ… arūpabhavaṃ… saññābhavaṃ… asaññābhavaṃ… nevasaññānāsaññābhavaṃ … ekavokārabhavaṃ… catuvokārabhavaṃ… pañcavokārabhavaṃ … atītaṃ… anāgataṃ… paccuppannaṃ… diṭṭhasutamutaviññātabbe dhamme na mamāyeyya na gaṇheyya na parāmaseyya nābhiniviseyya. Kiñcīti kiñci rūpagataṃ vedanāgataṃ saññāgataṃ saṅkhāragataṃ viññāṇagataṃ. Lokasminti apāyaloke…pe… āyatanaloketi – na ca mamāyetha kiñci lokasmiṃ.

তেনাহ ভগৰা –

Tenāha bhagavā –

‘‘চক্খূহি নেৰ লোলস্স, গামকথায আৰরযে সোতং।

‘‘Cakkhūhi neva lolassa, gāmakathāya āvaraye sotaṃ;

রসে চ নানুগিজ্ঝেয্য, ন চ মমাযেথ কিঞ্চি লোকস্মি’’ন্তি॥

Rase ca nānugijjheyya, na ca mamāyetha kiñci lokasmi’’nti.

১৫৮.

158.

ফস্সেন যদা ফুট্ঠস্স, পরিদেৰং ভিক্খু ন করেয্য কুহিঞ্চি।

Phassena yadā phuṭṭhassa, paridevaṃ bhikkhu na kareyya kuhiñci;

ভৰঞ্চ নাভিজপ্পেয্য, ভেরৰেসু চ ন সম্পৰেধেয্য॥

Bhavañca nābhijappeyya, bheravesu ca na sampavedheyya.

ফস্সেন যদা ফুট্ঠস্সাতি। ফস্সোতি রোগফস্সো। রোগফস্সেন ফুট্ঠো পরেতো সমোহিতো সমন্নাগতো অস্স; চক্খুরোগেন ফুট্ঠো পরেতো সমোহিতো সমন্নাগতো অস্স, সোতরোগেন…পে॰… ঘানরোগেন… জিৰ্হারোগেন… কাযরোগেন… সীসরোগেন… কণ্ণরোগেন… মুখরোগেন… দন্তরোগেন… কাসেন… সাসেন… পিনাসেন… ডাহেন… জরেন… কুচ্ছিরোগেন… মুচ্ছায… পক্খন্দিকায… সূলায… ৰিসূচিকায… কুট্ঠেন… গণ্ডেন… কিলাসেন… সোসেন… অপমারেন… দদ্দুযা… কণ্ডুযা … কচ্ছুযা… রখসায… ৰিতচ্ছিকায… লোহিতেন… পিত্তেন… মধুমেহেন… অংসায… পিল়কায… ভগন্দলেন… পিত্তসমুট্ঠানেন আবাধেন… সেম্হসমুট্ঠানেন আবাধেন… ৰাতসমুট্ঠানেন আবাধেন… সন্নিপাতিকেন আবাধেন… উতুপরিণামজেন আবাধেন… ৰিসমপরিহারজেন আবাধেন… ওপক্কমিকেন আবাধেন… কম্মৰিপাকজেন আবাধেন… সীতেন… উণ্হেন… জিঘচ্ছায… পিপাসায… উচ্চারেন… পস্সাৰেন… ডংসমকসৰাতাতপসরীসপসম্ফস্সেহি ফুট্ঠো পরেতো সমোহিতো সমন্নাগতো অস্সাতি – ফস্সেন যদা ফুট্ঠস্স।

Phassenayadā phuṭṭhassāti. Phassoti rogaphasso. Rogaphassena phuṭṭho pareto samohito samannāgato assa; cakkhurogena phuṭṭho pareto samohito samannāgato assa, sotarogena…pe… ghānarogena… jivhārogena… kāyarogena… sīsarogena… kaṇṇarogena… mukharogena… dantarogena… kāsena… sāsena… pināsena… ḍāhena… jarena… kucchirogena… mucchāya… pakkhandikāya… sūlāya… visūcikāya… kuṭṭhena… gaṇḍena… kilāsena… sosena… apamārena… dadduyā… kaṇḍuyā … kacchuyā… rakhasāya… vitacchikāya… lohitena… pittena… madhumehena… aṃsāya… piḷakāya… bhagandalena… pittasamuṭṭhānena ābādhena… semhasamuṭṭhānena ābādhena… vātasamuṭṭhānena ābādhena… sannipātikena ābādhena… utupariṇāmajena ābādhena… visamaparihārajena ābādhena… opakkamikena ābādhena… kammavipākajena ābādhena… sītena… uṇhena… jighacchāya… pipāsāya… uccārena… passāvena… ḍaṃsamakasavātātapasarīsapasamphassehi phuṭṭho pareto samohito samannāgato assāti – phassena yadā phuṭṭhassa.

পরিদেৰং ভিক্খু ন করেয্য কুহিঞ্চীতি। আদেৰং পরিদেৰং আদেৰনং পরিদেৰনং আদেৰিতত্তং পরিদেৰিতত্তং ৰাচা পলাপং ৰিপ্পলাপং লালপ্পং লালপ্পাযনং লালপ্পাযিতত্তং ন করেয্য ন জনেয্য ন সঞ্জনেয্য ন নিব্বত্তেয্য নাভিনিব্বত্তেয্য। কুহিঞ্চীতি কুহিঞ্চি কিম্হিচি কত্থচি অজ্ঝত্তং ৰা বহিদ্ধা ৰা অজ্ঝত্তবহিদ্ধা ৰাতি – পরিদেৰং ভিক্খু ন করেয্য কুহিঞ্চি।

Paridevaṃbhikkhu na kareyya kuhiñcīti. Ādevaṃ paridevaṃ ādevanaṃ paridevanaṃ ādevitattaṃ paridevitattaṃ vācā palāpaṃ vippalāpaṃ lālappaṃ lālappāyanaṃ lālappāyitattaṃ na kareyya na janeyya na sañjaneyya na nibbatteyya nābhinibbatteyya. Kuhiñcīti kuhiñci kimhici katthaci ajjhattaṃ vā bahiddhā vā ajjhattabahiddhā vāti – paridevaṃ bhikkhu na kareyya kuhiñci.

ভৰঞ্চ নাভিজপ্পেয্যাতি। কামভৰং ন জপ্পেয্য, রূপভৰং ন জপ্পেয্য, অরূপভৰং ন জপ্পেয্য ন পজপ্পেয্য নাভিজপ্পেয্যাতি – ভৰঞ্চ নাভিজপ্পেয্য।

Bhavañca nābhijappeyyāti. Kāmabhavaṃ na jappeyya, rūpabhavaṃ na jappeyya, arūpabhavaṃ na jappeyya na pajappeyya nābhijappeyyāti – bhavañca nābhijappeyya.

ভেরৰেসু চ ন সম্পৰেধেয্যাতি। ভেরৰাতি একেনাকারেন ভযম্পি ভেরৰম্পি তঞ্ঞেৰ। ৰুত্তঞ্হেতং ভগৰতা – ‘‘এতং নূন তং ভযং ভেরৰং ন জহে আগচ্ছতী’’তি। বহিদ্ধারম্মণং ৰুত্তং সীহা ব্যগ্ঘা দীপী অচ্ছা তরচ্ছা কোকা মহিংসা অস্সা হত্থী অহি ৰিচ্ছিকা সতপদী, চোরা ৰা অস্সু মানৰা ৰা কতকম্মা ৰা অকতকম্মা ৰা। অথাপরেন আকারেন ভযং ৰুচ্চতি অজ্ঝত্তিকং চিত্তসমুট্ঠানং ভযং ভযানকং ছম্ভিতত্তং লোমহংসো চেতসো উব্বেগো উত্রাসো, জাতিভযং জরাভযং ব্যাধিভযং মরণভযং রাজভযং চোরভযং অগ্গিভযং উদকভযং অত্তানুৰাদভযং পরানুৰাদভযং দণ্ডভযং দুগ্গতিভযং ঊমিভযং কুম্ভীলভযং আৰট্টভযং সুসুকাভযং ⁸⁵ আজীৰিকভযং অসিলোকভযং পরিসায সারজ্জভযং মদনভযং দুগ্গতিভযং ভযং ভযানকং ছম্ভিতত্তং লোমহংসো চেতসো উব্বেগো উত্রাসো। ভেরৰেসু চ ন সম্পৰেধেয্যাতি ভেরৰে পস্সিত্ৰা ৰা সুণিত্ৰা ৰা ন ৰেধেয্য ন পৰেধেয্য ন সম্পৰেধেয্য ন তসেয্য ন উত্তসেয্য ন পরিতসেয্য ন ভাযেয্য ন সন্তাসং আপজ্জেয্য, অভীরূ অস্স অছম্ভী অনুত্রাসী অপলাযী, পহীনভযভেরৰো ৰিগতলোমহংসো ৰিহরেয্যাতি – ভেরৰেসু চ ন সম্পৰেধেয্য।

Bheravesu ca na sampavedheyyāti. Bheravāti ekenākārena bhayampi bheravampi taññeva. Vuttañhetaṃ bhagavatā – ‘‘etaṃ nūna taṃ bhayaṃ bheravaṃ na jahe āgacchatī’’ti. Bahiddhārammaṇaṃ vuttaṃ sīhā byagghā dīpī acchā taracchā kokā mahiṃsā assā hatthī ahi vicchikā satapadī, corā vā assu mānavā vā katakammā vā akatakammā vā. Athāparena ākārena bhayaṃ vuccati ajjhattikaṃ cittasamuṭṭhānaṃ bhayaṃ bhayānakaṃ chambhitattaṃ lomahaṃso cetaso ubbego utrāso, jātibhayaṃ jarābhayaṃ byādhibhayaṃ maraṇabhayaṃ rājabhayaṃ corabhayaṃ aggibhayaṃ udakabhayaṃ attānuvādabhayaṃ parānuvādabhayaṃ daṇḍabhayaṃ duggatibhayaṃ ūmibhayaṃ kumbhīlabhayaṃ āvaṭṭabhayaṃ susukābhayaṃ ⁸⁶ ājīvikabhayaṃ asilokabhayaṃ parisāya sārajjabhayaṃ madanabhayaṃ duggatibhayaṃ bhayaṃ bhayānakaṃ chambhitattaṃ lomahaṃso cetaso ubbego utrāso. Bheravesu ca na sampavedheyyāti bherave passitvā vā suṇitvā vā na vedheyya na pavedheyya na sampavedheyya na taseyya na uttaseyya na paritaseyya na bhāyeyya na santāsaṃ āpajjeyya, abhīrū assa achambhī anutrāsī apalāyī, pahīnabhayabheravo vigatalomahaṃso vihareyyāti – bheravesu ca na sampavedheyya.

তেনাহ ভগৰা –

Tenāha bhagavā –

‘‘ফস্সেন যদা ফুট্ঠস্স, পরিদেৰং ভিক্খু ন করেয্য কুহিঞ্চি।

‘‘Phassena yadā phuṭṭhassa, paridevaṃ bhikkhu na kareyya kuhiñci;

ভৰঞ্চ নাভিজপ্পেয্য, ভেরৰেসু চ ন সম্পৰেধেয্যা’’তি॥

Bhavañca nābhijappeyya, bheravesu ca na sampavedheyyā’’ti.

১৫৯.

159.

অন্নানমথো পানানং, খাদনীযানমথোপি ৰত্থানং।

Annānamatho pānānaṃ, khādanīyānamathopi vatthānaṃ;

লদ্ধা ন সন্নিধিং কযিরা, ন চ পরিত্তসে তানি অলভমানো॥

Laddhāna sannidhiṃ kayirā, na ca parittase tāni alabhamāno.

অন্নানমথো পানানং, খাদনীযানমথোপি ৰত্থানন্তি। অন্নানন্তি ওদনো কুম্মাসো সত্তু মচ্ছো মংসং। পানানন্তি অট্ঠ পানানি – অম্বপানং, জম্বুপানং, চোচপানং, মোচপানং, মধুপানং , মুদ্দিকপানং, সালুকপানং, ফারুসকপানং। অপরানিপি অট্ঠ পানানি – কোসম্বপানং, কোলপানং, বদরপানং, ঘতপানং, তেলপানং, পযোপানং, যাগুপানং, রসপানং। খাদনীযানন্তি পিট্ঠখজ্জকং, পূৰখজ্জকং, মূলখজ্জকং, তচখজ্জকং, পত্তখজ্জকং, পুপ্ফখজ্জকং, ফলখজ্জকং। ৰত্থানন্তি ছ চীৰরানি – খোমং, কপ্পাসিকং, কোসেয্যং, কম্বলং, সাণং, ভঙ্গন্তি – অন্নানমথো পানানং খাদনীযানমথোপি ৰত্থানং।

Annānamathopānānaṃ, khādanīyānamathopi vatthānanti. Annānanti odano kummāso sattu maccho maṃsaṃ. Pānānanti aṭṭha pānāni – ambapānaṃ, jambupānaṃ, cocapānaṃ, mocapānaṃ, madhupānaṃ , muddikapānaṃ, sālukapānaṃ, phārusakapānaṃ. Aparānipi aṭṭha pānāni – kosambapānaṃ, kolapānaṃ, badarapānaṃ, ghatapānaṃ, telapānaṃ, payopānaṃ, yāgupānaṃ, rasapānaṃ. Khādanīyānanti piṭṭhakhajjakaṃ, pūvakhajjakaṃ, mūlakhajjakaṃ, tacakhajjakaṃ, pattakhajjakaṃ, pupphakhajjakaṃ, phalakhajjakaṃ. Vatthānanti cha cīvarāni – khomaṃ, kappāsikaṃ, koseyyaṃ, kambalaṃ, sāṇaṃ, bhaṅganti – annānamatho pānānaṃ khādanīyānamathopi vatthānaṃ.

লদ্ধা ন সন্নিধিং কযিরাতি। লদ্ধাতি লদ্ধা লভিত্ৰা অধিগন্ত্ৰা ৰিন্দিত্ৰা পটিলভিত্ৰা ন কুহনায, ন লপনায, ন নেমিত্তিকতায, ন নিপ্পেসিকতায, ন লাভেন লাভং নিজিগীসনতায ⁸⁷, ন কট্ঠদানেন, ন ৰেল়ুদানেন, ন পত্তদানেন, ন পুপ্ফদানেন, ন ফলদানেন, ন সিনানদানেন, ন চুণ্ণদানেন, ন মত্তিকাদানেন, ন দন্তকট্ঠদানেন, ন মুখোদকদানেন, ন চাটুকম্যতায, ন মুগ্গসূপ্যতায ⁸⁸, ন পারিভটযযতায, ন পীঠমদ্দিকতায ⁸⁹, ন ৰত্থুৰিজ্জায, ন তিরচ্ছানৰিজ্জায, ন অঙ্গৰিজ্জায, ন নক্খত্তৰিজ্জায, ন দূতগমনেন, ন পহিণগমনেন, ন জঙ্ঘপেসনিযেন, ন ৰেজ্জকম্মেন, ন নৰকম্মেন, ন পিণ্ডপটিপিণ্ডকেন, ন দানানুপ্পদানেন ধম্মেন সমেন লদ্ধা লভিত্ৰা অধিগন্ত্ৰা ৰিন্দিত্ৰা পটিলভিত্ৰাতি – লদ্ধা। ন সন্নিধিং কযিরাতি অন্নসন্নিধিং পানসন্নিধিং ৰত্থসন্নিধিং যানসন্নিধিং সযনসন্নিধিং গন্ধসন্নিধিং আমিসসন্নিধিং ন করেয্য ন জনেয্য ন সঞ্জনেয্য ন নিব্বত্তেয্য নাভিনিব্বত্তেয্যাতি – লদ্ধা ন সন্নিধিং কযিরা।

Laddhā na sannidhiṃ kayirāti. Laddhāti laddhā labhitvā adhigantvā vinditvā paṭilabhitvā na kuhanāya, na lapanāya, na nemittikatāya, na nippesikatāya, na lābhena lābhaṃ nijigīsanatāya ⁹⁰, na kaṭṭhadānena, na veḷudānena, na pattadānena, na pupphadānena, na phaladānena, na sinānadānena, na cuṇṇadānena, na mattikādānena, na dantakaṭṭhadānena, na mukhodakadānena, na cāṭukamyatāya, na muggasūpyatāya ⁹¹, na pāribhaṭayayatāya, na pīṭhamaddikatāya ⁹², na vatthuvijjāya, na tiracchānavijjāya, na aṅgavijjāya, na nakkhattavijjāya, na dūtagamanena, na pahiṇagamanena, na jaṅghapesaniyena, na vejjakammena, na navakammena, na piṇḍapaṭipiṇḍakena, na dānānuppadānena dhammena samena laddhā labhitvā adhigantvā vinditvā paṭilabhitvāti – laddhā. Na sannidhiṃ kayirāti annasannidhiṃ pānasannidhiṃ vatthasannidhiṃ yānasannidhiṃ sayanasannidhiṃ gandhasannidhiṃ āmisasannidhiṃ na kareyya na janeyya na sañjaneyya na nibbatteyya nābhinibbatteyyāti – laddhā na sannidhiṃ kayirā.

ন চ পরিত্তসে তানি অলভমানোতি। অন্নং ৰা ন লভামি , পানং ৰা ন লভামি, ৰত্থং ৰা ন লভামি, কুলং ৰা ন লভামি, গণং ৰা ন লভামি, আৰাসং ৰা ন লভামি, লাভং ৰা ন লভামি, যসং ৰা ন লভামি, পসংসং ৰা ন লভামি, সুখং ৰা ন লভামি, চীৰরং ৰা ন লভামি, পিণ্ডপাতং ৰা ন লভামি, সেনাসনং ৰা ন লভামি, গিলানপচ্চযভেসজ্জপরিক্খারং ৰা ন লভামি, গিলানুপট্ঠাকং ৰা ন লভামি, ‘‘অপ্পঞ্ঞাতোম্হী’’তি ন তসেয্য ন উত্তসেয্য ন পরিত্তসেয্য ন ভাযেয্য ন সন্তাসং আপজ্জেয্য , অভীরূ অস্স অছম্ভী অনুত্রাসী অপলাযী, পহীনভযভেরৰো ৰিগতলোমহংসো ৰিহরেয্যাতি – ন চ পরিত্তসে তানি অলভমানো।

Na ca parittase tāni alabhamānoti. Annaṃ vā na labhāmi , pānaṃ vā na labhāmi, vatthaṃ vā na labhāmi, kulaṃ vā na labhāmi, gaṇaṃ vā na labhāmi, āvāsaṃ vā na labhāmi, lābhaṃ vā na labhāmi, yasaṃ vā na labhāmi, pasaṃsaṃ vā na labhāmi, sukhaṃ vā na labhāmi, cīvaraṃ vā na labhāmi, piṇḍapātaṃ vā na labhāmi, senāsanaṃ vā na labhāmi, gilānapaccayabhesajjaparikkhāraṃ vā na labhāmi, gilānupaṭṭhākaṃ vā na labhāmi, ‘‘appaññātomhī’’ti na taseyya na uttaseyya na parittaseyya na bhāyeyya na santāsaṃ āpajjeyya , abhīrū assa achambhī anutrāsī apalāyī, pahīnabhayabheravo vigatalomahaṃso vihareyyāti – na ca parittase tāni alabhamāno.

তেনাহ ভগৰা –

Tenāha bhagavā –

‘‘অন্নানমথো পানানং, খাদনীযানমথোপি ৰত্থানং।

‘‘Annānamatho pānānaṃ, khādanīyānamathopi vatthānaṃ;

লদ্ধা ন সন্নিধিং কযিরা, ন চ পরিত্তসে তানি অলভমানো’’তি॥

Laddhā na sannidhiṃ kayirā, na ca parittase tāni alabhamāno’’ti.

১৬০.

160.

ঝাযী ন পাদলোলস্স, ৰিরমে কুক্কুচ্চা নপ্পমজ্জেয্য।

Jhāyīna pādalolassa, virame kukkuccā nappamajjeyya;

অথাসনেসু সযনেসু, অপ্পসদ্দেসু ভিক্খু ৰিহরেয্য॥

Athāsanesu sayanesu, appasaddesu bhikkhu vihareyya.

ঝাযী ন পাদলোলস্সাতি। ঝাযীতি পঠমেনপি ঝানেন ঝাযী, দুতিযেনপি ঝানেন ঝাযী, ততিযেনপি ঝানেন ঝাযী, চতুত্থেনপি ঝানেন ঝাযী, সৰিতক্কসৰিচারেনপি ঝানেন ঝাযী, অৰিতক্কৰিচারমত্তেনপি ঝানেন ঝাযী, অৰিতক্কঅৰিচারেনপি ঝানেন ঝাযী, সপ্পীতিকেনপি ঝানেন ঝাযী, নিপ্পীতিকেনপি ঝানেন ঝাযী, পীতিসহগতেনপি ঝানেন ঝাযী, সাতসহগতেনপি ঝানেন ঝাযী, সুখসহগতেনপি ঝানেন ঝাযী, উপেক্খাসহগতেনপি ঝানেন ঝাযী, সুঞ্ঞতেনপি ঝানেন ঝাযী, অনিমিত্তেনপি ঝানেন ঝাযী, অপ্পণিহিতেনপি ঝানেন ঝাযী, লোকিযেনপি ঝানেন ঝাযী, লোকুত্তরেনপি ঝানেন ঝাযী, ঝানরতো একত্তমনুযুত্তো পরমত্থগরুকোতি ⁹³ – ঝাযী।

Jhāyī na pādalolassāti. Jhāyīti paṭhamenapi jhānena jhāyī, dutiyenapi jhānena jhāyī, tatiyenapi jhānena jhāyī, catutthenapi jhānena jhāyī, savitakkasavicārenapi jhānena jhāyī, avitakkavicāramattenapi jhānena jhāyī, avitakkaavicārenapi jhānena jhāyī, sappītikenapi jhānena jhāyī, nippītikenapi jhānena jhāyī, pītisahagatenapi jhānena jhāyī, sātasahagatenapi jhānena jhāyī, sukhasahagatenapi jhānena jhāyī, upekkhāsahagatenapi jhānena jhāyī, suññatenapi jhānena jhāyī, animittenapi jhānena jhāyī, appaṇihitenapi jhānena jhāyī, lokiyenapi jhānena jhāyī, lokuttarenapi jhānena jhāyī, jhānarato ekattamanuyutto paramatthagarukoti ⁹⁴ – jhāyī.

ন পাদলোলস্সাতি। কথং পাদলোলো হোতি? ইধেকচ্চো পাদলোলিযেন সমন্নাগতো হোতি আরামেন আরামং উয্যানেন উয্যানং গামেন গামং নিগমেন নিগমং নগরেন নগরং রট্ঠেন রট্ঠং জনপদেন জনপদং দীঘচারিকং অনৰট্ঠিতচারিকং অনুযুত্তো ৰিহরতি। এৰম্পি পাদলোলো হোতি।

Napādalolassāti. Kathaṃ pādalolo hoti? Idhekacco pādaloliyena samannāgato hoti ārāmena ārāmaṃ uyyānena uyyānaṃ gāmena gāmaṃ nigamena nigamaṃ nagarena nagaraṃ raṭṭhena raṭṭhaṃ janapadena janapadaṃ dīghacārikaṃ anavaṭṭhitacārikaṃ anuyutto viharati. Evampi pādalolo hoti.

