| Library / Tipiṭaka / তিপিটক • Tipiṭaka / দ্ৰেমাতিকাপাল়ি • Dvemātikāpāḷi |
৪. তুৰট্টৰগ্গো
4. Tuvaṭṭavaggo
১. একমঞ্চতুৰট্টনসিক্খাপদৰণ্ণনা
1. Ekamañcatuvaṭṭanasikkhāpadavaṇṇanā
তুৰট্টৰগ্গস্স পঠমে তুৰট্টেয্যুন্তি নিপজ্জেয্যুং। তাসু পন একায ৰা নিপন্নায অপরা নিপজ্জতু, দ্ৰেপি ৰা সহেৰ নিপজ্জন্তু, দ্ৰিন্নম্পি পাচিত্তিযং।
Tuvaṭṭavaggassa paṭhame tuvaṭṭeyyunti nipajjeyyuṃ. Tāsu pana ekāya vā nipannāya aparā nipajjatu, dvepi vā saheva nipajjantu, dvinnampi pācittiyaṃ.
সাৰত্থিযং সম্বহুলা ভিক্খুনিযো আরব্ভ দ্ৰিন্নং একমঞ্চে তুৰট্টনৰত্থুস্মিং পঞ্ঞত্তং, সচে পন একায নিপন্নায একা নিসীদতি, উভো ৰা নিসীদন্তি, তাসং, উম্মত্তিকাদীনঞ্চ অনাপত্তি। একমঞ্চতা, দ্ৰিন্নং তুৰট্টনন্তি ইমানেত্থ দ্ৰে অঙ্গানি। সমুট্ঠানাদীনি এল়কলোমসদিসানীতি।
Sāvatthiyaṃ sambahulā bhikkhuniyo ārabbha dvinnaṃ ekamañce tuvaṭṭanavatthusmiṃ paññattaṃ, sace pana ekāya nipannāya ekā nisīdati, ubho vā nisīdanti, tāsaṃ, ummattikādīnañca anāpatti. Ekamañcatā, dvinnaṃ tuvaṭṭananti imānettha dve aṅgāni. Samuṭṭhānādīni eḷakalomasadisānīti.
একমঞ্চতুৰট্টনসিক্খাপদৰণ্ণনা নিট্ঠিতা।
Ekamañcatuvaṭṭanasikkhāpadavaṇṇanā niṭṭhitā.
২. একত্থরণতুৰট্টনসিক্খাপদৰণ্ণনা
2. Ekattharaṇatuvaṭṭanasikkhāpadavaṇṇanā
দুতিযে একং অত্থরণঞ্চেৰ পাৰুরণঞ্চ এতাসন্তি একত্থরণপাৰুরণা, সংহারিমানং পাৰারত্থরণকটসারকাদীনং একং অন্তং অত্থরিত্ৰা একং পারুপিত্ৰা তুৰট্টেন্তীনমেতং অধিৰচনং। পাচিত্তিযন্তি তংযেৰ অত্থরিত্ৰা তং পারুপিত্ৰা নিপজ্জন্তীনং পাচিত্তিযং।
Dutiye ekaṃ attharaṇañceva pāvuraṇañca etāsanti ekattharaṇapāvuraṇā, saṃhārimānaṃ pāvārattharaṇakaṭasārakādīnaṃ ekaṃ antaṃ attharitvā ekaṃ pārupitvā tuvaṭṭentīnametaṃ adhivacanaṃ. Pācittiyanti taṃyeva attharitvā taṃ pārupitvā nipajjantīnaṃ pācittiyaṃ.
সাৰত্থিযং সম্বহুলা ভিক্খুনিযো আরব্ভ এৰং তুৰট্টনৰত্থুস্মিং পঞ্ঞত্তং, তিকপাচিত্তিযং, অত্থরণে ৰা পাৰুরণে ৰা একস্মিং দুক্কটং, নানত্থরণপাৰুরণে দ্ৰিকদুক্কটং। তস্মিং পন নানত্থরণপাৰুরণসঞ্ঞায, ৰৰত্থানং দস্সেত্ৰা নিপজ্জন্তিযা, উম্মত্তিকাদীনঞ্চ অনাপত্তি। সেসং পঠমসদিসমেৰাতি।
Sāvatthiyaṃ sambahulā bhikkhuniyo ārabbha evaṃ tuvaṭṭanavatthusmiṃ paññattaṃ, tikapācittiyaṃ, attharaṇe vā pāvuraṇe vā ekasmiṃ dukkaṭaṃ, nānattharaṇapāvuraṇe dvikadukkaṭaṃ. Tasmiṃ pana nānattharaṇapāvuraṇasaññāya, vavatthānaṃ dassetvā nipajjantiyā, ummattikādīnañca anāpatti. Sesaṃ paṭhamasadisamevāti.
