| Library / Tipiṭaka / तिपिटक • Tipiṭaka / अपदानपाळि • Apadānapāḷi |
२. उदकपूजकत्थेरअपदानं
2. Udakapūjakattheraapadānaṃ
७.
7.
‘‘सुवण्णवण्णं सम्बुद्धं, गच्छन्तं अनिलञ्जसे।
‘‘Suvaṇṇavaṇṇaṃ sambuddhaṃ, gacchantaṃ anilañjase;
घतासनंव जलितं, आदित्तंव हुतासनं॥
Ghatāsanaṃva jalitaṃ, ādittaṃva hutāsanaṃ.
८.
8.
‘‘पाणिना उदकं गय्ह, आकासे उक्खिपिं अहं।
‘‘Pāṇinā udakaṃ gayha, ākāse ukkhipiṃ ahaṃ;
सम्पटिच्छि महावीरो, बुद्धो कारुणिको इसि॥
Sampaṭicchi mahāvīro, buddho kāruṇiko isi.
९.
9.
‘‘अन्तलिक्खे ठितो सत्था, पदुमुत्तरनामको।
‘‘Antalikkhe ṭhito satthā, padumuttaranāmako;
मम सङ्कप्पमञ्ञाय, इमं गाथमभासथ॥
Mama saṅkappamaññāya, imaṃ gāthamabhāsatha.
१०.
10.
‘‘‘इमिना दकदानेन, पीतिउप्पादनेन च।
‘‘‘Iminā dakadānena, pītiuppādanena ca;
कप्पसतसहस्सम्पि, दुग्गतिं नुपपज्जसि’॥
Kappasatasahassampi, duggatiṃ nupapajjasi’.
११.
11.
‘‘तेन कम्मेन द्विपदिन्द, लोकजेट्ठ नरासभ।
‘‘Tena kammena dvipadinda, lokajeṭṭha narāsabha;
पत्तोम्हि अचलं ठानं, हित्वा जयपराजयं॥
Pattomhi acalaṃ ṭhānaṃ, hitvā jayaparājayaṃ.
१२.
12.
‘‘सहस्सराजनामेन, तयो च चक्कवत्तिनो।
‘‘Sahassarājanāmena, tayo ca cakkavattino;
पञ्चसट्ठिकप्पसते, चातुरन्ता जनाधिपा॥
Pañcasaṭṭhikappasate, cāturantā janādhipā.
१३.
13.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा उदकपूजको थेरो इमा गाथायो अभासित्थाति।
Itthaṃ sudaṃ āyasmā udakapūjako thero imā gāthāyo abhāsitthāti.
उदकपूजकत्थेरस्सापदानं दुतियं।
Udakapūjakattherassāpadānaṃ dutiyaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / १-१०. थोमकत्थेरअपदानादिवण्णना • 1-10. Thomakattheraapadānādivaṇṇanā
