| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
உத³ககதா²வண்ணனா
Udakakathāvaṇṇanā
108. உத³ககதா²யங் மஹாகுச்சி²கா உத³கசாடி உத³கமணிகோ. ‘‘ஸமேக²லா சாடி உத³கமணிகோ’’திபி வத³ந்தி. தத்தா²தி தேஸு பா⁴ஜனேஸு. நிப்³ப³ஹனஉத³கந்தி ‘‘மஹோத³கங் ஆக³ந்த்வா தளாகமரியாத³ங் மா சி²ந்தீ³’’தி தளாகரக்க²ணத்த²ங் தஸ்ஸ ஏகபஸ்ஸேன விஸ்ஸஜ்ஜிதஉத³கங். நித்³த⁴மனதும்ப³ந்தி ஸஸ்ஸாதீ³னங் அத்தா²ய உத³கனிக்க²மனமக்³க³ங். மரியாத³ங் து³ப்³ப³லங் கத்வாதி இத³ங் அவஸ்ஸங் சி²ன்னஸபா⁴வத³ஸ்ஸனத்த²ங் ப⁴ண்ட³தெ³ய்யவிஸயத³ஸ்ஸனத்த²ஞ்ச வுத்தங். மரியாத³ங் து³ப்³ப³லங் அகத்வாபி யதா²வுத்தப்பயோகே³ கதே மரியாத³ங் சி²ந்தி³த்வா நிக்க²ந்தஉத³கக்³கா⁴னுரூபேன அவஹாரேன காரேதப்³ப³மேவ.
108. Udakakathāyaṃ mahākucchikā udakacāṭi udakamaṇiko. ‘‘Samekhalā cāṭi udakamaṇiko’’tipi vadanti. Tatthāti tesu bhājanesu. Nibbahanaudakanti ‘‘mahodakaṃ āgantvā taḷākamariyādaṃ mā chindī’’ti taḷākarakkhaṇatthaṃ tassa ekapassena vissajjitaudakaṃ. Niddhamanatumbanti sassādīnaṃ atthāya udakanikkhamanamaggaṃ. Mariyādaṃ dubbalaṃ katvāti idaṃ avassaṃ chinnasabhāvadassanatthaṃ bhaṇḍadeyyavisayadassanatthañca vuttaṃ. Mariyādaṃ dubbalaṃ akatvāpi yathāvuttappayoge kate mariyādaṃ chinditvā nikkhantaudakagghānurūpena avahārena kāretabbameva.
அனிக்³க³தேதி அனிக்க²மித்வா தளாகஸ்மிங்யேவ உத³கே டி²தே. அஸம்பத்தேவாதி தளாகதோ நிக்க²மித்வா மஹாமாதிகாய ஏவ டி²தே. அனிக்க²ந்தேதி தளாகதோ அனிக்க²ந்தே உத³கே. ஸுப³த்³தா⁴தி ப⁴ண்ட³தெ³ய்யம்பி ந ஹோதீதி அதி⁴ப்பாயோ. தேனாஹ ‘‘நிக்க²ந்தே ப³த்³தா⁴ ப⁴ண்ட³தெ³ய்ய’’ந்தி, தளாகதோ நிக்க²மித்வா பரேஸங் கு²த்³த³கமாதிகாமுக²ங் அபாபுணித்வா மஹாமாதிகாயங்யேவ டி²தே ப³த்³தா⁴ சே, ப⁴ண்ட³தெ³ய்யந்தி அத்தோ². ‘‘அனிக்க²ந்தே ப³த்³தா⁴ ஸுப³த்³தா⁴, நிக்க²ந்தே ப³த்³தா⁴ ப⁴ண்ட³தெ³ய்ய’’ந்தி ஹி இத³ங் த்³வயங் ஹெட்டா² வுத்தவிகப்பத்³வயஸ்ஸ யதா²க்கமேன வுத்தங். நத்தி² அவஹாரோதி எத்த² ‘‘அவஹாரோ நத்தி², ப⁴ண்ட³தெ³ய்யங் பன ஹோதீ’’தி கேசி வத³ந்தி, தளாகக³தஉத³கஸ்ஸ ஸப்³ப³ஸாதா⁴ரணத்தா தங் அயுத்தங் விய தி³ஸ்ஸதி, ‘‘அனிக்க²ந்தே ப³த்³தா⁴ ஸுப³த்³தா⁴’’தி இமினா ச அட்ட²கதா²வசனேன ந ஸமேதி. வத்து²ங்…பே॰… ந ஸமேதீதி எத்த² தளாகக³தஉத³கஸ்ஸ ஸப்³ப³ஸாதா⁴ரணத்தா அபரிக்³க³ஹிதங் இத⁴ வத்து²ந்தி அதி⁴ப்பாயோ.
Aniggateti anikkhamitvā taḷākasmiṃyeva udake ṭhite. Asampattevāti taḷākato nikkhamitvā mahāmātikāya eva ṭhite. Anikkhanteti taḷākato anikkhante udake. Subaddhāti bhaṇḍadeyyampi na hotīti adhippāyo. Tenāha ‘‘nikkhante baddhā bhaṇḍadeyya’’nti, taḷākato nikkhamitvā paresaṃ khuddakamātikāmukhaṃ apāpuṇitvā mahāmātikāyaṃyeva ṭhite baddhā ce, bhaṇḍadeyyanti attho. ‘‘Anikkhante baddhā subaddhā, nikkhante baddhā bhaṇḍadeyya’’nti hi idaṃ dvayaṃ heṭṭhā vuttavikappadvayassa yathākkamena vuttaṃ. Natthi avahāroti ettha ‘‘avahāro natthi, bhaṇḍadeyyaṃ pana hotī’’ti keci vadanti, taḷākagataudakassa sabbasādhāraṇattā taṃ ayuttaṃ viya dissati, ‘‘anikkhante baddhā subaddhā’’ti iminā ca aṭṭhakathāvacanena na sameti. Vatthuṃ…pe… na sametīti ettha taḷākagataudakassa sabbasādhāraṇattā apariggahitaṃ idha vatthunti adhippāyo.
உத³ககதா²வண்ணனா நிட்டி²தா.
Udakakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பூ⁴மட்ட²கதா²தி³வண்ணனா • Bhūmaṭṭhakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / உத³ககதா²வண்ணனா • Udakakathāvaṇṇanā