একত্থরণতুৰট্টনসিক্খাপদৰণ্ণনা নিট্ঠিতা।
Ekattharaṇatuvaṭṭanasikkhāpadavaṇṇanā niṭṭhitā.
৩. অফাসুকরণসিক্খাপদৰণ্ণনা
3. Aphāsukaraṇasikkhāpadavaṇṇanā
ততিযে অফাসুন্তি ‘‘ইমিনা ইমিস্সা অফাসু ভৰিস্সতী’’তি অনাপুচ্ছা পুরতো চঙ্কমনট্ঠাননিস্সজ্জাদযো ৰা উদ্দিসউদ্দিসাপনপরিপুচ্ছনসজ্ঝাযং ৰা করোন্তিযা চঙ্কমনে নিৰত্তনগণনায, ঠানাদীসু পযোগগণনায, উদ্দেসাদীসু পদগণনায পাচিত্তিযং।
Tatiye aphāsunti ‘‘iminā imissā aphāsu bhavissatī’’ti anāpucchā purato caṅkamanaṭṭhānanissajjādayo vā uddisauddisāpanaparipucchanasajjhāyaṃ vā karontiyā caṅkamane nivattanagaṇanāya, ṭhānādīsu payogagaṇanāya, uddesādīsu padagaṇanāya pācittiyaṃ.
সাৰত্থিযং থুল্লনন্দং আরব্ভ সঞ্চিচ্চ অফাসুকরণৰত্থুস্মিং পঞ্ঞত্তং, তিকপাচিত্তিযং, অনুপসম্পন্নায তিকদুক্কটং, ন অফাসুকামতায, আপুচ্ছা পুরতো চঙ্কমনাদীনি করোন্তিযা, উম্মত্তিকাদীনঞ্চ অনাপত্তি। উপসম্পন্নতা, অফাসুকামতা, অফাসুকরণং, অনাপুচ্ছনন্তি ইমানেত্থ চত্তারি অঙ্গানি। সমুট্ঠানাদীনি অদিন্নাদানসদিসানি, ইদং পন কিরিযাকিরিযং, দুক্খৰেদনন্তি।
Sāvatthiyaṃ thullanandaṃ ārabbha sañcicca aphāsukaraṇavatthusmiṃ paññattaṃ, tikapācittiyaṃ, anupasampannāya tikadukkaṭaṃ, na aphāsukāmatāya, āpucchā purato caṅkamanādīni karontiyā, ummattikādīnañca anāpatti. Upasampannatā, aphāsukāmatā, aphāsukaraṇaṃ, anāpucchananti imānettha cattāri aṅgāni. Samuṭṭhānādīni adinnādānasadisāni, idaṃ pana kiriyākiriyaṃ, dukkhavedananti.
অফাসুকরণসিক্খাপদৰণ্ণনা নিট্ঠিতা।
Aphāsukaraṇasikkhāpadavaṇṇanā niṭṭhitā.
৪. নউপট্ঠাপনসিক্খাপদৰণ্ণনা
4. Naupaṭṭhāpanasikkhāpadavaṇṇanā
চতুত্থে দুক্খিতন্তি গিলানং। সহজীৰিনিন্তি সদ্ধিৰিহারিনিং। নেৰ উপট্ঠহেয্যাতি তস্সা উপট্ঠানং সযং ৰা অকরোন্তিযা, পরেহি ৰা অকারেন্তিযা ধুরং নিক্খিত্তমত্তে পাচিত্তিযং।
Catutthe dukkhitanti gilānaṃ. Sahajīvininti saddhivihāriniṃ. Neva upaṭṭhaheyyāti tassā upaṭṭhānaṃ sayaṃ vā akarontiyā, parehi vā akārentiyā dhuraṃ nikkhittamatte pācittiyaṃ.
