| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
4. උභතොභාගවිමුත්‌තසුත්‌තං
4. Ubhatobhāgavimuttasuttaṃ
45. ‘‘‘උභතොභාගවිමුත්‌තො උභතොභාගවිමුත්‌තො’ති, ආවුසො, වුච්‌චති. කිත්‌තාවතා නු ඛො, ආවුසො, උභතොභාගවිමුත්‌තො වුත්‌තො භගවතා’’ති?
45. ‘‘‘Ubhatobhāgavimutto ubhatobhāgavimutto’ti, āvuso, vuccati. Kittāvatā nu kho, āvuso, ubhatobhāgavimutto vutto bhagavatā’’ti?
‘‘ඉධාවුසො, භික්‌ඛු විවිච්‌චෙව කාමෙහි…පෙ.… පඨමං ඣානං උපසම්‌පජ්‌ජ විහරති. යථා යථා ච තදායතනං තථා තථා නං කායෙන ඵුසිත්‌වා විහරති, පඤ්‌ඤාය ච නං පජානාති. එත්‌තාවතාපි ඛො, ආවුසො, උභතොභාගවිමුත්‌තො වුත්‌තො භගවතා පරියායෙන…පෙ.….
‘‘Idhāvuso, bhikkhu vivicceva kāmehi…pe… paṭhamaṃ jhānaṃ upasampajja viharati. Yathā yathā ca tadāyatanaṃ tathā tathā naṃ kāyena phusitvā viharati, paññāya ca naṃ pajānāti. Ettāvatāpi kho, āvuso, ubhatobhāgavimutto vutto bhagavatā pariyāyena…pe….
‘‘පුන චපරං, ආවුසො, භික්‌ඛු සබ්‌බසො නෙවසඤ්‌ඤානාසඤ්‌ඤායතනං සමතික්‌කම්‌ම සඤ්‌ඤාවෙදයිතනිරොධං උපසම්‌පජ්‌ජ විහරති, පඤ්‌ඤාය චස්‌ස දිස්‌වා ආසවා පරික්‌ඛීණා හොන්‌ති. යථා යථා ච තදායතනං තථා තථා නං කායෙන ඵුසිත්‌වා විහරති, පඤ්‌ඤාය ච නං පජානාති. එත්‌තාවතාපි ඛො, ආවුසො, උභතොභාගවිමුත්‌තො වුත්‌තො භගවතා නිප්‌පරියායෙනා’’ති. චතුත්‌ථං.
‘‘Puna caparaṃ, āvuso, bhikkhu sabbaso nevasaññānāsaññāyatanaṃ samatikkamma saññāvedayitanirodhaṃ upasampajja viharati, paññāya cassa disvā āsavā parikkhīṇā honti. Yathā yathā ca tadāyatanaṃ tathā tathā naṃ kāyena phusitvā viharati, paññāya ca naṃ pajānāti. Ettāvatāpi kho, āvuso, ubhatobhāgavimutto vutto bhagavatā nippariyāyenā’’ti. Catutthaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 4. උභතොභාගවිමුත්‌තසුත්‌තවණ්‌ණනා • 4. Ubhatobhāgavimuttasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-10. සම්‌බාධසුත්‌තාදිවණ්‌ණනා • 1-10. Sambādhasuttādivaṇṇanā
