| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၆. ဥစ္ဆေဒဒိဋ္ဌိနိဒ္ဒေသော
6. Ucchedadiṭṭhiniddeso
၁၃၉. သက္ကာယဝတ္ထုကာယ ဥစ္ဆေဒဒိဋ္ဌိယာ ကတမေဟိ ပဉ္စဟိ အာကာရေဟိ အဘိနိဝေသော ဟောတိ? ဣဓ အသ္သုတဝာ ပုထုဇ္ဇနော အရိယာနံ အဒသ္သာဝီ အရိယဓမ္မသ္သ အကောဝိဒော အရိယဓမ္မေ အဝိနီတော သပ္ပုရိသာနံ အဒသ္သာဝီ သပ္ပုရိသဓမ္မသ္သ အကောဝိဒော သပ္ပုရိသဓမ္မေ အဝိနီတော ရူပံ အတ္တတော သမနုပသ္သတိ, ဝေဒနံ အတ္တတော သမနုပသ္သတိ, သညံ အတ္တတော သမနုပသ္သတိ, သင္ခာရေ အတ္တတော သမနုပသ္သတိ, ဝိညာဏံ အတ္တတော သမနုပသ္သတိ။
139. Sakkāyavatthukāya ucchedadiṭṭhiyā katamehi pañcahi ākārehi abhiniveso hoti? Idha assutavā puthujjano ariyānaṃ adassāvī ariyadhammassa akovido ariyadhamme avinīto sappurisānaṃ adassāvī sappurisadhammassa akovido sappurisadhamme avinīto rūpaṃ attato samanupassati, vedanaṃ attato samanupassati, saññaṃ attato samanupassati, saṅkhāre attato samanupassati, viññāṇaṃ attato samanupassati.
ကထံ ရူပံ အတ္တတော သမနုပသ္သတိ? ဣဓေကစ္စော ပထဝီကသိဏံ။ပေ.။ ဩဒာတကသိဏံ အတ္တတော သမနုပသ္သတိ။ ‘‘ယံ ဩဒာတကသိဏံ, သော အဟံ ; ယော အဟံ, တံ ဩဒာတကသိဏ’’န္တိ – ဩဒာတကသိဏဉ္စ အတ္တဉ္စ အဒ္ဝယံ သမနုပသ္သတိ။ သေယ္ယထာပိ တေလပ္ပဒီပသ္သ ဈာယတော။ပေ.။ အယံ ပဌမာ သက္ကာယဝတ္ထုကာ ဥစ္ဆေဒဒိဋ္ဌိ။ ဥစ္ဆေဒဒိဋ္ဌိ မိစ္ဆာဒိဋ္ဌိ။ပေ.။ ဣမာနိ သညောဇနာနိ, န စ ဒိဋ္ဌိယော။ ဧဝံ ရူပံ အတ္တတော သမနုပသ္သတိ။ပေ.။ သက္ကာယဝတ္ထုကာယ ဥစ္ဆေဒဒိဋ္ဌိယာ ဣမေဟိ ပဉ္စဟိ အာကာရေဟိ အဘိနိဝေသော ဟောတိ။
Kathaṃ rūpaṃ attato samanupassati? Idhekacco pathavīkasiṇaṃ…pe… odātakasiṇaṃ attato samanupassati. ‘‘Yaṃ odātakasiṇaṃ, so ahaṃ ; yo ahaṃ, taṃ odātakasiṇa’’nti – odātakasiṇañca attañca advayaṃ samanupassati. Seyyathāpi telappadīpassa jhāyato…pe… ayaṃ paṭhamā sakkāyavatthukā ucchedadiṭṭhi. Ucchedadiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ rūpaṃ attato samanupassati…pe… sakkāyavatthukāya ucchedadiṭṭhiyā imehi pañcahi ākārehi abhiniveso hoti.
ဥစ္ဆေဒဒိဋ္ဌိနိဒ္ဒေသော ဆဋ္ဌော။
Ucchedadiṭṭhiniddeso chaṭṭho.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၆. ဥစ္ဆေဒဒိဋ္ဌိနိဒ္ဒေသဝဏ္ဏနာ • 6. Ucchedadiṭṭhiniddesavaṇṇanā
