| Library / Tipiṭaka / ತಿಪಿಟಕ • Tipiṭaka / ದ್ವೇಮಾತಿಕಾಪಾಳಿ • Dvemātikāpāḷi |
೪. ತುವಟ್ಟವಗ್ಗೋ
4. Tuvaṭṭavaggo
೧. ಏಕಮಞ್ಚತುವಟ್ಟನಸಿಕ್ಖಾಪದವಣ್ಣನಾ
1. Ekamañcatuvaṭṭanasikkhāpadavaṇṇanā
ತುವಟ್ಟವಗ್ಗಸ್ಸ ಪಠಮೇ ತುವಟ್ಟೇಯ್ಯುನ್ತಿ ನಿಪಜ್ಜೇಯ್ಯುಂ। ತಾಸು ಪನ ಏಕಾಯ ವಾ ನಿಪನ್ನಾಯ ಅಪರಾ ನಿಪಜ್ಜತು, ದ್ವೇಪಿ ವಾ ಸಹೇವ ನಿಪಜ್ಜನ್ತು, ದ್ವಿನ್ನಮ್ಪಿ ಪಾಚಿತ್ತಿಯಂ।
Tuvaṭṭavaggassa paṭhame tuvaṭṭeyyunti nipajjeyyuṃ. Tāsu pana ekāya vā nipannāya aparā nipajjatu, dvepi vā saheva nipajjantu, dvinnampi pācittiyaṃ.
ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ದ್ವಿನ್ನಂ ಏಕಮಞ್ಚೇ ತುವಟ್ಟನವತ್ಥುಸ್ಮಿಂ ಪಞ್ಞತ್ತಂ, ಸಚೇ ಪನ ಏಕಾಯ ನಿಪನ್ನಾಯ ಏಕಾ ನಿಸೀದತಿ, ಉಭೋ ವಾ ನಿಸೀದನ್ತಿ, ತಾಸಂ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಏಕಮಞ್ಚತಾ, ದ್ವಿನ್ನಂ ತುವಟ್ಟನನ್ತಿ ಇಮಾನೇತ್ಥ ದ್ವೇ ಅಙ್ಗಾನಿ। ಸಮುಟ್ಠಾನಾದೀನಿ ಏಳಕಲೋಮಸದಿಸಾನೀತಿ।
Sāvatthiyaṃ sambahulā bhikkhuniyo ārabbha dvinnaṃ ekamañce tuvaṭṭanavatthusmiṃ paññattaṃ, sace pana ekāya nipannāya ekā nisīdati, ubho vā nisīdanti, tāsaṃ, ummattikādīnañca anāpatti. Ekamañcatā, dvinnaṃ tuvaṭṭananti imānettha dve aṅgāni. Samuṭṭhānādīni eḷakalomasadisānīti.
ಏಕಮಞ್ಚತುವಟ್ಟನಸಿಕ್ಖಾಪದವಣ್ಣನಾ ನಿಟ್ಠಿತಾ।
Ekamañcatuvaṭṭanasikkhāpadavaṇṇanā niṭṭhitā.
೨. ಏಕತ್ಥರಣತುವಟ್ಟನಸಿಕ್ಖಾಪದವಣ್ಣನಾ
2. Ekattharaṇatuvaṭṭanasikkhāpadavaṇṇanā
ದುತಿಯೇ ಏಕಂ ಅತ್ಥರಣಞ್ಚೇವ ಪಾವುರಣಞ್ಚ ಏತಾಸನ್ತಿ ಏಕತ್ಥರಣಪಾವುರಣಾ, ಸಂಹಾರಿಮಾನಂ ಪಾವಾರತ್ಥರಣಕಟಸಾರಕಾದೀನಂ ಏಕಂ ಅನ್ತಂ ಅತ್ಥರಿತ್ವಾ ಏಕಂ ಪಾರುಪಿತ್ವಾ ತುವಟ್ಟೇನ್ತೀನಮೇತಂ ಅಧಿವಚನಂ। ಪಾಚಿತ್ತಿಯನ್ತಿ ತಂಯೇವ ಅತ್ಥರಿತ್ವಾ ತಂ ಪಾರುಪಿತ್ವಾ ನಿಪಜ್ಜನ್ತೀನಂ ಪಾಚಿತ್ತಿಯಂ।
Dutiye ekaṃ attharaṇañceva pāvuraṇañca etāsanti ekattharaṇapāvuraṇā, saṃhārimānaṃ pāvārattharaṇakaṭasārakādīnaṃ ekaṃ antaṃ attharitvā ekaṃ pārupitvā tuvaṭṭentīnametaṃ adhivacanaṃ. Pācittiyanti taṃyeva attharitvā taṃ pārupitvā nipajjantīnaṃ pācittiyaṃ.
ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಏವಂ ತುವಟ್ಟನವತ್ಥುಸ್ಮಿಂ ಪಞ್ಞತ್ತಂ, ತಿಕಪಾಚಿತ್ತಿಯಂ, ಅತ್ಥರಣೇ ವಾ ಪಾವುರಣೇ ವಾ ಏಕಸ್ಮಿಂ ದುಕ್ಕಟಂ, ನಾನತ್ಥರಣಪಾವುರಣೇ ದ್ವಿಕದುಕ್ಕಟಂ। ತಸ್ಮಿಂ ಪನ ನಾನತ್ಥರಣಪಾವುರಣಸಞ್ಞಾಯ, ವವತ್ಥಾನಂ ದಸ್ಸೇತ್ವಾ ನಿಪಜ್ಜನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಸೇಸಂ ಪಠಮಸದಿಸಮೇವಾತಿ।
Sāvatthiyaṃ sambahulā bhikkhuniyo ārabbha evaṃ tuvaṭṭanavatthusmiṃ paññattaṃ, tikapācittiyaṃ, attharaṇe vā pāvuraṇe vā ekasmiṃ dukkaṭaṃ, nānattharaṇapāvuraṇe dvikadukkaṭaṃ. Tasmiṃ pana nānattharaṇapāvuraṇasaññāya, vavatthānaṃ dassetvā nipajjantiyā, ummattikādīnañca anāpatti. Sesaṃ paṭhamasadisamevāti.
ಏಕತ್ಥರಣತುವಟ್ಟನಸಿಕ್ಖಾಪದವಣ್ಣನಾ ನಿಟ್ಠಿತಾ।
Ekattharaṇatuvaṭṭanasikkhāpadavaṇṇanā niṭṭhitā.
೩. ಅಫಾಸುಕರಣಸಿಕ್ಖಾಪದವಣ್ಣನಾ
3. Aphāsukaraṇasikkhāpadavaṇṇanā
ತತಿಯೇ ಅಫಾಸುನ್ತಿ ‘‘ಇಮಿನಾ ಇಮಿಸ್ಸಾ ಅಫಾಸು ಭವಿಸ್ಸತೀ’’ತಿ ಅನಾಪುಚ್ಛಾ ಪುರತೋ ಚಙ್ಕಮನಟ್ಠಾನನಿಸ್ಸಜ್ಜಾದಯೋ ವಾ ಉದ್ದಿಸಉದ್ದಿಸಾಪನಪರಿಪುಚ್ಛನಸಜ್ಝಾಯಂ ವಾ ಕರೋನ್ತಿಯಾ ಚಙ್ಕಮನೇ ನಿವತ್ತನಗಣನಾಯ, ಠಾನಾದೀಸು ಪಯೋಗಗಣನಾಯ, ಉದ್ದೇಸಾದೀಸು ಪದಗಣನಾಯ ಪಾಚಿತ್ತಿಯಂ।
Tatiye aphāsunti ‘‘iminā imissā aphāsu bhavissatī’’ti anāpucchā purato caṅkamanaṭṭhānanissajjādayo vā uddisauddisāpanaparipucchanasajjhāyaṃ vā karontiyā caṅkamane nivattanagaṇanāya, ṭhānādīsu payogagaṇanāya, uddesādīsu padagaṇanāya pācittiyaṃ.
ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಸಞ್ಚಿಚ್ಚ ಅಫಾಸುಕರಣವತ್ಥುಸ್ಮಿಂ ಪಞ್ಞತ್ತಂ, ತಿಕಪಾಚಿತ್ತಿಯಂ, ಅನುಪಸಮ್ಪನ್ನಾಯ ತಿಕದುಕ್ಕಟಂ, ನ ಅಫಾಸುಕಾಮತಾಯ, ಆಪುಚ್ಛಾ ಪುರತೋ ಚಙ್ಕಮನಾದೀನಿ ಕರೋನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಉಪಸಮ್ಪನ್ನತಾ, ಅಫಾಸುಕಾಮತಾ, ಅಫಾಸುಕರಣಂ, ಅನಾಪುಚ್ಛನನ್ತಿ ಇಮಾನೇತ್ಥ ಚತ್ತಾರಿ ಅಙ್ಗಾನಿ। ಸಮುಟ್ಠಾನಾದೀನಿ ಅದಿನ್ನಾದಾನಸದಿಸಾನಿ, ಇದಂ ಪನ ಕಿರಿಯಾಕಿರಿಯಂ, ದುಕ್ಖವೇದನನ್ತಿ।
Sāvatthiyaṃ thullanandaṃ ārabbha sañcicca aphāsukaraṇavatthusmiṃ paññattaṃ, tikapācittiyaṃ, anupasampannāya tikadukkaṭaṃ, na aphāsukāmatāya, āpucchā purato caṅkamanādīni karontiyā, ummattikādīnañca anāpatti. Upasampannatā, aphāsukāmatā, aphāsukaraṇaṃ, anāpucchananti imānettha cattāri aṅgāni. Samuṭṭhānādīni adinnādānasadisāni, idaṃ pana kiriyākiriyaṃ, dukkhavedananti.
ಅಫಾಸುಕರಣಸಿಕ್ಖಾಪದವಣ್ಣನಾ ನಿಟ್ಠಿತಾ।
Aphāsukaraṇasikkhāpadavaṇṇanā niṭṭhitā.
೪. ನಉಪಟ್ಠಾಪನಸಿಕ್ಖಾಪದವಣ್ಣನಾ
4. Naupaṭṭhāpanasikkhāpadavaṇṇanā
ಚತುತ್ಥೇ ದುಕ್ಖಿತನ್ತಿ ಗಿಲಾನಂ। ಸಹಜೀವಿನಿನ್ತಿ ಸದ್ಧಿವಿಹಾರಿನಿಂ। ನೇವ ಉಪಟ್ಠಹೇಯ್ಯಾತಿ ತಸ್ಸಾ ಉಪಟ್ಠಾನಂ ಸಯಂ ವಾ ಅಕರೋನ್ತಿಯಾ, ಪರೇಹಿ ವಾ ಅಕಾರೇನ್ತಿಯಾ ಧುರಂ ನಿಕ್ಖಿತ್ತಮತ್ತೇ ಪಾಚಿತ್ತಿಯಂ।
Catutthe dukkhitanti gilānaṃ. Sahajīvininti saddhivihāriniṃ. Neva upaṭṭhaheyyāti tassā upaṭṭhānaṃ sayaṃ vā akarontiyā, parehi vā akārentiyā dhuraṃ nikkhittamatte pācittiyaṃ.
ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ದುಕ್ಖಿತಂ ಸಹಜೀವಿನಿಂ ಅನುಪಟ್ಠಾನವತ್ಥುಸ್ಮಿಂ ಪಞ್ಞತ್ತಂ, ಅನ್ತೇವಾಸಿನಿಯಾ ವಾ ಅನುಪಸಮ್ಪನ್ನಾಯ ವಾ ದುಕ್ಕಟಂ, ದಸಸು ಅಞ್ಞತರನ್ತರಾಯೇ ಸತಿ ಪರಿಯೇಸಿತ್ವಾ ಅಲಭನ್ತಿಯಾ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಗಿಲಾನತಾ, ಸದ್ಧಿವಿಹಾರಿತಾ, ಅನುಞ್ಞಾತಕಾರಣಾಭಾವೋ, ಉಪಟ್ಠಾನೇ ಧುರನಿಕ್ಖೇಪೋತಿ ಇಮಾನೇತ್ಥ ಚತ್ತಾರಿ ಅಙ್ಗಾನಿ। ಸಮುಟ್ಠಾನಾದೀನಿ ಸಮನುಭಾಸನಸದಿಸಾನೀತಿ।
Sāvatthiyaṃ thullanandaṃ ārabbha dukkhitaṃ sahajīviniṃ anupaṭṭhānavatthusmiṃ paññattaṃ, antevāsiniyā vā anupasampannāya vā dukkaṭaṃ, dasasu aññatarantarāye sati pariyesitvā alabhantiyā, gilānāya, āpadāsu, ummattikādīnañca anāpatti. Gilānatā, saddhivihāritā, anuññātakāraṇābhāvo, upaṭṭhāne dhuranikkhepoti imānettha cattāri aṅgāni. Samuṭṭhānādīni samanubhāsanasadisānīti.
ನಉಪಟ್ಠಾಪನಸಿಕ್ಖಾಪದವಣ್ಣನಾ ನಿಟ್ಠಿತಾ।
Naupaṭṭhāpanasikkhāpadavaṇṇanā niṭṭhitā.
೫. ನಿಕ್ಕಡ್ಢನಸಿಕ್ಖಾಪದವಣ್ಣನಾ
5. Nikkaḍḍhanasikkhāpadavaṇṇanā
ಪಞ್ಚಮೇ ಉಪಸ್ಸಯಂ ದತ್ವಾತಿ ಸಕವಾಟಬದ್ಧಂ ಅತ್ತನೋ ಪುಗ್ಗಲಿಕವಿಹಾರಂ ದತ್ವಾ। ನಿಕ್ಕಡ್ಢೇಯ್ಯಾತಿ ಬಹೂನಿಪಿ ದ್ವಾರಾನಿ ಏಕಪ್ಪಯೋಗೇನ ನಿಕ್ಕಡ್ಢೇನ್ತಿಯಾ ಏಕಾ ಆಪತ್ತಿ, ನಾನಾಪಯೋಗೇಹಿ ಪಯೋಗಗಣನಾಯ ಆಪತ್ತಿಯೋ, ಆಣತ್ತಿಯಮ್ಪಿ ಏಸೇವ ನಯೋ। ಸಚೇ ಪನ ‘‘ಇಮಞ್ಚಿಮಞ್ಚ ದ್ವಾರಂ ಅತಿಕ್ಕಾಮೇಹೀ’’ತಿ ಆಣಾಪೇತಿ, ಏಕಾಯ ಆಣತ್ತಿಯಾ ಏವ ದ್ವಾರಗಣನಾಯ ಆಪತ್ತಿಯೋ।
Pañcame upassayaṃ datvāti sakavāṭabaddhaṃ attano puggalikavihāraṃ datvā. Nikkaḍḍheyyāti bahūnipi dvārāni ekappayogena nikkaḍḍhentiyā ekā āpatti, nānāpayogehi payogagaṇanāya āpattiyo, āṇattiyampi eseva nayo. Sace pana ‘‘imañcimañca dvāraṃ atikkāmehī’’ti āṇāpeti, ekāya āṇattiyā eva dvāragaṇanāya āpattiyo.
ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಏತಾದಿಸೇ ವತ್ಥುಸ್ಮಿಂ ಪಞ್ಞತ್ತಂ, ತಿಕಪಾಚಿತ್ತಿಯಂ, ಅಕವಾಟಬದ್ಧತೋ ದುಕ್ಕಟಂ, ಅನುಪಸಮ್ಪನ್ನಾಯ ತಿಕದುಕ್ಕಟಂ, ಸಕವಾಟಬದ್ಧತೋ ವಾ ಅಕವಾಟಬದ್ಧತೋ ವಾ ಉಭಿನ್ನಮ್ಪಿ ಪರಿಕ್ಖಾರನಿಕ್ಕಡ್ಢನೇ ದುಕ್ಕಟಮೇವ, ಸೇಸಂ ಸಙ್ಘಿಕವಿಹಾರನಿಕ್ಕಡ್ಢನಸಿಕ್ಖಾಪದೇ ವುತ್ತನಯಮೇವಾತಿ।
Sāvatthiyaṃ thullanandaṃ ārabbha etādise vatthusmiṃ paññattaṃ, tikapācittiyaṃ, akavāṭabaddhato dukkaṭaṃ, anupasampannāya tikadukkaṭaṃ, sakavāṭabaddhato vā akavāṭabaddhato vā ubhinnampi parikkhāranikkaḍḍhane dukkaṭameva, sesaṃ saṅghikavihāranikkaḍḍhanasikkhāpade vuttanayamevāti.