সাৰত্থিযং থুল্লনন্দং আরব্ভ দুক্খিতং সহজীৰিনিং অনুপট্ঠানৰত্থুস্মিং পঞ্ঞত্তং, অন্তেৰাসিনিযা ৰা অনুপসম্পন্নায ৰা দুক্কটং, দসসু অঞ্ঞতরন্তরাযে সতি পরিযেসিত্ৰা অলভন্তিযা, গিলানায, আপদাসু, উম্মত্তিকাদীনঞ্চ অনাপত্তি। গিলানতা, সদ্ধিৰিহারিতা, অনুঞ্ঞাতকারণাভাৰো, উপট্ঠানে ধুরনিক্খেপোতি ইমানেত্থ চত্তারি অঙ্গানি। সমুট্ঠানাদীনি সমনুভাসনসদিসানীতি।
Sāvatthiyaṃ thullanandaṃ ārabbha dukkhitaṃ sahajīviniṃ anupaṭṭhānavatthusmiṃ paññattaṃ, antevāsiniyā vā anupasampannāya vā dukkaṭaṃ, dasasu aññatarantarāye sati pariyesitvā alabhantiyā, gilānāya, āpadāsu, ummattikādīnañca anāpatti. Gilānatā, saddhivihāritā, anuññātakāraṇābhāvo, upaṭṭhāne dhuranikkhepoti imānettha cattāri aṅgāni. Samuṭṭhānādīni samanubhāsanasadisānīti.
নউপট্ঠাপনসিক্খাপদৰণ্ণনা নিট্ঠিতা।
Naupaṭṭhāpanasikkhāpadavaṇṇanā niṭṭhitā.
৫. নিক্কড্ঢনসিক্খাপদৰণ্ণনা
5. Nikkaḍḍhanasikkhāpadavaṇṇanā
পঞ্চমে উপস্সযং দত্ৰাতি সকৰাটবদ্ধং অত্তনো পুগ্গলিকৰিহারং দত্ৰা। নিক্কড্ঢেয্যাতি বহূনিপি দ্ৰারানি একপ্পযোগেন নিক্কড্ঢেন্তিযা একা আপত্তি, নানাপযোগেহি পযোগগণনায আপত্তিযো, আণত্তিযম্পি এসেৰ নযো। সচে পন ‘‘ইমঞ্চিমঞ্চ দ্ৰারং অতিক্কামেহী’’তি আণাপেতি, একায আণত্তিযা এৰ দ্ৰারগণনায আপত্তিযো।
Pañcame upassayaṃ datvāti sakavāṭabaddhaṃ attano puggalikavihāraṃ datvā. Nikkaḍḍheyyāti bahūnipi dvārāni ekappayogena nikkaḍḍhentiyā ekā āpatti, nānāpayogehi payogagaṇanāya āpattiyo, āṇattiyampi eseva nayo. Sace pana ‘‘imañcimañca dvāraṃ atikkāmehī’’ti āṇāpeti, ekāya āṇattiyā eva dvāragaṇanāya āpattiyo.
সাৰত্থিযং থুল্লনন্দং আরব্ভ এতাদিসে ৰত্থুস্মিং পঞ্ঞত্তং, তিকপাচিত্তিযং, অকৰাটবদ্ধতো দুক্কটং, অনুপসম্পন্নায তিকদুক্কটং, সকৰাটবদ্ধতো ৰা অকৰাটবদ্ধতো ৰা উভিন্নম্পি পরিক্খারনিক্কড্ঢনে দুক্কটমেৰ, সেসং সঙ্ঘিকৰিহারনিক্কড্ঢনসিক্খাপদে ৰুত্তনযমেৰাতি।
Sāvatthiyaṃ thullanandaṃ ārabbha etādise vatthusmiṃ paññattaṃ, tikapācittiyaṃ, akavāṭabaddhato dukkaṭaṃ, anupasampannāya tikadukkaṭaṃ, sakavāṭabaddhato vā akavāṭabaddhato vā ubhinnampi parikkhāranikkaḍḍhane dukkaṭameva, sesaṃ saṅghikavihāranikkaḍḍhanasikkhāpade vuttanayamevāti.
নিক্কড্ঢনসিক্খাপদৰণ্ণনা নিট্ঠিতা।
Nikkaḍḍhanasikkhāpadavaṇṇanā niṭṭhitā.
