| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
உப⁴தொப்³யஞ்ஜனகவத்து²கதா²வண்ணனா
Ubhatobyañjanakavatthukathāvaṇṇanā
116. இத்தி²உப⁴தொப்³யஞ்ஜனகோதி இத்தி²ந்த்³ரியயுத்தோ, இதரோ பன புரிஸிந்த்³ரியயுத்தோ. ஏகஸ்ஸ ஹி பா⁴வத்³வயங் ஸஹ நுப்பஜ்ஜதி யமகே (யம॰ 3.இந்த்³ரியயமக.188) படிக்கி²த்தத்தா. து³தியப்³யஞ்ஜனங் பன கம்மஸஹாயேன அகுஸலசித்தேனேவ பா⁴வவிரஹிதங் உப்பஜ்ஜதி. பகதித்தி²புரிஸானம்பி கம்மமேவ ப்³யஞ்ஜனலிங்கா³னங் காரணங், ந பா⁴வோ தஸ்ஸ கேனசி பச்சயேன பச்சயத்தஸ்ஸ பட்டா²னே அவுத்தத்தா. கேவலங் பா⁴வஸஹிதானங்யேவ ப்³யஞ்ஜனலிங்கா³னங் பவத்தித³ஸ்ஸனத்த²ங் அட்ட²கதா²ஸு ‘‘இத்தி²ந்த்³ரியங் படிச்ச இத்தி²லிங்கா³தீ³னீ’’திஆதி³னா (த⁴॰ ஸ॰ அட்ட²॰ 632) இந்த்³ரியங் ப்³யஞ்ஜனகஆரணத்தேன வுத்தங், இத⁴ பன அகுஸலப³லேன இந்த்³ரியங் வினாபி ப்³யஞ்ஜனங் உப்பஜ்ஜதீதி வுத்தங். உபி⁴ன்னம்பி சேஸங் உப⁴தொப்³யஞ்ஜனகானங் யதா³ இத்தி²யா ராகோ³ உப்பஜ்ஜதி, ததா³ புரிஸப்³யஞ்ஜனங் பாகடங் ஹோதி, இதரங் படிச்ச²ன்னங். யதா³ புரிஸே ராகோ³ உப்பஜ்ஜதி, ததா³ இத்தி²ப்³யஞ்ஜனங் பாகடங் ஹோதி, இதரங் படிச்ச²ன்னங். தத்த² விசாரணக்கமோதி படிஸந்தி⁴க்க²ணே ஏவ இத்தி²புரிஸலிங்கா³னம்பி பாதுபா⁴வப்பகாஸகே குருந்தி³வசனே அயுத்ததாபகாஸனத்த²ங் அத்த²விசாரணக்கமோ. அட்ட²ஸாலினியஞ்ஹி ‘‘இத்தி²லிங்கா³தீ³னி பன இத்தி²ந்த்³ரியங் படிச்ச பவத்தே ஸமுட்டி²தானீ’’திஆதி³ (த⁴॰ ஸ॰ அட்ட²॰ 632) வுத்தங். நேவஸ்ஸ பப்³ப³ஜ்ஜா அத்தீ²தி யோஜனா. யோ ச படிக்கி²த்தே அப⁴ப்³பே³, ப⁴ப்³பே³ ச புக்³க³லே ஞத்வா பப்³பா³ஜேதி, உபஸம்பாதே³தி வா, து³க்கடங். அஜானந்தஸ்ஸ ஸப்³ப³த்த² அனாபத்தீதி வேதி³தப்³ப³ங்.
116.Itthiubhatobyañjanakoti itthindriyayutto, itaro pana purisindriyayutto. Ekassa hi bhāvadvayaṃ saha nuppajjati yamake (yama. 3.indriyayamaka.188) paṭikkhittattā. Dutiyabyañjanaṃ pana kammasahāyena akusalacitteneva bhāvavirahitaṃ uppajjati. Pakatitthipurisānampi kammameva byañjanaliṅgānaṃ kāraṇaṃ, na bhāvo tassa kenaci paccayena paccayattassa paṭṭhāne avuttattā. Kevalaṃ bhāvasahitānaṃyeva byañjanaliṅgānaṃ pavattidassanatthaṃ aṭṭhakathāsu ‘‘itthindriyaṃ paṭicca itthiliṅgādīnī’’tiādinā (dha. sa. aṭṭha. 632) indriyaṃ byañjanakaāraṇattena vuttaṃ, idha pana akusalabalena indriyaṃ vināpi byañjanaṃ uppajjatīti vuttaṃ. Ubhinnampi cesaṃ ubhatobyañjanakānaṃ yadā itthiyā rāgo uppajjati, tadā purisabyañjanaṃ pākaṭaṃ hoti, itaraṃ paṭicchannaṃ. Yadā purise rāgo uppajjati, tadā itthibyañjanaṃ pākaṭaṃ hoti, itaraṃ paṭicchannaṃ. Tattha vicāraṇakkamoti paṭisandhikkhaṇe eva itthipurisaliṅgānampi pātubhāvappakāsake kurundivacane ayuttatāpakāsanatthaṃ atthavicāraṇakkamo. Aṭṭhasāliniyañhi ‘‘itthiliṅgādīni pana itthindriyaṃ paṭicca pavatte samuṭṭhitānī’’tiādi (dha. sa. aṭṭha. 632) vuttaṃ. Nevassa pabbajjā atthīti yojanā. Yo ca paṭikkhitte abhabbe, bhabbe ca puggale ñatvā pabbājeti, upasampādeti vā, dukkaṭaṃ. Ajānantassa sabbattha anāpattīti veditabbaṃ.
உப⁴தொப்³யஞ்ஜனகவத்து²கதா²வண்ணனா நிட்டி²தா.
Ubhatobyañjanakavatthukathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 54. உப⁴தொப்³யஞ்ஜனகவத்து² • 54. Ubhatobyañjanakavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / உப⁴தொப்³யஞ்ஜனகவத்து²கதா² • Ubhatobyañjanakavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / உப⁴தொப்³யஞ்ஜனகவத்து²கதா²வண்ணனா • Ubhatobyañjanakavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / உப⁴தொப்³யஞ்ஜனகவத்து²கதா²வண்ணனா • Ubhatobyañjanakavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 54. உப⁴தொப்³யஞ்ஜனகவத்து²கதா² • 54. Ubhatobyañjanakavatthukathā