ನಿಕ್ಕಡ್ಢನಸಿಕ್ಖಾಪದವಣ್ಣನಾ ನಿಟ್ಠಿತಾ।
Nikkaḍḍhanasikkhāpadavaṇṇanā niṭṭhitā.
೬. ಸಂಸಟ್ಠಸಿಕ್ಖಾಪದವಣ್ಣನಾ
6. Saṃsaṭṭhasikkhāpadavaṇṇanā
ಛಟ್ಠಂ ಉತ್ತಾನಪದತ್ಥಮೇವ। ಸಾವತ್ಥಿಯಂ ಚಣ್ಡಕಾಳಿಂ ಆರಬ್ಭ ಸಂಸಟ್ಠವಿಹಾರವತ್ಥುಸ್ಮಿಂ ಪಞ್ಞತ್ತಂ, ಸೇಸಮೇತ್ಥ ಪಠಮಅರಿಟ್ಠಸಿಕ್ಖಾಪದೇ ವುತ್ತವಿನಿಚ್ಛಯಸದಿಸಮೇವಾತಿ।
Chaṭṭhaṃ uttānapadatthameva. Sāvatthiyaṃ caṇḍakāḷiṃ ārabbha saṃsaṭṭhavihāravatthusmiṃ paññattaṃ, sesamettha paṭhamaariṭṭhasikkhāpade vuttavinicchayasadisamevāti.
ಸಂಸಟ್ಠಸಿಕ್ಖಾಪದವಣ್ಣನಾ ನಿಟ್ಠಿತಾ।
Saṃsaṭṭhasikkhāpadavaṇṇanā niṭṭhitā.
೭. ಅನ್ತೋರಟ್ಠಸಿಕ್ಖಾಪದವಣ್ಣನಾ
7. Antoraṭṭhasikkhāpadavaṇṇanā
ಸತ್ತಮೇ ಅನ್ತೋರಟ್ಠೇತಿ ಯಸ್ಸ ವಿಜಿತೇ ವಿಹರತಿ, ತಸ್ಸ ರಟ್ಠೇ। ಅಸತ್ಥಿಕಾ ಚಾರಿಕನ್ತಿ ವಿನಾ ಸತ್ಥೇನ ಗಚ್ಛನ್ತಿಯಾ, ಗಾಮನ್ತರಗಣನಾಯ, ಅಗಾಮಕೇ ಅರಞ್ಞೇ ಅದ್ಧಯೋಜನಗಣನಾಯ ಪಾಚಿತ್ತಿಯಂ।
Sattame antoraṭṭheti yassa vijite viharati, tassa raṭṭhe. Asatthikā cārikanti vinā satthena gacchantiyā, gāmantaragaṇanāya, agāmake araññe addhayojanagaṇanāya pācittiyaṃ.
ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ವುತ್ತನಯೇನೇವ ದೇಸಚಾರಿಕಂ ಪಕ್ಕಮನವತ್ಥುಸ್ಮಿಂ ಪಞ್ಞತ್ತಂ। ಸತ್ಥೇನ ಸಹ ಗಚ್ಛನ್ತಿಯಾ, ಖೇಮೇ ಅಪ್ಪಟಿಭಯೇ, ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಅನ್ತೋರಟ್ಠತಾ, ಅಖೇಮತಾ, ಅನುಞ್ಞಾತಕಾರಣಾಭಾವೋ, ಚಾರಿಕಂ ಪಕ್ಕಮನನ್ತಿ ಇಮಾನೇತ್ಥ ಚತ್ತಾರಿ ಅಙ್ಗಾನಿ। ಸಮುಟ್ಠಾನಾದೀನಿ ಏಳಕಲೋಮಸದಿಸಾನೀತಿ।
Sāvatthiyaṃ sambahulā bhikkhuniyo ārabbha vuttanayeneva desacārikaṃ pakkamanavatthusmiṃ paññattaṃ. Satthena saha gacchantiyā, kheme appaṭibhaye, āpadāsu, ummattikādīnañca anāpatti. Antoraṭṭhatā, akhematā, anuññātakāraṇābhāvo, cārikaṃ pakkamananti imānettha cattāri aṅgāni. Samuṭṭhānādīni eḷakalomasadisānīti.
ಅನ್ತೋರಟ್ಠಸಿಕ್ಖಾಪದವಣ್ಣನಾ ನಿಟ್ಠಿತಾ।
Antoraṭṭhasikkhāpadavaṇṇanā niṭṭhitā.
೮. ತಿರೋರಟ್ಠಸಿಕ್ಖಾಪದವಣ್ಣನಾ
8. Tiroraṭṭhasikkhāpadavaṇṇanā
ಅಟ್ಠಮೇ ತಿರೋರಟ್ಠೇತಿ ಯಸ್ಸ ವಿಜಿತೇ ವಿಹರತಿ, ತಂ ಠಪೇತ್ವಾ ಅಞ್ಞಸ್ಸ ರಟ್ಠೇ। ಸೇಸಂ ಸತ್ತಮೇ ವುತ್ತನಯೇನೇವ ವೇದಿತಬ್ಬಂ, ನಗರಂ ಪನೇತ್ಥ ರಾಜಗಹನ್ತಿ।
Aṭṭhame tiroraṭṭheti yassa vijite viharati, taṃ ṭhapetvā aññassa raṭṭhe. Sesaṃ sattame vuttanayeneva veditabbaṃ, nagaraṃ panettha rājagahanti.
ತಿರೋರಟ್ಠಸಿಕ್ಖಾಪದವಣ್ಣನಾ ನಿಟ್ಠಿತಾ।
Tiroraṭṭhasikkhāpadavaṇṇanā niṭṭhitā.
೯. ಅನ್ತೋವಸ್ಸಸಿಕ್ಖಾಪದವಣ್ಣನಾ
9. Antovassasikkhāpadavaṇṇanā
ನವಮೇ ಅನ್ತೋವಸ್ಸನ್ತಿ ಪುರಿಮಂ ವಾ ತೇಮಾಸಂ, ಪಚ್ಛಿಮಂ ವಾ ತೇಮಾಸಂ ಅವಸಿತ್ವಾ ತಸ್ಸ ವಸ್ಸಸ್ಸ ಅನ್ತೋಯೇವ। ಇಧ ಸತ್ತಾಹಕರಣೀಯೇನ ವಾ ಕೇನಚಿ ಉಬ್ಬಳ್ಹಾಯ ವಾ ಆಪದಾಸು ವಾ ಗಚ್ಛನ್ತಿಯಾ ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಸೇಸಂ ಅಟ್ಠಮಸದಿಸಮೇವಾತಿ।
Navame antovassanti purimaṃ vā temāsaṃ, pacchimaṃ vā temāsaṃ avasitvā tassa vassassa antoyeva. Idha sattāhakaraṇīyena vā kenaci ubbaḷhāya vā āpadāsu vā gacchantiyā ummattikādīnañca anāpatti. Sesaṃ aṭṭhamasadisamevāti.
ಅನ್ತೋವಸ್ಸಸಿಕ್ಖಾಪದವಣ್ಣನಾ ನಿಟ್ಠಿತಾ।
Antovassasikkhāpadavaṇṇanā niṭṭhitā.