৬. সংসট্ঠসিক্খাপদৰণ্ণনা
6. Saṃsaṭṭhasikkhāpadavaṇṇanā
ছট্ঠং উত্তানপদত্থমেৰ। সাৰত্থিযং চণ্ডকাল়িং আরব্ভ সংসট্ঠৰিহারৰত্থুস্মিং পঞ্ঞত্তং, সেসমেত্থ পঠমঅরিট্ঠসিক্খাপদে ৰুত্তৰিনিচ্ছযসদিসমেৰাতি।
Chaṭṭhaṃ uttānapadatthameva. Sāvatthiyaṃ caṇḍakāḷiṃ ārabbha saṃsaṭṭhavihāravatthusmiṃ paññattaṃ, sesamettha paṭhamaariṭṭhasikkhāpade vuttavinicchayasadisamevāti.
সংসট্ঠসিক্খাপদৰণ্ণনা নিট্ঠিতা।
Saṃsaṭṭhasikkhāpadavaṇṇanā niṭṭhitā.
৭. অন্তোরট্ঠসিক্খাপদৰণ্ণনা
7. Antoraṭṭhasikkhāpadavaṇṇanā
সত্তমে অন্তোরট্ঠেতি যস্স ৰিজিতে ৰিহরতি, তস্স রট্ঠে। অসত্থিকা চারিকন্তি ৰিনা সত্থেন গচ্ছন্তিযা, গামন্তরগণনায, অগামকে অরঞ্ঞে অদ্ধযোজনগণনায পাচিত্তিযং।
Sattame antoraṭṭheti yassa vijite viharati, tassa raṭṭhe. Asatthikā cārikanti vinā satthena gacchantiyā, gāmantaragaṇanāya, agāmake araññe addhayojanagaṇanāya pācittiyaṃ.
সাৰত্থিযং সম্বহুলা ভিক্খুনিযো আরব্ভ ৰুত্তনযেনেৰ দেসচারিকং পক্কমনৰত্থুস্মিং পঞ্ঞত্তং। সত্থেন সহ গচ্ছন্তিযা, খেমে অপ্পটিভযে, আপদাসু, উম্মত্তিকাদীনঞ্চ অনাপত্তি। অন্তোরট্ঠতা, অখেমতা, অনুঞ্ঞাতকারণাভাৰো, চারিকং পক্কমনন্তি ইমানেত্থ চত্তারি অঙ্গানি। সমুট্ঠানাদীনি এল়কলোমসদিসানীতি।
Sāvatthiyaṃ sambahulā bhikkhuniyo ārabbha vuttanayeneva desacārikaṃ pakkamanavatthusmiṃ paññattaṃ. Satthena saha gacchantiyā, kheme appaṭibhaye, āpadāsu, ummattikādīnañca anāpatti. Antoraṭṭhatā, akhematā, anuññātakāraṇābhāvo, cārikaṃ pakkamananti imānettha cattāri aṅgāni. Samuṭṭhānādīni eḷakalomasadisānīti.
অন্তোরট্ঠসিক্খাপদৰণ্ণনা নিট্ঠিতা।
Antoraṭṭhasikkhāpadavaṇṇanā niṭṭhitā.
৮. তিরোরট্ঠসিক্খাপদৰণ্ণনা
8. Tiroraṭṭhasikkhāpadavaṇṇanā
অট্ঠমে তিরোরট্ঠেতি যস্স ৰিজিতে ৰিহরতি, তং ঠপেত্ৰা অঞ্ঞস্স রট্ঠে। সেসং সত্তমে ৰুত্তনযেনেৰ ৰেদিতব্বং, নগরং পনেত্থ রাজগহন্তি।
Aṭṭhame tiroraṭṭheti yassa vijite viharati, taṃ ṭhapetvā aññassa raṭṭhe. Sesaṃ sattame vuttanayeneva veditabbaṃ, nagaraṃ panettha rājagahanti.
তিরোরট্ঠসিক্খাপদৰণ্ণনা নিট্ঠিতা।
Tiroraṭṭhasikkhāpadavaṇṇanā niṭṭhitā.
