| Library / Tipiṭaka / ਤਿਪਿਟਕ • Tipiṭaka / ਅਪਦਾਨ-ਅਟ੍ਠਕਥਾ • Apadāna-aṭṭhakathā |
੬. ਉਦਕਪੂਜਕਤ੍ਥੇਰਅਪਦਾਨવਣ੍ਣਨਾ
6. Udakapūjakattheraapadānavaṇṇanā
ਸੁવਣ੍ਣવਣ੍ਣਂ ਸਮ੍ਬੁਦ੍ਧਨ੍ਤਿਆਦਿਕਂ ਆਯਸ੍ਮਤੋ ਉਦਕਪੂਜਕਤ੍ਥੇਰਸ੍ਸ ਅਪਦਾਨਂ। ਅਯਮ੍ਪਿ ਪੁਰਿਮਜਿਨવਰੇਸੁ ਪੂਰਿਤਕੁਸਲਸਞ੍ਚਯੋ ਤਤ੍ਥ ਤਤ੍ਥ ਭવੇ વਿવਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਪਰਿਪੂਰਿਯਮਾਨੋ ਪੁਦੁਮੁਤ੍ਤਰਸ੍ਸ ਭਗવਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ વੁਦ੍ਧਿਮਨ੍વਾਯ ਕੁਸਲਾਕੁਸਲਂ ਜਾਨਨ੍ਤੋ ਪਦੁਮੁਤ੍ਤਰਸ੍ਸ ਭਗવਤੋ ਆਕਾਸੇ ਗਚ੍ਛਤੋ ਨਿਕ੍ਖਨ੍ਤਛਬ੍ਬਣ੍ਣਬੁਦ੍ਧਰਂਸੀਸੁ ਪਸਨ੍ਨੋ ਉਭੋਹਿ ਹਤ੍ਥੇਹਿ ਉਦਕਂ ਗਹੇਤ੍વਾ ਪੂਜੇਸਿ। ਤੇਨ ਪੂਜਿਤਂ ਉਦਕਂ ਰਜਤਬੁਬ੍ਬੁਲਂ વਿਯ ਆਕਾਸੇ ਅਟ੍ਠਾਸਿ। ਸੋ ਅਭਿਪ੍ਪਸਨ੍ਨੋ ਤੇਨੇવ ਸੋਮਨਸ੍ਸੇਨ ਤੁਸਿਤਾਦੀਸੁ ਨਿਬ੍ਬਤ੍ਤੋ ਦਿਬ੍ਬਸਮ੍ਪਤ੍ਤਿਯੋ ਅਨੁਭવਿਤ੍વਾ ਅਪਰਭਾਗੇ ਮਨੁਸ੍ਸਸਮ੍ਪਤ੍ਤਿਯੋ ਚ ਅਨੁਭવਿਤ੍વਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ વਿਞ੍ਞੁਤਂ ਪਤ੍ਤੋ ਸਤ੍ਥਰਿ ਪਸੀਦਿਤ੍વਾ ਪਬ੍ਬਜਿਤੋ ਨਚਿਰਸ੍ਸੇવ ਅਰਹਾ ਅਹੋਸਿ।
Suvaṇṇavaṇṇaṃsambuddhantiādikaṃ āyasmato udakapūjakattherassa apadānaṃ. Ayampi purimajinavaresu pūritakusalasañcayo tattha tattha bhave vivaṭṭūpanissayāni puññāni paripūriyamāno pudumuttarassa bhagavato kāle ekasmiṃ kulagehe nibbatto vuddhimanvāya kusalākusalaṃ jānanto padumuttarassa bhagavato ākāse gacchato nikkhantachabbaṇṇabuddharaṃsīsu pasanno ubhohi hatthehi udakaṃ gahetvā pūjesi. Tena pūjitaṃ udakaṃ rajatabubbulaṃ viya ākāse aṭṭhāsi. So abhippasanno teneva somanassena tusitādīsu nibbatto dibbasampattiyo anubhavitvā aparabhāge manussasampattiyo ca anubhavitvā imasmiṃ buddhuppāde kulagehe nibbatto viññutaṃ patto satthari pasīditvā pabbajito nacirasseva arahā ahosi.