অথ ৰা ভিক্খু অন্তোপিসঙ্ঘারামে পাদলোলিযেন সমন্নাগতো হোতি। ন অত্থহেতু ন কারণহেতু উদ্ধতো অৰূপসন্তচিত্তো পরিৰেণতো পরিৰেণং গচ্ছতি ৰিহারতো ৰিহারং গচ্ছতি অড্ঢযোগতো অড্ঢযোগং গচ্ছতি পাসাদতো পাসাদং গচ্ছতি হম্মিযতো হম্মিযং গচ্ছতি গুহায গুহং গচ্ছতি লেণতো লেণং গচ্ছতি কুটিতো কুটিং গচ্ছতি কূটাগারতো কূটাগারং গচ্ছতি অট্টতো অট্টং গচ্ছতি মাল়তো মাল়ং গচ্ছতি উদ্দণ্ডতো উদ্দণ্ডং গচ্ছতি উপট্ঠানসালতো উপট্ঠানসালং গচ্ছতি মণ্ডলমাল়তো মণ্ডলমাল়ং গচ্ছতি রুক্খমূলতো রুক্খমূলং গচ্ছতি। যত্থ ৰা পন ভিক্খূ নিসীদন্তি তহিং গচ্ছতি, তত্থ একস্স ৰা দুতিযো হোতি, দ্ৰিন্নং ৰা ততিযো হোতি, তিণ্ণং ৰা চতুত্থো হোতি। তত্থ বহুং সম্ফপ্পলাপং পলপতি, সেয্যথিদং – রাজকথং চোরকথং মহামত্তকথং সেনাকথং ভযকথং যুদ্ধকথং অন্নকথং পানকথং ৰত্থকথং যানকথং সযনকথং মালাকথং গন্ধকথং ঞাতিকথং গামকথং নিগমকথং নগরকথং জনপদকথং ইত্থিকথং সূরকথং ৰিসিখাকথং কুম্ভট্ঠানকথং পুব্বপেতকথং নানত্তকথং লোকক্খাযিকং সমুদ্দক্খাযিকং ইতি ভৰাভৰকথং ইতি ৰা। এৰম্পি পাদলোলো হোতি।

Atha vā bhikkhu antopisaṅghārāme pādaloliyena samannāgato hoti. Na atthahetu na kāraṇahetu uddhato avūpasantacitto pariveṇato pariveṇaṃ gacchati vihārato vihāraṃ gacchati aḍḍhayogato aḍḍhayogaṃ gacchati pāsādato pāsādaṃ gacchati hammiyato hammiyaṃ gacchati guhāya guhaṃ gacchati leṇato leṇaṃ gacchati kuṭito kuṭiṃ gacchati kūṭāgārato kūṭāgāraṃ gacchati aṭṭato aṭṭaṃ gacchati māḷato māḷaṃ gacchati uddaṇḍato uddaṇḍaṃ gacchati upaṭṭhānasālato upaṭṭhānasālaṃ gacchati maṇḍalamāḷato maṇḍalamāḷaṃ gacchati rukkhamūlato rukkhamūlaṃ gacchati. Yattha vā pana bhikkhū nisīdanti tahiṃ gacchati, tattha ekassa vā dutiyo hoti, dvinnaṃ vā tatiyo hoti, tiṇṇaṃ vā catuttho hoti. Tattha bahuṃ samphappalāpaṃ palapati, seyyathidaṃ – rājakathaṃ corakathaṃ mahāmattakathaṃ senākathaṃ bhayakathaṃ yuddhakathaṃ annakathaṃ pānakathaṃ vatthakathaṃ yānakathaṃ sayanakathaṃ mālākathaṃ gandhakathaṃ ñātikathaṃ gāmakathaṃ nigamakathaṃ nagarakathaṃ janapadakathaṃ itthikathaṃ sūrakathaṃ visikhākathaṃ kumbhaṭṭhānakathaṃ pubbapetakathaṃ nānattakathaṃ lokakkhāyikaṃ samuddakkhāyikaṃ iti bhavābhavakathaṃ iti vā. Evampi pādalolo hoti.

ন পাদলোলস্সাতি। পাদলোলিযং পজহেয্য ৰিনোদেয্য ব্যন্তিং করেয্য অনভাৰং গমেয্য, পাদলোলিযা আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরেয্য চরেয্য ৰিচরেয্য ইরিযেয্য ৰত্তেয্য পালেয্য যপেয্য যাপেয্য, পটিসল্লানারামো অস্স পটিসল্লানরতো অজ্ঝত্তং চেতোসমথমনুযুত্তো অনিরাকতজ্ঝানো ৰিপস্সনা সমন্নাগতো ব্রূহেতা সুঞ্ঞাগারানং ঝাযী ঝানরতো একত্তমনুযুত্তো পরমত্থগরুকোতি – ঝাযী ন পাদলোলস্স।

Napādalolassāti. Pādaloliyaṃ pajaheyya vinodeyya byantiṃ kareyya anabhāvaṃ gameyya, pādaloliyā ārato assa virato paṭivirato nikkhanto nissaṭo vippamutto visaññutto vimariyādikatena cetasā vihareyya careyya vicareyya iriyeyya vatteyya pāleyya yapeyya yāpeyya, paṭisallānārāmo assa paṭisallānarato ajjhattaṃ cetosamathamanuyutto anirākatajjhāno vipassanā samannāgato brūhetā suññāgārānaṃ jhāyī jhānarato ekattamanuyutto paramatthagarukoti – jhāyī na pādalolassa.

ৰিরমে কুক্কুচ্চা নপ্পমজ্জেয্যাতি। কুক্কুচ্চন্তি হত্থকুক্কুচ্চম্পি কুক্কুচ্চং, পাদকুক্কুচ্চম্পি কুক্কুচ্চং, হত্থপাদকুক্কুচ্চম্পি কুক্কুচ্চং, অকপ্পিযে কপ্পিযসঞ্ঞিতা, কপ্পিযে অকপ্পিযসঞ্ঞিতা, অৰজ্জে ৰজ্জসঞ্ঞিতা, ৰজ্জে অৰজ্জসঞ্ঞিতা, যং এৰরূপং কুক্কুচ্চং কুক্কুচ্চাযনা কুক্কুচ্চাযিতত্তং চেতসো ৰিপ্পটিসারো মনোৰিলেখো – ইদং ৰুচ্চতি কুক্কুচ্চং।

Virame kukkuccā nappamajjeyyāti. Kukkuccanti hatthakukkuccampi kukkuccaṃ, pādakukkuccampi kukkuccaṃ, hatthapādakukkuccampi kukkuccaṃ, akappiye kappiyasaññitā, kappiye akappiyasaññitā, avajje vajjasaññitā, vajje avajjasaññitā, yaṃ evarūpaṃ kukkuccaṃ kukkuccāyanā kukkuccāyitattaṃ cetaso vippaṭisāro manovilekho – idaṃ vuccati kukkuccaṃ.

অপি চ দ্ৰীহি কারণেহি উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো – কতত্তা চ অকতত্তা চ। কথং কতত্তা চ অকতত্তা চ উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো? ‘‘কতং মে কাযদুচ্চরিতং, অকতং মে কাযসুচরিত’’ন্তি উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো, ‘‘কতং মে ৰচীদুচ্চরিতং, অকতং মে ৰচীসুচরিত’’ন্তি উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো, ‘‘কতং মে মনোদুচ্চরিতং, অকতং মে মনোসুচরিতন্তি…পে॰… ‘‘কতো মে পাণাতিপাতো, অকতা মে পাণাতিপাতা ৰেরমণী’’তি উপ্পজ্জতি কুক্কুচ্চং…পে॰… মনোৰিলেখো, ‘‘কতং মে অদিন্নাদানং… কতো মে কামেসুমিচ্ছাচারো… কতো মে মুসাৰাদো… কতা মে পিসুণৰাচা… কতা মে ফরুসৰাচা… কতো মে সম্ফপ্পলাপো… কতা মে অভিজ্ঝা… কতো মে ব্যাপাদো… কতা মে মিচ্ছাদিট্ঠি, অকতা মে সম্মাদিট্ঠী’’তি উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো । এৰং কতত্তা চ অকতত্তা চ উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো।

Api ca dvīhi kāraṇehi uppajjati kukkuccaṃ cetaso vippaṭisāro manovilekho – katattā ca akatattā ca. Kathaṃ katattā ca akatattā ca uppajjati kukkuccaṃ cetaso vippaṭisāro manovilekho? ‘‘Kataṃ me kāyaduccaritaṃ, akataṃ me kāyasucarita’’nti uppajjati kukkuccaṃ cetaso vippaṭisāro manovilekho, ‘‘kataṃ me vacīduccaritaṃ, akataṃ me vacīsucarita’’nti uppajjati kukkuccaṃ cetaso vippaṭisāro manovilekho, ‘‘kataṃ me manoduccaritaṃ, akataṃ me manosucaritanti…pe… ‘‘kato me pāṇātipāto, akatā me pāṇātipātā veramaṇī’’ti uppajjati kukkuccaṃ…pe… manovilekho, ‘‘kataṃ me adinnādānaṃ… kato me kāmesumicchācāro… kato me musāvādo… katā me pisuṇavācā… katā me pharusavācā… kato me samphappalāpo… katā me abhijjhā… kato me byāpādo… katā me micchādiṭṭhi, akatā me sammādiṭṭhī’’ti uppajjati kukkuccaṃ cetaso vippaṭisāro manovilekho . Evaṃ katattā ca akatattā ca uppajjati kukkuccaṃ cetaso vippaṭisāro manovilekho.

অথ ৰা ‘‘সীলেসুম্হি ন পরিপূরকারী’’তি উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো, ‘‘ইন্দ্রিযেসুম্হি অগুত্তদ্ৰারো’’তি…পে॰… ‘‘ভোজনে অমত্তঞ্ঞুম্হী’’তি… ‘‘জাগরিযং অননুযুত্তোম্হী’’তি… ‘‘ন সতিসম্পজঞ্ঞেন সমন্নাগতোম্হী’’তি… ‘‘অভাৰিতা মে চত্তারো সতিপট্ঠানা’’তি… ‘‘অভাৰিতা মে চত্তারো সম্মপ্পধানা’’তি… ‘‘অভাৰিতা মে চত্তারো ইদ্ধিপাদা’’তি… ‘‘অভাৰিতানি মে পঞ্চিন্দ্রিযানী’’তি… ‘‘অভাৰিতানি মে পঞ্চ বলানী’’তি… ‘‘অভাৰিতা মে সত্ত বোজ্ঝঙ্গা’’তি… ‘‘অভাৰিতো মে অরিযো অট্ঠঙ্গিকো মগ্গো’’তি… ‘‘দুক্খং মে অপরিঞ্ঞাত’’ন্তি… ‘‘সমুদযো মে অপ্পহীনো’’তি… ‘‘মগ্গো মে অভাৰিতো’’তি… ‘‘নিরোধো মে অসচ্ছিকতো’’তি উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো। ৰিরমে কুক্কুচ্চাতি কুক্কুচ্চা আরমেয্য ৰিরমেয্য পটিৰিরমেয্য কুক্কুচ্চং পজহেয্য ৰিনোদেয্য ব্যন্তিং করেয্য অনভাৰং গমেয্য। কুক্কুচ্চা আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরেয্যাতি – ৰিরমে কুক্কুচ্চা।

Atha vā ‘‘sīlesumhi na paripūrakārī’’ti uppajjati kukkuccaṃ cetaso vippaṭisāro manovilekho, ‘‘indriyesumhi aguttadvāro’’ti…pe… ‘‘bhojane amattaññumhī’’ti… ‘‘jāgariyaṃ ananuyuttomhī’’ti… ‘‘na satisampajaññena samannāgatomhī’’ti… ‘‘abhāvitā me cattāro satipaṭṭhānā’’ti… ‘‘abhāvitā me cattāro sammappadhānā’’ti… ‘‘abhāvitā me cattāro iddhipādā’’ti… ‘‘abhāvitāni me pañcindriyānī’’ti… ‘‘abhāvitāni me pañca balānī’’ti… ‘‘abhāvitā me satta bojjhaṅgā’’ti… ‘‘abhāvito me ariyo aṭṭhaṅgiko maggo’’ti… ‘‘dukkhaṃ me apariññāta’’nti… ‘‘samudayo me appahīno’’ti… ‘‘maggo me abhāvito’’ti… ‘‘nirodho me asacchikato’’ti uppajjati kukkuccaṃ cetaso vippaṭisāro manovilekho. Virame kukkuccāti kukkuccā ārameyya virameyya paṭivirameyya kukkuccaṃ pajaheyya vinodeyya byantiṃ kareyya anabhāvaṃ gameyya. Kukkuccā ārato assa virato paṭivirato nikkhanto nissaṭo vippamutto visaññutto vimariyādikatena cetasā vihareyyāti – virame kukkuccā.

নপ্পমজ্জেয্যাতি সক্কচ্চকারী অস্স সাতচ্চকারী অট্ঠিতকারী অনোলীনৰুত্তিকো অনিক্খিত্তচ্ছন্দো অনিক্খিত্তধুরো অপ্পমাদো কুসলেসু ধম্মেসু। ‘‘কদাহং অপরিপূরং ৰা সীলক্খন্ধং পরিপূরেয্যং, পরিপূরং ৰা সীলক্খন্ধং তত্থ তত্থ পঞ্ঞায অনুগ্গণ্হেয্য’’ন্তি? যো তত্থ ছন্দো চ ৰাযামো চ উস্সাহো চ উস্সোল়্হী চ থামো চ অপ্পটিৰানী চ সতি চ সম্পজঞ্ঞঞ্চ আতপ্পং পধানং অধিট্ঠানং অনুযোগো অপ্পমাদো কুসলেসু ধম্মেসু । ‘‘কদাহং অপরিপূরং ৰা সমাধিক্খন্ধং…পে॰… পঞ্ঞাক্খন্ধং… ৰিমুত্তিক্খন্ধং… ৰিমুত্তিঞাণদস্সনক্খন্ধং… কদাহং অপরিঞ্ঞাতং ৰা দুক্খং পরিজানেয্যং, অপ্পহীনে ৰা কিলেসে পজহেয্যং, অভাৰিতং ৰা মগ্গং ভাৰেয্যং, অসচ্ছিকতং ৰা নিরোধং সচ্ছিকরেয্য’’ন্তি? যো তত্থ ছন্দো চ ৰাযামো চ উস্সাহো চ উস্সোল়্হী চ থামো চ অপ্পটিৰানী চ সতি চ সম্পজঞ্ঞঞ্চ আতপ্পং পধানং অধিট্ঠানং অনুযোগো অপ্পমাদো কুসলেসু ধম্মেসূতি – ৰিরমে কুক্কুচ্চা নপ্পমজ্জেয্য।

Nappamajjeyyāti sakkaccakārī assa sātaccakārī aṭṭhitakārī anolīnavuttiko anikkhittacchando anikkhittadhuro appamādo kusalesu dhammesu. ‘‘Kadāhaṃ aparipūraṃ vā sīlakkhandhaṃ paripūreyyaṃ, paripūraṃ vā sīlakkhandhaṃ tattha tattha paññāya anuggaṇheyya’’nti? Yo tattha chando ca vāyāmo ca ussāho ca ussoḷhī ca thāmo ca appaṭivānī ca sati ca sampajaññañca ātappaṃ padhānaṃ adhiṭṭhānaṃ anuyogo appamādo kusalesu dhammesu . ‘‘Kadāhaṃ aparipūraṃ vā samādhikkhandhaṃ…pe… paññākkhandhaṃ… vimuttikkhandhaṃ… vimuttiñāṇadassanakkhandhaṃ… kadāhaṃ apariññātaṃ vā dukkhaṃ parijāneyyaṃ, appahīne vā kilese pajaheyyaṃ, abhāvitaṃ vā maggaṃ bhāveyyaṃ, asacchikataṃ vā nirodhaṃ sacchikareyya’’nti? Yo tattha chando ca vāyāmo ca ussāho ca ussoḷhī ca thāmo ca appaṭivānī ca sati ca sampajaññañca ātappaṃ padhānaṃ adhiṭṭhānaṃ anuyogo appamādo kusalesu dhammesūti – virame kukkuccā nappamajjeyya.

অথাসনেসু সযনেসু, অপ্পসদ্দেসু ভিক্খু ৰিহরেয্যাতি। অথাতি পদসন্ধি…পে॰… আসনং ৰুচ্চতি যত্থ নিসীদতি – মঞ্চো পীঠং ভিসি তট্টিকা চম্মখণ্ডো তিণসন্থারো পণ্ণসন্থারো পলালসন্থারো। সযনং ৰুচ্চতি সেনাসনং ৰিহারো অড্ঢযোগো পাসাদো হম্মিযং গুহাতি – অথাসনেসু সযনেসু।

Athāsanesu sayanesu, appasaddesu bhikkhu vihareyyāti. Athāti padasandhi…pe… āsanaṃ vuccati yattha nisīdati – mañco pīṭhaṃ bhisi taṭṭikā cammakhaṇḍo tiṇasanthāro paṇṇasanthāro palālasanthāro. Sayanaṃ vuccati senāsanaṃ vihāro aḍḍhayogo pāsādo hammiyaṃ guhāti – athāsanesu sayanesu.

অপ্পসদ্দেসু ভিক্খু ৰিহরেয্যাতি। অপ্পসদ্দেসু অপ্পনিগ্ঘোসেসু ৰিজনৰাতেসু মনুস্সরাহস্সেয্যকেসু পটিসল্লানসারুপ্পেসু সেনাসনেসু চরেয্য ৰিচরেয্য ৰিহরেয্য ইরিযেয্য ৰত্তেয্য পালেয্য যপেয্য যাপেয্যাতি – অথাসনেসু সযনেসু অপ্পসদ্দেসু ভিক্খু ৰিহরেয্য।

Appasaddesu bhikkhu vihareyyāti. Appasaddesu appanigghosesu vijanavātesu manussarāhasseyyakesu paṭisallānasāruppesu senāsanesu careyya vicareyya vihareyya iriyeyya vatteyya pāleyya yapeyya yāpeyyāti – athāsanesu sayanesu appasaddesu bhikkhu vihareyya.

তেনাহ ভগৰা –

Tenāha bhagavā –

‘‘ঝাযী ন পাদলোলস্স, ৰিরমে কুক্কুচ্চা নপ্পমজ্জেয্য।

‘‘Jhāyī na pādalolassa, virame kukkuccā nappamajjeyya;

অথাসনেসু সযনেসু, অপ্পসদ্দেসু ভিক্খু ৰিহরেয্যা’’তি॥

Athāsanesu sayanesu, appasaddesu bhikkhu vihareyyā’’ti.

১৬১.

161.

নিদ্দং ন বহুলীকরেয্য, জাগরিযং ভজেয্য আতাপী।

Niddaṃ na bahulīkareyya, jāgariyaṃ bhajeyya ātāpī;

তন্দিং মাযং হস্সং খিড্ডং, মেথুনং ৰিপ্পজহে সৰিভূসং॥

Tandiṃ māyaṃ hassaṃ khiḍḍaṃ, methunaṃ vippajahe savibhūsaṃ.

নিদ্দং ন বহুলীকরেয্যাতি। রত্তিন্দিৰং ছকোট্ঠাসং কারেত্ৰা পঞ্চকোট্ঠাসং পটিপজ্জেয্য এককোট্ঠাসং নিপ্পজ্জেয্যাতি – নিদ্দং ন বহুলীকরেয্য।

Niddaṃ na bahulīkareyyāti. Rattindivaṃ chakoṭṭhāsaṃ kāretvā pañcakoṭṭhāsaṃ paṭipajjeyya ekakoṭṭhāsaṃ nippajjeyyāti – niddaṃ na bahulīkareyya.

জাগরিযং ভজেয্য আতাপীতি। ইধ ভিক্খু দিৰসং চঙ্কমেন নিসজ্জায আৰরণীযেহি ধম্মেহি চিত্তং পরিসোধেয্য, রত্তিযা পঠমং যামং চঙ্কমেন নিসজ্জায আৰরণীযেহি ধম্মেহি চিত্তং পরিসোধেয্য, রত্তিযা মজ্ঝিমং যামং দক্খিণেন পস্সেন সীহসেয্যং কপ্পেয্য পাদেপাদং অচ্চাধায সতো সম্পজানো উট্ঠানসঞ্ঞং মনসিকরিত্ৰা, রত্তিযা পচ্ছিমং যামং পচ্চুট্ঠায চঙ্কমেন নিসজ্জায আৰরণীযেহি ধম্মেহি চিত্তং পরিসোধেয্য।

Jāgariyaṃ bhajeyya ātāpīti. Idha bhikkhu divasaṃ caṅkamena nisajjāya āvaraṇīyehi dhammehi cittaṃ parisodheyya, rattiyā paṭhamaṃ yāmaṃ caṅkamena nisajjāya āvaraṇīyehi dhammehi cittaṃ parisodheyya, rattiyā majjhimaṃ yāmaṃ dakkhiṇena passena sīhaseyyaṃ kappeyya pādepādaṃ accādhāya sato sampajāno uṭṭhānasaññaṃ manasikaritvā, rattiyā pacchimaṃ yāmaṃ paccuṭṭhāya caṅkamena nisajjāya āvaraṇīyehi dhammehi cittaṃ parisodheyya.

জাগরিযং ভজেয্যাতি জাগরিযং ভজেয্য সম্ভজেয্য সেৰেয্য নিসেৰেয্য সংসেৰেয্য পটিসেৰেয্যাতি – জাগরিযং ভজেয্য।

Jāgariyaṃ bhajeyyāti jāgariyaṃ bhajeyya sambhajeyya seveyya niseveyya saṃseveyya paṭiseveyyāti – jāgariyaṃ bhajeyya.

আতাপীতি। আতপ্পং ৰুচ্চতি ৰীরিযং ⁹⁵। যো চেতসিকো ৰীরিযারম্ভো নিক্কমো পরক্কমো উয্যামো ৰাযামো উস্সাহো উস্সোল়্হী থামো ঠিতি অসিথিলপরক্কমতা অনিক্খিত্তচ্ছন্দতা অনিক্খিত্তধুরতা ধুরসম্পগ্গহো ৰীরিযং ৰীরিযিন্দ্রিযং ৰীরিযবলং সম্মাৰাযামো। ইমিনা আতাপেন উপেতো সমুপেতো উপগতো সমুপগতো উপপন্নো সমুপপন্নো সমন্নাগতো সো ৰুচ্চতি আতাপীতি – জাগরিযং ভজেয্য আতাপী।

Ātāpīti. Ātappaṃ vuccati vīriyaṃ ⁹⁶. Yo cetasiko vīriyārambho nikkamo parakkamo uyyāmo vāyāmo ussāho ussoḷhī thāmo ṭhiti asithilaparakkamatā anikkhittacchandatā anikkhittadhuratā dhurasampaggaho vīriyaṃ vīriyindriyaṃ vīriyabalaṃ sammāvāyāmo. Iminā ātāpena upeto samupeto upagato samupagato upapanno samupapanno samannāgato so vuccati ātāpīti – jāgariyaṃ bhajeyya ātāpī.

