| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
২৪. উদকাসনৰগ্গো
24. Udakāsanavaggo
১-১০.উদকাসনদাযকত্থেরঅপদানাদিৰণ্ণনা
1-10.Udakāsanadāyakattheraapadānādivaṇṇanā
চতুৰীসতিমে ৰগ্গে পঠমদুতিযাপদানানি উত্তানানেৰ।
Catuvīsatime vagge paṭhamadutiyāpadānāni uttānāneva.
৯. ততিযাপদানে অরুণৰতিযা নগরেতি আ সমন্ততো আলোকং করোন্তো উণতি উগ্গচ্ছতীতি অরুণো, সো তস্মিং ৰিজ্জতীতি অরুণৰতী, তস্মিং নগরে আলোকং করোন্তো সূরিযো উগ্গচ্ছতীতি অত্থো। সেসনগরেসুপি সূরিযুগ্গমনে ৰিজ্জমানেপি ৰিসেসৰচনং সব্বচতুপ্পদানং মহিযং সযনেপি সতি মহিযং সযতীতি মহিংসোতি ৰচনং ৰিয রূল়্হিৰসেন ৰুত্তন্তি ৰেদিতব্বং। অথ ৰা পাকারপাসাদহম্মিযাদীসু সুৰণ্ণরজতমণিমুত্তাদিসত্তরতনপভাহি অরুণুগ্গমনং ৰিয পভাৰতী অরুণৰতী নাম, তস্মিং অরুণৰতিযা নগরে, পূপিকো পূপৰিক্কযেন জীৰিকং কপ্পেন্তো অহোসিন্তি অত্থো।
9. Tatiyāpadāne aruṇavatiyā nagareti ā samantato ālokaṃ karonto uṇati uggacchatīti aruṇo, so tasmiṃ vijjatīti aruṇavatī, tasmiṃ nagare ālokaṃ karonto sūriyo uggacchatīti attho. Sesanagaresupi sūriyuggamane vijjamānepi visesavacanaṃ sabbacatuppadānaṃ mahiyaṃ sayanepi sati mahiyaṃ sayatīti mahiṃsoti vacanaṃ viya rūḷhivasena vuttanti veditabbaṃ. Atha vā pākārapāsādahammiyādīsu suvaṇṇarajatamaṇimuttādisattaratanapabhāhi aruṇuggamanaṃ viya pabhāvatī aruṇavatī nāma, tasmiṃ aruṇavatiyā nagare, pūpiko pūpavikkayena jīvikaṃ kappento ahosinti attho.
১৪. চতুত্থাপদানে তিৰরাযং পুরে রম্মেতি তীহি পাকারেহি পরিৰারিতা পরিক্খিত্তাতি তিৰরা, খজ্জভোজ্জাদিউপভোগৰত্থাভরণাদিনচ্চগীতাদীহি রমণীযন্তি রম্মং, তস্মিং তিৰরাযং পুরে নগরে রম্মে নল়কারো অহং অহোসিন্তি সম্বন্ধো।
14. Catutthāpadāne tivarāyaṃ pure rammeti tīhi pākārehi parivāritā parikkhittāti tivarā, khajjabhojjādiupabhogavatthābharaṇādinaccagītādīhi ramaṇīyanti rammaṃ, tasmiṃ tivarāyaṃ pure nagare ramme naḷakāro ahaṃ ahosinti sambandho.
পঞ্চমাপদানং উত্তানত্থমেৰ।
Pañcamāpadānaṃ uttānatthameva.
২৩. ছট্ঠাপদানে ৰণ্ণকারো অহং তদাতি নীলপীতরত্তাদিৰণ্ণৰসেন ৰত্থানি করোতি রঞ্জেতীতি ৰণ্ণকারো। ৰত্থরজকো হুত্ৰা চেতিযে ৰত্থেহি অচ্ছাদনসমযে নানাৰণ্ণেহি দুস্সানি রঞ্জেসিন্তি অত্থো।
23. Chaṭṭhāpadāne vaṇṇakāro ahaṃ tadāti nīlapītarattādivaṇṇavasena vatthāni karoti rañjetīti vaṇṇakāro. Vattharajako hutvā cetiye vatthehi acchādanasamaye nānāvaṇṇehi dussāni rañjesinti attho.
২৭. সত্তমাপদানে পিযালং পুপ্ফিতং দিস্ৰাতি সুপুপ্ফিতং পিযালরুক্খং দিস্ৰা। গতমগ্গে খিপিং অহন্তি অহং মিগলুদ্দো নেসাদো হুত্ৰা পিযালপুপ্ফং ওচিনিত্ৰা বুদ্ধস্স গতমগ্গে খিপিং পূজেসিন্তি অত্থো।
27. Sattamāpadāne piyālaṃ pupphitaṃ disvāti supupphitaṃ piyālarukkhaṃ disvā. Gatamagge khipiṃahanti ahaṃ migaluddo nesādo hutvā piyālapupphaṃ ocinitvā buddhassa gatamagge khipiṃ pūjesinti attho.
৩০. অট্ঠমাপদানে সকে সিপ্পে অপত্থদ্ধোতি অত্তনো তক্কব্যাকরণাদিসিপ্পস্মিং অপত্থদ্ধো পতিট্ঠিতো ছেকো অহং কাননং অগমং গতো সম্বুদ্ধং যন্তং দিস্ৰানাতি ৰনন্তরে গচ্ছন্তং ৰিপস্সিং সম্বুদ্ধং পস্সিত্ৰা। অম্বযাগং অদাসহন্তি অহং অম্বদানং অদাসিন্তি অত্থো।
30. Aṭṭhamāpadāne sake sippe apatthaddhoti attano takkabyākaraṇādisippasmiṃ apatthaddho patiṭṭhito cheko ahaṃ kānanaṃ agamaṃ gato sambuddhaṃ yantaṃ disvānāti vanantare gacchantaṃ vipassiṃ sambuddhaṃ passitvā. Ambayāgaṃ adāsahanti ahaṃ ambadānaṃ adāsinti attho.
৩৩. নৰমাপদানে জগতী কারিতা ময্হন্তি অত্থদস্সিস্স ভগৰতো সরীরধাতুনিধাপিতচেতিযে জগতি ছিন্নভিন্নআলিন্দপুপ্ফাধানসঙ্খাতা জগতি মযা কারিতা কারাপিতাতি অত্থো।
33. Navamāpadāne jagatī kāritā mayhanti atthadassissa bhagavato sarīradhātunidhāpitacetiye jagati chinnabhinnaālindapupphādhānasaṅkhātā jagati mayā kāritā kārāpitāti attho.
দসমাপদানং উত্তানত্থমেৰাতি।
Dasamāpadānaṃ uttānatthamevāti.
চতুৰীসতিমৰগ্গৰণ্ণনা সমত্তা।
Catuvīsatimavaggavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi
৩. সালপুপ্ফিযত্থেরঅপদানং • 3. Sālapupphiyattheraapadānaṃ
৪. কিলঞ্জদাযকত্থেরঅপদানং • 4. Kilañjadāyakattheraapadānaṃ
৬. ৰণ্ণকারত্থেরঅপদানং • 6. Vaṇṇakārattheraapadānaṃ
৭. পিযালপুপ্ফিযত্থেরঅপদানং • 7. Piyālapupphiyattheraapadānaṃ
৮. অম্বযাগদাযকত্থেরঅপদানং • 8. Ambayāgadāyakattheraapadānaṃ
৯. জগতিকারকত্থেরঅপদানং • 9. Jagatikārakattheraapadānaṃ
