| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[212] 2. உச்சி²ட்ட²ப⁴த்தஜாதகவண்ணனா
[212] 2. Ucchiṭṭhabhattajātakavaṇṇanā
அஞ்ஞோ உபரிமோ வண்ணோதி இத³ங் ஸத்தா² ஜேதவனே விஹரந்தோ புராணது³தியிகாபலோப⁴னங் ஆரப்³ப⁴ கதே²ஸி. ஸோ ஹி பி⁴க்கு² ஸத்தா²ரா ‘‘ஸச்சங் கிர, த்வங் பி⁴க்கு², உக்கண்டி²தோஸீ’’தி புட்டோ² ‘‘ஸச்ச’’ந்தி வத்வா ‘‘கோ தங் உக்கண்டா²பேஸீ’’தி வுத்தே ‘‘புராணது³தியிகா’’தி ஆஹ. அத² நங் ஸத்தா² ‘‘பி⁴க்கு² அயங் தே இத்தீ² அனத்த²காரிகா, புப்³பே³பி அத்தனோ ஜாரஸ்ஸ உச்சி²ட்ட²கங் போ⁴ஜேஸீ’’தி வத்வா அதீதங் ஆஹரி.
Aññouparimo vaṇṇoti idaṃ satthā jetavane viharanto purāṇadutiyikāpalobhanaṃ ārabbha kathesi. So hi bhikkhu satthārā ‘‘saccaṃ kira, tvaṃ bhikkhu, ukkaṇṭhitosī’’ti puṭṭho ‘‘sacca’’nti vatvā ‘‘ko taṃ ukkaṇṭhāpesī’’ti vutte ‘‘purāṇadutiyikā’’ti āha. Atha naṃ satthā ‘‘bhikkhu ayaṃ te itthī anatthakārikā, pubbepi attano jārassa ucchiṭṭhakaṃ bhojesī’’ti vatvā atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ ஏகஸ்மிங் டா²னே பி⁴க்க²ங் சரித்வா ஜீவிககப்பகே கபணே நடககுலே நிப்³ப³த்தித்வா வயப்பத்தோ து³க்³க³தோ து³ரூபகோ ஹுத்வா பி⁴க்க²ங் சரித்வா ஜீவிகங் கப்பேஸி. ததா³ காஸிரட்டே² ஏகஸ்மிங் கா³மகே ஏகஸ்ஸ ப்³ராஹ்மணஸ்ஸ ப்³ராஹ்மணீ து³ஸ்ஸீலா பாபத⁴ம்மா அதிசாரங் சரதி. அதே²கதி³வஸங் ப்³ராஹ்மணே கேனசிதே³வ கரணீயேன ப³ஹி க³தே தஸ்ஸா ஜாரோ தங் க²ணங் ஓலோகெத்வா தங் கே³ஹங் பாவிஸி. ஸா தேன ஸத்³தி⁴ங் அதிசரித்வா ‘‘முஹுத்தங் அச்ச², பு⁴ஞ்ஜித்வாவ க³மிஸ்ஸஸீ’’தி ப⁴த்தங் ஸம்பாதெ³த்வா ஸூபப்³யஞ்ஜனஸம்பன்னங் உண்ஹப⁴த்தங் வட்³டெ⁴த்வா ‘‘த்வங் பு⁴ஞ்ஜா’’தி தஸ்ஸ த³த்வா ஸயங் ப்³ராஹ்மணஸ்ஸ ஆக³மனங் ஓலோகயமானா த்³வாரே அட்டா²ஸி. போ³தி⁴ஸத்தோ ப்³ராஹ்மணியா ஜாரஸ்ஸ பு⁴ஞ்ஜனட்டா²னே பிண்ட³ங் பச்சாஸீஸந்தோ அட்டா²ஸி.
