| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೫೪. ಉಭತೋಬ್ಯಞ್ಜನಕವತ್ಥುಕಥಾ
54. Ubhatobyañjanakavatthukathā
೧೧೬. ಉಭತೋಬ್ಯಞ್ಜನಕೋತಿ ಏತ್ಥ ಬಾಹಿರತ್ಥಸಮಾಸಂ ದಸ್ಸೇನ್ತೋ ಆಹ ‘‘ಇತ್ಥಿನಿಮಿತ್ತುಪ್ಪಾದನಕಮ್ಮತೋ ಚಾ’’ತಿಆದಿ। ತತ್ಥ ‘‘ಇತ್ಥಿ…ಪೇ॰… ಕಮ್ಮತೋ ಚಾ’’ತಿ ಇಮಿನಾ ಉಭಯಸರೂಪಂ ದಸ್ಸೇತಿ। ಉಭತೋ ಕಮ್ಮತೋ ಪವತ್ತನ್ತಿ ಪಾಠಸೇಸೋ ಯೋಜೇತಬ್ಬೋ। ಬ್ಯಞ್ಜನನ್ತಿ ನಿಮಿತ್ತಂ। ಅಸ್ಸಾತಿ ಜನಸ್ಸ। ಕರೋತಿಪಿ ಕಾರೇತಿಪೀತಿ ಏತ್ಥ ಕರಧಾತುಯಾ ಸುದ್ಧಕಮ್ಮಕಾರಿತಕಮ್ಮಾನಿ ದಸ್ಸೇನ್ತೋ ಆಹ ‘‘ಪುರಿಸನಿಮಿತ್ತೇನಾ’’ತಿಆದಿ। ತತ್ಥ ‘‘ವೀತಿಕ್ಕಮ’’ನ್ತಿ ಇಮಿನಾ ಸುದ್ಧಕಮ್ಮಂ ದಸ್ಸೇತಿ, ‘‘ಪರ’’ನ್ತಿ ಇಮಿನಾ ಕಾರಿತಕಮ್ಮಂ ದಸ್ಸೇತಿ। ಸಮಾದಪೇತ್ವಾತಿ ಉಯ್ಯೋಜೇತ್ವಾ। ತಸ್ಸ ದುವಿಧಭಾವಂ ದಸ್ಸೇನ್ತೋ ಆಹ ‘‘ದುವಿಧೋ’’ತಿಆದಿ। ತತ್ಥ ಇತ್ಥಿಭಾವೇನ ಲಕ್ಖಿತೋ ಉಭತೋಬ್ಯಞ್ಜನಕೋ ಇತ್ಥಿಉಭತೋಬ್ಯಞ್ಜನಕೋ। ಏಸ ನಯೋ ಇತರತ್ಥಾಪಿ।
116.Ubhatobyañjanakoti ettha bāhiratthasamāsaṃ dassento āha ‘‘itthinimittuppādanakammato cā’’tiādi. Tattha ‘‘itthi…pe… kammato cā’’ti iminā ubhayasarūpaṃ dasseti. Ubhato kammato pavattanti pāṭhaseso yojetabbo. Byañjananti nimittaṃ. Assāti janassa. Karotipi kāretipīti ettha karadhātuyā suddhakammakāritakammāni dassento āha ‘‘purisanimittenā’’tiādi. Tattha ‘‘vītikkama’’nti iminā suddhakammaṃ dasseti, ‘‘para’’nti iminā kāritakammaṃ dasseti. Samādapetvāti uyyojetvā. Tassa duvidhabhāvaṃ dassento āha ‘‘duvidho’’tiādi. Tattha itthibhāvena lakkhito ubhatobyañjanako itthiubhatobyañjanako. Esa nayo itaratthāpi.
