| Library / Tipiṭaka / តិបិដក • Tipiṭaka / កង្ខាវិតរណី-អភិនវ-ដីកា • Kaṅkhāvitaraṇī-abhinava-ṭīkā |
អសាធារណបារាជិកំ
Asādhāraṇapārājikaṃ
៥. ឧព្ភជាណុមណ្ឌលសិក្ខាបទវណ្ណនា
5. Ubbhajāṇumaṇḍalasikkhāpadavaṇṇanā
ឧព្ភកប្បរន្តិ ទុតិយមហាសន្ធិតោ ឧទ្ធំ។ ឥតោ ចិតោ ច សញ្ចរណន្តិ ហត្ថស្ស វា កាយស្ស វា តិរិយំ ឥតោ ចិតោ ច សញ្ចរណំ។
Ubbhakapparanti dutiyamahāsandhito uddhaṃ. Ito cito ca sañcaraṇanti hatthassa vā kāyassa vā tiriyaṃ ito cito ca sañcaraṇaṃ.
ឯកតោអវស្សុតេតិ (បាចិ. អដ្ឋ. ៦៦២) ភិក្ខុនិយា អវស្សវេ, ភិក្ខុនិយា កាយសំសគ្គរាគេន អវស្សុតភាវេ សតីតិ អត្ថោ។ ភិក្ខុនិយា វសេនេវ ច ឯកតោអវស្សុតភាវោ គហេតព្ពោ។ វុត្តញ្ហេតំ សមន្តបាសាទិកាយំ (បាចិ. អដ្ឋ. ៦៦២) –
Ekatoavassuteti (pāci. aṭṭha. 662) bhikkhuniyā avassave, bhikkhuniyā kāyasaṃsaggarāgena avassutabhāve satīti attho. Bhikkhuniyā vaseneva ca ekatoavassutabhāvo gahetabbo. Vuttañhetaṃ samantapāsādikāyaṃ (pāci. aṭṭha. 662) –
‘‘ឯកតោអវស្សុតេតិ ឯត្ថ កិញ្ចាបិ ‘ឯកតោ’តិ អវិសេសេន វុត្តំ, តថាបិ ភិក្ខុនិយា ឯវ អវស្សុតេ សតិ អយំ អាបត្តិភេទោ វុត្តោតិ វេទិតព្ពោ’’តិ។
‘‘Ekatoavassuteti ettha kiñcāpi ‘ekato’ti avisesena vuttaṃ, tathāpi bhikkhuniyā eva avassute sati ayaṃ āpattibhedo vuttoti veditabbo’’ti.
បុរិសស្ស កាយន្តិ បុរិសស្ស យំ កញ្ចិ កាយំ។ ឧភតោអវស្សុតេបីតិ ភិក្ខុនិយា ចេវ បុរិសស្ស ច កាយសំសគ្គរាគេន អវស្សុតភាវេ សតិបិ។ កាយេនាតិ យថាបរិច្ឆិន្នេន អត្តនោ កាយេន។ កាយប្បដិពទ្ធន្តិ បុរិសស្ស កាយប្បដិពទ្ធំ។ អវសេសកាយេន វាតិ យថាបរិច្ឆិន្នកាយតោ អវសេសេន កាយេន, ឧព្ភក្ខកអធោជាណុមណ្ឌលអធោកប្បរសង្ខាតេន កាយេនាតិ វុត្តំ ហោតិ។ តស្ស កាយន្តិ អវស្សុតស្ស តស្ស បុរិសស្ស យំ កញ្ចិ កាយំ។ យថា ចេត្ថ សយំ អាមសន្តិយា ថុល្លច្ចយំ, ឯវំ តស្ស អាមសនំ សាទិយន្តិយាបីតិ ទដ្ឋព្ពំ។ បុរិសស្ស កាយសំសគ្គរាគោ នត្ថីតិ បុរិសស្ស មេថុនរាគោ, គេហសិតបេមំ, សុទ្ធចិត្តំ វា។ អវសេសេតិ បារាជិកខេត្តតោ អវសេសេ។ កាយប្បដិពទ្ធេន កាយប្បដិពទ្ធាទិភេទេតិ ‘‘កាយប្បដិពទ្ធេន កាយប្បដិពទ្ធំ អាមសតិ, អាបត្តិ ទុក្កដស្សា’’តិអាទិកេ (បាចិ. ៦៥៩, ៦៦២) សព្ពវារេ។ ‘‘អសញ្ចិច្ចា’’តិអាទីសុ វិរជ្ឈិត្វា វា អាមសន្តិយា, អញ្ញវិហិតាយ វា, ‘‘អយំ បុរិសោ’’តិ វា ‘‘ឥត្ថី’’តិ វា អជានន្តិយា វា, តេន ផុដ្ឋាយបិ តំ ផស្សំ អស្សាទយន្តិយា វា អាមសនេបិ សតិ អនាបត្តិ។
Purisassa kāyanti purisassa yaṃ kañci kāyaṃ. Ubhatoavassutepīti bhikkhuniyā ceva purisassa ca kāyasaṃsaggarāgena avassutabhāve satipi. Kāyenāti yathāparicchinnena attano kāyena. Kāyappaṭibaddhanti purisassa kāyappaṭibaddhaṃ. Avasesakāyena vāti yathāparicchinnakāyato avasesena kāyena, ubbhakkhakaadhojāṇumaṇḍalaadhokapparasaṅkhātena kāyenāti vuttaṃ hoti. Tassa kāyanti avassutassa tassa purisassa yaṃ kañci kāyaṃ. Yathā cettha sayaṃ āmasantiyā thullaccayaṃ, evaṃ tassa āmasanaṃ sādiyantiyāpīti daṭṭhabbaṃ. Purisassa kāyasaṃsaggarāgo natthīti purisassa methunarāgo, gehasitapemaṃ, suddhacittaṃ vā. Avaseseti pārājikakhettato avasese. Kāyappaṭibaddhena kāyappaṭibaddhādibhedeti ‘‘kāyappaṭibaddhena kāyappaṭibaddhaṃ āmasati, āpatti dukkaṭassā’’tiādike (pāci. 659, 662) sabbavāre. ‘‘Asañciccā’’tiādīsu virajjhitvā vā āmasantiyā, aññavihitāya vā, ‘‘ayaṃ puriso’’ti vā ‘‘itthī’’ti vā ajānantiyā vā, tena phuṭṭhāyapi taṃ phassaṃ assādayantiyā vā āmasanepi sati anāpatti.
ឧព្ភជាណុមណ្ឌលសិក្ខាបទវណ្ណនា និដ្ឋិតា។
Ubbhajāṇumaṇḍalasikkhāpadavaṇṇanā niṭṭhitā.