তন্দিং মাযং হস্সং খিড্ডং, মেথুনং ৰিপ্পজহে সৰিভূসন্তি। তন্দীতি ⁹⁷ তন্দী তন্দিযনা তন্দিযিতত্তং ⁹⁸ তন্দিমনকতা আলস্যং আলস্যাযনা আলস্যাযিতত্তং। মাযা ৰুচ্চতি ৰঞ্চনিকা চরিযা। ইধেকচ্চো কাযেন দুচ্চরিতং চরিত্ৰা…পে॰… ৰাচায মনসা দুচ্চরিতং চরিত্ৰা তস্স পটিচ্ছাদনহেতু পাপিকং ইচ্ছং পণিদহতি। মা মং জঞ্ঞাতি ⁹⁹ ইচ্ছতি, মা মং জঞ্ঞাতি সঙ্কপ্পেতি, মা মং জঞ্ঞাতি ৰাচং ভাসতি, মা মং জঞ্ঞাতি কাযেন পরক্কমতি। যা এৰরূপা মাযাৰিতা অচ্চসরা ৰঞ্চনা নিকতি নিকিরণা পরিহরণা গূহনা পরিগূহনা ছাদনা পরিচ্ছাদনা ¹⁰⁰ অনুত্তানীকম্মং অনাৰিকম্মং ৰোচ্ছাদনা পাপকিরিযা – অযং ৰুচ্চতি মাযা। হস্সন্তি ইধেকচ্চো অতিৰেলং দন্তৰিদংসকং হসতি। ৰুত্তঞ্হেতং ভগৰতা – ‘‘কুমারকমিদং, ভিক্খৰে , অরিযস্স ৰিনযে যদিদং অতিৰেলং দন্তৰিদংসকং হসিত’’ন্তি।

Tandiṃ māyaṃ hassaṃ khiḍḍaṃ, methunaṃ vippajahe savibhūsanti. Tandīti ¹⁰¹ tandī tandiyanā tandiyitattaṃ ¹⁰² tandimanakatā ālasyaṃ ālasyāyanā ālasyāyitattaṃ. Māyā vuccati vañcanikā cariyā. Idhekacco kāyena duccaritaṃ caritvā…pe… vācāya manasā duccaritaṃ caritvā tassa paṭicchādanahetu pāpikaṃ icchaṃ paṇidahati. Mā maṃ jaññāti ¹⁰³ icchati, mā maṃ jaññāti saṅkappeti, mā maṃ jaññāti vācaṃ bhāsati, mā maṃ jaññāti kāyena parakkamati. Yā evarūpā māyāvitā accasarā vañcanā nikati nikiraṇā pariharaṇā gūhanā parigūhanā chādanā paricchādanā ¹⁰⁴ anuttānīkammaṃ anāvikammaṃ vocchādanā pāpakiriyā – ayaṃ vuccati māyā. Hassanti idhekacco ativelaṃ dantavidaṃsakaṃ hasati. Vuttañhetaṃ bhagavatā – ‘‘kumārakamidaṃ, bhikkhave , ariyassa vinaye yadidaṃ ativelaṃ dantavidaṃsakaṃ hasita’’nti.

খিড্ডাতি দ্ৰে খিড্ডা – কাযিকা চ খিড্ডা ৰাচসিকা চ খিড্ডা। কতমা কাযিকা খিড্ডা? হত্থীহিপি কীল়ন্তি, অস্সেহিপি কীল়ন্তি, রথেহিপি কীল়ন্তি, ধনূহিপি কীল়ন্তি, অট্ঠপদেহিপি কীল়ন্তি, দসপদেহিপি কীল়ন্তি, আকাসেপি কীল়ন্তি, পরিহারপথেপি কীল়ন্তি, সন্তিকাযপি কীল়ন্তি , খলিকাযপি কীল়ন্তি, ঘটিকাযপি কীল়ন্তি, সলাকহত্থেনপি কীল়ন্তি, অক্খেনপি কীল়ন্তি, পঙ্কচীরেনপি কীল়ন্তি , ৰঙ্ককেনপি কীল়ন্তি, মোক্খচিকাযপি কীল়ন্তি, চিঙ্গুলকেনপি কীল়ন্তি, পত্তাল়্হকেনপি কীল়ন্তি, রথকেনপি কীল়ন্তি, ধনুকেনপি কীল়ন্তি, অক্খরিকাযপি কীল়ন্তি, মনেসিকাযপি কীল়ন্তি, যথাৰজ্জেনপি কীল়ন্তি – অযং কাযিকা খিড্ডা। কতমা ৰাচসিকা খিড্ডা? মুখভেরিকং ¹⁰⁵ মুখালম্বরং মুখডিণ্ডিমকং ¹⁰⁶ মুখৰলিমকং মুখভেরুল়কং ¹⁰⁷ মুখদদ্দরিকং নাটকং লাপং গীতং দৰকম্মং – অযং ৰাচসিকা খিড্ডা।

Khiḍḍāti dve khiḍḍā – kāyikā ca khiḍḍā vācasikā ca khiḍḍā. Katamā kāyikā khiḍḍā? Hatthīhipi kīḷanti, assehipi kīḷanti, rathehipi kīḷanti, dhanūhipi kīḷanti, aṭṭhapadehipi kīḷanti, dasapadehipi kīḷanti, ākāsepi kīḷanti, parihārapathepi kīḷanti, santikāyapi kīḷanti , khalikāyapi kīḷanti, ghaṭikāyapi kīḷanti, salākahatthenapi kīḷanti, akkhenapi kīḷanti, paṅkacīrenapi kīḷanti , vaṅkakenapi kīḷanti, mokkhacikāyapi kīḷanti, ciṅgulakenapi kīḷanti, pattāḷhakenapi kīḷanti, rathakenapi kīḷanti, dhanukenapi kīḷanti, akkharikāyapi kīḷanti, manesikāyapi kīḷanti, yathāvajjenapi kīḷanti – ayaṃ kāyikā khiḍḍā. Katamā vācasikā khiḍḍā? Mukhabherikaṃ ¹⁰⁸ mukhālambaraṃ mukhaḍiṇḍimakaṃ ¹⁰⁹ mukhavalimakaṃ mukhabheruḷakaṃ ¹¹⁰ mukhadaddarikaṃ nāṭakaṃ lāpaṃ gītaṃ davakammaṃ – ayaṃ vācasikā khiḍḍā.

মেথুনধম্মো নাম যো সো অসদ্ধম্মো গামধম্মো ৰসলধম্মো দুট্ঠুল্লো ওদকন্তিকো রহস্সো দ্ৰযংদ্ৰযসমাপত্তি। কিংকারণা ৰুচ্চতি মেথুনধম্মো? উভিন্নং রত্তানং সারত্তানং অৰস্সুতানং পরিযুট্ঠিতানং পরিযাদিন্নচিত্তানং উভিন্নং সদিসানং ধম্মোতি, তংকারণা ৰুচ্চতি মেথুনধম্মো। যথা উভো কলহকারকা মেথুনকাতি ৰুচ্চন্তি, উভো ভণ্ডনকারকা…পে॰… উভো ভস্সকারকা… উভো অধিকরণকারকা… উভো ৰিৰাদকারকা… উভো ৰাদিনো… উভো সল্লাপকা মেথুনকাতি ৰুচ্চন্তি ; এৰমেৰ উভিন্নং রত্তানং সারত্তানং অৰস্সুতানং পরিযুট্ঠিতানং পরিযাদিন্নচিত্তানং উভিন্নং সদিসানং ধম্মোতি, তংকারণা ৰুচ্চতি মেথুনধম্মো।

Methunadhammo nāma yo so asaddhammo gāmadhammo vasaladhammo duṭṭhullo odakantiko rahasso dvayaṃdvayasamāpatti. Kiṃkāraṇā vuccati methunadhammo? Ubhinnaṃ rattānaṃ sārattānaṃ avassutānaṃ pariyuṭṭhitānaṃ pariyādinnacittānaṃ ubhinnaṃ sadisānaṃ dhammoti, taṃkāraṇā vuccati methunadhammo. Yathā ubho kalahakārakā methunakāti vuccanti, ubho bhaṇḍanakārakā…pe… ubho bhassakārakā… ubho adhikaraṇakārakā… ubho vivādakārakā… ubho vādino… ubho sallāpakā methunakāti vuccanti ; evameva ubhinnaṃ rattānaṃ sārattānaṃ avassutānaṃ pariyuṭṭhitānaṃ pariyādinnacittānaṃ ubhinnaṃ sadisānaṃ dhammoti, taṃkāraṇā vuccati methunadhammo.

ৰিভূসাতি দ্ৰে ৰিভূসা – অত্থি অগারিযস্স ৰিভূসা, অত্থি পব্বজিতস্স ৰিভূসা। কতমা অগারিযস্স ৰিভূসা? কেসা চ মস্সু চ মালা চ গন্ধা চ ৰিলেপনা চ আভরণা চ পিলন্ধনা চ ৰত্থঞ্চ সযনাসনঞ্চ ৰেঠনঞ্চ উচ্ছাদনং পরিমদ্দনং ন্হাপনং সম্বাহনং আদাসং অঞ্জনং মালাৰিলেপনং মুখচুণ্ণকং মুখলেপং হত্থবন্ধং সিখাবন্ধং ¹¹¹ দণ্ডনাল়িযং খগ্গং ছত্তং চিত্রা উপাহনা উণ্হীসং মণিং ৰাল়বীজনিং ওদাতানি ৰত্থানি দীঘদসানি ইতি ৰা – অযং অগারিযস্স ৰিভূসা। কতমা পব্বজিতস্স ৰিভূসা? চীৰরমণ্ডনা পত্তমণ্ডনা সেনাসনমণ্ডনা ইমস্স ৰা পূতিকাযস্স বাহিরানং ৰা পরিক্খারানং মণ্ডনা ৰিভূসনা কেল়না পরিকেল়না গেধিততা গেধিতত্তং চপলতা চাপল্যং – অযং পব্বজিতস্স ৰিভূসা।

Vibhūsāti dve vibhūsā – atthi agāriyassa vibhūsā, atthi pabbajitassa vibhūsā. Katamā agāriyassa vibhūsā? Kesā ca massu ca mālā ca gandhā ca vilepanā ca ābharaṇā ca pilandhanā ca vatthañca sayanāsanañca veṭhanañca ucchādanaṃ parimaddanaṃ nhāpanaṃ sambāhanaṃ ādāsaṃ añjanaṃ mālāvilepanaṃ mukhacuṇṇakaṃ mukhalepaṃ hatthabandhaṃ sikhābandhaṃ ¹¹² daṇḍanāḷiyaṃ khaggaṃ chattaṃ citrā upāhanā uṇhīsaṃ maṇiṃ vāḷabījaniṃ odātāni vatthāni dīghadasāni iti vā – ayaṃ agāriyassa vibhūsā. Katamā pabbajitassa vibhūsā? Cīvaramaṇḍanā pattamaṇḍanā senāsanamaṇḍanā imassa vā pūtikāyassa bāhirānaṃ vā parikkhārānaṃ maṇḍanā vibhūsanā keḷanā parikeḷanā gedhitatā gedhitattaṃ capalatā cāpalyaṃ – ayaṃ pabbajitassa vibhūsā.

তন্দিং মাযং হস্সং খিড্ডং, মেথুনং ৰিপ্পজহে সৰিভূসন্তি। তন্দিঞ্চ মাযঞ্চ হস্সঞ্চ খিড্ডঞ্চ মেথুনধম্মঞ্চ সৰিভূসং সপরিৰারং সপরিভণ্ডং সপরিক্খারং পজহেয্য ৰিনোদেয্য ব্যন্তিং করেয্য অনভাৰং গমেয্যাতি – তন্দিং মাযং হস্সং খিড্ডং, মেথুনং ৰিপ্পজহে সৰিভূসং।

Tandiṃ māyaṃ hassaṃ khiḍḍaṃ, methunaṃ vippajahe savibhūsanti. Tandiñca māyañca hassañca khiḍḍañca methunadhammañca savibhūsaṃ saparivāraṃ saparibhaṇḍaṃ saparikkhāraṃ pajaheyya vinodeyya byantiṃ kareyya anabhāvaṃ gameyyāti – tandiṃ māyaṃ hassaṃ khiḍḍaṃ, methunaṃ vippajahe savibhūsaṃ.

তেনাহ ভগৰা –

Tenāha bhagavā –

‘‘নিদ্দং ন বহুলীকরেয্য, জাগরিযং ভজেয্য আতাপী।

‘‘Niddaṃ na bahulīkareyya, jāgariyaṃ bhajeyya ātāpī;

তন্দিং মাযং হস্সং খিড্ডং, মেথুনং ৰিপ্পজহে সৰিভূস’’ন্তি॥

Tandiṃ māyaṃ hassaṃ khiḍḍaṃ, methunaṃ vippajahe savibhūsa’’nti.

১৬২.

162.

আথব্বণং সুপিনং লক্খণং, নো ৰিদহে অথোপি নক্খত্তং।

Āthabbaṇaṃsupinaṃ lakkhaṇaṃ, no vidahe athopi nakkhattaṃ;

ৰিরুতঞ্চ গব্ভকরণং, তিকিচ্ছং মামকো ন সেৰেয্য॥

Virutañcagabbhakaraṇaṃ, tikicchaṃ māmako na seveyya.

আথব্বণং সুপিনং লক্খণং, নো ৰিদহে অথোপি নক্খত্তন্তি। আথব্বণিকা আথব্বণং পযোজেন্তি, নগরে ৰা রুদ্ধে ¹¹³ সঙ্গামে ৰা পচ্চুপট্ঠিতে পরসেনপচ্চত্থিকেসু পচ্চামিত্তেসু ঈতিং উপ্পাদেন্তি, উপদ্দৰং উপ্পাদেন্তি, রোগং উপ্পাদেন্তি, পজ্জরকং করোন্তি, সূলং করোন্তি, ৰিসূচিকং করোন্তি, পক্খন্দিকং করোন্তি। এৰং আথব্বণিকা আথব্বণং পযোজেন্তি।

Āthabbaṇaṃ supinaṃ lakkhaṇaṃ, no vidahe athopi nakkhattanti. Āthabbaṇikā āthabbaṇaṃ payojenti, nagare vā ruddhe ¹¹⁴ saṅgāme vā paccupaṭṭhite parasenapaccatthikesu paccāmittesu ītiṃ uppādenti, upaddavaṃ uppādenti, rogaṃ uppādenti, pajjarakaṃ karonti, sūlaṃ karonti, visūcikaṃ karonti, pakkhandikaṃ karonti. Evaṃ āthabbaṇikā āthabbaṇaṃ payojenti.

সুপিনপাঠকা সুপিনং আদিসন্তি, যো পুব্বণ্হসমযং সুপিনং পস্সতি, এৰং ৰিপাকো হোতি। যো মজ্ঝন্হিকসমযং ¹¹⁵ সুপিনং পস্সতি, এৰং ৰিপাকো হোতি। যো সাযন্হসমযং সুপিনং পস্সতি, এৰং ৰিপাকো হোতি। যো পুরিমে যামে…পে॰… যো মজ্ঝিমে যামে… যো পচ্ছিমে যামে… যো দক্খিণেন পস্সেন নিপন্নো… যো ৰামেন পস্সেন নিপন্নো… যো উত্তানং নিপন্নো… যো অৰকুজ্জ নিপন্নো… যো চন্দং পস্সতি… যো সূরিযং পস্সতি… যো মহাসমুদ্দং পস্সতি… যো সিনেরুং পব্বতরাজানং পস্সতি… যো হত্থিং পস্সতি… যো অস্সং পস্সতি… যো রথং পস্সতি… যো পত্তিং পস্সতি… যো সেনাব্যূহং পস্সতি… যো আরামরামণেয্যকং পস্সতি… যো ৰনরামণেয্যকং পস্সতি… যো ভূমিরামণেয্যকং পস্সতি… যো পোক্খরণীরামণেয্যকং ¹¹⁶ পস্সতি, এৰং ৰিপাকো হোতীতি। এৰং সুপিনপাঠকা সুপিনং আদিসন্তি।

Supinapāṭhakā supinaṃ ādisanti, yo pubbaṇhasamayaṃ supinaṃ passati, evaṃ vipāko hoti. Yo majjhanhikasamayaṃ ¹¹⁷ supinaṃ passati, evaṃ vipāko hoti. Yo sāyanhasamayaṃ supinaṃ passati, evaṃ vipāko hoti. Yo purime yāme…pe… yo majjhime yāme… yo pacchime yāme… yo dakkhiṇena passena nipanno… yo vāmena passena nipanno… yo uttānaṃ nipanno… yo avakujja nipanno… yo candaṃ passati… yo sūriyaṃ passati… yo mahāsamuddaṃ passati… yo sineruṃ pabbatarājānaṃ passati… yo hatthiṃ passati… yo assaṃ passati… yo rathaṃ passati… yo pattiṃ passati… yo senābyūhaṃ passati… yo ārāmarāmaṇeyyakaṃ passati… yo vanarāmaṇeyyakaṃ passati… yo bhūmirāmaṇeyyakaṃ passati… yo pokkharaṇīrāmaṇeyyakaṃ ¹¹⁸ passati, evaṃ vipāko hotīti. Evaṃ supinapāṭhakā supinaṃ ādisanti.

লক্খণপাঠকা লক্খণং আদিসন্তি – মণিলক্খণং দণ্ডলক্খণং ৰত্থলক্খণং অসিলক্খণং উসুলক্খণং ধনুলক্খণং আৰুধলক্খণং ইত্থিলক্খণং পুরিসলক্খণং কুমারিকালক্খণং কুমারলক্খণং দাসিলক্খণং দাসলক্খণং হত্থিলক্খণং অস্সলক্খণং মহিংসলক্খণং উসভলক্খণং গোণলক্খণং অজলক্খণং মেণ্ডলক্খণং কুক্কুটলক্খণং ৰট্টলক্খণং গোধালক্খণং কণ্ণিকালক্খণং কচ্ছপলক্খণং মিগলক্খণং ইতি ৰাতি। এৰং লক্খণপাঠকা লক্খণং আদিসন্তি।

Lakkhaṇapāṭhakā lakkhaṇaṃ ādisanti – maṇilakkhaṇaṃ daṇḍalakkhaṇaṃ vatthalakkhaṇaṃ asilakkhaṇaṃ usulakkhaṇaṃ dhanulakkhaṇaṃ āvudhalakkhaṇaṃ itthilakkhaṇaṃ purisalakkhaṇaṃ kumārikālakkhaṇaṃ kumāralakkhaṇaṃ dāsilakkhaṇaṃ dāsalakkhaṇaṃ hatthilakkhaṇaṃ assalakkhaṇaṃ mahiṃsalakkhaṇaṃ usabhalakkhaṇaṃ goṇalakkhaṇaṃ ajalakkhaṇaṃ meṇḍalakkhaṇaṃ kukkuṭalakkhaṇaṃ vaṭṭalakkhaṇaṃ godhālakkhaṇaṃ kaṇṇikālakkhaṇaṃ kacchapalakkhaṇaṃ migalakkhaṇaṃ iti vāti. Evaṃ lakkhaṇapāṭhakā lakkhaṇaṃ ādisanti.

নক্খত্তপাঠকা নক্খত্তং আদিসন্তি। অট্ঠৰীসতি নক্খত্তানি। ইমিনা নক্খত্তেন ঘরপ্পৰেসো কত্তব্বো, ইমিনা নক্খত্তেন মকুটং বন্ধিতব্বং, ইমিনা নক্খত্তেন ৰারেয্যং কারেতব্বং, ইমিনা নক্খত্তেন বীজনীহারো ¹¹⁹ কত্তব্বো, ইমিনা নক্খত্তেন সংৰাসো ¹²⁰ গন্তব্বোতি। এৰং নক্খত্তপাঠকা নক্খত্তং আদিসন্তি।

Nakkhattapāṭhakā nakkhattaṃ ādisanti. Aṭṭhavīsati nakkhattāni. Iminā nakkhattena gharappaveso kattabbo, iminā nakkhattena makuṭaṃ bandhitabbaṃ, iminā nakkhattena vāreyyaṃ kāretabbaṃ, iminā nakkhattena bījanīhāro ¹²¹ kattabbo, iminā nakkhattena saṃvāso ¹²² gantabboti. Evaṃ nakkhattapāṭhakā nakkhattaṃ ādisanti.

আথব্বণং সুপিনং লক্খণং, নো ৰিদহে অথোপি নক্খত্তন্তি। আথব্বণঞ্চ সুপিনঞ্চ লক্খণঞ্চ নক্খত্তঞ্চ নো ৰিদহেয্য ন চরেয্য ন সমাচরেয্য ন সমাদায ৰত্তেয্য। অথ ৰা ন গণ্হেয্য ন উগ্গণ্হেয্য ন ধারেয্য ন উপধারেয্য ন উপলক্খেয্য নপ্পযোজেয্যাতি – আথব্বণং সুপিনং লক্খণং, নো ৰিদহে অথোপি নক্খত্তং।

Āthabbaṇaṃ supinaṃ lakkhaṇaṃ, no vidahe athopi nakkhattanti. Āthabbaṇañca supinañca lakkhaṇañca nakkhattañca no vidaheyya na careyya na samācareyya na samādāya vatteyya. Atha vā na gaṇheyya na uggaṇheyya na dhāreyya na upadhāreyya na upalakkheyya nappayojeyyāti – āthabbaṇaṃ supinaṃ lakkhaṇaṃ, no vidahe athopi nakkhattaṃ.

