| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
அஸாதா⁴ரணபாராஜிகங்
Asādhāraṇapārājikaṃ
5. உப்³ப⁴ஜாணுமண்ட³லஸிக்கா²பத³வண்ணனா
5. Ubbhajāṇumaṇḍalasikkhāpadavaṇṇanā
உப்³ப⁴கப்பரந்தி து³தியமஹாஸந்தி⁴தோ உத்³த⁴ங். இதோ சிதோ ச ஸஞ்சரணந்தி ஹத்த²ஸ்ஸ வா காயஸ்ஸ வா திரியங் இதோ சிதோ ச ஸஞ்சரணங்.
Ubbhakapparanti dutiyamahāsandhito uddhaṃ. Ito cito ca sañcaraṇanti hatthassa vā kāyassa vā tiriyaṃ ito cito ca sañcaraṇaṃ.
ஏகதோஅவஸ்ஸுதேதி (பாசி॰ அட்ட²॰ 662) பி⁴க்கு²னியா அவஸ்ஸவே, பி⁴க்கு²னியா காயஸங்ஸக்³க³ராகே³ன அவஸ்ஸுதபா⁴வே ஸதீதி அத்தோ². பி⁴க்கு²னியா வஸேனேவ ச ஏகதோஅவஸ்ஸுதபா⁴வோ க³ஹேதப்³போ³. வுத்தஞ்ஹேதங் ஸமந்தபாஸாதி³காயங் (பாசி॰ அட்ட²॰ 662) –
Ekatoavassuteti (pāci. aṭṭha. 662) bhikkhuniyā avassave, bhikkhuniyā kāyasaṃsaggarāgena avassutabhāve satīti attho. Bhikkhuniyā vaseneva ca ekatoavassutabhāvo gahetabbo. Vuttañhetaṃ samantapāsādikāyaṃ (pāci. aṭṭha. 662) –
‘‘ஏகதோஅவஸ்ஸுதேதி எத்த² கிஞ்சாபி ‘ஏகதோ’தி அவிஸேஸேன வுத்தங், ததா²பி பி⁴க்கு²னியா ஏவ அவஸ்ஸுதே ஸதி அயங் ஆபத்திபே⁴தோ³ வுத்தோதி வேதி³தப்³போ³’’தி.
‘‘Ekatoavassuteti ettha kiñcāpi ‘ekato’ti avisesena vuttaṃ, tathāpi bhikkhuniyā eva avassute sati ayaṃ āpattibhedo vuttoti veditabbo’’ti.
புரிஸஸ்ஸ காயந்தி புரிஸஸ்ஸ யங் கஞ்சி காயங். உப⁴தோஅவஸ்ஸுதேபீதி பி⁴க்கு²னியா சேவ புரிஸஸ்ஸ ச காயஸங்ஸக்³க³ராகே³ன அவஸ்ஸுதபா⁴வே ஸதிபி. காயேனாதி யதா²பரிச்சி²ன்னேன அத்தனோ காயேன. காயப்படிப³த்³த⁴ந்தி புரிஸஸ்ஸ காயப்படிப³த்³த⁴ங். அவஸேஸகாயேன வாதி யதா²பரிச்சி²ன்னகாயதோ அவஸேஸேன காயேன, உப்³ப⁴க்க²கஅதோ⁴ஜாணுமண்ட³லஅதோ⁴கப்பரஸங்கா²தேன காயேனாதி வுத்தங் ஹோதி. தஸ்ஸ காயந்தி அவஸ்ஸுதஸ்ஸ தஸ்ஸ புரிஸஸ்ஸ யங் கஞ்சி காயங். யதா² செத்த² ஸயங் ஆமஸந்தியா து²ல்லச்சயங், ஏவங் தஸ்ஸ ஆமஸனங் ஸாதி³யந்தியாபீதி த³ட்ட²ப்³ப³ங். புரிஸஸ்ஸ காயஸங்ஸக்³க³ராகோ³ நத்தீ²தி புரிஸஸ்ஸ மேது²னராகோ³, கே³ஹஸிதபேமங், ஸுத்³த⁴சித்தங் வா. அவஸேஸேதி பாராஜிககெ²த்ததோ அவஸேஸே. காயப்படிப³த்³தே⁴ன காயப்படிப³த்³தா⁴தி³பே⁴தே³தி ‘‘காயப்படிப³த்³தே⁴ன காயப்படிப³த்³த⁴ங் ஆமஸதி, ஆபத்தி து³க்கடஸ்ஸா’’திஆதி³கே (பாசி॰ 659, 662) ஸப்³ப³வாரே. ‘‘அஸஞ்சிச்சா’’திஆதீ³ஸு விரஜ்ஜி²த்வா வா ஆமஸந்தியா, அஞ்ஞவிஹிதாய வா, ‘‘அயங் புரிஸோ’’தி வா ‘‘இத்தீ²’’தி வா அஜானந்தியா வா, தேன பு²ட்டா²யபி தங் ப²ஸ்ஸங் அஸ்ஸாத³யந்தியா வா ஆமஸனேபி ஸதி அனாபத்தி.
Purisassa kāyanti purisassa yaṃ kañci kāyaṃ. Ubhatoavassutepīti bhikkhuniyā ceva purisassa ca kāyasaṃsaggarāgena avassutabhāve satipi. Kāyenāti yathāparicchinnena attano kāyena. Kāyappaṭibaddhanti purisassa kāyappaṭibaddhaṃ. Avasesakāyena vāti yathāparicchinnakāyato avasesena kāyena, ubbhakkhakaadhojāṇumaṇḍalaadhokapparasaṅkhātena kāyenāti vuttaṃ hoti. Tassa kāyanti avassutassa tassa purisassa yaṃ kañci kāyaṃ. Yathā cettha sayaṃ āmasantiyā thullaccayaṃ, evaṃ tassa āmasanaṃ sādiyantiyāpīti daṭṭhabbaṃ. Purisassa kāyasaṃsaggarāgo natthīti purisassa methunarāgo, gehasitapemaṃ, suddhacittaṃ vā. Avaseseti pārājikakhettato avasese. Kāyappaṭibaddhena kāyappaṭibaddhādibhedeti ‘‘kāyappaṭibaddhena kāyappaṭibaddhaṃ āmasati, āpatti dukkaṭassā’’tiādike (pāci. 659, 662) sabbavāre. ‘‘Asañciccā’’tiādīsu virajjhitvā vā āmasantiyā, aññavihitāya vā, ‘‘ayaṃ puriso’’ti vā ‘‘itthī’’ti vā ajānantiyā vā, tena phuṭṭhāyapi taṃ phassaṃ assādayantiyā vā āmasanepi sati anāpatti.
உப்³ப⁴ஜாணுமண்ட³லஸிக்கா²பத³வண்ணனா நிட்டி²தா.
Ubbhajāṇumaṇḍalasikkhāpadavaṇṇanā niṭṭhitā.
