| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
6. உத³கபூஜகத்தே²ரஅபதா³னவண்ணனா
6. Udakapūjakattheraapadānavaṇṇanā
ஸுவண்ணவண்ணங் ஸம்பு³த்³த⁴ந்திஆதி³கங் ஆயஸ்மதோ உத³கபூஜகத்தே²ரஸ்ஸ அபதா³னங். அயம்பி புரிமஜினவரேஸு பூரிதகுஸலஸஞ்சயோ தத்த² தத்த² ப⁴வே விவட்டூபனிஸ்ஸயானி புஞ்ஞானி பரிபூரியமானோ புது³முத்தரஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ வுத்³தி⁴மன்வாய குஸலாகுஸலங் ஜானந்தோ பது³முத்தரஸ்ஸ ப⁴க³வதோ ஆகாஸே க³ச்ச²தோ நிக்க²ந்தச²ப்³ப³ண்ணபு³த்³த⁴ரங்ஸீஸு பஸன்னோ உபோ⁴ஹி ஹத்தே²ஹி உத³கங் க³ஹெத்வா பூஜேஸி. தேன பூஜிதங் உத³கங் ரஜதபு³ப்³பு³லங் விய ஆகாஸே அட்டா²ஸி. ஸோ அபி⁴ப்பஸன்னோ தேனேவ ஸோமனஸ்ஸேன துஸிதாதீ³ஸு நிப்³ப³த்தோ தி³ப்³ப³ஸம்பத்தியோ அனுப⁴வித்வா அபரபா⁴கே³ மனுஸ்ஸஸம்பத்தியோ ச அனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ விஞ்ஞுதங் பத்தோ ஸத்த²ரி பஸீதி³த்வா பப்³ப³ஜிதோ நசிரஸ்ஸேவ அரஹா அஹோஸி.
Suvaṇṇavaṇṇaṃsambuddhantiādikaṃ āyasmato udakapūjakattherassa apadānaṃ. Ayampi purimajinavaresu pūritakusalasañcayo tattha tattha bhave vivaṭṭūpanissayāni puññāni paripūriyamāno pudumuttarassa bhagavato kāle ekasmiṃ kulagehe nibbatto vuddhimanvāya kusalākusalaṃ jānanto padumuttarassa bhagavato ākāse gacchato nikkhantachabbaṇṇabuddharaṃsīsu pasanno ubhohi hatthehi udakaṃ gahetvā pūjesi. Tena pūjitaṃ udakaṃ rajatabubbulaṃ viya ākāse aṭṭhāsi. So abhippasanno teneva somanassena tusitādīsu nibbatto dibbasampattiyo anubhavitvā aparabhāge manussasampattiyo ca anubhavitvā imasmiṃ buddhuppāde kulagehe nibbatto viññutaṃ patto satthari pasīditvā pabbajito nacirasseva arahā ahosi.
29. ஸோ அபரபா⁴கே³ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஸுவண்ணவண்ணங் ஸம்பு³த்³த⁴ந்திஆதி³மாஹ. தங் ஹெட்டா² வுத்தமேவ. க⁴தாஸனங்வ ஜலிதந்தி க⁴தங் வுச்சதி ஸப்பி, க⁴தஸ்ஸ ஆஸனங் ஆதா⁴ரந்தி க⁴தாஸனங், அக்³கி³, அத² வா தங் அஸதி பு⁴ஞ்ஜதீதி க⁴தாஸனங் , அக்³கி³யேவ. யதா² க⁴தே ஆஸித்தே அக்³கி³ம்ஹி அக்³கி³ஸிகா² அதீவ ஜலதி, ஏவங் அக்³கி³க்க²ந்த⁴ங் இவ ஜலமானங் ப⁴க³வந்தந்தி அத்தோ². ஆதி³த்தங்வ ஹுதாஸனந்தி ஹுதங் வுச்சதி பூஜாஸக்காரே, ஹுதஸ்ஸ பூஜாஸக்காரஸ்ஸ ஆஸனந்தி ஹுதாஸனங், ஜலமானங் ஸூரியங் இவ த்³வத்திங்ஸமஹாபுரிஸலக்க²ணேஹி ப்³யாமப்பபா⁴மண்ட³லேஹி விஜ்ஜோதமானங் ஸுவண்ணவண்ணங் ஸம்பு³த்³த⁴ங் அனிலஞ்ஜஸே ஆகாஸே க³ச்ச²ந்தங் அத்³த³ஸந்தி ஸம்ப³ந்தோ⁴. ஸேஸங் ஸப்³ப³த்த² உத்தானமேவாதி.
29. So aparabhāge attano pubbakammaṃ saritvā somanassajāto pubbacaritāpadānaṃ pakāsento suvaṇṇavaṇṇaṃ sambuddhantiādimāha. Taṃ heṭṭhā vuttameva. Ghatāsanaṃva jalitanti ghataṃ vuccati sappi, ghatassa āsanaṃ ādhāranti ghatāsanaṃ, aggi, atha vā taṃ asati bhuñjatīti ghatāsanaṃ , aggiyeva. Yathā ghate āsitte aggimhi aggisikhā atīva jalati, evaṃ aggikkhandhaṃ iva jalamānaṃ bhagavantanti attho. Ādittaṃva hutāsananti hutaṃ vuccati pūjāsakkāre, hutassa pūjāsakkārassa āsananti hutāsanaṃ, jalamānaṃ sūriyaṃ iva dvattiṃsamahāpurisalakkhaṇehi byāmappabhāmaṇḍalehi vijjotamānaṃ suvaṇṇavaṇṇaṃ sambuddhaṃ anilañjase ākāse gacchantaṃ addasanti sambandho. Sesaṃ sabbattha uttānamevāti.
உத³கபூஜகத்தே²ரஅபதா³னவண்ணனா ஸமத்தா.
Udakapūjakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 6. உத³கபூஜகத்தே²ரஅபதா³னங் • 6. Udakapūjakattheraapadānaṃ