ৰিরুতঞ্চ গব্ভকরণং, তিকিচ্ছং মামকো ন সেৰেয্যাতি। ৰিরুতং ৰুচ্চতি মিগৰাক্কং। মিগৰাক্কপাঠকা ¹²³ মিগৰাক্কং আদিসন্তি – সকুন্তানং ৰা চতুপ্পদানং ৰা রুতং ¹²⁴ ৰস্সিতং জানন্তীতি। এৰং মিগৰাক্কপাঠকা মিগৰাক্কং আদিসন্তি। গব্ভকরণীযা গব্ভং সণ্ঠাপেন্তি। দ্ৰীহি কারণেহি গব্ভো ন সণ্ঠাতি – পাণকেহি ৰা ৰাতকুপ্পেহি ৰা। পাণকানং ৰা ৰাতকুপ্পানং ৰা পটিঘাতায ওসধং দেন্তীতি। এৰং গব্ভকরণীযা গব্ভং সণ্ঠাপেন্তি। তিকিচ্ছাতি পঞ্চ তিকিচ্ছা – সালাকিযং, সল্লকত্তিযং, কাযতিকিচ্ছং, ভূতিযং, কোমারভচ্চং। মামকোতি বুদ্ধমামকো ধম্মমামকো সঙ্ঘমামকো, সো ৰা ভগৰন্তং মমাযতি ভগৰা ৰা তং পুগ্গলং পরিগ্গণ্হাতি। ৰুত্তঞ্হেতং ভগৰতা – ‘‘যে তে, ভিক্খৰে, ভিক্খূ কুহা থদ্ধা লপা সিঙ্গী উন্নল়া অসমাহিতা ন মে তে, ভিক্খৰে, ভিক্খূ মামকা, অপগতা চ তে, ভিক্খৰে, ভিক্খূ ইমস্মা ধম্মৰিনযা, ন চ তে ভিক্খূ ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জন্তি। যে চ খো, ভিক্খৰে, ভিক্খূ নিক্কুহা নিল্লপা ধীরা অত্থদ্ধা সুসমাহিতা তে খো মে, ভিক্খৰে, ভিক্খূ মামকা ন চ অপগতা তে , ভিক্খৰে, ভিক্খূ ইমস্মা ধম্মৰিনযা, তে চ ভিক্খূ ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জন্তি’’।

Virutañca gabbhakaraṇaṃ, tikicchaṃ māmako na seveyyāti. Virutaṃ vuccati migavākkaṃ. Migavākkapāṭhakā ¹²⁵ migavākkaṃ ādisanti – sakuntānaṃ vā catuppadānaṃ vā rutaṃ ¹²⁶ vassitaṃ jānantīti. Evaṃ migavākkapāṭhakā migavākkaṃ ādisanti. Gabbhakaraṇīyā gabbhaṃ saṇṭhāpenti. Dvīhi kāraṇehi gabbho na saṇṭhāti – pāṇakehi vā vātakuppehi vā. Pāṇakānaṃ vā vātakuppānaṃ vā paṭighātāya osadhaṃ dentīti. Evaṃ gabbhakaraṇīyā gabbhaṃ saṇṭhāpenti. Tikicchāti pañca tikicchā – sālākiyaṃ, sallakattiyaṃ, kāyatikicchaṃ, bhūtiyaṃ, komārabhaccaṃ. Māmakoti buddhamāmako dhammamāmako saṅghamāmako, so vā bhagavantaṃ mamāyati bhagavā vā taṃ puggalaṃ pariggaṇhāti. Vuttañhetaṃ bhagavatā – ‘‘ye te, bhikkhave, bhikkhū kuhā thaddhā lapā siṅgī unnaḷā asamāhitā na me te, bhikkhave, bhikkhū māmakā, apagatā ca te, bhikkhave, bhikkhū imasmā dhammavinayā, na ca te bhikkhū imasmiṃ dhammavinaye vuddhiṃ virūḷhiṃ vepullaṃ āpajjanti. Ye ca kho, bhikkhave, bhikkhū nikkuhā nillapā dhīrā atthaddhā susamāhitā te kho me, bhikkhave, bhikkhū māmakā na ca apagatā te , bhikkhave, bhikkhū imasmā dhammavinayā, te ca bhikkhū imasmiṃ dhammavinaye vuddhiṃ virūḷhiṃ vepullaṃ āpajjanti’’.

‘‘কুহা থদ্ধা লপা সিঙ্গী, উন্নল়া অসমাহিতা।

‘‘Kuhā thaddhā lapā siṅgī, unnaḷā asamāhitā;

ন তে ধম্মে ৰিরূহন্তি, সম্মাসম্বুদ্ধদেসিতে॥

Na te dhamme virūhanti, sammāsambuddhadesite.

‘‘নিক্কুহা নিল্লপা ধীরা, অত্থদ্ধা সুসমাহিতা।

‘‘Nikkuhā nillapā dhīrā, atthaddhā susamāhitā;

তে ৰে ধম্মে ৰিরূহন্তি, সম্মাসম্বুদ্ধদেসিতে’’॥

Te ve dhamme virūhanti, sammāsambuddhadesite’’.

ৰিরুতঞ্চ গব্ভকরণং, তিকিচ্ছং মামকো ন সেৰেয্যাতি। ৰিরুতঞ্চ গব্ভকরণঞ্চ তিকিচ্ছঞ্চ মামকো ন সেৰেয্য ন নিসেৰেয্য ন সংসেৰেয্য নপ্পটিসেৰেয্য ন চরেয্য ন সমাচরেয্য ন সমাদায ৰত্তেয্য। অথ ৰা ন গণ্হেয্য ন উগ্গণ্হেয্য ন ধারেয্য ন উপধারেয্য ন উপলক্খেয্য নপ্পযোজেয্যাতি – ৰিরুতঞ্চ গব্ভকরণং তিকিচ্ছং মামকো ন সেৰেয্য।

Virutañca gabbhakaraṇaṃ, tikicchaṃ māmako na seveyyāti. Virutañca gabbhakaraṇañca tikicchañca māmako na seveyya na niseveyya na saṃseveyya nappaṭiseveyya na careyya na samācareyya na samādāya vatteyya. Atha vā na gaṇheyya na uggaṇheyya na dhāreyya na upadhāreyya na upalakkheyya nappayojeyyāti – virutañca gabbhakaraṇaṃ tikicchaṃ māmako na seveyya.

তেনাহ ভগৰা –

Tenāha bhagavā –

‘‘আথব্বণং সুপিনং লক্খণং, নো ৰিদহে অথোপি নক্খত্তং।

‘‘Āthabbaṇaṃ supinaṃ lakkhaṇaṃ, no vidahe athopi nakkhattaṃ;

ৰিরুতঞ্চ গব্ভকরণং, তিকিচ্ছং মামকো ন সেৰেয্যা’’তি॥

Virutañca gabbhakaraṇaṃ, tikicchaṃ māmako na seveyyā’’ti.

১৬৩.

163.

নিন্দায নপ্পৰেধেয্য, ন উন্নমেয্য পসংসিতো ভিক্খু।

Nindāyanappavedheyya, na unnameyya pasaṃsito bhikkhu;

লোভং সহ মচ্ছরিযেন, কোধং পেসুণিযঞ্চ পনুদেয্য॥

Lobhaṃ saha macchariyena, kodhaṃ pesuṇiyañca panudeyya.

নিন্দায নপ্পৰেধেয্যাতি। ইধেকচ্চে ভিক্খূ নিন্দন্তি জাতিযা ৰা গোত্তেন ৰা কোলপুত্তিযেন ৰা ৰণ্ণপোক্খরতায ৰা ধনেন ৰা অজ্ঝেনেন ৰা কম্মাযতনেন ৰা সিপ্পাযতনেন ৰা ৰিজ্জাট্ঠানেন ৰা সুতেন ৰা পটিভানেন ৰা অঞ্ঞতরঞ্ঞতরেন ৰা ৰত্থুনা নিন্দন্তি গরহন্তি উপৰদন্তি, নিন্দিতো গরহিতো উপৰদিতো নিন্দায গরহায উপৰাদেন অকিত্তিযা অৰণ্ণহারিকায ন ৰেধেয্য নপ্পৰেধেয্য ন সম্পৰেধেয্য ন তসেয্য ন উত্তসেয্য ন পরিতসেয্য ন ভাযেয্য ন সন্তাসং আপজ্জেয্য, অভীরূ অস্স অছম্ভী অনুত্রাসী অপলাযী, পহীনভযভেরৰো ৰিগতলোমহংসো ৰিহরেয্যাতি – নিন্দায নপ্পৰেধেয্য।

Nindāya nappavedheyyāti. Idhekacce bhikkhū nindanti jātiyā vā gottena vā kolaputtiyena vā vaṇṇapokkharatāya vā dhanena vā ajjhenena vā kammāyatanena vā sippāyatanena vā vijjāṭṭhānena vā sutena vā paṭibhānena vā aññataraññatarena vā vatthunā nindanti garahanti upavadanti, nindito garahito upavadito nindāya garahāya upavādena akittiyā avaṇṇahārikāya na vedheyya nappavedheyya na sampavedheyya na taseyya na uttaseyya na paritaseyya na bhāyeyya na santāsaṃ āpajjeyya, abhīrū assa achambhī anutrāsī apalāyī, pahīnabhayabheravo vigatalomahaṃso vihareyyāti – nindāya nappavedheyya.

ন উন্নমেয্য পসংসিতো ভিক্খূতি। ইধেকচ্চে ভিক্খূ পসংসন্তি জাতিযা ৰা গোত্তেন ৰা কোলপুত্তিযেন ৰা ৰণ্ণপোক্খরতায ৰা ধনেন ৰা অজ্ঝেনেন ৰা কম্মাযতনেন ৰা সিপ্পাযতনেন ৰা ৰিজ্জাট্ঠানেন ৰা সুতেন ৰা পটিভানেন ৰা অঞ্ঞতরঞ্ঞতরেন ৰা ৰত্থুনা পসংসন্তি থোমেন্তি কিত্তেন্তি ৰণ্ণেন্তি, পসংসিতো থোমিতো কিত্তিতো ৰণ্ণিতো পসংসায থোমনেন কিত্তিযা ৰণ্ণহারিকায উন্নতিং ন করেয্য উন্নমং ন করেয্য মানং ন করেয্য থম্ভং ন করেয্য, ন তেন মানং জনেয্য ন তেন থদ্ধো অস্স পত্থদ্ধো পগ্গহিতসিরোতি – ন উন্নমেয্য পসংসিতো ভিক্খু।

Naunnameyya pasaṃsito bhikkhūti. Idhekacce bhikkhū pasaṃsanti jātiyā vā gottena vā kolaputtiyena vā vaṇṇapokkharatāya vā dhanena vā ajjhenena vā kammāyatanena vā sippāyatanena vā vijjāṭṭhānena vā sutena vā paṭibhānena vā aññataraññatarena vā vatthunā pasaṃsanti thomenti kittenti vaṇṇenti, pasaṃsito thomito kittito vaṇṇito pasaṃsāya thomanena kittiyā vaṇṇahārikāya unnatiṃ na kareyya unnamaṃ na kareyya mānaṃ na kareyya thambhaṃ na kareyya, na tena mānaṃ janeyya na tena thaddho assa patthaddho paggahitasiroti – na unnameyya pasaṃsito bhikkhu.

লোভং সহ মচ্ছরিযেন, কোধং পেসুণিযঞ্চ পনুদেয্যাতি। লোভোতি যো লোভো লুব্ভনা লুব্ভিতত্তং সারাগো সারজ্জনা সারজ্জিতত্তং অভিজ্ঝা লোভো অকুসলমূলং। মচ্ছরিযন্তি পঞ্চ মচ্ছরিযানি – আৰাসমচ্ছরিযং…পে॰… গাহো ৰুচ্চতি মচ্ছরিযং। কোধোতি যো চিত্তস্স আঘাতো পটিঘাতো পটিঘং পটিৰিরোধো, কোপো পকোপো সম্পকোপো, দোসো পদোসো সম্পদোসো, চিত্তস্স ব্যাপত্তি মনোপদোসো, কোধো কুজ্ঝনা কুজ্ঝিতত্তং, দোসো দুস্সনা দুস্সিতত্তং, ব্যাপত্তিং ব্যাপজ্জনা ব্যাপজ্জিতত্তং, ৰিরোধো পটিৰিরোধো চণ্ডিক্কং অসুরোপো অনত্তমনতা চিত্তস্স। পেসুঞ্ঞন্তি ইধেকচ্চো পিসুণৰাচো হোতি ইতো সুত্ৰা অমুত্র অক্খাতা ইমেসং ভেদায, অমুত্র ৰা সুত্ৰা ইমেসং অক্খাতা অমূসং ভেদায। ইতি সমগ্গানং ৰা ভেত্তা ভিন্নানং ৰা অনুপ্পদাতা, ৰগ্গারামো ৰগ্গরতো ৰগ্গনন্দী ৰগ্গকরণিং ৰাচং ভাসিতা হোতি – ইদং ৰুচ্চতি পেসুঞ্ঞং।

Lobhaṃ saha macchariyena, kodhaṃ pesuṇiyañca panudeyyāti. Lobhoti yo lobho lubbhanā lubbhitattaṃ sārāgo sārajjanā sārajjitattaṃ abhijjhā lobho akusalamūlaṃ. Macchariyanti pañca macchariyāni – āvāsamacchariyaṃ…pe… gāho vuccati macchariyaṃ. Kodhoti yo cittassa āghāto paṭighāto paṭighaṃ paṭivirodho, kopo pakopo sampakopo, doso padoso sampadoso, cittassa byāpatti manopadoso, kodho kujjhanā kujjhitattaṃ, doso dussanā dussitattaṃ, byāpattiṃ byāpajjanā byāpajjitattaṃ, virodho paṭivirodho caṇḍikkaṃ asuropo anattamanatā cittassa. Pesuññanti idhekacco pisuṇavāco hoti ito sutvā amutra akkhātā imesaṃ bhedāya, amutra vā sutvā imesaṃ akkhātā amūsaṃ bhedāya. Iti samaggānaṃ vā bhettā bhinnānaṃ vā anuppadātā, vaggārāmo vaggarato vagganandī vaggakaraṇiṃ vācaṃ bhāsitā hoti – idaṃ vuccati pesuññaṃ.

অপি চ দ্ৰীহি কারণেহি পেসুঞ্ঞং উপসংহরতি – পিযকম্যতায ৰা ভেদাধিপ্পাযেন ৰা। কথং পিযকম্যতায পেসুঞ্ঞং উপসংহরতি? ইমস্স পিযো ভৰিস্সামি মনাপো ভৰিস্সামি ৰিস্সাসিকো ভৰিস্সামি অব্ভন্তরিকো ভৰিস্সামি সুহদযো ভৰিস্সামীতি। এৰং পিযকম্যতায পেসুঞ্ঞং উপসংহরতি। কথং ভেদাধিপ্পাযেন পেসুঞ্ঞং উপসংহরতি? কথং ইমে নানা অস্সু ৰিনা অস্সু ৰগ্গা অস্সু দ্ৰেধা অস্সু দ্ৰেজ্ঝা অস্সু দ্ৰে পক্খা অস্সু ভিজ্ঝেয্যুং ন সমাগচ্ছেয্যুং দুক্খং ন ফাসু ৰিহরেয্যুন্তি। এৰং ভেদাধিপ্পাযেন পেসুঞ্ঞং উপসংহরতি। লোভং সহ মচ্ছরিযেন, কোধং পেসুণিযঞ্চ পনুদেয্যাতি। লোভঞ্চ মচ্ছরিযঞ্চ কোধঞ্চ পেসুঞ্ঞঞ্চ নুদেয্য পনুদেয্য পজহেয্য ৰিনোদেয্য ব্যন্তিং করেয্য অনভাৰং গমেয্যাতি – লোভং সহ মচ্ছরিযেন, কোধং পেসুণিযঞ্চ পনুদেয্য।

Api ca dvīhi kāraṇehi pesuññaṃ upasaṃharati – piyakamyatāya vā bhedādhippāyena vā. Kathaṃ piyakamyatāya pesuññaṃ upasaṃharati? Imassa piyo bhavissāmi manāpo bhavissāmi vissāsiko bhavissāmi abbhantariko bhavissāmi suhadayo bhavissāmīti. Evaṃ piyakamyatāya pesuññaṃ upasaṃharati. Kathaṃ bhedādhippāyena pesuññaṃ upasaṃharati? Kathaṃ ime nānā assu vinā assu vaggā assu dvedhā assu dvejjhā assu dve pakkhā assu bhijjheyyuṃ na samāgaccheyyuṃ dukkhaṃ na phāsu vihareyyunti. Evaṃ bhedādhippāyena pesuññaṃ upasaṃharati. Lobhaṃ saha macchariyena, kodhaṃ pesuṇiyañca panudeyyāti. Lobhañca macchariyañca kodhañca pesuññañca nudeyya panudeyya pajaheyya vinodeyya byantiṃ kareyya anabhāvaṃ gameyyāti – lobhaṃ saha macchariyena, kodhaṃ pesuṇiyañca panudeyya.

তেনাহ ভগৰা –

Tenāha bhagavā –

‘‘নিন্দায নপ্পৰেধেয্য, ন উন্নমেয্য পসংসিতো ভিক্খু।

‘‘Nindāya nappavedheyya, na unnameyya pasaṃsito bhikkhu;

লোভং সহ মচ্ছরিযেন, কোধং পেসুণিযঞ্চ পনুদেয্যা’’তি॥

Lobhaṃ saha macchariyena, kodhaṃ pesuṇiyañca panudeyyā’’ti.

১৬৪.

164.

কযৰিক্কযে ন তিট্ঠেয্য, উপৰাদং ভিক্খু ন করেয্য কুহিঞ্চি।

Kayavikkaye na tiṭṭheyya, upavādaṃ bhikkhu na kareyya kuhiñci;

গামে চ নাভিসজ্জেয্য, লাভকম্যা জনং ন লপযেয্য॥

Gāme ca nābhisajjeyya, lābhakamyā janaṃ na lapayeyya.

কযৰিক্কযে ন তিট্ঠেয্যাতি। যে কযৰিক্কযা ৰিনযে পটিক্খিত্তা ন তে ইমস্মিং অত্থে অধিপ্পেতা। কথং কযৰিক্কযে তিট্ঠতি? পঞ্চন্নং সদ্ধিং পত্তং ৰা চীৰরং ৰা অঞ্ঞং ৰা কিঞ্চি পরিক্খারং ৰঞ্চনিযং ৰা করোন্তো উদযং ৰা পত্থযন্তো পরিৰত্তেতি। এৰং কযৰিক্কযে তিট্ঠতি। কথং কযৰিক্কযে ন তিট্ঠতি? পঞ্চন্নং সদ্ধিং পত্তং ৰা চীৰরং ৰা অঞ্ঞং ৰা কিঞ্চি পরিক্খারং ন ৰঞ্চনিযং ৰা করোন্তো ন উদযং ৰা পত্থযন্তো পরিৰত্তেতি। এৰং কযৰিক্কযে ন তিট্ঠতি। কযৰিক্কযে ন তিট্ঠেয্যাতি। কযৰিক্কযে ন তিট্ঠেয্য ন সন্তিট্ঠেয্য, কযৰিক্কযং পজহেয্য ৰিনোদেয্য ব্যন্তিং করেয্য অনভাৰং গমেয্য, কযৰিক্কযা আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরেয্যাতি – কযৰিক্কযে ন তিট্ঠেয্য।

Kayavikkayena tiṭṭheyyāti. Ye kayavikkayā vinaye paṭikkhittā na te imasmiṃ atthe adhippetā. Kathaṃ kayavikkaye tiṭṭhati? Pañcannaṃ saddhiṃ pattaṃ vā cīvaraṃ vā aññaṃ vā kiñci parikkhāraṃ vañcaniyaṃ vā karonto udayaṃ vā patthayanto parivatteti. Evaṃ kayavikkaye tiṭṭhati. Kathaṃ kayavikkaye na tiṭṭhati? Pañcannaṃ saddhiṃ pattaṃ vā cīvaraṃ vā aññaṃ vā kiñci parikkhāraṃ na vañcaniyaṃ vā karonto na udayaṃ vā patthayanto parivatteti. Evaṃ kayavikkaye na tiṭṭhati. Kayavikkaye na tiṭṭheyyāti. Kayavikkaye na tiṭṭheyya na santiṭṭheyya, kayavikkayaṃ pajaheyya vinodeyya byantiṃ kareyya anabhāvaṃ gameyya, kayavikkayā ārato assa virato paṭivirato nikkhanto nissaṭo vippamutto visaññutto vimariyādikatena cetasā vihareyyāti – kayavikkaye na tiṭṭheyya.

উপৰাদং ভিক্খু ন করেয্য কুহিঞ্চীতি। কতমে উপৰাদকরাতি কিলেসা? সন্তেকে সমণব্রাহ্মণা ইদ্ধিমন্তো দিব্বচক্খুকা পরচিত্তৰিদুনো, তে দূরতোপি পস্সন্তি আসন্নাপি ন দিস্সন্তি চেতসাপি চিত্তং পজানন্তি, দেৰতাপি খো সন্তি ইদ্ধিমন্তিনিযো দিব্বচক্খুকা পরচিত্তৰিদুনিযো, তা দূরতোপি পস্সন্তি, আসন্নাপি ন দিস্সন্তি চেতসাপি চিত্তং পজানন্তি। তে ওল়ারিকেহি ৰা কিলেসেহি মজ্ঝিমেহি ৰা কিলেসেহি সুখুমেহি ৰা কিলেসেহি উপৰদেয্যুং। কতমে ওল়ারিকা কিলেসা? কাযদুচ্চরিতং ৰচীদুচ্চরিতং মনোদুচ্চরিতং – ইমে ৰুচ্চন্তি ওল়ারিকা কিলেসা। কতমে মজ্ঝিমা কিলেসা? কামৰিতক্কো ব্যাপাদৰিতক্কো ৰিহিংসাৰিতক্কো – ইমে ৰুচ্চন্তি মজ্ঝিমা কিলেসা। কতমে সুখুমা কিলেসা? ঞাতিৰিতক্কো, জনপদৰিতক্কো, অপরৰিতক্কো, পরানুদযতা পটিসঞ্ঞুত্তো ৰিতক্কো , লাভসক্কারসিলোকপটিসঞ্ঞুত্তো ৰিতক্কো, অনৰঞ্ঞত্তিপটিসঞ্ঞুত্তো ৰিতক্কো – ইমে ৰুচ্চন্তি সুখুমা কিলেসা। তে ওল়ারিকেহি ৰা কিলেসেহি মজ্ঝিমেহি ৰা কিলেসেহি সুখুমেহি ৰা কিলেসেহি ন উপৰদেয্য উপৰাদং ন করেয্য উপৰাদকরে কিলেসে ন করেয্য ন জনেয্য ন সঞ্জনেয্য ন নিব্বত্তেয্য নাভিনিব্বত্তেয্য, উপৰাদকরে কিলেসে পজহেয্য ৰিনোদেয্য ব্যন্তিং করেয্য অনভাৰং গমেয্য, উপৰাদকরেহি কিলেসেহি আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরেয্য। কুহিঞ্চীতি কুহিঞ্চি কিম্হিচি কত্থচি অজ্ঝত্তং ৰা বহিদ্ধা ৰা অজ্ঝত্তবহিদ্ধা ৰাতি – উপৰাদং ভিক্খু ন করেয্য কুহিঞ্চি।

Upavādaṃ bhikkhu na kareyya kuhiñcīti. Katame upavādakarāti kilesā? Santeke samaṇabrāhmaṇā iddhimanto dibbacakkhukā paracittaviduno, te dūratopi passanti āsannāpi na dissanti cetasāpi cittaṃ pajānanti, devatāpi kho santi iddhimantiniyo dibbacakkhukā paracittaviduniyo, tā dūratopi passanti, āsannāpi na dissanti cetasāpi cittaṃ pajānanti. Te oḷārikehi vā kilesehi majjhimehi vā kilesehi sukhumehi vā kilesehi upavadeyyuṃ. Katame oḷārikā kilesā? Kāyaduccaritaṃ vacīduccaritaṃ manoduccaritaṃ – ime vuccanti oḷārikā kilesā. Katame majjhimā kilesā? Kāmavitakko byāpādavitakko vihiṃsāvitakko – ime vuccanti majjhimā kilesā. Katame sukhumā kilesā? Ñātivitakko, janapadavitakko, aparavitakko, parānudayatā paṭisaññutto vitakko , lābhasakkārasilokapaṭisaññutto vitakko, anavaññattipaṭisaññutto vitakko – ime vuccanti sukhumā kilesā. Te oḷārikehi vā kilesehi majjhimehi vā kilesehi sukhumehi vā kilesehi na upavadeyya upavādaṃ na kareyya upavādakare kilese na kareyya na janeyya na sañjaneyya na nibbatteyya nābhinibbatteyya, upavādakare kilese pajaheyya vinodeyya byantiṃ kareyya anabhāvaṃ gameyya, upavādakarehi kilesehi ārato assa virato paṭivirato nikkhanto nissaṭo vippamutto visaññutto vimariyādikatena cetasā vihareyya. Kuhiñcīti kuhiñci kimhici katthaci ajjhattaṃ vā bahiddhā vā ajjhattabahiddhā vāti – upavādaṃ bhikkhu na kareyya kuhiñci.

