| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
6. උභයසුත්‌තං
6. Ubhayasuttaṃ
166. ‘‘චතස්‌සො ඉමා, භික්‌ඛවෙ, පටිපදා. කතමා චතස්‌සො? දුක්‌ඛා පටිපදා දන්‌ධාභිඤ්‌ඤා, දුක්‌ඛා පටිපදා ඛිප්‌පාභිඤ්‌ඤා, සුඛා පටිපදා දන්‌ධාභිඤ්‌ඤා, සුඛා පටිපදා ඛිප්‌පාභිඤ්‌ඤා.
166. ‘‘Catasso imā, bhikkhave, paṭipadā. Katamā catasso? Dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññā.
‘‘තත්‍ර , භික්‌ඛවෙ, යායං පටිපදා දුක්‌ඛා දන්‌ධාභිඤ්‌ඤා, අයං, භික්‌ඛවෙ, පටිපදා උභයෙනෙව හීනා අක්‌ඛායති. යම්‌පායං පටිපදා දුක්‌ඛා, ඉමිනාපායං හීනා අක්‌ඛායති; යම්‌පායං පටිපදා දන්‌ධා, ඉමිනාපායං හීනා අක්‌ඛායති. අයං, භික්‌ඛවෙ, පටිපදා උභයෙනෙව හීනා අක්‌ඛායති.
‘‘Tatra , bhikkhave, yāyaṃ paṭipadā dukkhā dandhābhiññā, ayaṃ, bhikkhave, paṭipadā ubhayeneva hīnā akkhāyati. Yampāyaṃ paṭipadā dukkhā, imināpāyaṃ hīnā akkhāyati; yampāyaṃ paṭipadā dandhā, imināpāyaṃ hīnā akkhāyati. Ayaṃ, bhikkhave, paṭipadā ubhayeneva hīnā akkhāyati.
‘‘තත්‍ර, භික්‌ඛවෙ, යායං පටිපදා දුක්‌ඛා ඛිප්‌පාභිඤ්‌ඤා, අයං, භික්‌ඛවෙ, පටිපදා දුක්‌ඛත්‌තා හීනා අක්‌ඛායති.
‘‘Tatra, bhikkhave, yāyaṃ paṭipadā dukkhā khippābhiññā, ayaṃ, bhikkhave, paṭipadā dukkhattā hīnā akkhāyati.
‘‘තත්‍ර , භික්‌ඛවෙ, යායං පටිපදා සුඛා දන්‌ධාභිඤ්‌ඤා, අයං, භික්‌ඛවෙ, පටිපදා දන්‌ධත්‌තා හීනා අක්‌ඛායති.
‘‘Tatra , bhikkhave, yāyaṃ paṭipadā sukhā dandhābhiññā, ayaṃ, bhikkhave, paṭipadā dandhattā hīnā akkhāyati.
‘‘තත්‍ර, භික්‌ඛවෙ, යායං පටිපදා සුඛා ඛිප්‌පාභිඤ්‌ඤා, අයං, භික්‌ඛවෙ, පටිපදා උභයෙනෙව පණීතා අක්‌ඛායති. යම්‌පායං පටිපදා සුඛා, ඉමිනාපායං පණීතා අක්‌ඛායති; යම්‌පායං පටිපදා ඛිප්‌පා, ඉමිනාපායං පණීතා අක්‌ඛායති. අයං, භික්‌ඛවෙ, පටිපදා උභයෙනෙව පණීතා අක්‌ඛායති. ඉමා ඛො, භික්‌ඛවෙ, චතස්‌සො පටිපදා’’ති. ඡට්‌ඨං.
‘‘Tatra, bhikkhave, yāyaṃ paṭipadā sukhā khippābhiññā, ayaṃ, bhikkhave, paṭipadā ubhayeneva paṇītā akkhāyati. Yampāyaṃ paṭipadā sukhā, imināpāyaṃ paṇītā akkhāyati; yampāyaṃ paṭipadā khippā, imināpāyaṃ paṇītā akkhāyati. Ayaṃ, bhikkhave, paṭipadā ubhayeneva paṇītā akkhāyati. Imā kho, bhikkhave, catasso paṭipadā’’ti. Chaṭṭhaṃ.
Related texts:
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 4-6. පඨමඛමසුත්‌තාදිවණ්‌ණනා • 4-6. Paṭhamakhamasuttādivaṇṇanā
