1-10.உத³காஸனதா³யகத்தே²ரஅபதா³னாதி³வண்ணனா

1-10.Udakāsanadāyakattheraapadānādivaṇṇanā

சதுவீஸதிமே வக்³கே³ பட²மது³தியாபதா³னானி உத்தானானேவ.

Catuvīsatime vagge paṭhamadutiyāpadānāni uttānāneva.

9. ததியாபதா³னே அருணவதியா நக³ரேதி ஆ ஸமந்ததோ ஆலோகங் கரொந்தோ உணதி உக்³க³ச்ச²தீதி அருணோ, ஸோ தஸ்மிங் விஜ்ஜதீதி அருணவதீ, தஸ்மிங் நக³ரே ஆலோகங் கரொந்தோ ஸூரியோ உக்³க³ச்ச²தீதி அத்தோ². ஸேஸனக³ரேஸுபி ஸூரியுக்³க³மனே விஜ்ஜமானேபி விஸேஸவசனங் ஸப்³ப³சதுப்பதா³னங் மஹியங் ஸயனேபி ஸதி மஹியங் ஸயதீதி மஹிங்ஸோதி வசனங் விய ரூள்ஹிவஸேன வுத்தந்தி வேதி³தப்³ப³ங். அத² வா பாகாரபாஸாத³ஹம்மியாதீ³ஸு ஸுவண்ணரஜதமணிமுத்தாதி³ஸத்தரதனபபா⁴ஹி அருணுக்³க³மனங் விய பபா⁴வதீ அருணவதீ நாம, தஸ்மிங் அருணவதியா நக³ரே, பூபிகோ பூபவிக்கயேன ஜீவிகங் கப்பெந்தோ அஹோஸிந்தி அத்தோ².

9. Tatiyāpadāne aruṇavatiyā nagareti ā samantato ālokaṃ karonto uṇati uggacchatīti aruṇo, so tasmiṃ vijjatīti aruṇavatī, tasmiṃ nagare ālokaṃ karonto sūriyo uggacchatīti attho. Sesanagaresupi sūriyuggamane vijjamānepi visesavacanaṃ sabbacatuppadānaṃ mahiyaṃ sayanepi sati mahiyaṃ sayatīti mahiṃsoti vacanaṃ viya rūḷhivasena vuttanti veditabbaṃ. Atha vā pākārapāsādahammiyādīsu suvaṇṇarajatamaṇimuttādisattaratanapabhāhi aruṇuggamanaṃ viya pabhāvatī aruṇavatī nāma, tasmiṃ aruṇavatiyā nagare, pūpiko pūpavikkayena jīvikaṃ kappento ahosinti attho.

14. சதுத்தா²பதா³னே திவராயங் புரே ரம்மேதி தீஹி பாகாரேஹி பரிவாரிதா பரிக்கி²த்தாதி திவரா, க²ஜ்ஜபோ⁴ஜ்ஜாதி³உபபோ⁴க³வத்தா²ப⁴ரணாதி³னச்சகீ³தாதீ³ஹி ரமணீயந்தி ரம்மங், தஸ்மிங் திவராயங் புரே நக³ரே ரம்மே நளகாரோ அஹங் அஹோஸிந்தி ஸம்ப³ந்தோ⁴.

14. Catutthāpadāne tivarāyaṃ pure rammeti tīhi pākārehi parivāritā parikkhittāti tivarā, khajjabhojjādiupabhogavatthābharaṇādinaccagītādīhi ramaṇīyanti rammaṃ, tasmiṃ tivarāyaṃ pure nagare ramme naḷakāro ahaṃ ahosinti sambandho.

பஞ்சமாபதா³னங் உத்தானத்த²மேவ.

Pañcamāpadānaṃ uttānatthameva.