গামে চ নাভিসজ্জেয্যাতি। কথং গামে সজ্জতি? ইধ ভিক্খু গামে গিহীহি সংসট্ঠো ৰিহরতি সহনন্দী সহসোকী সুখিতেসু সুখিতো দুক্খিতেসু দুক্খিতো, উপ্পন্নেসু কিচ্চকরণীযেসু অত্তনা ৰোযোগং আপজ্জতি। এৰম্পি গামে সজ্জতি।

Gāme ca nābhisajjeyyāti. Kathaṃ gāme sajjati? Idha bhikkhu gāme gihīhi saṃsaṭṭho viharati sahanandī sahasokī sukhitesu sukhito dukkhitesu dukkhito, uppannesu kiccakaraṇīyesu attanā voyogaṃ āpajjati. Evampi gāme sajjati.

অথ ৰা ভিক্খু পুব্বণ্হসমযং নিৰাসেত্ৰা পত্তচীৰরমাদায গামং ৰা নিগমং ৰা পিণ্ডায পৰিসতি অরক্খিতেনেৰ কাযেন অরক্খিতায ৰাচায অরক্খিতেন চিত্তেন অনুপট্ঠিতায সতিযা অসংৰুতেহি ইন্দ্রিযেহি। সো তত্র তত্র সজ্জতি তত্র তত্র গণ্হাতি তত্র তত্র বজ্ঝতি তত্র তত্র অনযব্যসনং আপজ্জতি। এৰম্পি গামে সজ্জতি।

Atha vā bhikkhu pubbaṇhasamayaṃ nivāsetvā pattacīvaramādāya gāmaṃ vā nigamaṃ vā piṇḍāya pavisati arakkhiteneva kāyena arakkhitāya vācāya arakkhitena cittena anupaṭṭhitāya satiyā asaṃvutehi indriyehi. So tatra tatra sajjati tatra tatra gaṇhāti tatra tatra bajjhati tatra tatra anayabyasanaṃ āpajjati. Evampi gāme sajjati.

কথং গামে ন সজ্জতি? ইধ ভিক্খু গামে গিহীহি অসংসট্ঠো ৰিহরতি ন সহনন্দী ন সহসোকী ন সুখিতেসু সুখিতো ন দুক্খিতেসু দুক্খিতো, উপ্পন্নেসু কিচ্চকরণীযেসু ন অত্তনা ৰোযোগং আপজ্জতি। এৰম্পি গামে ন সজ্জতি।

Kathaṃ gāme na sajjati? Idha bhikkhu gāme gihīhi asaṃsaṭṭho viharati na sahanandī na sahasokī na sukhitesu sukhito na dukkhitesu dukkhito, uppannesu kiccakaraṇīyesu na attanā voyogaṃ āpajjati. Evampi gāme na sajjati.

অথ ৰা ভিক্খু পুব্বণ্হসমযং নিৰাসেত্ৰা পত্তচীৰরমাদায গামং ৰা নিগমং ৰা পিণ্ডায পৰিসতি রক্খিতেনেৰ কাযেন রক্খিতায ৰাচায রক্খিতেন চিত্তেন উপট্ঠিতায সতিযা সংৰুতেহি ইন্দ্রিযেহি। সো তত্র তত্র ন সজ্জতি তত্র তত্র ন গণ্হাতি তত্র তত্র ন বজ্ঝতি তত্র তত্র ন অনযব্যসনং আপজ্জতি। এৰম্পি গামে ন সজ্জতি। গামে চ নাভিসজ্জেয্যাতি গামে ন সজ্জেয্য ন গণ্হেয্য ন বজ্ঝেয্য ন পলিবজ্ঝেয্য, অগিদ্ধো অস্স অগধিতো অমুচ্ছিতো অনজ্ঝোসন্নো ৰীতগেধো ৰিগতগেধো চত্তগেধো…পে॰… ব্রহ্মভূতেন অত্তনা ৰিহরেয্যাতি – গামে চ নাভিসজ্জেয্য।

Atha vā bhikkhu pubbaṇhasamayaṃ nivāsetvā pattacīvaramādāya gāmaṃ vā nigamaṃ vā piṇḍāya pavisati rakkhiteneva kāyena rakkhitāya vācāya rakkhitena cittena upaṭṭhitāya satiyā saṃvutehi indriyehi. So tatra tatra na sajjati tatra tatra na gaṇhāti tatra tatra na bajjhati tatra tatra na anayabyasanaṃ āpajjati. Evampi gāme na sajjati. Gāme ca nābhisajjeyyāti gāme na sajjeyya na gaṇheyya na bajjheyya na palibajjheyya, agiddho assa agadhito amucchito anajjhosanno vītagedho vigatagedho cattagedho…pe… brahmabhūtena attanā vihareyyāti – gāme ca nābhisajjeyya.

লাভকম্যা জনং ন লপযেয্যাতি। কতমা লপনা? লাভসক্কারসিলোকসন্নিস্সিতস্স পাপিচ্ছস্স ইচ্ছাপকতস্স আমিসচক্খুকস্স লোকধম্মগরুকস্স যা পরেসং আলপনা লপনা সল্লপনা উল্লপনা সমুল্লপনা উন্নহনা সমুন্নহনা উক্কাচনা সমুক্কাচনা ¹²⁷ অনুপিযভাণিতা চাতুকম্যতা মুগ্গসূপ্যতা পারিভটযতা পরপিট্ঠিমংসিকতা ¹²⁸, যা তত্থ সণ্হৰাচতা সখিলৰাচতা সিথিলৰাচতা ¹²⁹ অফরুসৰাচতা – অযং ৰুচ্চতি লপনা।

Lābhakamyā janaṃ na lapayeyyāti. Katamā lapanā? Lābhasakkārasilokasannissitassa pāpicchassa icchāpakatassa āmisacakkhukassa lokadhammagarukassa yā paresaṃ ālapanā lapanā sallapanā ullapanā samullapanā unnahanā samunnahanā ukkācanā samukkācanā ¹³⁰ anupiyabhāṇitā cātukamyatā muggasūpyatā pāribhaṭayatā parapiṭṭhimaṃsikatā ¹³¹, yā tattha saṇhavācatā sakhilavācatā sithilavācatā ¹³² apharusavācatā – ayaṃ vuccati lapanā.

অপি চ দ্ৰীহি কারণেহি জনং লপতি – অত্তানং ৰা নীচং ঠপেন্তো পরং উচ্চং ঠপেন্তো জনং লপতি, অত্তানং ৰা উচ্চং ঠপেন্তো পরং নীচং ঠপেন্তো জনং লপতি। কথং অত্তানং নীচং ঠপেন্তো পরং উচ্চং ঠপেন্তো জনং লপতি? ‘‘তুম্হে মে বহূপকারা, অহং তুম্হে নিস্সায লভামি চীৰরপিণ্ডপাতসেনাসনগিলানপচ্চযভেসজ্জপরিক্খারং, যেপি মে অঞ্ঞে দাতুং ৰা কাতুং ৰা মঞ্ঞন্তি, তুম্হে নিস্সায তুম্হে সম্পস্সন্তা যম্পি মে পুরাণং মাতাপেত্তিকং নামধেয্যং তম্পি মে অন্তরহিতং। তুম্হেহি অহং ঞাযামি অসুকস্স কুলূপকো অসুকায কুলূপকো’’তি। এৰং অত্তানং নীচং ঠপেন্তো পরং উচ্চং ঠপেন্তো জনং লপতি।

Api ca dvīhi kāraṇehi janaṃ lapati – attānaṃ vā nīcaṃ ṭhapento paraṃ uccaṃ ṭhapento janaṃ lapati, attānaṃ vā uccaṃ ṭhapento paraṃ nīcaṃ ṭhapento janaṃ lapati. Kathaṃ attānaṃ nīcaṃ ṭhapento paraṃ uccaṃ ṭhapento janaṃ lapati? ‘‘Tumhe me bahūpakārā, ahaṃ tumhe nissāya labhāmi cīvarapiṇḍapātasenāsanagilānapaccayabhesajjaparikkhāraṃ, yepi me aññe dātuṃ vā kātuṃ vā maññanti, tumhe nissāya tumhe sampassantā yampi me purāṇaṃ mātāpettikaṃ nāmadheyyaṃ tampi me antarahitaṃ. Tumhehi ahaṃ ñāyāmi asukassa kulūpako asukāya kulūpako’’ti. Evaṃ attānaṃ nīcaṃ ṭhapento paraṃ uccaṃ ṭhapento janaṃ lapati.

কথং অত্তানং উচ্চং ঠপেন্তো পরং নীচং ঠপেন্তো জনং লপতি? ‘‘অহং তুম্হাকং বহূপকারো, তুম্হে মং আগম্ম বুদ্ধং সরণং গতা, ধম্মং সরণং গতা, সঙ্ঘং সরণং গতা, পাণাতিপাতা পটিৰিরতা, অদিন্নাদানা পটিৰিরতা, কামেসুমিচ্ছাচারা পটিৰিরতা, মুসাৰাদা পটিৰিরতা, সুরামেরযমজ্জপ্পমাদট্ঠানা পটিৰিরতা। অহং তুম্হাকং উদ্দেসং দেমি, পরিপুচ্ছং দেমি, উপোসথং আচিক্খামি, নৰকম্মং অধিট্ঠামি। অথ পন তুম্হে মং উজ্ঝিত্ৰা অঞ্ঞে সক্করোথ গরুং করোথ মানেথ পূজেথা’’তি। এৰং অত্তানং উচ্চং ঠপেন্তো পরং নীচং ঠপেন্তো জনং লপতি।

Kathaṃ attānaṃ uccaṃ ṭhapento paraṃ nīcaṃ ṭhapento janaṃ lapati? ‘‘Ahaṃ tumhākaṃ bahūpakāro, tumhe maṃ āgamma buddhaṃ saraṇaṃ gatā, dhammaṃ saraṇaṃ gatā, saṅghaṃ saraṇaṃ gatā, pāṇātipātā paṭiviratā, adinnādānā paṭiviratā, kāmesumicchācārā paṭiviratā, musāvādā paṭiviratā, surāmerayamajjappamādaṭṭhānā paṭiviratā. Ahaṃ tumhākaṃ uddesaṃ demi, paripucchaṃ demi, uposathaṃ ācikkhāmi, navakammaṃ adhiṭṭhāmi. Atha pana tumhe maṃ ujjhitvā aññe sakkarotha garuṃ karotha mānetha pūjethā’’ti. Evaṃ attānaṃ uccaṃ ṭhapento paraṃ nīcaṃ ṭhapento janaṃ lapati.

লাভকম্যা জনং ন লপযেয্যাতি। লাভহেতু লাভপচ্চযা লাভকারণা লাভাভিনিব্বত্তিযা লাভং পরিপাচেন্তো জনং ন লপযেয্য, লপনং পজহেয্য ৰিনোদেয্য ব্যন্তিং করেয্য অনভাৰং গমেয্য, লপনা আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরেয্যাতি – লাভকম্যা জনং ন লপযেয্য।

Lābhakamyājanaṃ na lapayeyyāti. Lābhahetu lābhapaccayā lābhakāraṇā lābhābhinibbattiyā lābhaṃ paripācento janaṃ na lapayeyya, lapanaṃ pajaheyya vinodeyya byantiṃ kareyya anabhāvaṃ gameyya, lapanā ārato assa virato paṭivirato nikkhanto nissaṭo vippamutto visaññutto vimariyādikatena cetasā vihareyyāti – lābhakamyā janaṃ na lapayeyya.

তেনাহ ভগৰা –

Tenāha bhagavā –

‘‘কযৰিক্কযে ন তিট্ঠেয্য, উপৰাদং ভিক্খু ন করেয্য কুহিঞ্চি।

‘‘Kayavikkaye na tiṭṭheyya, upavādaṃ bhikkhu na kareyya kuhiñci;

গামে চ নাভিসজ্জেয্য, লাভকম্যা জনং ন লপযেয্যা’’তি॥

Gāme ca nābhisajjeyya, lābhakamyā janaṃ na lapayeyyā’’ti.

১৬৫.

165.

ন চ কত্থিকো ¹³³ সিযা ভিক্খু, ন চ ৰাচং পযুত্তং ভাসেয্য।

Na ca katthiko¹³⁴siyā bhikkhu, na ca vācaṃ payuttaṃ bhāseyya;

পাগব্ভিযং ন সিক্খেয্য, কথং ৰিগ্গাহিকং ন কথযেয্য॥

Pāgabbhiyaṃ na sikkheyya, kathaṃ viggāhikaṃ na kathayeyya.

ন চ কত্থিকো সিযা ভিক্খূতি। ইধেকচ্চো কত্থী হোতি ৰিকত্থী। সো কত্থতি ৰিকত্থতি অহমস্মি সীলসম্পন্নোতি ৰা ৰতসম্পন্নোতি ৰা সীলব্বতসম্পন্নোতি ৰা জাতিযা ৰা গোত্তেন ৰা কোলপুত্তিযেন ৰা ৰণ্ণপোক্খরতায ৰা ধনেন ৰা অজ্ঝেনেন ৰা কম্মাযতনেন ৰা সিপ্পাযতনেন ৰা ৰিজ্জাট্ঠানেন ৰা সুতেন ৰা পটিভানেন ৰা অঞ্ঞতরঞ্ঞতরেন ৰা ৰত্থুনা। উচ্চা কুলা পব্বজিতোতি ৰা মহাভোগকুলা পব্বজিতোতি ৰা উল়ারভোগকুলা পব্বজিতোতি ৰা সুত্তন্তিকোতি ৰা ৰিনযধরোতি ৰা ধম্মকথিকোতি ৰা আরঞ্ঞিকোতি ৰা…পে॰… নেৰসঞ্ঞানাসঞ্ঞাযতনসমাপত্তিযা লাভীতি ৰা কত্থতি ৰিকত্থতি। এৰং ন কত্থেয্য ন ৰিকত্থেয্য, কত্থং পজহেয্য ৰিনোদেয্য ব্যন্তিং করেয্য অনভাৰং গমেয্য, কত্থনা আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরেয্যাতি – ন চ কত্থিকো সিযা ভিক্খু।

Naca katthiko siyā bhikkhūti. Idhekacco katthī hoti vikatthī. So katthati vikatthati ahamasmi sīlasampannoti vā vatasampannoti vā sīlabbatasampannoti vā jātiyā vā gottena vā kolaputtiyena vā vaṇṇapokkharatāya vā dhanena vā ajjhenena vā kammāyatanena vā sippāyatanena vā vijjāṭṭhānena vā sutena vā paṭibhānena vā aññataraññatarena vā vatthunā. Uccā kulā pabbajitoti vā mahābhogakulā pabbajitoti vā uḷārabhogakulā pabbajitoti vā suttantikoti vā vinayadharoti vā dhammakathikoti vā āraññikoti vā…pe… nevasaññānāsaññāyatanasamāpattiyā lābhīti vā katthati vikatthati. Evaṃ na kattheyya na vikattheyya, katthaṃ pajaheyya vinodeyya byantiṃ kareyya anabhāvaṃ gameyya, katthanā ārato assa virato paṭivirato nikkhanto nissaṭo vippamutto visaññutto vimariyādikatena cetasā vihareyyāti – na ca katthiko siyā bhikkhu.

ন চ ৰাচং পযুত্তং ভাসেয্যাতি। কতমা পযুত্তৰাচা? ইধেকচ্চো চীৰরপযুত্তং ৰাচং ভাসতি, পিণ্ডপাতপযুত্তং ৰাচং ভাসতি, সেনাসনপযুত্তং ৰাচং ভাসতি, গিলানপচ্চযভেসজ্জপরিক্খারপযুত্তং ৰাচং ভাসতি – অযম্পি ৰুচ্চতি পযুত্তৰাচা।

Naca vācaṃ payuttaṃ bhāseyyāti. Katamā payuttavācā? Idhekacco cīvarapayuttaṃ vācaṃ bhāsati, piṇḍapātapayuttaṃ vācaṃ bhāsati, senāsanapayuttaṃ vācaṃ bhāsati, gilānapaccayabhesajjaparikkhārapayuttaṃ vācaṃ bhāsati – ayampi vuccati payuttavācā.

অথ ৰা চীৰরহেতু পিণ্ডপাতহেতু সেনাসনহেতু গিলানপচ্চযভেসজ্জপরিক্খারহেতু সচ্চম্পি ভণতি মুসাপি ভণতি, পিসুণম্পি ভণতি অপিসুণম্পি ভণতি, ফরুসম্পি ভণতি অফরুসম্পি ভণতি, সম্ফপ্পলাপম্পি ভণতি অসম্ফপ্পলাপম্পি ভণতি, মন্তাপি ৰাচং ভাসতি – অযম্পি ৰুচ্চতি পযুত্তৰাচা। অথ ৰা পসন্নচিত্তো পরেসং ধম্মং দেসেতি – ‘‘অহো ৰত মে ধম্মং সুণেয্যুং, সুত্ৰাৰ ধম্মং পসীদেয্যুং, পসন্না চ মে পসন্নাকারং করেয্যু’’ন্তি – অযং ৰুচ্চতি পযুত্তৰাচা। ন চ ৰাচং পযুত্তং ভাসেয্যাতি। অন্তমসো ধম্মদেসনং ৰাচং উপাদায পযুত্তৰাচং ন ভাসেয্য ন কথেয্য ন ভণেয্য ন দীপেয্য ন ৰোহরেয্য, পযুত্তং ৰাচং পজহেয্য ৰিনোদেয্য ব্যন্তিং করেয্য অনভাৰং গমেয্য, পযুত্তৰাচায আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরেয্যাতি – ন চ ৰাচং পযুত্তং ভাসেয্য।

Atha vā cīvarahetu piṇḍapātahetu senāsanahetu gilānapaccayabhesajjaparikkhārahetu saccampi bhaṇati musāpi bhaṇati, pisuṇampi bhaṇati apisuṇampi bhaṇati, pharusampi bhaṇati apharusampi bhaṇati, samphappalāpampi bhaṇati asamphappalāpampi bhaṇati, mantāpi vācaṃ bhāsati – ayampi vuccati payuttavācā. Atha vā pasannacitto paresaṃ dhammaṃ deseti – ‘‘aho vata me dhammaṃ suṇeyyuṃ, sutvāva dhammaṃ pasīdeyyuṃ, pasannā ca me pasannākāraṃ kareyyu’’nti – ayaṃ vuccati payuttavācā. Na ca vācaṃ payuttaṃ bhāseyyāti. Antamaso dhammadesanaṃ vācaṃ upādāya payuttavācaṃ na bhāseyya na katheyya na bhaṇeyya na dīpeyya na vohareyya, payuttaṃ vācaṃ pajaheyya vinodeyya byantiṃ kareyya anabhāvaṃ gameyya, payuttavācāya ārato assa virato paṭivirato nikkhanto nissaṭo vippamutto visaññutto vimariyādikatena cetasā vihareyyāti – na ca vācaṃ payuttaṃ bhāseyya.

পাগব্ভিযং ন সিক্খেয্যাতি। পাগব্ভিযন্তি তীণি পাগব্ভিযানি – কাযিকং পাগব্ভিযং, ৰাচসিকং পাগব্ভিযং, চেতসিকং পাগব্ভিযং। কতমং কাযিকং পাগব্ভিযং? ইধেকচ্চো সঙ্ঘগতোপি কাযিকং পাগব্ভিযং দস্সেতি, গণগতোপি কাযিকং পাগব্ভিযং দস্সেতি, ভোজনসালাযপি কাযিকং পাগব্ভিযং দস্সেতি, জন্তাঘরেপি কাযিকং পাগব্ভিযং দস্সেতি, উদকতিত্থেপি কাযিকং পাগব্ভিযং দস্সেতি, অন্তরঘরং পৰিসন্তোপি কাযিকং পাগব্ভিযং দস্সেতি, অন্তরঘরং পৰিট্ঠোপি কাযিকং পাগব্ভিযং দস্সেতি।

Pāgabbhiyaṃ na sikkheyyāti. Pāgabbhiyanti tīṇi pāgabbhiyāni – kāyikaṃ pāgabbhiyaṃ, vācasikaṃ pāgabbhiyaṃ, cetasikaṃ pāgabbhiyaṃ. Katamaṃ kāyikaṃ pāgabbhiyaṃ? Idhekacco saṅghagatopi kāyikaṃ pāgabbhiyaṃ dasseti, gaṇagatopi kāyikaṃ pāgabbhiyaṃ dasseti, bhojanasālāyapi kāyikaṃ pāgabbhiyaṃ dasseti, jantāgharepi kāyikaṃ pāgabbhiyaṃ dasseti, udakatitthepi kāyikaṃ pāgabbhiyaṃ dasseti, antaragharaṃ pavisantopi kāyikaṃ pāgabbhiyaṃ dasseti, antaragharaṃ paviṭṭhopi kāyikaṃ pāgabbhiyaṃ dasseti.

কথং সঙ্ঘগতো কাযিকং পাগব্ভিযং দস্সেতি? ইধেকচ্চো সঙ্ঘগতো অচিত্তীকারকতো থেরে ভিক্খূ ঘট্টযন্তোপি তিট্ঠতি, ঘট্টযন্তোপি নিসীদতি, পুরতোপি তিট্ঠতি, পুরতোপি নিসীদতি, উচ্চেপি আসনে নিসীদতি, সসীসং পারুপিত্ৰা নিসীদতি , ঠিতকোপি ভণতি, বাহাৰিক্খেপকোপি ভণতি। এৰং সঙ্ঘগতো কাযিকং পাগব্ভিযং দস্সেতি।

Kathaṃ saṅghagato kāyikaṃ pāgabbhiyaṃ dasseti? Idhekacco saṅghagato acittīkārakato there bhikkhū ghaṭṭayantopi tiṭṭhati, ghaṭṭayantopi nisīdati, puratopi tiṭṭhati, puratopi nisīdati, uccepi āsane nisīdati, sasīsaṃ pārupitvā nisīdati , ṭhitakopi bhaṇati, bāhāvikkhepakopi bhaṇati. Evaṃ saṅghagato kāyikaṃ pāgabbhiyaṃ dasseti.

