| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
উব্বাহিকৰগ্গৰণ্ণনা
Ubbāhikavaggavaṇṇanā
৪৫৫. উব্বাহিকৰগ্গে অত্থকুসলোতিআদিপদানং ভেদনিস্সিতসমাসং দস্সেন্তো আহ ‘‘অট্ঠকথাকুসলো’’তিআদি। আচরিযমুখতোতি আচরিযৰদনতো, আচরিযসম্মুখে ৰা, সিথিলধনিতাদীতি আদিসদ্দেন দীঘরস্সাদীনি (পরি॰ অট্ঠ॰ ৪৮৫; ৰি॰ সঙ্গ॰ অট্ঠ॰ ২৫২) সঙ্গণ্হাতি। অক্খরপরিচ্ছেদেতি এত্তকো সিথিলো, এত্তকো ধনিতোতিআদিনা অক্খরপরিচ্ছেদে। ইমিনা ব্যঞ্জনকুসলোতি এত্থ ব্যঞ্জনসদ্দো অক্খরপরিযাযোতি দস্সেতি। ন পুব্বাপরকুসলোতি এত্থ পুব্বাপরো নাম পুরিমানং চতুন্নঞ্চেৰ কথায চ পুব্বাপরোতি আহ ‘‘অত্থপুব্বাপরে’’তিআদি।
455. Ubbāhikavagge atthakusalotiādipadānaṃ bhedanissitasamāsaṃ dassento āha ‘‘aṭṭhakathākusalo’’tiādi. Ācariyamukhatoti ācariyavadanato, ācariyasammukhe vā, sithiladhanitādīti ādisaddena dīgharassādīni (pari. aṭṭha. 485; vi. saṅga. aṭṭha. 252) saṅgaṇhāti. Akkharaparicchedeti ettako sithilo, ettako dhanitotiādinā akkharaparicchede. Iminā byañjanakusaloti ettha byañjanasaddo akkharapariyāyoti dasseti. Na pubbāparakusaloti ettha pubbāparo nāma purimānaṃ catunnañceva kathāya ca pubbāparoti āha ‘‘atthapubbāpare’’tiādi.
কোধনোতিআদীনি ৰুত্তানীতি সম্বন্ধো। যস্মা ন সক্কোতীতি যোজনা। পসারেতাতি এত্থ সরধাতু উপসগ্গৰসেন ৰেচিত্তৰাচকোতি আহ ‘‘মোহেতা’’তি।
Kodhanotiādīni vuttānīti sambandho. Yasmā na sakkotīti yojanā. Pasāretāti ettha saradhātu upasaggavasena vecittavācakoti āha ‘‘mohetā’’ti.
ইতি উব্বাহিকৰগ্গৰণ্ণনায যোজনা সমত্তা।
Iti ubbāhikavaggavaṇṇanāya yojanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৯. উব্বাহিকৰগ্গো • 9. Ubbāhikavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / উব্বাহিকৰগ্গৰণ্ণনা • Ubbāhikavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / উব্বাহিকৰগ্গৰণ্ণনা • Ubbāhikavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৰোহারৰগ্গাদিৰণ্ণনা • Vohāravaggādivaṇṇanā