೧೦. ಚಾರಿಕನಪಕ್ಕಮನಸಿಕ್ಖಾಪದವಣ್ಣನಾ
10. Cārikanapakkamanasikkhāpadavaṇṇanā
ದಸಮೇ ವಸ್ಸಂವುಟ್ಠಾತಿ ಪುರಿಮಂ ವಾ ತೇಮಾಸಂ, ಪಚ್ಛಿಮಂ ವಾ ತೇಮಾಸಂ ವುಟ್ಠಾ। ಛಪ್ಪಞ್ಚಯೋಜನಾನೀತಿ ಏತ್ಥ ಪವಾರೇತ್ವಾ ಪಞ್ಚ ಯೋಜನಾನಿ ಗನ್ತುಮ್ಪಿ ವಟ್ಟತಿ, ಛಸು ವತ್ತಬ್ಬಮೇವ ನತ್ಥಿ। ಸಚೇ ಪನ ತೀಣಿ ಗನ್ತ್ವಾ ತೇನೇವ ಮಗ್ಗೇನ ಪಚ್ಚಾಗಚ್ಛತಿ, ನ ವಟ್ಟತಿ, ಅಞ್ಞೇನ ಆಗನ್ತುಂ ವಟ್ಟತಿ। ‘‘ವುತ್ತಪ್ಪಮಾಣಂ ಅದ್ಧಾನಂ ನ ಗಚ್ಛಿಸ್ಸಾಮೀ’’ತಿ ಧುರೇ ನಿಕ್ಖಿತ್ತಮತ್ತೇ ಪಾಚಿತ್ತಿಯಂ।
Dasame vassaṃvuṭṭhāti purimaṃ vā temāsaṃ, pacchimaṃ vā temāsaṃ vuṭṭhā. Chappañcayojanānīti ettha pavāretvā pañca yojanāni gantumpi vaṭṭati, chasu vattabbameva natthi. Sace pana tīṇi gantvā teneva maggena paccāgacchati, na vaṭṭati, aññena āgantuṃ vaṭṭati. ‘‘Vuttappamāṇaṃ addhānaṃ na gacchissāmī’’ti dhure nikkhittamatte pācittiyaṃ.
ರಾಜಗಹೇ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ವಸ್ಸಂ ವಸಿತ್ವಾ ಚಾರಿಕಂ ಅಪಕ್ಕಮನವತ್ಥುಸ್ಮಿಂ ಪಞ್ಞತ್ತಂ। ಅನ್ತರಾಯೇ ಸತಿ, ಪರಿಯೇಸಿತ್ವಾ ದುತಿಯಿಕಂ ಭಿಕ್ಖುನಿಂ ಅಲಭನ್ತಿಯಾ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ವಸ್ಸಂವುಟ್ಠತಾ, ಅನುಞ್ಞಾತಕಾರಣಾಭಾವೋ, ಪಞ್ಚಯೋಜನಾನತಿಕ್ಕಮೋತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಪಠಮಪಾರಾಜಿಕಸದಿಸಾನಿ, ಇದಂ ಪನ ಅಕಿರಿಯಂ, ದುಕ್ಖವೇದನನ್ತಿ।
Rājagahe sambahulā bhikkhuniyo ārabbha vassaṃ vasitvā cārikaṃ apakkamanavatthusmiṃ paññattaṃ. Antarāye sati, pariyesitvā dutiyikaṃ bhikkhuniṃ alabhantiyā, gilānāya, āpadāsu, ummattikādīnañca anāpatti. Vassaṃvuṭṭhatā, anuññātakāraṇābhāvo, pañcayojanānatikkamoti imānettha tīṇi aṅgāni. Samuṭṭhānādīni paṭhamapārājikasadisāni, idaṃ pana akiriyaṃ, dukkhavedananti.
ಚಾರಿಕನಪಕ್ಕಮನಸಿಕ್ಖಾಪದವಣ್ಣನಾ ನಿಟ್ಠಿತಾ।
Cārikanapakkamanasikkhāpadavaṇṇanā niṭṭhitā.
ತುವಟ್ಟವಗ್ಗೋ ಚತುತ್ಥೋ।
Tuvaṭṭavaggo catuttho.