কথং গণগতো কাযিকং পাগব্ভিযং দস্সেতি? ইধেকচ্চো গণগতো অচিত্তীকারকতো থেরানং ভিক্খূনং অনুপাহনানং চঙ্কমন্তানং সউপাহনো চঙ্কমতি , নীচে চঙ্কমে চঙ্কমন্তানং উচ্চে চঙ্কমে চঙ্কমতি, ছমায চঙ্কমন্তানং চঙ্কমে চঙ্কমতি, ঘট্টযন্তোপি তিট্ঠতি, ঘট্টযন্তোপি নিসীদতি, পুরতোপি তিট্ঠতি, পুরতোপি নিসীদতি, উচ্চেপি আসনে নিসীদতি, সসীসং পারুপিত্ৰাপি নিসীদতি, ঠিতোপি ভণতি, বাহাৰিক্খেপকোপি ভণতি। এৰং গণগতো কাযিকং পাগব্ভিযং দস্সেতি।

Kathaṃ gaṇagato kāyikaṃ pāgabbhiyaṃ dasseti? Idhekacco gaṇagato acittīkārakato therānaṃ bhikkhūnaṃ anupāhanānaṃ caṅkamantānaṃ saupāhano caṅkamati , nīce caṅkame caṅkamantānaṃ ucce caṅkame caṅkamati, chamāya caṅkamantānaṃ caṅkame caṅkamati, ghaṭṭayantopi tiṭṭhati, ghaṭṭayantopi nisīdati, puratopi tiṭṭhati, puratopi nisīdati, uccepi āsane nisīdati, sasīsaṃ pārupitvāpi nisīdati, ṭhitopi bhaṇati, bāhāvikkhepakopi bhaṇati. Evaṃ gaṇagato kāyikaṃ pāgabbhiyaṃ dasseti.

কথং ভোজনসালায কাযিকং পাগব্ভিযং দস্সেতি? ইধেকচ্চো ভোজনসালায অচিত্তীকারকতো থেরে ভিক্খূ অনুপখজ্জ নিসীদতি, নৰেপি ভিক্খূ আসনেন পটিবাহতি, ঘট্টযন্তোপি তিট্ঠতি, ঘট্টযন্তোপি নিসীদতি, পুরতোপি তিট্ঠতি, পুরতোপি নিসীদতি, উচ্চেপি আসনে নিসীদতি, সসীসং পারুপিত্ৰা নিসীদতি, ঠিতকোপি ভণতি, বাহাৰিক্খেপকোপি ভণতি। এৰং ভোজনসালায কাযিকং পাগব্ভিযং দস্সেতি।

Kathaṃ bhojanasālāya kāyikaṃ pāgabbhiyaṃ dasseti? Idhekacco bhojanasālāya acittīkārakato there bhikkhū anupakhajja nisīdati, navepi bhikkhū āsanena paṭibāhati, ghaṭṭayantopi tiṭṭhati, ghaṭṭayantopi nisīdati, puratopi tiṭṭhati, puratopi nisīdati, uccepi āsane nisīdati, sasīsaṃ pārupitvā nisīdati, ṭhitakopi bhaṇati, bāhāvikkhepakopi bhaṇati. Evaṃ bhojanasālāya kāyikaṃ pāgabbhiyaṃ dasseti.

কথং জন্তাঘরে কাযিকং পাগব্ভিযং দস্সেতি? ইধেকচ্চো জন্তাঘরে অচিত্তীকারকতো থেরে ভিক্খূ ঘট্টযন্তোপি তিট্ঠতি, ঘট্টযন্তোপি নিসীদতি, পুরতোপি তিট্ঠতি, পুরতোপি নিসীদতি, উচ্চেপি আসনে নিসীদতি, অনাপুচ্ছাপি কট্ঠং পক্খিপতি, অনাপুচ্ছাপি দ্ৰারং পিদহতি। এৰং জন্তাঘরে কাযিকং পাগব্ভিযং দস্সেতি।

Kathaṃ jantāghare kāyikaṃ pāgabbhiyaṃ dasseti? Idhekacco jantāghare acittīkārakato there bhikkhū ghaṭṭayantopi tiṭṭhati, ghaṭṭayantopi nisīdati, puratopi tiṭṭhati, puratopi nisīdati, uccepi āsane nisīdati, anāpucchāpi kaṭṭhaṃ pakkhipati, anāpucchāpi dvāraṃ pidahati. Evaṃ jantāghare kāyikaṃ pāgabbhiyaṃ dasseti.

কথং উদকতিত্থে কাযিকং পাগব্ভিযং দস্সেতি? ইধেকচ্চো উদকতিত্থে অচিত্তীকারকতো থেরে ভিক্খূ ঘট্টযন্তোপি ওতরতি, পুরতোপি ওতরতি, ঘট্টযন্তোপি ন্হাযতি, পুরতোপি ন্হাযতি, উপরিতোপি ন্হাযতি, ঘট্টযন্তোপি উত্তরতি, পুরতোপি উত্তরতি । এৰং উদকতিত্থে কাযিকং পাগব্ভিযং দস্সেতি।

Kathaṃ udakatitthe kāyikaṃ pāgabbhiyaṃ dasseti? Idhekacco udakatitthe acittīkārakato there bhikkhū ghaṭṭayantopi otarati, puratopi otarati, ghaṭṭayantopi nhāyati, puratopi nhāyati, uparitopi nhāyati, ghaṭṭayantopi uttarati, puratopi uttarati . Evaṃ udakatitthe kāyikaṃ pāgabbhiyaṃ dasseti.

কথং অন্তরঘরং পৰিসন্তো কাযিকং পাগব্ভিযং দস্সেতি? ইধেকচ্চো অন্তরঘরং পৰিসন্তো অচিত্তীকারকতো থেরে ভিক্খূ ঘট্টযন্তোপি গচ্ছতি, পুরতোপি গচ্ছতি, ৰোক্কম্মপি থেরানং ভিক্খূনং পুরতো গচ্ছতি । এৰং অন্তরঘরং পৰিসন্তো কাযিকং পাগব্ভিযং দস্সেতি।

Kathaṃ antaragharaṃ pavisanto kāyikaṃ pāgabbhiyaṃ dasseti? Idhekacco antaragharaṃ pavisanto acittīkārakato there bhikkhū ghaṭṭayantopi gacchati, puratopi gacchati, vokkammapi therānaṃ bhikkhūnaṃ purato gacchati . Evaṃ antaragharaṃ pavisanto kāyikaṃ pāgabbhiyaṃ dasseti.

কথং অন্তরঘরং পৰিট্ঠো কাযিকং পাগব্ভিযং দস্সেতি? ইধেকচ্চো অন্তরঘরং পৰিট্ঠো ‘‘ন পৰিস, ভন্তে’’তি ৰুচ্চমানো পৰিসতি, ‘‘ন তিট্ঠ, ভন্তে’’তি ৰুচ্চমানো তিট্ঠতি, ‘‘ন নিসীদ, ভন্তে’’তি ৰুচ্চমানো নিসীদতি, অনোকাসম্পি পৰিসতি, অনোকাসেপি তিট্ঠতি, অনোকাসেপি নিসীদতি, যানিপি তানি হোন্তি কুলানং ওৰরকানি গূল়্হানি চ পটিচ্ছন্নানি চ, যত্থ কুলিত্থিযো কুলধীতরো কুলসুণ্হাযো কুলকুমারিযো নিসীদন্তি তত্থপি সহসা পৰিসতি, কুমারকস্স সীসম্পি পরামসতি। এৰং অন্তরঘরং পৰিট্ঠো কাযিকং পাগব্ভিযং দস্সেতি – ইদং কাযিকং পাগব্ভিযং।

Kathaṃ antaragharaṃ paviṭṭho kāyikaṃ pāgabbhiyaṃ dasseti? Idhekacco antaragharaṃ paviṭṭho ‘‘na pavisa, bhante’’ti vuccamāno pavisati, ‘‘na tiṭṭha, bhante’’ti vuccamāno tiṭṭhati, ‘‘na nisīda, bhante’’ti vuccamāno nisīdati, anokāsampi pavisati, anokāsepi tiṭṭhati, anokāsepi nisīdati, yānipi tāni honti kulānaṃ ovarakāni gūḷhāni ca paṭicchannāni ca, yattha kulitthiyo kuladhītaro kulasuṇhāyo kulakumāriyo nisīdanti tatthapi sahasā pavisati, kumārakassa sīsampi parāmasati. Evaṃ antaragharaṃ paviṭṭho kāyikaṃ pāgabbhiyaṃ dasseti – idaṃ kāyikaṃ pāgabbhiyaṃ.

কতমং ৰাচসিকং পাগব্ভিযং? ইধেকচ্চো সঙ্ঘগতোপি ৰাচসিকং পাগব্ভিযং দস্সেতি, গণগতোপি ৰাচসিকং পাগব্ভিযং দস্সেতি, অন্তরঘরং পৰিট্ঠোপি ৰাচসিকং পাগব্ভিযং দস্সেতি। কথং সঙ্ঘগতো ৰাচসিকং পাগব্ভিযং দস্সেতি? ইধেকচ্চো সঙ্ঘগতো অচিত্তীকারকতো থেরে ভিক্খূ অনাপুচ্ছং ৰা অনজ্ঝিট্ঠো ৰা আরামগতানং ভিক্খূনং ধম্মং ভণতি, পঞ্হং ৰিসজ্জেতি, পাতিমোক্খং উদ্দিসতি , ঠিতকোপি ভণতি, বাহাৰিক্খেপকোপি ভণতি। এৰং সঙ্ঘগতো ৰাচসিকং পাগব্ভিযং দস্সেতি।

Katamaṃ vācasikaṃ pāgabbhiyaṃ? Idhekacco saṅghagatopi vācasikaṃ pāgabbhiyaṃ dasseti, gaṇagatopi vācasikaṃ pāgabbhiyaṃ dasseti, antaragharaṃ paviṭṭhopi vācasikaṃ pāgabbhiyaṃ dasseti. Kathaṃ saṅghagato vācasikaṃ pāgabbhiyaṃ dasseti? Idhekacco saṅghagato acittīkārakato there bhikkhū anāpucchaṃ vā anajjhiṭṭho vā ārāmagatānaṃ bhikkhūnaṃ dhammaṃ bhaṇati, pañhaṃ visajjeti, pātimokkhaṃ uddisati , ṭhitakopi bhaṇati, bāhāvikkhepakopi bhaṇati. Evaṃ saṅghagato vācasikaṃ pāgabbhiyaṃ dasseti.

কথং গণগতো ৰাচসিকং পাগব্ভিযং দস্সেতি? ইধেকচ্চো গণগতো অচিত্তীকারকতো থেরে ভিক্খূ অনাপুচ্ছং ৰা অনজ্ঝিট্ঠো ৰা আরামগতানং ভিক্খূনং ধম্মং ভণতি, পঞ্হং ৰিসজ্জেতি, ঠিতকোপি ভণতি, বাহাৰিক্খেপকোপি ভণতি; আরামগতানং ভিক্খুনীনং উপাসকানং উপাসিকানং ধম্মং ভণতি, পঞ্হং ৰিসজ্জেতি, ঠিতকোপি ভণতি, বাহাৰিক্খেপকোপি ভণতি। এৰং গণগতো ৰাচসিকং পাগব্ভিযং দস্সেতি।

Kathaṃ gaṇagato vācasikaṃ pāgabbhiyaṃ dasseti? Idhekacco gaṇagato acittīkārakato there bhikkhū anāpucchaṃ vā anajjhiṭṭho vā ārāmagatānaṃ bhikkhūnaṃ dhammaṃ bhaṇati, pañhaṃ visajjeti, ṭhitakopi bhaṇati, bāhāvikkhepakopi bhaṇati; ārāmagatānaṃ bhikkhunīnaṃ upāsakānaṃ upāsikānaṃ dhammaṃ bhaṇati, pañhaṃ visajjeti, ṭhitakopi bhaṇati, bāhāvikkhepakopi bhaṇati. Evaṃ gaṇagato vācasikaṃ pāgabbhiyaṃ dasseti.

কথং অন্তরঘরং পৰিট্ঠো ৰাচসিকং পাগব্ভিযং দস্সেতি? ইধেকচ্চো অন্তরঘরং পৰিট্ঠো ইত্থিং ৰা কুমারিং ৰা এৰমাহ – ‘‘ইত্থন্নামে ইত্থংগোত্তে কিং অত্থি? যাগু অত্থি, ভত্তং অত্থি, খাদনীযং অত্থি? কিং পিৰিস্সাম , কিং ভুঞ্জিস্সাম, কিং খাদিস্সাম, কিং ৰা অত্থি, কিং ৰা মে দস্সথা’’তি ৰিপ্পলপতি। এৰং অন্তরঘরং পৰিট্ঠো ৰাচসিকং পাগব্ভিযং দস্সেতি – ইদং ৰাচসিকং পাগব্ভিযং।

Kathaṃ antaragharaṃ paviṭṭho vācasikaṃ pāgabbhiyaṃ dasseti? Idhekacco antaragharaṃ paviṭṭho itthiṃ vā kumāriṃ vā evamāha – ‘‘itthannāme itthaṃgotte kiṃ atthi? Yāgu atthi, bhattaṃ atthi, khādanīyaṃ atthi? Kiṃ pivissāma , kiṃ bhuñjissāma, kiṃ khādissāma, kiṃ vā atthi, kiṃ vā me dassathā’’ti vippalapati. Evaṃ antaragharaṃ paviṭṭho vācasikaṃ pāgabbhiyaṃ dasseti – idaṃ vācasikaṃ pāgabbhiyaṃ.

কতমং চেতসিকং পাগব্ভিযং? ইধেকচ্চো ন উচ্চা কুলা পব্বজিতো সমানো উচ্চা কুলা পব্বজিতেন সদ্ধিং সদিসং অত্তানং করোতি চিত্তেন, ন মহাভোগকুলা পব্বজিতো সমানো মহাভোগকুলা পব্বজিতেন সদ্ধিং সদিসং অত্তানং করোতি চিত্তেন, ন উল়ারভোগকুলা পব্বজিতো সমানো উল়ারভোগকুলা পব্বজিতেন সদ্ধিং সদিসং অত্তানং করোতি চিত্তেন, ন সুত্তন্তিকো সমানো সুত্তন্তিকেন সদ্ধিং সদিসং অত্তানং করোতি চিত্তেন, ন ৰিনযধরো সমানো ৰিনযধরেন… ন ধম্মকথিকো সমানো ধম্মকথিকেন… ন আরঞ্ঞিকো সমানো আরঞ্ঞকেন… ন পিণ্ডপাতিকো সমানো পিণ্ডপাতিকেন… ন পংসুকূলিকো সমানো পংসুকূলিকেন… ন তেচীৰরিকো সমানো তেচীৰরকেন… ন সপদানচারিকো সমানো সপদানচারিকেন… ন খলুপচ্ছাভত্তিকো সমানো খলুপচ্ছাভত্তিকেন… ন নেসজ্জিকো সমানো নেসঞ্ঞিকেন… ন যথাসন্থতিকো সমানো যথাসন্থতিকেন সদ্ধিং সদিসং অত্তানং করোতি চিত্তেন, ন পঠমস্স ঝানস্স লাভী সমানো পঠমস্স ঝানস্স লাভিনা সদ্ধিং সদিসং অত্তানং করোতি চিত্তেন, ন দুতিযস্স ঝানস্স লাভী সমানো দুতিযস্স… ন ততিযস্স ঝানস্স লাভী সমানো ততিযস্স… ন চতুত্থস্স ঝানস্স লাভী সমানো লাভী সমানো চতুত্থস্স… ন আকাসানঞ্চাযতনসমাপত্তিযা লাভী সমানো আকাসনঞ্চাযতনসমাপত্তিযা… ন ৰিঞ্ঞাণঞ্চাযতনসমাপত্তিযা লাভী সমানো ৰিঞ্ঞাণঞ্চাযতন সমাপত্তিযা… ন আকিঞ্চঞ্ঞাযতনসমাপত্তিযা লাভী সমানো আকিঞ্চঞ্ঞাযতন সমাপত্তিযা… ন নেৰসঞ্ঞানাসঞ্ঞাযতনসমাপত্তিযা লাভী সমানো নেৰসঞ্ঞানাসঞ্ঞাযতনসমাপত্তিযা লাভিনা সদ্ধিং সদিসং অত্তানং করোতি চিত্তেন – ইদং চেতসিকং পাগব্ভিযং। ন সিক্খেয্যাতি পাগব্ভিযং ন সিক্খেয্য ন চরেয্য ন আচরেয্য ন সমাচরেয্য ন সমাদায ৰত্তেয্য, পাগব্ভিযং পজহেয্য ৰিনোদেয্য ব্যন্তিং করেয্য অনভাৰং গমেয্য, পাগব্ভিযা আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরেয্যাতি – পাগব্ভিযং ন সিক্খেয্য।

Katamaṃ cetasikaṃ pāgabbhiyaṃ? Idhekacco na uccā kulā pabbajito samāno uccā kulā pabbajitena saddhiṃ sadisaṃ attānaṃ karoti cittena, na mahābhogakulā pabbajito samāno mahābhogakulā pabbajitena saddhiṃ sadisaṃ attānaṃ karoti cittena, na uḷārabhogakulā pabbajito samāno uḷārabhogakulā pabbajitena saddhiṃ sadisaṃ attānaṃ karoti cittena, na suttantiko samāno suttantikena saddhiṃ sadisaṃ attānaṃ karoti cittena, na vinayadharo samāno vinayadharena… na dhammakathiko samāno dhammakathikena… na āraññiko samāno āraññakena… na piṇḍapātiko samāno piṇḍapātikena… na paṃsukūliko samāno paṃsukūlikena… na tecīvariko samāno tecīvarakena… na sapadānacāriko samāno sapadānacārikena… na khalupacchābhattiko samāno khalupacchābhattikena… na nesajjiko samāno nesaññikena… na yathāsanthatiko samāno yathāsanthatikena saddhiṃ sadisaṃ attānaṃ karoti cittena, na paṭhamassa jhānassa lābhī samāno paṭhamassa jhānassa lābhinā saddhiṃ sadisaṃ attānaṃ karoti cittena, na dutiyassa jhānassa lābhī samāno dutiyassa… na tatiyassa jhānassa lābhī samāno tatiyassa… na catutthassa jhānassa lābhī samāno lābhī samāno catutthassa… na ākāsānañcāyatanasamāpattiyā lābhī samāno ākāsanañcāyatanasamāpattiyā… na viññāṇañcāyatanasamāpattiyā lābhī samāno viññāṇañcāyatana samāpattiyā… na ākiñcaññāyatanasamāpattiyā lābhī samāno ākiñcaññāyatana samāpattiyā… na nevasaññānāsaññāyatanasamāpattiyā lābhī samāno nevasaññānāsaññāyatanasamāpattiyā lābhinā saddhiṃ sadisaṃ attānaṃ karoti cittena – idaṃ cetasikaṃ pāgabbhiyaṃ. Na sikkheyyāti pāgabbhiyaṃ na sikkheyya na careyya na ācareyya na samācareyya na samādāya vatteyya, pāgabbhiyaṃ pajaheyya vinodeyya byantiṃ kareyya anabhāvaṃ gameyya, pāgabbhiyā ārato assa virato paṭivirato nikkhanto nissaṭo vippamutto visaññutto vimariyādikatena cetasā vihareyyāti – pāgabbhiyaṃ na sikkheyya.

কথং ৰিগ্গাহিকং ন কথযেয্যাতি। কতমা ৰিগ্গাহিকা কথা? ইধেকচ্চো এৰরূপিং কথং কত্তা হোতি – ‘‘ন ত্ৰং ইমং ধম্মৰিনযং আজানাসি…পে॰… নিব্বেঠেহি ৰা সচে পহোসী’’তি। ৰুত্তঞ্হেতং ভগৰতা – ‘‘ৰিগ্গাহিকায খো, মোগ্গল্লান, কথায সতি কথাবাহুল্লং পাটিকঙ্খং, কথাবাহুল্লে সতি উদ্ধচ্চং, উদ্ধতস্স অসংৰরো, অসংৰুতস্স আরা চিত্তং সমাধিম্হা’’তি। কথং ৰিগ্গাহিকং ন কথযেয্যাতি। ৰিগ্গাহিকং কথং ন কথেয্য ন ভণেয্য ন দীপেয্য ন ৰোহরেয্য, ৰিগ্গাহিকং কথং পজহেয্য ৰিনোদেয্য ব্যন্তিং করেয্য অনভাৰং গমেয্য, ৰিগ্গাহিককথায আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরেয্যাতি – কথং ৰিগ্গাহিকং ন কথযেয্য।

Kathaṃviggāhikaṃ na kathayeyyāti. Katamā viggāhikā kathā? Idhekacco evarūpiṃ kathaṃ kattā hoti – ‘‘na tvaṃ imaṃ dhammavinayaṃ ājānāsi…pe… nibbeṭhehi vā sace pahosī’’ti. Vuttañhetaṃ bhagavatā – ‘‘viggāhikāya kho, moggallāna, kathāya sati kathābāhullaṃ pāṭikaṅkhaṃ, kathābāhulle sati uddhaccaṃ, uddhatassa asaṃvaro, asaṃvutassa ārā cittaṃ samādhimhā’’ti. Kathaṃ viggāhikaṃ na kathayeyyāti. Viggāhikaṃ kathaṃ na katheyya na bhaṇeyya na dīpeyya na vohareyya, viggāhikaṃ kathaṃ pajaheyya vinodeyya byantiṃ kareyya anabhāvaṃ gameyya, viggāhikakathāya ārato assa virato paṭivirato nikkhanto nissaṭo vippamutto visaññutto vimariyādikatena cetasā vihareyyāti – kathaṃ viggāhikaṃ na kathayeyya.

তেনাহ ভগৰা –

Tenāha bhagavā –

‘‘ন চ কত্থিকো সিযা ভিক্খু, ন চ ৰাচং পযুত্তং ভাসেয্য।

‘‘Na ca katthiko siyā bhikkhu, na ca vācaṃ payuttaṃ bhāseyya;

পাগব্ভিযং ন সিক্খেয্য, কথং ৰিগ্গাহিকং ন কথযেয্যা’’তি॥

Pāgabbhiyaṃ na sikkheyya, kathaṃ viggāhikaṃ na kathayeyyā’’ti.

১৬৬.

166.

মোসৰজ্জে ন নিয্যেথ, সম্পজানো সঠানি ন কযিরা।

Mosavajje na niyyetha, sampajāno saṭhāni na kayirā;

অথ জীৰিতেন পঞ্ঞায, সীলব্বতেন নাঞ্ঞমতিমঞ্ঞে॥

Atha jīvitena paññāya, sīlabbatena nāññamatimaññe.

