| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
অসাধারণপারাজিকং
Asādhāraṇapārājikaṃ
৫. উব্ভজাণুমণ্ডলসিক্খাপদৰণ্ণনা
5. Ubbhajāṇumaṇḍalasikkhāpadavaṇṇanā
উব্ভকপ্পরন্তি দুতিযমহাসন্ধিতো উদ্ধং। ইতো চিতো চ সঞ্চরণন্তি হত্থস্স ৰা কাযস্স ৰা তিরিযং ইতো চিতো চ সঞ্চরণং।
Ubbhakapparanti dutiyamahāsandhito uddhaṃ. Ito cito ca sañcaraṇanti hatthassa vā kāyassa vā tiriyaṃ ito cito ca sañcaraṇaṃ.
একতোঅৰস্সুতেতি (পাচি॰ অট্ঠ॰ ৬৬২) ভিক্খুনিযা অৰস্সৰে, ভিক্খুনিযা কাযসংসগ্গরাগেন অৰস্সুতভাৰে সতীতি অত্থো। ভিক্খুনিযা ৰসেনেৰ চ একতোঅৰস্সুতভাৰো গহেতব্বো। ৰুত্তঞ্হেতং সমন্তপাসাদিকাযং (পাচি॰ অট্ঠ॰ ৬৬২) –
Ekatoavassuteti (pāci. aṭṭha. 662) bhikkhuniyā avassave, bhikkhuniyā kāyasaṃsaggarāgena avassutabhāve satīti attho. Bhikkhuniyā vaseneva ca ekatoavassutabhāvo gahetabbo. Vuttañhetaṃ samantapāsādikāyaṃ (pāci. aṭṭha. 662) –
‘‘একতোঅৰস্সুতেতি এত্থ কিঞ্চাপি ‘একতো’তি অৰিসেসেন ৰুত্তং, তথাপি ভিক্খুনিযা এৰ অৰস্সুতে সতি অযং আপত্তিভেদো ৰুত্তোতি ৰেদিতব্বো’’তি।
‘‘Ekatoavassuteti ettha kiñcāpi ‘ekato’ti avisesena vuttaṃ, tathāpi bhikkhuniyā eva avassute sati ayaṃ āpattibhedo vuttoti veditabbo’’ti.
পুরিসস্স কাযন্তি পুরিসস্স যং কঞ্চি কাযং। উভতোঅৰস্সুতেপীতি ভিক্খুনিযা চেৰ পুরিসস্স চ কাযসংসগ্গরাগেন অৰস্সুতভাৰে সতিপি। কাযেনাতি যথাপরিচ্ছিন্নেন অত্তনো কাযেন। কাযপ্পটিবদ্ধন্তি পুরিসস্স কাযপ্পটিবদ্ধং। অৰসেসকাযেন ৰাতি যথাপরিচ্ছিন্নকাযতো অৰসেসেন কাযেন, উব্ভক্খকঅধোজাণুমণ্ডলঅধোকপ্পরসঙ্খাতেন কাযেনাতি ৰুত্তং হোতি। তস্স কাযন্তি অৰস্সুতস্স তস্স পুরিসস্স যং কঞ্চি কাযং। যথা চেত্থ সযং আমসন্তিযা থুল্লচ্চযং, এৰং তস্স আমসনং সাদিযন্তিযাপীতি দট্ঠব্বং। পুরিসস্স কাযসংসগ্গরাগো নত্থীতি পুরিসস্স মেথুনরাগো, গেহসিতপেমং, সুদ্ধচিত্তং ৰা। অৰসেসেতি পারাজিকখেত্ততো অৰসেসে। কাযপ্পটিবদ্ধেন কাযপ্পটিবদ্ধাদিভেদেতি ‘‘কাযপ্পটিবদ্ধেন কাযপ্পটিবদ্ধং আমসতি, আপত্তি দুক্কটস্সা’’তিআদিকে (পাচি॰ ৬৫৯, ৬৬২) সব্বৰারে। ‘‘অসঞ্চিচ্চা’’তিআদীসু ৰিরজ্ঝিত্ৰা ৰা আমসন্তিযা, অঞ্ঞৰিহিতায ৰা, ‘‘অযং পুরিসো’’তি ৰা ‘‘ইত্থী’’তি ৰা অজানন্তিযা ৰা, তেন ফুট্ঠাযপি তং ফস্সং অস্সাদযন্তিযা ৰা আমসনেপি সতি অনাপত্তি।
Purisassa kāyanti purisassa yaṃ kañci kāyaṃ. Ubhatoavassutepīti bhikkhuniyā ceva purisassa ca kāyasaṃsaggarāgena avassutabhāve satipi. Kāyenāti yathāparicchinnena attano kāyena. Kāyappaṭibaddhanti purisassa kāyappaṭibaddhaṃ. Avasesakāyena vāti yathāparicchinnakāyato avasesena kāyena, ubbhakkhakaadhojāṇumaṇḍalaadhokapparasaṅkhātena kāyenāti vuttaṃ hoti. Tassa kāyanti avassutassa tassa purisassa yaṃ kañci kāyaṃ. Yathā cettha sayaṃ āmasantiyā thullaccayaṃ, evaṃ tassa āmasanaṃ sādiyantiyāpīti daṭṭhabbaṃ. Purisassa kāyasaṃsaggarāgo natthīti purisassa methunarāgo, gehasitapemaṃ, suddhacittaṃ vā. Avaseseti pārājikakhettato avasese. Kāyappaṭibaddhena kāyappaṭibaddhādibhedeti ‘‘kāyappaṭibaddhena kāyappaṭibaddhaṃ āmasati, āpatti dukkaṭassā’’tiādike (pāci. 659, 662) sabbavāre. ‘‘Asañciccā’’tiādīsu virajjhitvā vā āmasantiyā, aññavihitāya vā, ‘‘ayaṃ puriso’’ti vā ‘‘itthī’’ti vā ajānantiyā vā, tena phuṭṭhāyapi taṃ phassaṃ assādayantiyā vā āmasanepi sati anāpatti.
উব্ভজাণুমণ্ডলসিক্খাপদৰণ্ণনা নিট্ঠিতা।
Ubbhajāṇumaṇḍalasikkhāpadavaṇṇanā niṭṭhitā.