੨੯. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍વਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸੁવਣ੍ਣવਣ੍ਣਂ ਸਮ੍ਬੁਦ੍ਧਨ੍ਤਿਆਦਿਮਾਹ। ਤਂ ਹੇਟ੍ਠਾ વੁਤ੍ਤਮੇવ। ਘਤਾਸਨਂવ ਜਲਿਤਨ੍ਤਿ ਘਤਂ વੁਚ੍ਚਤਿ ਸਪ੍ਪਿ, ਘਤਸ੍ਸ ਆਸਨਂ ਆਧਾਰਨ੍ਤਿ ਘਤਾਸਨਂ, ਅਗ੍ਗਿ, ਅਥ વਾ ਤਂ ਅਸਤਿ ਭੁਞ੍ਜਤੀਤਿ ਘਤਾਸਨਂ , ਅਗ੍ਗਿਯੇવ। ਯਥਾ ਘਤੇ ਆਸਿਤ੍ਤੇ ਅਗ੍ਗਿਮ੍ਹਿ ਅਗ੍ਗਿਸਿਖਾ ਅਤੀવ ਜਲਤਿ, ਏવਂ ਅਗ੍ਗਿਕ੍ਖਨ੍ਧਂ ਇવ ਜਲਮਾਨਂ ਭਗવਨ੍ਤਨ੍ਤਿ ਅਤ੍ਥੋ। ਆਦਿਤ੍ਤਂવ ਹੁਤਾਸਨਨ੍ਤਿ ਹੁਤਂ વੁਚ੍ਚਤਿ ਪੂਜਾਸਕ੍ਕਾਰੇ, ਹੁਤਸ੍ਸ ਪੂਜਾਸਕ੍ਕਾਰਸ੍ਸ ਆਸਨਨ੍ਤਿ ਹੁਤਾਸਨਂ, ਜਲਮਾਨਂ ਸੂਰਿਯਂ ਇવ ਦ੍વਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਬ੍ਯਾਮਪ੍ਪਭਾਮਣ੍ਡਲੇਹਿ વਿਜ੍ਜੋਤਮਾਨਂ ਸੁવਣ੍ਣવਣ੍ਣਂ ਸਮ੍ਬੁਦ੍ਧਂ ਅਨਿਲਞ੍ਜਸੇ ਆਕਾਸੇ ਗਚ੍ਛਨ੍ਤਂ ਅਦ੍ਦਸਨ੍ਤਿ ਸਮ੍ਬਨ੍ਧੋ। ਸੇਸਂ ਸਬ੍ਬਤ੍ਥ ਉਤ੍ਤਾਨਮੇવਾਤਿ।
29. So aparabhāge attano pubbakammaṃ saritvā somanassajāto pubbacaritāpadānaṃ pakāsento suvaṇṇavaṇṇaṃ sambuddhantiādimāha. Taṃ heṭṭhā vuttameva. Ghatāsanaṃva jalitanti ghataṃ vuccati sappi, ghatassa āsanaṃ ādhāranti ghatāsanaṃ, aggi, atha vā taṃ asati bhuñjatīti ghatāsanaṃ , aggiyeva. Yathā ghate āsitte aggimhi aggisikhā atīva jalati, evaṃ aggikkhandhaṃ iva jalamānaṃ bhagavantanti attho. Ādittaṃva hutāsananti hutaṃ vuccati pūjāsakkāre, hutassa pūjāsakkārassa āsananti hutāsanaṃ, jalamānaṃ sūriyaṃ iva dvattiṃsamahāpurisalakkhaṇehi byāmappabhāmaṇḍalehi vijjotamānaṃ suvaṇṇavaṇṇaṃ sambuddhaṃ anilañjase ākāse gacchantaṃ addasanti sambandho. Sesaṃ sabbattha uttānamevāti.
ਉਦਕਪੂਜਕਤ੍ਥੇਰਅਪਦਾਨવਣ੍ਣਨਾ ਸਮਤ੍ਤਾ।
Udakapūjakattheraapadānavaṇṇanā samattā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਅਪਦਾਨਪਾਲ਼ਿ • Apadānapāḷi / ੬. ਉਦਕਪੂਜਕਤ੍ਥੇਰਅਪਦਾਨਂ • 6. Udakapūjakattheraapadānaṃ
