| Library / Tipiṭaka / තිපිටක • Tipiṭaka / කඞ්‌ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
අසාධාරණපාරාජිකං
Asādhāraṇapārājikaṃ
5. උබ්‌භජාණුමණ්‌ඩලසික්‌ඛාපදවණ්‌ණනා
5. Ubbhajāṇumaṇḍalasikkhāpadavaṇṇanā
උබ්‌භකප්‌පරන්‌ති දුතියමහාසන්‌ධිතො උද්‌ධං. ඉතො චිතො ච සඤ්‌චරණන්‌ති හත්‌ථස්‌ස වා කායස්‌ස වා තිරියං ඉතො චිතො ච සඤ්‌චරණං.
Ubbhakapparanti dutiyamahāsandhito uddhaṃ. Ito cito ca sañcaraṇanti hatthassa vā kāyassa vā tiriyaṃ ito cito ca sañcaraṇaṃ.
එකතොඅවස්‌සුතෙති (පාචි. අට්‌ඨ. 662) භික්‌ඛුනියා අවස්‌සවෙ, භික්‌ඛුනියා කායසංසග්‌ගරාගෙන අවස්‌සුතභාවෙ සතීති අත්‌ථො. භික්‌ඛුනියා වසෙනෙව ච එකතොඅවස්‌සුතභාවො ගහෙතබ්‌බො. වුත්‌තඤ්‌හෙතං සමන්‌තපාසාදිකායං (පාචි. අට්‌ඨ. 662) –
Ekatoavassuteti (pāci. aṭṭha. 662) bhikkhuniyā avassave, bhikkhuniyā kāyasaṃsaggarāgena avassutabhāve satīti attho. Bhikkhuniyā vaseneva ca ekatoavassutabhāvo gahetabbo. Vuttañhetaṃ samantapāsādikāyaṃ (pāci. aṭṭha. 662) –
‘‘එකතොඅවස්‌සුතෙති එත්‌ථ කිඤ්‌චාපි ‘එකතො’ති අවිසෙසෙන වුත්‌තං, තථාපි භික්‌ඛුනියා එව අවස්‌සුතෙ සති අයං ආපත්‌තිභෙදො වුත්‌තොති වෙදිතබ්‌බො’’ති.
‘‘Ekatoavassuteti ettha kiñcāpi ‘ekato’ti avisesena vuttaṃ, tathāpi bhikkhuniyā eva avassute sati ayaṃ āpattibhedo vuttoti veditabbo’’ti.
පුරිසස්‌ස කායන්‌ති පුරිසස්‌ස යං කඤ්‌චි කායං. උභතොඅවස්‌සුතෙපීති භික්‌ඛුනියා චෙව පුරිසස්‌ස ච කායසංසග්‌ගරාගෙන අවස්‌සුතභාවෙ සතිපි. කායෙනාති යථාපරිච්‌ඡින්‌නෙන අත්‌තනො කායෙන. කායප්‌පටිබද්‌ධන්‌ති පුරිසස්‌ස කායප්‌පටිබද්‌ධං. අවසෙසකායෙන වාති යථාපරිච්‌ඡින්‌නකායතො අවසෙසෙන කායෙන, උබ්‌භක්‌ඛකඅධොජාණුමණ්‌ඩලඅධොකප්‌පරසඞ්‌ඛාතෙන කායෙනාති වුත්‌තං හොති. තස්‌ස කායන්‌ති අවස්‌සුතස්‌ස තස්‌ස පුරිසස්‌ස යං කඤ්‌චි කායං. යථා චෙත්‌ථ සයං ආමසන්‌තියා ථුල්‌ලච්‌චයං, එවං තස්‌ස ආමසනං සාදියන්‌තියාපීති දට්‌ඨබ්‌බං. පුරිසස්‌ස කායසංසග්‌ගරාගො නත්‌ථීති පුරිසස්‌ස මෙථුනරාගො, ගෙහසිතපෙමං, සුද්‌ධචිත්‌තං වා. අවසෙසෙති පාරාජිකඛෙත්‌තතො අවසෙසෙ. කායප්‌පටිබද්‌ධෙන කායප්‌පටිබද්‌ධාදිභෙදෙති ‘‘කායප්‌පටිබද්‌ධෙන කායප්‌පටිබද්‌ධං ආමසති, ආපත්‌ති දුක්‌කටස්‌සා’’තිආදිකෙ (පාචි. 659, 662) සබ්‌බවාරෙ. ‘‘අසඤ්‌චිච්‌චා’’තිආදීසු විරජ්‌ඣිත්‌වා වා ආමසන්‌තියා, අඤ්‌ඤවිහිතාය වා, ‘‘අයං පුරිසො’’ති වා ‘‘ඉත්‌ථී’’ති වා අජානන්‌තියා වා, තෙන ඵුට්‌ඨායපි තං ඵස්‌සං අස්‌සාදයන්‌තියා වා ආමසනෙපි සති අනාපත්‌ති.
Purisassa kāyanti purisassa yaṃ kañci kāyaṃ. Ubhatoavassutepīti bhikkhuniyā ceva purisassa ca kāyasaṃsaggarāgena avassutabhāve satipi. Kāyenāti yathāparicchinnena attano kāyena. Kāyappaṭibaddhanti purisassa kāyappaṭibaddhaṃ. Avasesakāyena vāti yathāparicchinnakāyato avasesena kāyena, ubbhakkhakaadhojāṇumaṇḍalaadhokapparasaṅkhātena kāyenāti vuttaṃ hoti. Tassa kāyanti avassutassa tassa purisassa yaṃ kañci kāyaṃ. Yathā cettha sayaṃ āmasantiyā thullaccayaṃ, evaṃ tassa āmasanaṃ sādiyantiyāpīti daṭṭhabbaṃ. Purisassa kāyasaṃsaggarāgo natthīti purisassa methunarāgo, gehasitapemaṃ, suddhacittaṃ vā. Avaseseti pārājikakhettato avasese. Kāyappaṭibaddhena kāyappaṭibaddhādibhedeti ‘‘kāyappaṭibaddhena kāyappaṭibaddhaṃ āmasati, āpatti dukkaṭassā’’tiādike (pāci. 659, 662) sabbavāre. ‘‘Asañciccā’’tiādīsu virajjhitvā vā āmasantiyā, aññavihitāya vā, ‘‘ayaṃ puriso’’ti vā ‘‘itthī’’ti vā ajānantiyā vā, tena phuṭṭhāyapi taṃ phassaṃ assādayantiyā vā āmasanepi sati anāpatti.
උබ්‌භජාණුමණ්‌ඩලසික්‌ඛාපදවණ්‌ණනා නිට්‌ඨිතා.
Ubbhajāṇumaṇḍalasikkhāpadavaṇṇanā niṭṭhitā.