মোসৰজ্জে ন নিয্যেথাতি। মোসৰজ্জং ৰুচ্চতি মুসাৰাদো। ইধেকচ্চো সভগ্গতো ¹³⁵ ৰা পরিসগ্গতো ¹³⁶ ৰা…পে॰… আমিসকিঞ্চিক্খহেতু ৰা সম্পজানমুসা ভাসিতা হোতি – ইদং ৰুচ্চতি মোসৰজ্জং। অপি চ তীহাকারেহি মুসাৰাদো হোতি – পুব্বেৰস্স হোতি ‘‘মুসা ভণিস্স’’ন্তি, ভণন্তস্স হোতি ‘‘মুসা ভণামী’’তি, ভণিতস্স হোতি ‘‘মুসা মযা ভণিত’’ন্তি, ইমেহি তীহাকারেহি মুসাৰাদো হোতি। অপি চ চতূহাকারেহি… পঞ্চহাকারেহি… ছহাকারেহি… সত্তহাকারেহি… অট্ঠহাকারেহি… মুসাৰাদো হোতি – পুব্বেৰস্স হোতি ‘‘মুসা ভণিস্স’’ন্তি, ভণন্তস্স হোতি ‘‘মুসা ভণামী’’তি, ভণিতস্স হোতি ‘‘মুসা মযা ভণিত’’ন্তি ৰিনিধায দিট্ঠিং ৰিনিধায খন্তিং ৰিনিধায রুচিং ৰিনিধায সঞ্ঞং ৰিনিধায ভাৰং – ইমেহি অট্ঠহাকারেহি মুসাৰাদো হোতি। মোসৰজ্জে ন নিয্যেথাতি। মোসৰজ্জে ন যাযেয্য ন নিয্যাযেয্য ন ৰহেয্য ¹³⁷ ন সংহরেয্য, মোসৰজ্জং পজহেয্য ৰিনোদেয্য ব্যন্তিং করেয্য অনভাৰং গমেয্য, মোসৰজ্জা আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরেয্যাতি – মোসৰজ্জে ন নিয্যেথ।

Mosavajje na niyyethāti. Mosavajjaṃ vuccati musāvādo. Idhekacco sabhaggato ¹³⁸ vā parisaggato ¹³⁹ vā…pe… āmisakiñcikkhahetu vā sampajānamusā bhāsitā hoti – idaṃ vuccati mosavajjaṃ. Api ca tīhākārehi musāvādo hoti – pubbevassa hoti ‘‘musā bhaṇissa’’nti, bhaṇantassa hoti ‘‘musā bhaṇāmī’’ti, bhaṇitassa hoti ‘‘musā mayā bhaṇita’’nti, imehi tīhākārehi musāvādo hoti. Api ca catūhākārehi… pañcahākārehi… chahākārehi… sattahākārehi… aṭṭhahākārehi… musāvādo hoti – pubbevassa hoti ‘‘musā bhaṇissa’’nti, bhaṇantassa hoti ‘‘musā bhaṇāmī’’ti, bhaṇitassa hoti ‘‘musā mayā bhaṇita’’nti vinidhāya diṭṭhiṃ vinidhāya khantiṃ vinidhāya ruciṃ vinidhāya saññaṃ vinidhāya bhāvaṃ – imehi aṭṭhahākārehi musāvādo hoti. Mosavajje na niyyethāti. Mosavajje na yāyeyya na niyyāyeyya na vaheyya ¹⁴⁰ na saṃhareyya, mosavajjaṃ pajaheyya vinodeyya byantiṃ kareyya anabhāvaṃ gameyya, mosavajjā ārato assa virato paṭivirato nikkhanto nissaṭo vippamutto visaññutto vimariyādikatena cetasā vihareyyāti – mosavajje na niyyetha.

সম্পজানো সঠানি ন কযিরাতি। কতমং সাঠেয্যং? ইধেকচ্চো সঠো হোতি পরিসঠো, যং তত্থ সঠং সঠতা সাঠেয্যং কক্করতা কক্করিযং পরিক্খত্ততা পারিক্খত্তিযং – ইদং ৰুচ্চতি সাঠেয্যং। সম্পজানো সঠানি ন কযিরাতি। সম্পজানো হুত্ৰা সাঠেয্যং ন করেয্য ন জনেয্য ন সঞ্জনেয্য ন নিব্বত্তেয্য নাভিনিব্বত্তেয্য, সাঠেয্যং পজহেয্য ৰিনোদেয্য ব্যন্তিং করেয্য অনভাৰং গমেয্য, সাঠেয্যা আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরেয্যাতি – সম্পজানো সঠানি ন কযিরা।

Sampajāno saṭhāni na kayirāti. Katamaṃ sāṭheyyaṃ? Idhekacco saṭho hoti parisaṭho, yaṃ tattha saṭhaṃ saṭhatā sāṭheyyaṃ kakkaratā kakkariyaṃ parikkhattatā pārikkhattiyaṃ – idaṃ vuccati sāṭheyyaṃ. Sampajāno saṭhāni na kayirāti. Sampajāno hutvā sāṭheyyaṃ na kareyya na janeyya na sañjaneyya na nibbatteyya nābhinibbatteyya, sāṭheyyaṃ pajaheyya vinodeyya byantiṃ kareyya anabhāvaṃ gameyya, sāṭheyyā ārato assa virato paṭivirato nikkhanto nissaṭo vippamutto visaññutto vimariyādikatena cetasā vihareyyāti – sampajāno saṭhāni na kayirā.

অথ জীৰিতেন পঞ্ঞায, সীলব্বতেন নাঞ্ঞমতিমঞ্ঞেতি। অথাতি পদসন্ধি…পে॰… পদানুপুব্বতাপেতং – অথাতি। ইধেকচ্চো লূখজীৰিতং জীৰন্তো পরং পণীতজীৰিতং জীৰন্তং অতিমঞ্ঞতি – ‘‘কিং পনাযং বহুলাজীৰো সব্বং সংভক্খেতি, সেয্যথিদং – মূলবীজং খন্ধবীজং ফল়ুবীজং অগ্গবীজং বীজবীজমেৰ পঞ্চমং অসনিৰিচক্কদন্তকূটসমণপ্পধানেনা’’তি ¹⁴¹। সো তায লূখজীৰিতায পরং পণীতজীৰিতং জীৰন্তং অতিমঞ্ঞতি।

Atha jīvitena paññāya, sīlabbatena nāññamatimaññeti. Athāti padasandhi…pe… padānupubbatāpetaṃ – athāti. Idhekacco lūkhajīvitaṃ jīvanto paraṃ paṇītajīvitaṃ jīvantaṃ atimaññati – ‘‘kiṃ panāyaṃ bahulājīvo sabbaṃ saṃbhakkheti, seyyathidaṃ – mūlabījaṃ khandhabījaṃ phaḷubījaṃ aggabījaṃ bījabījameva pañcamaṃ asanivicakkadantakūṭasamaṇappadhānenā’’ti ¹⁴². So tāya lūkhajīvitāya paraṃ paṇītajīvitaṃ jīvantaṃ atimaññati.

ইধেকচ্চো পণীতজীৰিতং জীৰন্তো পরং লূখজীৰিতং জীৰন্তং অতিমঞ্ঞতি – ‘‘কিং পনাযং অপ্পপুঞ্ঞো অপ্পেসক্খো ন লাভী চীৰরপিণ্ডপাতসেনাসনগিলানপচ্চযভেসজ্জপরিক্খারান’’ন্তি। সো তায পণীতজীৰিতায পরং লূখজীৰিতং জীৰন্তং অতিমঞ্ঞতি। ইধেকচ্চো পঞ্ঞাসম্পন্নো হোতি। সো পুট্ঠো পঞ্হং ৰিসজ্জেতি। তস্স এৰং হোতি – ‘‘অহমস্মি পঞ্ঞাসম্পন্নো, ইমে পনঞ্ঞে ন পঞ্ঞাসম্পন্না’’তি। সো তায পঞ্ঞাসম্পদায পরং অতিমঞ্ঞতি। ইধেকচ্চো সীলসম্পন্নো হোতি, পাতিমোক্খসংৰরসংৰুতো ৰিহরতি আচারগোচরসম্পন্নো, অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু। তস্স এৰং হোতি – ‘‘অহমস্মি সীলসম্পন্নো, ইমে পনঞ্ঞে ভিক্খূ দুস্সীলা পাপধম্মা’’তি। সো তায সীলসম্পদায পরং অতিমঞ্ঞতি। ইধেকচ্চো ৰতসম্পন্নো হোতি আরঞ্ঞিকো ৰা পিণ্ডপাতিকো ৰা পংসুকূলিকো ৰা তেচীৰরিকো ৰা সপদানচারিকো ৰা খলুপচ্ছাভত্তিকো ৰা নেসজ্জিকো ৰা যথাসন্থতিকো ৰা। তস্স এৰং হোতি – ‘‘অহমস্মি ৰত সম্পন্নো, ইমে পনঞ্ঞে ন ৰতসম্পন্না’’তি। সো তায ৰতসম্পদায পরং অতিমঞ্ঞতি। অথ জীৰিতেন পঞ্ঞায, সীলব্বতেন নাঞ্ঞমতিমঞ্ঞেতি। লূখজীৰিতায ৰা পণীতজীৰিতায ৰা পঞ্ঞাসম্পদায ৰা সীলসম্পদায ৰা ৰতসম্পদায ৰা পরং নাতিমঞ্ঞেয্য, নাৰজানেয্য, ন তেন মানং জনেয্য, ন তেন থদ্ধো অস্স, পত্থদ্ধো পগ্গহিতসিরোতি – অথ জীৰিতেন পঞ্ঞায সীলব্বতেন নাঞ্ঞমতিমঞ্ঞে।

Idhekacco paṇītajīvitaṃ jīvanto paraṃ lūkhajīvitaṃ jīvantaṃ atimaññati – ‘‘kiṃ panāyaṃ appapuñño appesakkho na lābhī cīvarapiṇḍapātasenāsanagilānapaccayabhesajjaparikkhārāna’’nti. So tāya paṇītajīvitāya paraṃ lūkhajīvitaṃ jīvantaṃ atimaññati. Idhekacco paññāsampanno hoti. So puṭṭho pañhaṃ visajjeti. Tassa evaṃ hoti – ‘‘ahamasmi paññāsampanno, ime panaññe na paññāsampannā’’ti. So tāya paññāsampadāya paraṃ atimaññati. Idhekacco sīlasampanno hoti, pātimokkhasaṃvarasaṃvuto viharati ācāragocarasampanno, aṇumattesu vajjesu bhayadassāvī, samādāya sikkhati sikkhāpadesu. Tassa evaṃ hoti – ‘‘ahamasmi sīlasampanno, ime panaññe bhikkhū dussīlā pāpadhammā’’ti. So tāya sīlasampadāya paraṃ atimaññati. Idhekacco vatasampanno hoti āraññiko vā piṇḍapātiko vā paṃsukūliko vā tecīvariko vā sapadānacāriko vā khalupacchābhattiko vā nesajjiko vā yathāsanthatiko vā. Tassa evaṃ hoti – ‘‘ahamasmi vata sampanno, ime panaññe na vatasampannā’’ti. So tāya vatasampadāya paraṃ atimaññati. Atha jīvitena paññāya, sīlabbatena nāññamatimaññeti. Lūkhajīvitāya vā paṇītajīvitāya vā paññāsampadāya vā sīlasampadāya vā vatasampadāya vā paraṃ nātimaññeyya, nāvajāneyya, na tena mānaṃ janeyya, na tena thaddho assa, patthaddho paggahitasiroti – atha jīvitena paññāya sīlabbatena nāññamatimaññe.

তেনাহ ভগৰা –

Tenāha bhagavā –

‘‘মোসৰজ্জে ন নিয্যেথ, সম্পজানো সঠানি ন কযিরা।

‘‘Mosavajje na niyyetha, sampajāno saṭhāni na kayirā;

অথ জীৰিতেন পঞ্ঞায, সীলব্বতেন নাঞ্ঞমতিমঞ্ঞে’’তি॥

Atha jīvitena paññāya, sīlabbatena nāññamatimaññe’’ti.

১৬৭.

167.

সুত্ৰা রুসিতো ¹⁴³ বহুং ৰাচং, সমণানং ৰা পুথুজনানং ¹⁴⁴ ।

Sutvārusito¹⁴⁵bahuṃ vācaṃ, samaṇānaṃ vā puthujanānaṃ¹⁴⁶;

ফরুসেন নে ন পটিৰজ্জা, ন হি সন্তো পটিসেনিং করোন্তি ¹⁴⁷ ॥

Pharusena ne na paṭivajjā, na hi santo paṭiseniṃ karonti¹⁴⁸.

সুত্ৰা রুসিতো বহুং ৰাচং, সমণানং পুথুজনানন্তি। রুসিতোতি দূসিতো খুংসিতো ঘট্টিতো ৰম্ভিতো গরহিতো উপৰদিতো। সমণানন্তি যে কেচি ইতো বহিদ্ধা পরিব্বজূপগতা পরিব্বজসমাপন্না। পুথুজনানন্তি খত্তিযা চ ব্রাহ্মণা চ ৰেস্সা চ সুদ্দা চ গহট্ঠা চ পব্বজিতা চ দেৰা চ মনুস্সা চ, তে বহুকাহি ৰাচাহি অনিট্ঠাহি অকন্তাহি অমনাপাহি অক্কোসেয্যুং পরিভাসেয্যুং রোসেয্যুং ৰিরোসেয্যুং হিংসেয্যুং ৰিহিংসেয্যুং হেঠেয্যুং ৰিহেঠেয্যুং ঘাতেয্যুং উপঘাতেয্যুং উপঘাতং করেয্যুং তেসং বহুং ৰাচং অনিট্ঠং অকন্তং অমনাপং সুত্ৰা সুণিত্ৰা উগ্গহিত্ৰা উপধারযিত্ৰা উপলক্খযিত্ৰাতি – সুত্ৰা রুসিতো বহুং ৰাচং, সমণানং ৰা পুথুজনানং।

Sutvārusito bahuṃ vācaṃ, samaṇānaṃ puthujanānanti. Rusitoti dūsito khuṃsito ghaṭṭito vambhito garahito upavadito. Samaṇānanti ye keci ito bahiddhā paribbajūpagatā paribbajasamāpannā. Puthujanānanti khattiyā ca brāhmaṇā ca vessā ca suddā ca gahaṭṭhā ca pabbajitā ca devā ca manussā ca, te bahukāhi vācāhi aniṭṭhāhi akantāhi amanāpāhi akkoseyyuṃ paribhāseyyuṃ roseyyuṃ viroseyyuṃ hiṃseyyuṃ vihiṃseyyuṃ heṭheyyuṃ viheṭheyyuṃ ghāteyyuṃ upaghāteyyuṃ upaghātaṃ kareyyuṃ tesaṃ bahuṃ vācaṃ aniṭṭhaṃ akantaṃ amanāpaṃ sutvā suṇitvā uggahitvā upadhārayitvā upalakkhayitvāti – sutvā rusito bahuṃ vācaṃ, samaṇānaṃ vā puthujanānaṃ.

ফরুসেন নে ন পটিৰজ্জাতি। ফরুসেনাতি ফরুসেন কক্খল়েন ন পটিৰজ্জা নপ্পটিভণেয্য, অক্কোসন্তং ন পচ্চক্কোসেয্য, রোসন্তং নপ্পটিরোসেয্য, ভণ্ডনং নপ্পটিভণ্ডেয্য ন কলহং করেয্য ন ভণ্ডনং করেয্য ন ৰিগ্গহং করেয্য ন ৰিৰাদং করেয্য ন মেধগং করেয্য, কলহভণ্ডনৰিগ্গহৰিৰাদমেধগং পজহেয্য ৰিনোদেয্য ব্যন্তিং করেয্য অনভাৰং গমেয্য, কলহভণ্ডনৰিগ্গহৰিৰাদমেধগা আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরেয্যাতি – ফরুসেন নে ন পটিৰজ্জা।

Pharusena ne na paṭivajjāti. Pharusenāti pharusena kakkhaḷena na paṭivajjā nappaṭibhaṇeyya, akkosantaṃ na paccakkoseyya, rosantaṃ nappaṭiroseyya, bhaṇḍanaṃ nappaṭibhaṇḍeyya na kalahaṃ kareyya na bhaṇḍanaṃ kareyya na viggahaṃ kareyya na vivādaṃ kareyya na medhagaṃ kareyya, kalahabhaṇḍanaviggahavivādamedhagaṃ pajaheyya vinodeyya byantiṃ kareyya anabhāvaṃ gameyya, kalahabhaṇḍanaviggahavivādamedhagā ārato assa virato paṭivirato nikkhanto nissaṭo vippamutto visaññutto vimariyādikatena cetasā vihareyyāti – pharusena ne na paṭivajjā.

ন হি সন্তো পটিসেনিং করোন্তীতি। সন্তোতি রাগস্স সন্তত্তা সন্তো, দোসস্স… মোহস্স… কোধস্স… উপনাহস্স…পে॰… সব্বাকুসলাভিসঙ্খারানং সন্তত্তা সমিতত্তা ৰূপসমিতত্তা ৰিজ্ঝাতত্তা নিব্বুতত্তা ৰিগতত্তা পটিপস্সদ্ধত্তা সন্তো উপসন্তো ৰূপসন্তো নিব্বুতো পটিপস্সদ্ধোতি – সন্তো। ন হি সন্তো পটিসেনিং করোন্তীতি। সন্তো পটিসেনিং পটিমল্লং পটিকণ্টকং ¹⁴⁹ পটিপক্খং ন করোন্তি ন জনেন্তি ন সঞ্জনেন্তি ন নিব্বত্তেন্তি নাভিনিব্বত্তেন্তীতি – ন হি সন্তো পটিসেনিং করোন্তি।

Na hi santo paṭiseniṃ karontīti. Santoti rāgassa santattā santo, dosassa… mohassa… kodhassa… upanāhassa…pe… sabbākusalābhisaṅkhārānaṃ santattā samitattā vūpasamitattā vijjhātattā nibbutattā vigatattā paṭipassaddhattā santo upasanto vūpasanto nibbuto paṭipassaddhoti – santo. Na hi santo paṭiseniṃ karontīti. Santo paṭiseniṃ paṭimallaṃ paṭikaṇṭakaṃ ¹⁵⁰ paṭipakkhaṃ na karonti na janenti na sañjanenti na nibbattenti nābhinibbattentīti – na hi santo paṭiseniṃ karonti.

তেনাহ ভগৰা –

Tenāha bhagavā –

‘‘সুত্ৰা রুসিতো বহুং ৰাচং, সমণানং ৰা পুথুজনানং।

‘‘Sutvā rusito bahuṃ vācaṃ, samaṇānaṃ vā puthujanānaṃ;

ফরুসেন নে ন পটিৰজ্জা, ন হি সন্তো পটিসেনিং করোন্তী’’তি॥

Pharusena ne na paṭivajjā, na hi santo paṭiseniṃ karontī’’ti.

১৬৮.

168.

এতঞ্চ ধম্মমঞ্ঞায, ৰিচিনং ভিক্খু সদা সতো সিক্খে।

Etañcadhammamaññāya, vicinaṃ bhikkhu sadā sato sikkhe;

সন্তীতি নিব্বুতিং ঞত্ৰা, সাসনে গোতমস্স নপ্পমজ্জেয্য॥

Santīti nibbutiṃ ñatvā, sāsane gotamassa nappamajjeyya.

এতঞ্চ ধম্মমঞ্ঞাযাতি। এতন্তি আচিক্খিতং দেসিতং পঞ্ঞপিতং পট্ঠপিতং ৰিৰটং ৰিভত্তং উত্তানীকতং পকাসিতং ধম্মং অঞ্ঞায জানিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰাতি। এৰম্পি এতঞ্চ ধম্মমঞ্ঞায। অথ ৰা সমঞ্চ ৰিসমঞ্চ পথঞ্চ ৰিপথঞ্চ সাৰজ্জঞ্চ অনৰজ্জঞ্চ হীনঞ্চ পণীতঞ্চ কণ্হঞ্চ সুক্কঞ্চ ৰিঞ্ঞূগরহিতঞ্চ ৰিঞ্ঞূপসত্থঞ্চ ধম্মং অঞ্ঞায জানিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰাতি। এৰম্পি এতঞ্চ ধম্মমঞ্ঞায। অথ ৰা সম্মাপটিপদং অনুলোমপটিপদং অপচ্চনীকপটিপদং অৰিরুদ্ধপটিপদং অন্ৰত্থপটিপদং ধম্মানুধম্মপটিপদং সীলেসু পরিপূরকারিতং ইন্দ্রিযেসু গুত্তদ্ৰারতং ভোজনে মত্তঞ্ঞুতং জাগরিযানুযোগং সতিসম্পজঞ্ঞং, চত্তারো সতিপট্ঠানে চত্তারো সম্মপ্পধানে চত্তারো ইদ্ধিপাদে পঞ্চিন্দ্রিযানি পঞ্চ বলানি সত্ত বোজ্ঝঙ্গে অরিযং অট্ঠঙ্গিকং মগ্গং, নিব্বানঞ্চ নিব্বানগামিনিঞ্চ পটিপদং ধম্মং অঞ্ঞায জানিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰাতি। এৰম্পি তঞ্চ ধম্মমঞ্ঞায।

Etañca dhammamaññāyāti. Etanti ācikkhitaṃ desitaṃ paññapitaṃ paṭṭhapitaṃ vivaṭaṃ vibhattaṃ uttānīkataṃ pakāsitaṃ dhammaṃ aññāya jānitvā tulayitvā tīrayitvā vibhāvayitvā vibhūtaṃ katvāti. Evampi etañca dhammamaññāya. Atha vā samañca visamañca pathañca vipathañca sāvajjañca anavajjañca hīnañca paṇītañca kaṇhañca sukkañca viññūgarahitañca viññūpasatthañca dhammaṃ aññāya jānitvā tulayitvā tīrayitvā vibhāvayitvā vibhūtaṃ katvāti. Evampi etañca dhammamaññāya. Atha vā sammāpaṭipadaṃ anulomapaṭipadaṃ apaccanīkapaṭipadaṃ aviruddhapaṭipadaṃ anvatthapaṭipadaṃ dhammānudhammapaṭipadaṃ sīlesu paripūrakāritaṃ indriyesu guttadvārataṃ bhojane mattaññutaṃ jāgariyānuyogaṃ satisampajaññaṃ, cattāro satipaṭṭhāne cattāro sammappadhāne cattāro iddhipāde pañcindriyāni pañca balāni satta bojjhaṅge ariyaṃ aṭṭhaṅgikaṃ maggaṃ, nibbānañca nibbānagāminiñca paṭipadaṃ dhammaṃ aññāya jānitvā tulayitvā tīrayitvā vibhāvayitvā vibhūtaṃ katvāti. Evampi tañca dhammamaññāya.