৯. অন্তোৰস্সসিক্খাপদৰণ্ণনা
9. Antovassasikkhāpadavaṇṇanā
নৰমে অন্তোৰস্সন্তি পুরিমং ৰা তেমাসং, পচ্ছিমং ৰা তেমাসং অৰসিত্ৰা তস্স ৰস্সস্স অন্তোযেৰ। ইধ সত্তাহকরণীযেন ৰা কেনচি উব্বল়্হায ৰা আপদাসু ৰা গচ্ছন্তিযা উম্মত্তিকাদীনঞ্চ অনাপত্তি। সেসং অট্ঠমসদিসমেৰাতি।
Navame antovassanti purimaṃ vā temāsaṃ, pacchimaṃ vā temāsaṃ avasitvā tassa vassassa antoyeva. Idha sattāhakaraṇīyena vā kenaci ubbaḷhāya vā āpadāsu vā gacchantiyā ummattikādīnañca anāpatti. Sesaṃ aṭṭhamasadisamevāti.
অন্তোৰস্সসিক্খাপদৰণ্ণনা নিট্ঠিতা।
Antovassasikkhāpadavaṇṇanā niṭṭhitā.
১০. চারিকনপক্কমনসিক্খাপদৰণ্ণনা
10. Cārikanapakkamanasikkhāpadavaṇṇanā
দসমে ৰস্সংৰুট্ঠাতি পুরিমং ৰা তেমাসং, পচ্ছিমং ৰা তেমাসং ৰুট্ঠা। ছপ্পঞ্চযোজনানীতি এত্থ পৰারেত্ৰা পঞ্চ যোজনানি গন্তুম্পি ৰট্টতি, ছসু ৰত্তব্বমেৰ নত্থি। সচে পন তীণি গন্ত্ৰা তেনেৰ মগ্গেন পচ্চাগচ্ছতি, ন ৰট্টতি, অঞ্ঞেন আগন্তুং ৰট্টতি। ‘‘ৰুত্তপ্পমাণং অদ্ধানং ন গচ্ছিস্সামী’’তি ধুরে নিক্খিত্তমত্তে পাচিত্তিযং।
Dasame vassaṃvuṭṭhāti purimaṃ vā temāsaṃ, pacchimaṃ vā temāsaṃ vuṭṭhā. Chappañcayojanānīti ettha pavāretvā pañca yojanāni gantumpi vaṭṭati, chasu vattabbameva natthi. Sace pana tīṇi gantvā teneva maggena paccāgacchati, na vaṭṭati, aññena āgantuṃ vaṭṭati. ‘‘Vuttappamāṇaṃ addhānaṃ na gacchissāmī’’ti dhure nikkhittamatte pācittiyaṃ.
রাজগহে সম্বহুলা ভিক্খুনিযো আরব্ভ ৰস্সং ৰসিত্ৰা চারিকং অপক্কমনৰত্থুস্মিং পঞ্ঞত্তং। অন্তরাযে সতি, পরিযেসিত্ৰা দুতিযিকং ভিক্খুনিং অলভন্তিযা, গিলানায, আপদাসু, উম্মত্তিকাদীনঞ্চ অনাপত্তি। ৰস্সংৰুট্ঠতা, অনুঞ্ঞাতকারণাভাৰো, পঞ্চযোজনানতিক্কমোতি ইমানেত্থ তীণি অঙ্গানি। সমুট্ঠানাদীনি পঠমপারাজিকসদিসানি, ইদং পন অকিরিযং, দুক্খৰেদনন্তি।
Rājagahe sambahulā bhikkhuniyo ārabbha vassaṃ vasitvā cārikaṃ apakkamanavatthusmiṃ paññattaṃ. Antarāye sati, pariyesitvā dutiyikaṃ bhikkhuniṃ alabhantiyā, gilānāya, āpadāsu, ummattikādīnañca anāpatti. Vassaṃvuṭṭhatā, anuññātakāraṇābhāvo, pañcayojanānatikkamoti imānettha tīṇi aṅgāni. Samuṭṭhānādīni paṭhamapārājikasadisāni, idaṃ pana akiriyaṃ, dukkhavedananti.
চারিকনপক্কমনসিক্খাপদৰণ্ণনা নিট্ঠিতা।
Cārikanapakkamanasikkhāpadavaṇṇanā niṭṭhitā.
তুৰট্টৰগ্গো চতুত্থো।
Tuvaṭṭavaggo catuttho.