Atīte bārāṇasiyaṃ brahmadatte rajjaṃ kārente bodhisatto ekasmiṃ ṭhāne bhikkhaṃ caritvā jīvikakappake kapaṇe naṭakakule nibbattitvā vayappatto duggato durūpako hutvā bhikkhaṃ caritvā jīvikaṃ kappesi. Tadā kāsiraṭṭhe ekasmiṃ gāmake ekassa brāhmaṇassa brāhmaṇī dussīlā pāpadhammā aticāraṃ carati. Athekadivasaṃ brāhmaṇe kenacideva karaṇīyena bahi gate tassā jāro taṃ khaṇaṃ oloketvā taṃ gehaṃ pāvisi. Sā tena saddhiṃ aticaritvā ‘‘muhuttaṃ accha, bhuñjitvāva gamissasī’’ti bhattaṃ sampādetvā sūpabyañjanasampannaṃ uṇhabhattaṃ vaḍḍhetvā ‘‘tvaṃ bhuñjā’’ti tassa datvā sayaṃ brāhmaṇassa āgamanaṃ olokayamānā dvāre aṭṭhāsi. Bodhisatto brāhmaṇiyā jārassa bhuñjanaṭṭhāne piṇḍaṃ paccāsīsanto aṭṭhāsi.
தஸ்மிங் க²ணே ப்³ராஹ்மணோ கே³ஹாபி⁴முகோ² ஆக³ச்ச²தி. ப்³ராஹ்மணீ தங் ஆக³ச்ச²ந்தங் தி³ஸ்வா வேகே³ன பவிஸித்வா ‘‘உட்டே²ஹி, ப்³ராஹ்மணோ ஆக³ச்ச²தீ’’தி ஜாரங் கொட்டே² ஓதாரெத்வா ப்³ராஹ்மணஸ்ஸ பவிஸித்வா நிஸின்னகாலே ப²லகங் உபனெத்வா ஹத்த²தோ⁴வனங் த³த்வா இதரேன பு⁴த்தாவஸிட்ட²ஸ்ஸ ஸீதப⁴த்தஸ்ஸ உபரி உண்ஹப⁴த்தங் வட்³டெ⁴த்வா ப்³ராஹ்மணஸ்ஸ அதா³ஸி. ஸோ ப⁴த்தே ஹத்த²ங் ஓதாரெத்வா உபரி உண்ஹங் ஹெட்டா² ச ப⁴த்தங் ஸீதலங் தி³ஸ்வா சிந்தேஸி – ‘‘இமினா அஞ்ஞஸ்ஸ பு⁴த்தாதி⁴கேன உச்சி²ட்ட²ப⁴த்தேன ப⁴விதப்³ப³’’ந்தி. ஸோ ப்³ராஹ்மணிங் புச்ச²ந்தோ பட²மங் கா³த²மாஹ –
Tasmiṃ khaṇe brāhmaṇo gehābhimukho āgacchati. Brāhmaṇī taṃ āgacchantaṃ disvā vegena pavisitvā ‘‘uṭṭhehi, brāhmaṇo āgacchatī’’ti jāraṃ koṭṭhe otāretvā brāhmaṇassa pavisitvā nisinnakāle phalakaṃ upanetvā hatthadhovanaṃ datvā itarena bhuttāvasiṭṭhassa sītabhattassa upari uṇhabhattaṃ vaḍḍhetvā brāhmaṇassa adāsi. So bhatte hatthaṃ otāretvā upari uṇhaṃ heṭṭhā ca bhattaṃ sītalaṃ disvā cintesi – ‘‘iminā aññassa bhuttādhikena ucchiṭṭhabhattena bhavitabba’’nti. So brāhmaṇiṃ pucchanto paṭhamaṃ gāthamāha –
123.
123.
‘‘அஞ்ஞோ உபரிமோ வண்ணோ, அஞ்ஞோ வண்ணோ ச ஹெட்டி²மோ;
‘‘Añño uparimo vaṇṇo, añño vaṇṇo ca heṭṭhimo;
ப்³ராஹ்மணீ த்வேவ புச்சா²மி, கிங் ஹெட்டா² கிஞ்ச உப்பரீ’’தி.
Brāhmaṇī tveva pucchāmi, kiṃ heṭṭhā kiñca upparī’’ti.
தத்த² வண்ணோதி ஆகாரோ. அயஞ்ஹி உபரிமஸ்ஸ உண்ஹபா⁴வங் ஹெட்டி²மஸ்ஸ ச ஸீதபா⁴வங் புச்ச²ந்தோ ஏவமாஹ. கிங் ஹெட்டா² கிஞ்ச உப்பரீதி வுட்³டி⁴தப⁴த்தேன நாம உபரி ஸீதலேன, ஹெட்டா² உண்ஹேன ப⁴விதப்³ப³ங், இத³ஞ்ச பன ந தாதி³ஸங், தேன தங் புச்சா²மி – ‘‘கேன காரணேன உபரி ப⁴த்தங் உண்ஹங், ஹெட்டி²மங் ஸீதல’’ந்தி.
Tattha vaṇṇoti ākāro. Ayañhi uparimassa uṇhabhāvaṃ heṭṭhimassa ca sītabhāvaṃ pucchanto evamāha. Kiṃ heṭṭhā kiñca upparīti vuḍḍhitabhattena nāma upari sītalena, heṭṭhā uṇhena bhavitabbaṃ, idañca pana na tādisaṃ, tena taṃ pucchāmi – ‘‘kena kāraṇena upari bhattaṃ uṇhaṃ, heṭṭhimaṃ sītala’’nti.
ப்³ராஹ்மணீ அத்தனா கதகம்மஸ்ஸ உத்தானபா⁴வப⁴யேன ப்³ராஹ்மணே புனப்புனங் கதெ²ந்தேபி துண்ஹீயேவ அஹோஸி. தஸ்மிங் க²ணே நடபுத்தஸ்ஸ ஏதத³ஹோஸி – ‘‘கொட்டே² நிஸீதா³பிதபாபபுரிஸேன ஜாரேன ப⁴விதப்³ப³ங், இமினா கே³ஹஸ்ஸாமிகேன, ப்³ராஹ்மணீ பன அத்தனா கதகம்மஸ்ஸ பாகடபா⁴வப⁴யேன கிஞ்சி ந கதே²தி, ஹந்தா³ஹங் இமிஸ்ஸா கதகம்மங் பகாஸெத்வா ஜாரஸ்ஸ கொட்ட²கே நிஸீதா³பிதபா⁴வங் ப்³ராஹ்மணஸ்ஸ கதே²மீ’’தி. ஸோ ப்³ராஹ்மணஸ்ஸ கே³ஹா நிக்க²ந்தகாலதோ பட்டா²ய இதரஸ்ஸ கே³ஹபவேஸனங் அதிசரணங் அக்³க³ப⁴த்தபு⁴ஞ்ஜனங் ப்³ராஹ்மணியா த்³வாரே ட²த்வா மக்³க³ங் ஓலோகனங் இதரஸ்ஸ கொட்டே² ஓதாரிதபா⁴வந்தி ஸப்³ப³ங் தங் பவத்திங் ஆசிக்கி²த்வா து³தியங் கா³த²மாஹ –
Brāhmaṇī attanā katakammassa uttānabhāvabhayena brāhmaṇe punappunaṃ kathentepi tuṇhīyeva ahosi. Tasmiṃ khaṇe naṭaputtassa etadahosi – ‘‘koṭṭhe nisīdāpitapāpapurisena jārena bhavitabbaṃ, iminā gehassāmikena, brāhmaṇī pana attanā katakammassa pākaṭabhāvabhayena kiñci na katheti, handāhaṃ imissā katakammaṃ pakāsetvā jārassa koṭṭhake nisīdāpitabhāvaṃ brāhmaṇassa kathemī’’ti. So brāhmaṇassa gehā nikkhantakālato paṭṭhāya itarassa gehapavesanaṃ aticaraṇaṃ aggabhattabhuñjanaṃ brāhmaṇiyā dvāre ṭhatvā maggaṃ olokanaṃ itarassa koṭṭhe otāritabhāvanti sabbaṃ taṃ pavattiṃ ācikkhitvā dutiyaṃ gāthamāha –
124.
124.
‘‘அஹங் நடொஸ்மி ப⁴த்³த³ந்தே, பி⁴க்க²கொஸ்மி இதா⁴க³தோ;
‘‘Ahaṃ naṭosmi bhaddante, bhikkhakosmi idhāgato;
அயஞ்ஹி கொட்ட²மோதிண்ணோ, அயங் ஸோ யங் க³வேஸஸீ’’தி.
Ayañhi koṭṭhamotiṇṇo, ayaṃ so yaṃ gavesasī’’ti.
தத்த² அஹங் நடொஸ்மி, ப⁴த்³த³ந்தேதி, ஸாமி, அஹங் நடஜாதிகோ. பி⁴க்க²கொஸ்மி இதா⁴க³தோதி ஸ்வாஹங் இமங் டா²னங் பி⁴க்க²கோ பி⁴க்க²ங் பரியேஸமானோ ஆக³தொஸ்மி. அயஞ்ஹி கொட்ட²மோதிண்ணோதி அயங் பன ஏதிஸ்ஸா ஜாரோ இமங் ப⁴த்தங் பு⁴ஞ்ஜந்தோ தவ ப⁴யேன கொட்ட²ங் ஓதிண்ணோ. அயங் ஸோ யங் க³வேஸஸீதி யங் த்வங் கஸ்ஸ நு கோ² இமினா உச்சி²ட்ட²கேன ப⁴விதப்³ப³ந்தி க³வேஸஸி, அயங் ஸோ. சூளாய நங் க³ஹெத்வா கொட்டா² நீஹரித்வா யதா² ந புனேவரூபங் பாபங் கரோதி, ததா² அஸ்ஸ ஸதிங் ஜனேஹீதி வத்வா பக்காமி. ப்³ராஹ்மணோ உபோ⁴பி தே யதா² நங் ந புனேவரூபங் பாபங் கரொந்தி, தஜ்ஜனபோத²னேஹி ததா² ஸிக்கா²பெத்வா யதா²கம்மங் க³தோ.
Tattha ahaṃ naṭosmi, bhaddanteti, sāmi, ahaṃ naṭajātiko. Bhikkhakosmi idhāgatoti svāhaṃ imaṃ ṭhānaṃ bhikkhako bhikkhaṃ pariyesamāno āgatosmi. Ayañhi koṭṭhamotiṇṇoti ayaṃ pana etissā jāro imaṃ bhattaṃ bhuñjanto tava bhayena koṭṭhaṃ otiṇṇo. Ayaṃ so yaṃ gavesasīti yaṃ tvaṃ kassa nu kho iminā ucchiṭṭhakena bhavitabbanti gavesasi, ayaṃ so. Cūḷāya naṃ gahetvā koṭṭhā nīharitvā yathā na punevarūpaṃ pāpaṃ karoti, tathā assa satiṃ janehīti vatvā pakkāmi. Brāhmaṇo ubhopi te yathā naṃ na punevarūpaṃ pāpaṃ karonti, tajjanapothanehi tathā sikkhāpetvā yathākammaṃ gato.
ஸத்தா² இமங் த⁴ம்மதே³ஸனங் ஆஹரித்வா ஸச்சானி பகாஸெத்வா ஜாதகங் ஸமோதா⁴னேஸி, ஸச்சபரியோஸானே உக்கண்டி²தோ பி⁴க்கு² ஸோதாபத்திப²லே பதிட்ட²ஹி. ‘‘ததா³ ப்³ராஹ்மணீ புராணது³தியிகா அஹோஸி, ப்³ராஹ்மணோ உக்கண்டி²தோ பி⁴க்கு², நடபுத்தோ பன அஹமேவ அஹோஸி’’ந்தி.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne ukkaṇṭhito bhikkhu sotāpattiphale patiṭṭhahi. ‘‘Tadā brāhmaṇī purāṇadutiyikā ahosi, brāhmaṇo ukkaṇṭhito bhikkhu, naṭaputto pana ahameva ahosi’’nti.
உச்சி²ட்ட²ப⁴த்தஜாதகவண்ணனா து³தியா.
Ucchiṭṭhabhattajātakavaṇṇanā dutiyā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 212. உச்சி²ட்ட²ப⁴த்தஜாதகங் • 212. Ucchiṭṭhabhattajātakaṃ