ತತ್ಥಾತಿ ದುವಿಧೇಸು ಉಭತೋಬ್ಯಞ್ಜನಕೇಸು। ಇತ್ಥಿನಿಮಿತ್ತನ್ತಿ ಇತ್ಥಿಯಾ ಅಙ್ಗಜಾತಂ। ಏಸೇವ ನಯೋ ‘‘ಪುರಿಸನಿಮಿತ್ತ’’ನ್ತಿ ಏತ್ಥಾಪಿ। ಪಾಕಟಂ ಪಟಿಚ್ಛನ್ನನ್ತಿ ಸಭಾವತೋ ಪಾಕಟಂ ಪಟಿಚ್ಛನ್ನಂ। ಪುನ ಪಟಿಚ್ಛನ್ನಂ ಪಾಕಟನ್ತಿ ರಾಗವಸೇನ ಪಟಿಚ್ಛನ್ನಂ ಪಾಕಟಂ। ಪರಂ ಗಣ್ಹಾಪೇತೀತಿ ಪರಮೇವ ಗಣ್ಹಾಪೇತೀತಿ ಅತ್ಥೋ। ಇದನ್ತಿ ಕಾರಣಂ। ಏತೇಸನ್ತಿ ದ್ವಿನ್ನಂ ಉಭತೋಬ್ಯಞ್ಜನಕಾನಂ। ಕುರುನ್ದಿಯಂ ಪನ ವುತ್ತಂ, ಕಿಂ ವುತ್ತನ್ತಿ ಯೋಜನಾ। ತತ್ಥಾತಿ ಉಭತೋಬ್ಯಞ್ಜನಕೇ। ವಿಚಾರಣಕ್ಕಮೋತಿ ವೀಮಂಸನಾನುಕ್ಕಮೋ। ‘‘ತತ್ಥ ವಿಚಾರಕ್ಕಮೋ’’ತಿಪಿ ಪಾಠೋ। ವಿಚಾರಣಕ್ಕಮೋ ಧಮ್ಮಸಙ್ಗಹಟ್ಠಕಥಾಯ ವೇದಿತಬ್ಬೋ, ಇಧ ಪನ ಕಿಂ ವೇದಿತಬ್ಬನ್ತಿ ಆಹ ‘‘ಇದಮಿಧ ವೇದಿತಬ್ಬ’’ನ್ತಿ। ತತ್ಥ ಇದನ್ತಿ ನಪಬ್ಬಜ್ಜೂಪಸಮ್ಪದಕಾರಣಂ। ಇಧಾತಿ ಇಮಿಸ್ಸಂ ವಿನಯಟ್ಠಕಥಾಯಂ।
Tatthāti duvidhesu ubhatobyañjanakesu. Itthinimittanti itthiyā aṅgajātaṃ. Eseva nayo ‘‘purisanimitta’’nti etthāpi. Pākaṭaṃ paṭicchannanti sabhāvato pākaṭaṃ paṭicchannaṃ. Puna paṭicchannaṃ pākaṭanti rāgavasena paṭicchannaṃ pākaṭaṃ. Paraṃ gaṇhāpetīti parameva gaṇhāpetīti attho. Idanti kāraṇaṃ. Etesanti dvinnaṃ ubhatobyañjanakānaṃ. Kurundiyaṃ pana vuttaṃ, kiṃ vuttanti yojanā. Tatthāti ubhatobyañjanake. Vicāraṇakkamoti vīmaṃsanānukkamo. ‘‘Tattha vicārakkamo’’tipi pāṭho. Vicāraṇakkamo dhammasaṅgahaṭṭhakathāya veditabbo, idha pana kiṃ veditabbanti āha ‘‘idamidha veditabba’’nti. Tattha idanti napabbajjūpasampadakāraṇaṃ. Idhāti imissaṃ vinayaṭṭhakathāyaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೫೪. ಉಭತೋಬ್ಯಞ್ಜನಕವತ್ಥು • 54. Ubhatobyañjanakavatthu
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಉಭತೋಬ್ಯಞ್ಜನಕವತ್ಥುಕಥಾ • Ubhatobyañjanakavatthukathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಉಭತೋಬ್ಯಞ್ಜನಕವತ್ಥುಕಥಾವಣ್ಣನಾ • Ubhatobyañjanakavatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಉಭತೋಬ್ಯಞ್ಜನಕವತ್ಥುಕಥಾವಣ್ಣನಾ • Ubhatobyañjanakavatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಉಭತೋಬ್ಯಞ್ಜನಕವತ್ಥುಕಥಾವಣ್ಣನಾ • Ubhatobyañjanakavatthukathāvaṇṇanā