23. ச²ட்டா²பதா³னே வண்ணகாரோ அஹங் ததா³தி நீலபீதரத்தாதி³வண்ணவஸேன வத்தா²னி கரோதி ரஞ்ஜேதீதி வண்ணகாரோ. வத்த²ரஜகோ ஹுத்வா சேதியே வத்தே²ஹி அச்சா²த³னஸமயே நானாவண்ணேஹி து³ஸ்ஸானி ரஞ்ஜேஸிந்தி அத்தோ².

23. Chaṭṭhāpadāne vaṇṇakāro ahaṃ tadāti nīlapītarattādivaṇṇavasena vatthāni karoti rañjetīti vaṇṇakāro. Vattharajako hutvā cetiye vatthehi acchādanasamaye nānāvaṇṇehi dussāni rañjesinti attho.

27. ஸத்தமாபதா³னே பியாலங் புப்பி²தங் தி³ஸ்வாதி ஸுபுப்பி²தங் பியாலருக்க²ங் தி³ஸ்வா. க³தமக்³கே³ கி²பிங் அஹந்தி அஹங் மிக³லுத்³தோ³ நேஸாதோ³ ஹுத்வா பியாலபுப்ப²ங் ஓசினித்வா பு³த்³த⁴ஸ்ஸ க³தமக்³கே³ கி²பிங் பூஜேஸிந்தி அத்தோ².

27. Sattamāpadāne piyālaṃ pupphitaṃ disvāti supupphitaṃ piyālarukkhaṃ disvā. Gatamagge khipiṃahanti ahaṃ migaluddo nesādo hutvā piyālapupphaṃ ocinitvā buddhassa gatamagge khipiṃ pūjesinti attho.

30. அட்ட²மாபதா³னே ஸகே ஸிப்பே அபத்த²த்³தோ⁴தி அத்தனோ தக்கப்³யாகரணாதி³ஸிப்பஸ்மிங் அபத்த²த்³தோ⁴ பதிட்டி²தோ சே²கோ அஹங் கானநங் அக³மங் க³தோ ஸம்பு³த்³த⁴ங் யந்தங் தி³ஸ்வானாதி வனந்தரே க³ச்ச²ந்தங் விபஸ்ஸிங் ஸம்பு³த்³த⁴ங் பஸ்ஸித்வா. அம்ப³யாக³ங் அதா³ஸஹந்தி அஹங் அம்ப³தா³னங் அதா³ஸிந்தி அத்தோ².

30. Aṭṭhamāpadāne sake sippe apatthaddhoti attano takkabyākaraṇādisippasmiṃ apatthaddho patiṭṭhito cheko ahaṃ kānanaṃ agamaṃ gato sambuddhaṃ yantaṃ disvānāti vanantare gacchantaṃ vipassiṃ sambuddhaṃ passitvā. Ambayāgaṃ adāsahanti ahaṃ ambadānaṃ adāsinti attho.

33. நவமாபதா³னே ஜக³தீ காரிதா மய்ஹந்தி அத்த²த³ஸ்ஸிஸ்ஸ ப⁴க³வதோ ஸரீரதா⁴துனிதா⁴பிதசேதியே ஜக³தி சி²ன்னபி⁴ன்னஆலிந்த³புப்பா²தா⁴னஸங்கா²தா ஜக³தி மயா காரிதா காராபிதாதி அத்தோ².

33. Navamāpadāne jagatī kāritā mayhanti atthadassissa bhagavato sarīradhātunidhāpitacetiye jagati chinnabhinnaālindapupphādhānasaṅkhātā jagati mayā kāritā kārāpitāti attho.

த³ஸமாபதா³னங் உத்தானத்த²மேவாதி.

Dasamāpadānaṃ uttānatthamevāti.

சதுவீஸதிமவக்³க³வண்ணனா ஸமத்தா.

Catuvīsatimavaggavaṇṇanā samattā.

Next: 25. துவரதா³யகவக்³கோ³ • 25. Tuvaradāyakavaggo

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact