| Library / Tipiṭaka / তিপিটক • Tipiṭaka / পেতৰত্থু-অট্ঠকথা • Petavatthu-aṭṭhakathā |
৫. উচ্ছুপেতৰত্থুৰণ্ণনা
5. Ucchupetavatthuvaṇṇanā
ইদং মম উচ্ছুৰনং মহন্তন্তি ইদং উচ্ছুপেতৰত্থু। তস্স কা উপ্পত্তি? ভগৰতি ৰেল়ুৰনে ৰিহরন্তে অঞ্ঞতরো পুরিসো উচ্ছুকলাপং খন্ধে কত্ৰা একং উচ্ছুং খাদন্তো গচ্ছতি। অথ অঞ্ঞতরো উপাসকো সীলৰা কল্যাণধম্মো বালদারকেন সদ্ধিং তস্স পিট্ঠিতো পিট্ঠিতো গচ্ছতি। দারকো উচ্ছুং পস্সিত্ৰা ‘‘দেহী’’তি পরোদতি। উপাসকো দারকং পরোদন্তং দিস্ৰা তং পুরিসং সঙ্গণ্হন্তো তেন সদ্ধিং সল্লাপমকাসি। সো পন পুরিসো তেন সদ্ধিং ন কিঞ্চি আলপি, দারকস্স উচ্ছুখণ্ডম্পি নাদাসি। উপাসকো তং দারকং দস্সেত্ৰা ‘‘অযং দারকো অতিৰিয রোদতি, ইমস্স একং উচ্ছুখণ্ডং দেহী’’তি আহ। তং সুত্ৰা সো পুরিসো অসহন্তো পটিহতচিত্তং উপট্ঠপেত্ৰা অনাদরৰসেন একং উচ্ছুলট্ঠিং পিট্ঠিতো খিপি।
Idaṃ mama ucchuvanaṃ mahantanti idaṃ ucchupetavatthu. Tassa kā uppatti? Bhagavati veḷuvane viharante aññataro puriso ucchukalāpaṃ khandhe katvā ekaṃ ucchuṃ khādanto gacchati. Atha aññataro upāsako sīlavā kalyāṇadhammo bāladārakena saddhiṃ tassa piṭṭhito piṭṭhito gacchati. Dārako ucchuṃ passitvā ‘‘dehī’’ti parodati. Upāsako dārakaṃ parodantaṃ disvā taṃ purisaṃ saṅgaṇhanto tena saddhiṃ sallāpamakāsi. So pana puriso tena saddhiṃ na kiñci ālapi, dārakassa ucchukhaṇḍampi nādāsi. Upāsako taṃ dārakaṃ dassetvā ‘‘ayaṃ dārako ativiya rodati, imassa ekaṃ ucchukhaṇḍaṃ dehī’’ti āha. Taṃ sutvā so puriso asahanto paṭihatacittaṃ upaṭṭhapetvā anādaravasena ekaṃ ucchulaṭṭhiṃ piṭṭhito khipi.
সো অপরেন সমযেন কালং কত্ৰা চিরং পরিভাৰিতস্স লোভস্স ৰসেন পেতেসু নিব্বত্তি, তস্স ফলং নাম সককম্মসরিক্খকং হোতীতি অট্ঠকরীসমত্তং ঠানং অৰত্থরন্তং অঞ্জনৰণ্ণং মুসলদণ্ডপরিমাণেহি উচ্ছূহি ঘনসঞ্ছন্নং মহন্তং উচ্ছুৰনং নিব্বত্তি। তস্মিং খাদিতুকামতায ‘‘উচ্ছুং গহেস্সামী’’তি উপগতমত্তে তং উচ্ছূ অভিহনন্তি, সো তেন পুচ্ছিতো পততি।
So aparena samayena kālaṃ katvā ciraṃ paribhāvitassa lobhassa vasena petesu nibbatti, tassa phalaṃ nāma sakakammasarikkhakaṃ hotīti aṭṭhakarīsamattaṃ ṭhānaṃ avattharantaṃ añjanavaṇṇaṃ musaladaṇḍaparimāṇehi ucchūhi ghanasañchannaṃ mahantaṃ ucchuvanaṃ nibbatti. Tasmiṃ khāditukāmatāya ‘‘ucchuṃ gahessāmī’’ti upagatamatte taṃ ucchū abhihananti, so tena pucchito patati.
অথেকদিৰসং আযস্মা মহামোগ্গল্লানো রাজগহং পিণ্ডায গচ্ছন্তো অন্তরামগ্গে তং পেতং অদ্দস। সো থেরং দিস্ৰা অত্তনা কতকম্মং পুচ্ছি –
Athekadivasaṃ āyasmā mahāmoggallāno rājagahaṃ piṇḍāya gacchanto antarāmagge taṃ petaṃ addasa. So theraṃ disvā attanā katakammaṃ pucchi –
৭৩৭.
737.
‘‘ইদং মম উচ্ছুৰনং মহন্তং, নিব্বত্ততি পুঞ্ঞফলং অনপ্পকং।
‘‘Idaṃ mama ucchuvanaṃ mahantaṃ, nibbattati puññaphalaṃ anappakaṃ;
তং দানি মে ন পরিভোগমেতি, আচিক্খ ভন্তে কিস্স অযং ৰিপাকো॥
Taṃ dāni me na paribhogameti, ācikkha bhante kissa ayaṃ vipāko.
৭৩৮.
738.
‘‘হঞ্ঞামি খজ্জামি চ ৰাযমামি, পরিসক্কামি পরিভুঞ্জিতুং কিঞ্চি।
‘‘Haññāmi khajjāmi ca vāyamāmi, parisakkāmi paribhuñjituṃ kiñci;
স্ৰাহং ছিন্নথামো কপণো লালপামি, কিস্স কম্মস্স অযং ৰিপাকো॥
Svāhaṃ chinnathāmo kapaṇo lālapāmi, kissa kammassa ayaṃ vipāko.
৭৩৯.
739.
‘‘ৰিঘাতো চাহং পরিপতামি ছমাযং,
‘‘Vighāto cāhaṃ paripatāmi chamāyaṃ,
পরিৰত্তামি ৰারিচরোৰ ঘম্মে।
Parivattāmi vāricarova ghamme;
রুদতো চ মে অস্সুকা নিগ্গলন্তি,
Rudato ca me assukā niggalanti,
আচিক্খ ভন্তে কিস্স অযং ৰিপাকো॥
Ācikkha bhante kissa ayaṃ vipāko.
৭৪০.
740.
‘‘ছাতো কিলন্তো চ পিপাসিতো চ, সন্তস্সিতো সাতসুখং ন ৰিন্দে।
‘‘Chāto kilanto ca pipāsito ca, santassito sātasukhaṃ na vinde;
পুচ্ছামি তং এতমত্থং ভদন্তে, কথং নু উচ্ছুপরিভোগং লভেয্য’’ন্তি॥
Pucchāmi taṃ etamatthaṃ bhadante, kathaṃ nu ucchuparibhogaṃ labheyya’’nti.
৭৪১.
741.
‘‘পুরে তুৰং কম্মমকাসি অত্তনা, মনুস্সভূতো পুরিমায জাতিযা।
‘‘Pure tuvaṃ kammamakāsi attanā, manussabhūto purimāya jātiyā;
অহঞ্চ তং এতমত্থং ৰদামি, সুত্ৰান ত্ৰং এতমত্থং ৰিজান॥
Ahañca taṃ etamatthaṃ vadāmi, sutvāna tvaṃ etamatthaṃ vijāna.
৭৪২.
742.
‘‘উচ্ছুং তুৰং খাদমানো পযাতো, পুরিসো চ তে পিট্ঠিতো অন্ৰগচ্ছি।
‘‘Ucchuṃ tuvaṃ khādamāno payāto, puriso ca te piṭṭhito anvagacchi;
সো চ তং পচ্চাসন্তো কথেসি, তস্স তুৰং ন কিঞ্চি আলপিত্থ॥
So ca taṃ paccāsanto kathesi, tassa tuvaṃ na kiñci ālapittha.
৭৪৩.
743.
‘‘সো চ তং অভণন্তং অযাচি, দেহয্য উচ্ছুন্তি চ তং অৰোচ।
‘‘So ca taṃ abhaṇantaṃ ayāci, dehayya ucchunti ca taṃ avoca;
তস্স তুৰং পিট্ঠিতো উচ্ছুং অদাসি, তস্সেতং কম্মস্স অযং ৰিপাকো॥
Tassa tuvaṃ piṭṭhito ucchuṃ adāsi, tassetaṃ kammassa ayaṃ vipāko.
৭৪৪.
744.
‘‘ইঙ্ঘ ত্ৰং গন্ত্ৰান পিট্ঠিতো গণ্হেয্যাসি, গহেত্ৰান তং খাদস্সু যাৰদত্থং।
‘‘Iṅgha tvaṃ gantvāna piṭṭhito gaṇheyyāsi, gahetvāna taṃ khādassu yāvadatthaṃ;
তেনেৰ ত্ৰং অত্তমনো ভৰিস্সসি, হট্ঠো চুদগ্গো চ পমোদিতো চাতি॥
Teneva tvaṃ attamano bhavissasi, haṭṭho cudaggo ca pamodito cāti.
৭৪৫.
745.
‘‘গন্ত্ৰান সো পিট্ঠিতো অগ্গহেসি, গহেত্ৰান তং খাদি যাৰদত্থং।
‘‘Gantvāna so piṭṭhito aggahesi, gahetvāna taṃ khādi yāvadatthaṃ;
তেনেৰ সো অত্তমনো অহোসি, হট্ঠো চুদগ্গো চ পমোদিতো চা’’তি॥ –
Teneva so attamano ahosi, haṭṭho cudaggo ca pamodito cā’’ti. –
ৰচনপটিৰচনগাথা পেতেন থেরেন চ ৰুত্তা।
Vacanapaṭivacanagāthā petena therena ca vuttā.
৭৩৭-৮. তত্থ কিস্সাতি কীদিসস্স, কম্মস্সাতি অধিপ্পাযো। হঞ্ঞামীতি ৰিহঞ্ঞামি ৰিঘাতং আপজ্জামি। ৰিহঞ্ঞামীতি ৰা ৰিবাধিযামি, ৰিসেসতো পীল়িযামীতি অত্থো। খজ্জামীতি খাদিযামি, অসিপত্তসদিসেহি নিসিতেহি খাদন্তেহি ৰিয উচ্ছুপত্তেহি কন্তিযামীতি অত্থো। ৰাযমামীতি উচ্ছুং খাদিতুং ৰাযামং করোমি। পরিসক্কামীতি পযোগং করোমি। পরিভুঞ্জিতুন্তি উচ্ছুরসং পরিভুঞ্জিতুং, উচ্ছুং খাদিতুন্তি অত্থো। ছিন্নথামোতি ছিন্নসহো উপচ্ছিন্নথামো, পরিক্খীণবলোতি অত্থো। কপণোতি দীনো। লালপামীতি দুক্খেন অট্টিতো অতিৰিয ৰিলপামি।
737-8. Tattha kissāti kīdisassa, kammassāti adhippāyo. Haññāmīti vihaññāmi vighātaṃ āpajjāmi. Vihaññāmīti vā vibādhiyāmi, visesato pīḷiyāmīti attho. Khajjāmīti khādiyāmi, asipattasadisehi nisitehi khādantehi viya ucchupattehi kantiyāmīti attho. Vāyamāmīti ucchuṃ khādituṃ vāyāmaṃ karomi. Parisakkāmīti payogaṃ karomi. Paribhuñjitunti ucchurasaṃ paribhuñjituṃ, ucchuṃ khāditunti attho. Chinnathāmoti chinnasaho upacchinnathāmo, parikkhīṇabaloti attho. Kapaṇoti dīno. Lālapāmīti dukkhena aṭṭito ativiya vilapāmi.
৭৩৯. ৰিঘাতোতি ৰিঘাতৰা, ৰিহতবলো ৰা। পরিপতামি ছমাযন্তি ঠাতুং অসক্কোন্তো ভূমিযং পপতামি। পরিৰত্তামীতি পরিব্ভমামি। ৰারিচরোৰাতি মচ্ছো ৰিয। ঘম্মেতি ঘম্মসন্তত্তে থলে।
739.Vighātoti vighātavā, vihatabalo vā. Paripatāmi chamāyanti ṭhātuṃ asakkonto bhūmiyaṃ papatāmi. Parivattāmīti paribbhamāmi. Vāricarovāti maccho viya. Ghammeti ghammasantatte thale.
৭৪০-৪. সন্তস্সিতোতি ওট্ঠকণ্ঠতালূনং সোসপ্পত্তিযা সুট্ঠু তসিতো। সাতসুখন্তি সাতভূতং সুখং। ন ৰিন্দেতি ন লভামি। তন্তি তুৰং। ৰিজানাতি ৰিজানাহি। পযাতোতি গন্তুং আরদ্ধো। অন্ৰগচ্ছীতি অনুবন্ধি। পচ্চাসন্তোতি পচ্চাসীসমানো। তস্সেতং কম্মস্সাতি এত্থ এতন্তি নিপাতমত্তং, তস্স কম্মস্সাতি অত্থো। পিট্ঠিতো গণ্হেয্যাসীতি অত্তনো পিট্ঠিপস্সেনেৰ উচ্ছুং গণ্হেয্যাসি। পমোদিতোতি পমুদিতো।
740-4.Santassitoti oṭṭhakaṇṭhatālūnaṃ sosappattiyā suṭṭhu tasito. Sātasukhanti sātabhūtaṃ sukhaṃ. Na vindeti na labhāmi. Tanti tuvaṃ. Vijānāti vijānāhi. Payātoti gantuṃ āraddho. Anvagacchīti anubandhi. Paccāsantoti paccāsīsamāno. Tassetaṃ kammassāti ettha etanti nipātamattaṃ, tassa kammassāti attho. Piṭṭhito gaṇheyyāsīti attano piṭṭhipasseneva ucchuṃ gaṇheyyāsi. Pamoditoti pamudito.
৭৪৫. গহেত্ৰান তং খাদি যাৰদত্থন্তি থেরেন আণত্তিনিযামেন উচ্ছুং গহেত্ৰা যথারুচি খাদিত্ৰা মহন্তং উচ্ছুকলাপং গহেত্ৰা থেরস্স উপনেসি, থেরো তং অনুগ্গণ্হন্তো তেনেৰ তং উচ্ছুকলাপং গাহাপেত্ৰা ৰেল়ুৰনং গন্ত্ৰা ভগৰতো অদাসি, ভগৰা ভিক্খুসঙ্ঘেন সদ্ধিং তং পরিভুঞ্জিত্ৰা অনুমোদনং অকাসি, পেতো পসন্নচিত্তো ৰন্দিত্ৰা গতো, ততো পট্ঠায যথাসুখং উচ্ছুং পরিভুঞ্জি।
745.Gahetvāna taṃ khādi yāvadatthanti therena āṇattiniyāmena ucchuṃ gahetvā yathāruci khāditvā mahantaṃ ucchukalāpaṃ gahetvā therassa upanesi, thero taṃ anuggaṇhanto teneva taṃ ucchukalāpaṃ gāhāpetvā veḷuvanaṃ gantvā bhagavato adāsi, bhagavā bhikkhusaṅghena saddhiṃ taṃ paribhuñjitvā anumodanaṃ akāsi, peto pasannacitto vanditvā gato, tato paṭṭhāya yathāsukhaṃ ucchuṃ paribhuñji.
সো অপরেন সমযেন কালং কত্ৰা তাৰতিংসেসু উপ্পজ্জি। সা পনেসা পেতস্স পৰত্তি মনুস্সলোকে পাকটা অহোসি। অথ মনুস্সা সত্থারং উপসঙ্কমিত্ৰা তং পৰত্তিং পুচ্ছিংসু। সত্থা তেসং তমত্থং ৰিত্থারতো কথেত্ৰা ধম্মং দেসেসি, তং সুত্ৰা মনুস্সা মচ্ছেরমলতো পটিৰিরতা অহেসুন্তি।
So aparena samayena kālaṃ katvā tāvatiṃsesu uppajji. Sā panesā petassa pavatti manussaloke pākaṭā ahosi. Atha manussā satthāraṃ upasaṅkamitvā taṃ pavattiṃ pucchiṃsu. Satthā tesaṃ tamatthaṃ vitthārato kathetvā dhammaṃ desesi, taṃ sutvā manussā maccheramalato paṭiviratā ahesunti.
উচ্ছুপেতৰত্থুৰণ্ণনা নিট্ঠিতা।
Ucchupetavatthuvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পেতৰত্থুপাল়ি • Petavatthupāḷi / ৫. উচ্ছুপেতৰত্থু • 5. Ucchupetavatthu
