| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
असाधारणपाराजिकं
Asādhāraṇapārājikaṃ
५. उब्भजाणुमण्डलसिक्खापदवण्णना
5. Ubbhajāṇumaṇḍalasikkhāpadavaṇṇanā
उब्भकप्परन्ति दुतियमहासन्धितो उद्धं। इतो चितो च सञ्चरणन्ति हत्थस्स वा कायस्स वा तिरियं इतो चितो च सञ्चरणं।
Ubbhakapparanti dutiyamahāsandhito uddhaṃ. Ito cito ca sañcaraṇanti hatthassa vā kāyassa vā tiriyaṃ ito cito ca sañcaraṇaṃ.
एकतोअवस्सुतेति (पाचि॰ अट्ठ॰ ६६२) भिक्खुनिया अवस्सवे, भिक्खुनिया कायसंसग्गरागेन अवस्सुतभावे सतीति अत्थो। भिक्खुनिया वसेनेव च एकतोअवस्सुतभावो गहेतब्बो। वुत्तञ्हेतं समन्तपासादिकायं (पाचि॰ अट्ठ॰ ६६२) –
Ekatoavassuteti (pāci. aṭṭha. 662) bhikkhuniyā avassave, bhikkhuniyā kāyasaṃsaggarāgena avassutabhāve satīti attho. Bhikkhuniyā vaseneva ca ekatoavassutabhāvo gahetabbo. Vuttañhetaṃ samantapāsādikāyaṃ (pāci. aṭṭha. 662) –
‘‘एकतोअवस्सुतेति एत्थ किञ्चापि ‘एकतो’ति अविसेसेन वुत्तं, तथापि भिक्खुनिया एव अवस्सुते सति अयं आपत्तिभेदो वुत्तोति वेदितब्बो’’ति।
‘‘Ekatoavassuteti ettha kiñcāpi ‘ekato’ti avisesena vuttaṃ, tathāpi bhikkhuniyā eva avassute sati ayaṃ āpattibhedo vuttoti veditabbo’’ti.
पुरिसस्स कायन्ति पुरिसस्स यं कञ्चि कायं। उभतोअवस्सुतेपीति भिक्खुनिया चेव पुरिसस्स च कायसंसग्गरागेन अवस्सुतभावे सतिपि। कायेनाति यथापरिच्छिन्नेन अत्तनो कायेन। कायप्पटिबद्धन्ति पुरिसस्स कायप्पटिबद्धं। अवसेसकायेन वाति यथापरिच्छिन्नकायतो अवसेसेन कायेन, उब्भक्खकअधोजाणुमण्डलअधोकप्परसङ्खातेन कायेनाति वुत्तं होति। तस्स कायन्ति अवस्सुतस्स तस्स पुरिसस्स यं कञ्चि कायं। यथा चेत्थ सयं आमसन्तिया थुल्लच्चयं, एवं तस्स आमसनं सादियन्तियापीति दट्ठब्बं। पुरिसस्स कायसंसग्गरागो नत्थीति पुरिसस्स मेथुनरागो, गेहसितपेमं, सुद्धचित्तं वा। अवसेसेति पाराजिकखेत्ततो अवसेसे। कायप्पटिबद्धेन कायप्पटिबद्धादिभेदेति ‘‘कायप्पटिबद्धेन कायप्पटिबद्धं आमसति, आपत्ति दुक्कटस्सा’’तिआदिके (पाचि॰ ६५९, ६६२) सब्बवारे। ‘‘असञ्चिच्चा’’तिआदीसु विरज्झित्वा वा आमसन्तिया, अञ्ञविहिताय वा, ‘‘अयं पुरिसो’’ति वा ‘‘इत्थी’’ति वा अजानन्तिया वा, तेन फुट्ठायपि तं फस्सं अस्सादयन्तिया वा आमसनेपि सति अनापत्ति।
Purisassa kāyanti purisassa yaṃ kañci kāyaṃ. Ubhatoavassutepīti bhikkhuniyā ceva purisassa ca kāyasaṃsaggarāgena avassutabhāve satipi. Kāyenāti yathāparicchinnena attano kāyena. Kāyappaṭibaddhanti purisassa kāyappaṭibaddhaṃ. Avasesakāyena vāti yathāparicchinnakāyato avasesena kāyena, ubbhakkhakaadhojāṇumaṇḍalaadhokapparasaṅkhātena kāyenāti vuttaṃ hoti. Tassa kāyanti avassutassa tassa purisassa yaṃ kañci kāyaṃ. Yathā cettha sayaṃ āmasantiyā thullaccayaṃ, evaṃ tassa āmasanaṃ sādiyantiyāpīti daṭṭhabbaṃ. Purisassa kāyasaṃsaggarāgo natthīti purisassa methunarāgo, gehasitapemaṃ, suddhacittaṃ vā. Avaseseti pārājikakhettato avasese. Kāyappaṭibaddhena kāyappaṭibaddhādibhedeti ‘‘kāyappaṭibaddhena kāyappaṭibaddhaṃ āmasati, āpatti dukkaṭassā’’tiādike (pāci. 659, 662) sabbavāre. ‘‘Asañciccā’’tiādīsu virajjhitvā vā āmasantiyā, aññavihitāya vā, ‘‘ayaṃ puriso’’ti vā ‘‘itthī’’ti vā ajānantiyā vā, tena phuṭṭhāyapi taṃ phassaṃ assādayantiyā vā āmasanepi sati anāpatti.
उब्भजाणुमण्डलसिक्खापदवण्णना निट्ठिता।
Ubbhajāṇumaṇḍalasikkhāpadavaṇṇanā niṭṭhitā.