ৰিচিনং ভিক্খু সদা সতো সিক্খেতি। ৰিচিনন্তি ৰিচিনন্তো পৰিচিনন্তো তুলযন্তো তীরযন্তো ৰিভাৰযন্তো ৰিভূতং করোন্তো। ‘‘সব্বে সঙ্খারা অনিচ্চা’’তি…পে॰… ‘‘যং কিঞ্চি সমুদযধম্মং সব্বং তং নিরোধধম্ম’’ন্তি ৰিচিনন্তো পৰিচিনন্তো তুলযন্তো তীরযন্তো ৰিভাৰযন্তো ৰিভূতং করোন্তোতি – ৰিচিনং ভিক্খু। সদাতি সদা সব্বদা সব্বকালং…পে॰… পচ্ছিমে ৰযোখন্ধে। সতোতি চতূহি কারণেহি সতো – কাযে কাযানুপস্সনাসতিপট্ঠানং ভাৰেন্তো সতো…পে॰… সো ৰুচ্চতি সতো। সিক্খেতি তিস্সো সিক্খাযো – অধিসীলসিক্খা, অধিচিত্তসিক্খা, অধিপঞ্ঞাসিক্খা…পে॰… অযং অধিপঞ্ঞাসিক্খা। ইমা তিস্সো সিক্খাযো আৰজ্জন্তো সিক্খেয্য…পে॰… সিক্খেয্য আচরেয্য সমাচরেয্য সমাদায ৰত্তেয্যাতি – ৰিচিনং ভিক্খু সদা সতো সিক্খে।

Vicinaṃ bhikkhu sadā sato sikkheti. Vicinanti vicinanto pavicinanto tulayanto tīrayanto vibhāvayanto vibhūtaṃ karonto. ‘‘Sabbe saṅkhārā aniccā’’ti…pe… ‘‘yaṃ kiñci samudayadhammaṃ sabbaṃ taṃ nirodhadhamma’’nti vicinanto pavicinanto tulayanto tīrayanto vibhāvayanto vibhūtaṃ karontoti – vicinaṃ bhikkhu. Sadāti sadā sabbadā sabbakālaṃ…pe… pacchime vayokhandhe. Satoti catūhi kāraṇehi sato – kāye kāyānupassanāsatipaṭṭhānaṃ bhāvento sato…pe… so vuccati sato. Sikkheti tisso sikkhāyo – adhisīlasikkhā, adhicittasikkhā, adhipaññāsikkhā…pe… ayaṃ adhipaññāsikkhā. Imā tisso sikkhāyo āvajjanto sikkheyya…pe… sikkheyya ācareyya samācareyya samādāya vatteyyāti – vicinaṃ bhikkhu sadā sato sikkhe.

সন্তীতি নিব্বুতিং ঞত্ৰাতি। রাগস্স নিব্বুতিং সন্তীতি ঞত্ৰা, দোসস্স… মোহস্স…পে॰… সব্বাকুসলাভিসঙ্খারানং নিব্বুতিং সন্তীতি ঞত্ৰা জানিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰাতি – সন্তীতি নিব্বুতিং ঞত্ৰা।

Santītinibbutiṃ ñatvāti. Rāgassa nibbutiṃ santīti ñatvā, dosassa… mohassa…pe… sabbākusalābhisaṅkhārānaṃ nibbutiṃ santīti ñatvā jānitvā tulayitvā tīrayitvā vibhāvayitvā vibhūtaṃ katvāti – santīti nibbutiṃ ñatvā.

সাসনে গোতমস্স নপ্পমজ্জেয্যাতি। গোতমস্স সাসনে বুদ্ধসাসনে জিনসাসনে তথাগতসাসনে দেৰসাসনে অরহন্তসাসনে। নপ্পমজ্জেয্যাতি সক্কচ্চকারী অস্স সাতচ্চকারী অট্ঠিতকারী অনোলীনৰুত্তিকো অনিক্খিত্তচ্ছন্দো অনিক্খিত্তধুরো কুসলেসু ধম্মেসু। ‘‘কদাহং অপরিপূরং ৰা সীলক্খন্ধং পরিপূরেয্যং…পে॰… অপরিপূরং ৰা সমাধিক্খন্ধং… পঞ্ঞাক্খন্ধং… ৰিমুত্তিক্খন্ধং… ৰিমুত্তিঞাণদস্সনক্খন্ধং? কদাহং অপরিঞ্ঞাতং ৰা দুক্খং পরিজানেয্যং, অপ্পহীনে ৰা কিলেসে পজহেয্যং, অভাৰিতং ৰা মগ্গং ভাৰেয্যং, অসচ্ছিকতং ৰা নিরোধং সচ্ছিকরেয্য’’ন্তি? যো তত্থ ছন্দো চ ৰাযামো চ উস্সাহো চ উস্সোল়্হী চ থামো চ অপ্পটিৰানী চ সতি চ সম্পজঞ্ঞঞ্চ আতপ্পং পধানং অধিট্ঠানং অনুযোগো অপ্পমাদো কুসলেসু ধম্মেসূতি – সাসনে গোতমস্স নপ্পমজ্জেয্য।

Sāsane gotamassa nappamajjeyyāti. Gotamassa sāsane buddhasāsane jinasāsane tathāgatasāsane devasāsane arahantasāsane. Nappamajjeyyāti sakkaccakārī assa sātaccakārī aṭṭhitakārī anolīnavuttiko anikkhittacchando anikkhittadhuro kusalesu dhammesu. ‘‘Kadāhaṃ aparipūraṃ vā sīlakkhandhaṃ paripūreyyaṃ…pe… aparipūraṃ vā samādhikkhandhaṃ… paññākkhandhaṃ… vimuttikkhandhaṃ… vimuttiñāṇadassanakkhandhaṃ? Kadāhaṃ apariññātaṃ vā dukkhaṃ parijāneyyaṃ, appahīne vā kilese pajaheyyaṃ, abhāvitaṃ vā maggaṃ bhāveyyaṃ, asacchikataṃ vā nirodhaṃ sacchikareyya’’nti? Yo tattha chando ca vāyāmo ca ussāho ca ussoḷhī ca thāmo ca appaṭivānī ca sati ca sampajaññañca ātappaṃ padhānaṃ adhiṭṭhānaṃ anuyogo appamādo kusalesu dhammesūti – sāsane gotamassa nappamajjeyya.

তেনাহ ভগৰা –

Tenāha bhagavā –

‘‘এতঞ্চ ধম্মমঞ্ঞায, ৰিচিনং ভিক্খু সদা সতো সিক্খে।

‘‘Etañca dhammamaññāya, vicinaṃ bhikkhu sadā sato sikkhe;

সন্তীতি নিব্বুতিং ঞত্ৰা, সাসনে গোতমস্স নপ্পমজ্জেয্যা’’তি॥

Santīti nibbutiṃ ñatvā, sāsane gotamassa nappamajjeyyā’’ti.

১৬৯.

169.

অভিভূ হি সো অনভিভূতো, সক্খিধম্মমনীতিহমদ্দসি।

Abhibhūhi so anabhibhūto, sakkhidhammamanītihamaddasi;

তস্মা হি তস্স ভগৰতো সাসনে, অপ্পমত্তো সদা নমস্সমনুসিক্খে॥[ইতি ভগৰা]

Tasmā hi tassa bhagavato sāsane, appamatto sadā namassamanusikkhe.[iti bhagavā]

অভিভূ হি সো অনভিভূতোতি। অভিভূতি রূপাভিভূ ¹⁵¹ সদ্দাভিভূ গন্ধাভিভূ রসাভিভূ ফোট্ঠব্বাভিভূ ধম্মাভিভূ, অনভিভূতো কেহিচি কিলেসেহি, অভিভোসি নে পাপকে ¹⁵² অকুসলে ধম্মে সংকিলেসিকে পোনোভৰিকে সদরে দুক্খৰিপাকে আযতিং জাতিজরামরণিযেতি – অভিভূ হি সো অনভিভূতো।

Abhibhūhi so anabhibhūtoti. Abhibhūti rūpābhibhū ¹⁵³ saddābhibhū gandhābhibhū rasābhibhū phoṭṭhabbābhibhū dhammābhibhū, anabhibhūto kehici kilesehi, abhibhosi ne pāpake ¹⁵⁴ akusale dhamme saṃkilesike ponobhavike sadare dukkhavipāke āyatiṃ jātijarāmaraṇiyeti – abhibhū hi so anabhibhūto.

সক্খিধম্মমনীতিহমদ্দসীতি। সক্খিধম্মন্তি ন ইতিহিতিহং ন ইতিকিরিযায ন পরম্পরায ন পিটকসম্পদায ন তক্কহেতু ন নযহেতু ন আকারপরিৰিতক্কেন ন দিট্ঠিনিজ্ঝানক্খন্তিযা সামং সযমভিঞ্ঞাতং অত্তপচ্চক্খধম্মং অদ্দসি অদ্দক্খি অপস্সি পটিৰিজ্ঝীতি – সক্খিধম্মমনীতিহমদ্দসি।

Sakkhidhammamanītihamaddasīti. Sakkhidhammanti na itihitihaṃ na itikiriyāya na paramparāya na piṭakasampadāya na takkahetu na nayahetu na ākāraparivitakkena na diṭṭhinijjhānakkhantiyā sāmaṃ sayamabhiññātaṃ attapaccakkhadhammaṃ addasi addakkhi apassi paṭivijjhīti – sakkhidhammamanītihamaddasi.

তস্মা হি তস্স ভগৰতো সাসনেতি। তস্মাতি তস্মা তংকারণা তংহেতু তপ্পচ্চযা তংনিদানা। তস্স ভগৰতো সাসনেতি। তস্স ভগৰতো সাসনে গোতমসাসনে বুদ্ধসাসনে জিনসাসনে তথাগতসাসনে দেৰসাসনে অরহন্তসাসনেতি – তস্মা তস্স ভগৰতো সাসনে।

Tasmā hi tassa bhagavato sāsaneti. Tasmāti tasmā taṃkāraṇā taṃhetu tappaccayā taṃnidānā. Tassa bhagavato sāsaneti. Tassa bhagavato sāsane gotamasāsane buddhasāsane jinasāsane tathāgatasāsane devasāsane arahantasāsaneti – tasmā tassa bhagavato sāsane.

অপ্পমত্তো সদা নমস্সমনুসিক্খে (ইতি ভগৰা)তি। অপ্পমত্তোতি সক্কচ্চকারী…পে॰… অপ্পমাদো কুসলেসু ধম্মেসু। সদাতি সদা সব্বকালং…পে॰… পচ্ছিমে ৰযোখন্ধে। নমস্সন্তি কাযেন ৰা নমস্সমানো ৰাচায ৰা নমস্সমানো চিত্তেন ৰা নমস্সমানো অন্ৰত্থপটিপত্তিযা ৰা নমস্সমানো ধম্মানুধম্মপটিপত্তিযা ৰা নমস্সমানো সক্কুরুমানো গরুকুরুমানো ¹⁵⁵ মানযমানো পূজযমানো অপচযমানো। অনুসিক্খেতি তিস্সো সিক্খাযো – অধিসীলসিক্খা, অধিচিত্তসিক্খা, অধিপঞ্ঞাসিক্খা…পে॰… অযং অধিপঞ্ঞাসিক্খা। ইমা তিস্সো সিক্খাযো আৰজ্জন্তো সিক্খেয্য…পে॰… সচ্ছিকাতব্বং সচ্ছিকরোন্তো সিক্খেয্য চরেয্য আচরেয্য সমাচরেয্য সমাদায ৰত্তেয্য। ভগৰাতি গারৰাধিৰচনং…পে॰… সচ্ছিকা পঞ্ঞত্তি যদিদং ভগৰাতি – অপ্পমত্তো সদা নমস্সমনুসিক্খে। (ইতি ভগৰা)।

Appamattosadā namassamanusikkhe (iti bhagavā)ti. Appamattoti sakkaccakārī…pe… appamādo kusalesu dhammesu. Sadāti sadā sabbakālaṃ…pe… pacchime vayokhandhe. Namassanti kāyena vā namassamāno vācāya vā namassamāno cittena vā namassamāno anvatthapaṭipattiyā vā namassamāno dhammānudhammapaṭipattiyā vā namassamāno sakkurumāno garukurumāno ¹⁵⁶ mānayamāno pūjayamāno apacayamāno. Anusikkheti tisso sikkhāyo – adhisīlasikkhā, adhicittasikkhā, adhipaññāsikkhā…pe… ayaṃ adhipaññāsikkhā. Imā tisso sikkhāyo āvajjanto sikkheyya…pe… sacchikātabbaṃ sacchikaronto sikkheyya careyya ācareyya samācareyya samādāya vatteyya. Bhagavāti gāravādhivacanaṃ…pe… sacchikā paññatti yadidaṃ bhagavāti – appamatto sadā namassamanusikkhe. (Iti bhagavā).

তেনাহ ভগৰা –

Tenāha bhagavā –

‘‘অভিভূ হি সো অনভিভূতো, সক্খিধম্মমনীতিহমদ্দসি।

‘‘Abhibhū hi so anabhibhūto, sakkhidhammamanītihamaddasi;

তস্মা হি তস্স ভগৰতো সাসনে, অপ্পমত্তো সদা নমস্সমনুসিক্খে’’॥ [ইতি ভগৰাতি]

Tasmā hi tassa bhagavato sāsane, appamatto sadā namassamanusikkhe’’. [iti bhagavāti]

তুৰট্টকসুত্তনিদ্দেসো ¹⁵⁷ চুদ্দসমো।

Tuvaṭṭakasuttaniddeso ¹⁵⁸ cuddasamo.

Next: ১৫. অত্তদণ্ডসুত্তনিদ্দেসো • 15. Attadaṇḍasuttaniddeso

Footnotes:

1. আদিচ্চবন্ধূ (সী॰ স্যা॰)

2. মহেসিং (সী॰ স্যা॰)

3. ādiccabandhū (sī. syā.)

4. mahesiṃ (sī. syā.)

5. সংসযপক্খন্নো (সী॰ স্যা॰)

6. saṃsayapakkhanno (sī. syā.)

7. নত্থি সী॰ স্যা॰ পোত্থকেসু

8. natthi sī. syā. potthakesu

9. নিক্খেপত্থপুচ্ছা (সী॰ ক॰)

10. nikkhepatthapucchā (sī. ka.)

11. সুরিযো (সী॰ স্যা॰)

12. suriyo (sī. syā.)

13. ৰূপকট্ঠকাযানং (সী॰)

14. vūpakaṭṭhakāyānaṃ (sī.)

15. অব্বূহনং (সী॰ স্যা॰), অব্ভুহনং (ক॰)

16. পৰাহনং (স্যা॰)

17. abbūhanaṃ (sī. syā.), abbhuhanaṃ (ka.)

18. pavāhanaṃ (syā.)

19. সব্বমুপরুদ্ধে (স্যা॰)

20. sabbamuparuddhe (syā.)

21. অজ্ঝত্তং সমুট্ঠাতি (স্যা॰)

22. ajjhattaṃ samuṭṭhāti (syā.)

23. অস্স (স্যা॰)

24. অস্সূতি অজ্ঝত্তং (বহূসু)

25. assa (syā.)

26. assūti ajjhattaṃ (bahūsu)

27. অত্তং (স্যা॰)

28. নিরত্তং (স্যা॰)

29. attaṃ (syā.)

30. nirattaṃ (syā.)

31. করে (সী॰)

32. kare (sī.)

33. সীদন্তরসমুদ্দো (স্যা॰)

34. sīdantarasamuddo (syā.)

35. রাগুস্সদো (স্যা॰)

36. rāgussado (syā.)

37. অকিত্তযীতি অকিত্তযি পরিকিত্তযি আচিক্খি দেসেসি পঞ্ঞপেসি পট্ঠপেসি ৰিৰরি ৰিভজি উত্তানিমকাসি পকাসেসীতি অকিত্তযি (স্যা॰)

38. akittayīti akittayi parikittayi ācikkhi desesi paññapesi paṭṭhapesi vivari vibhaji uttānimakāsi pakāsesīti akittayi (syā.)

39. উম্মাপুপ্ফসমানং (সী॰ ক॰), উম্মারপুপ্ফসমানং (স্যা॰)

40. অল়ারিট্ঠকসমানং (স্যা॰)

41. অকালমেঘো (স্যা॰)

42. কুড্ডো (সী॰)

43. ummāpupphasamānaṃ (sī. ka.), ummārapupphasamānaṃ (syā.)

44. aḷāriṭṭhakasamānaṃ (syā.)

45. akālamegho (syā.)

46. kuḍḍo (sī.)

47. তিসহস্সিং মহাসহস্সিম্পি (সী॰ ক॰)

48. tisahassiṃ mahāsahassimpi (sī. ka.)

49. অতীতানাগতপচ্চুপ্পন্নং (স্যা॰) মহানি॰ ৬৯

50. অত্থি ধম্মং জানিতব্বং (সী॰ ক॰)

51. পরমত্থো ৰা, সব্বন্তং (স্যা॰)

52. atītānāgatapaccuppannaṃ (syā.) mahāni. 69

53. atthi dhammaṃ jānitabbaṃ (sī. ka.)

54. paramattho vā, sabbantaṃ (syā.)

55. পরিৰত্তন্তি (ক॰) পসূরসুত্তনিদ্দেসে অৰসানেপি

56. parivattanti (ka.) pasūrasuttaniddese avasānepi

57. পরিৰত্তন্তি (ক॰) পসূরসুত্তনিদ্দেসে অৰসানেপি

58. parivattanti (ka.) pasūrasuttaniddese avasānepi

59. বুদ্ধসুবুদ্ধতং (ক॰)

60. buddhasubuddhataṃ (ka.)

61. গোমহিসা (স্যা॰) মহানি॰ ৫

62. ডহো (সী॰ স্যা॰) মহানি॰ ৫

63. লোহিতং পিত্তং (স্যা॰ ক॰)

64. gomahisā (syā.) mahāni. 5

65. ḍaho (sī. syā.) mahāni. 5

66. lohitaṃ pittaṃ (syā. ka.)

67. সমুদাচারেন্তি (সী॰)

68. samudācārenti (sī.)

69. অন্তরামলং (সী॰ ক॰) ইতিৰু॰ ৮৮

70. antarāmalaṃ (sī. ka.) itivu. 88

71. অন্ধতমং (স্যা॰) ইতিৰু॰ ৮৮

72. andhatamaṃ (syā.) itivu. 88

73. অনৰত্থিতচারিকং (সী॰ স্যা॰)

74. anavatthitacārikaṃ (sī. syā.)

75. কুম্ভথূনং (সী॰ স্যা॰ ক॰)

76. সোভনগরকং (সী॰ স্যা॰)

77. মহিসযুদ্ধং (সী॰ স্যা॰)

78. kumbhathūnaṃ (sī. syā. ka.)

79. sobhanagarakaṃ (sī. syā.)

80. mahisayuddhaṃ (sī. syā.)

81. ইত্থিকথা পুরিসকথা (বহূসু)

82. itthikathā purisakathā (bahūsu)

83. আরুহনত্থায (ক॰) পুরাভেদসুত্তনিদ্দেসে সত্তমগাথাৰণ্ণনাযং

84. āruhanatthāya (ka.) purābhedasuttaniddese sattamagāthāvaṇṇanāyaṃ

85. সুংসুকাভযং (স্যা॰)

86. suṃsukābhayaṃ (syā.)

87. নিজিগিংসনতায (সী॰ স্যা॰)

88. ন মুগ্গসুপ্পতায (সী॰), ন মুগ্গসূপতায (স্যা॰)

89. পিট্ঠিমংসিকতায (সী॰), পিট্ঠিমদ্দিকতায (ক॰)

90. nijigiṃsanatāya (sī. syā.)

91. na muggasuppatāya (sī.), na muggasūpatāya (syā.)

92. piṭṭhimaṃsikatāya (sī.), piṭṭhimaddikatāya (ka.)

93. সদত্থগরুকোতি (সী॰ স্যা॰)

94. sadatthagarukoti (sī. syā.)

95. ৰিরিযং (সী॰ স্যা॰)

96. viriyaṃ (sī. syā.)

97. তন্দিন্তি (সী॰)

98. নত্থি অত্তদণ্ডসুত্তনিদ্দেসে খুদ্দকৰত্থুৰিভঙ্গেপি

99. জঞ্ঞূতি (ক॰)

100. পটিচ্ছাদনা (সী॰ ক॰) মহানিদ্দেসে

101. tandinti (sī.)

102. natthi attadaṇḍasuttaniddese khuddakavatthuvibhaṅgepi

103. jaññūti (ka.)

104. paṭicchādanā (sī. ka.) mahāniddese

105. মুখভেরিযং (স্যা॰)

106. মুখদেণ্ডিমকং (সী॰ স্যা॰)

107. মুখভেরুলকং (সী॰)

108. mukhabheriyaṃ (syā.)

109. mukhadeṇḍimakaṃ (sī. syā.)

110. mukhabherulakaṃ (sī.)

111. ৰসিক্খাবন্ধং (স্যা॰)

112. vasikkhābandhaṃ (syā.)

113. রুন্ধে (ক॰)

114. rundhe (ka.)

115. মজ্ঝন্তিকসমযং (বহূসু)

116. পোক্খরণিরামণেয্যকং (স্যা॰)

117. majjhantikasamayaṃ (bahūsu)

118. pokkharaṇirāmaṇeyyakaṃ (syā.)

119. বীজনিহারো (স্যা॰ ক॰)

120. ঘরৰাসো (স্যা॰)

121. bījanihāro (syā. ka.)

122. gharavāso (syā.)

123. মিগচক্কং। মিগচক্কপাঠকা (স্যা॰)

124. রুদং (স্যা॰)

125. migacakkaṃ. migacakkapāṭhakā (syā.)

126. rudaṃ (syā.)

127. উক্কাপনা সমুক্কাপনা (স্যা॰)

128. পিট্ঠিমংসিকতা (ক॰) ৰিসুদ্ধিমগ্গে সীলনিদ্দেসৰণ্ণনা ওলোকেতব্বা

129. মেত্তৰাচকতা (স্যা॰)

130. ukkāpanā samukkāpanā (syā.)

131. piṭṭhimaṃsikatā (ka.) visuddhimagge sīlaniddesavaṇṇanā oloketabbā

132. mettavācakatā (syā.)

133. কত্থিতা (স্যা॰ ক॰)

134. katthitā (syā. ka.)

135. সভাগগ্গতো (সী॰ ক॰)

136. পরিসগতো (সী॰ ক॰)

137. ন ৰুয্হেয্য (সী॰ ক॰), নত্থি স্যা॰ পোত্থকে

138. sabhāgaggato (sī. ka.)

139. parisagato (sī. ka.)

140. na vuyheyya (sī. ka.), natthi syā. potthake

141. অসনীৰ চক্কং দন্তকূটং সমণপ্পধানেনাতি (সী॰)

142. asanīva cakkaṃ dantakūṭaṃ samaṇappadhānenāti (sī.)

143. দূসিতো (সী॰ স্যা॰)

144. পুথুৰচনানং (সী॰ স্যা॰)

145. dūsito (sī. syā.)

146. puthuvacanānaṃ (sī. syā.)

147. পটিসেনি করোতি (স্যা॰)

148. paṭiseni karoti (syā.)

149. পটিবন্ধনং (সী॰)

150. paṭibandhanaṃ (sī.)

151. অভিভূতরূপা (স্যা॰) এৰমঞ্ঞেসু পঞ্চপদেসুপি

152. অভিভূ হি নে হীনে পাপকে (সী॰ ক॰), অভিভূ হি পাপকে (স্যা॰)

153. abhibhūtarūpā (syā.) evamaññesu pañcapadesupi

154. abhibhū hi ne hīne pāpake (sī. ka.), abhibhū hi pāpake (syā.)

155. সক্কারমানো গরুকারমানো (স্যা॰)

156. sakkāramāno garukāramāno (syā.)

157. তুৰটকসুত্তনিদ্দেসো (সী॰ স্যা॰) সুত্তনিপাতেপি

158. tuvaṭakasuttaniddeso (sī. syā.) suttanipātepi

Related texts:

অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / মহানিদ্দেস-অট্ঠকথা • Mahāniddesa-aṭṭhakathā / ১৪. তুৰটকসুত্তনিদ্দেসৰণ্ণনা • 14. Tuvaṭakasuttaniddesavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact