| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೨೪. ಉದಕಾಸನವಗ್ಗೋ
24. Udakāsanavaggo
೧-೧೦.ಉದಕಾಸನದಾಯಕತ್ಥೇರಅಪದಾನಾದಿವಣ್ಣನಾ
1-10.Udakāsanadāyakattheraapadānādivaṇṇanā
ಚತುವೀಸತಿಮೇ ವಗ್ಗೇ ಪಠಮದುತಿಯಾಪದಾನಾನಿ ಉತ್ತಾನಾನೇವ।
Catuvīsatime vagge paṭhamadutiyāpadānāni uttānāneva.
೯. ತತಿಯಾಪದಾನೇ ಅರುಣವತಿಯಾ ನಗರೇತಿ ಆ ಸಮನ್ತತೋ ಆಲೋಕಂ ಕರೋನ್ತೋ ಉಣತಿ ಉಗ್ಗಚ್ಛತೀತಿ ಅರುಣೋ, ಸೋ ತಸ್ಮಿಂ ವಿಜ್ಜತೀತಿ ಅರುಣವತೀ, ತಸ್ಮಿಂ ನಗರೇ ಆಲೋಕಂ ಕರೋನ್ತೋ ಸೂರಿಯೋ ಉಗ್ಗಚ್ಛತೀತಿ ಅತ್ಥೋ। ಸೇಸನಗರೇಸುಪಿ ಸೂರಿಯುಗ್ಗಮನೇ ವಿಜ್ಜಮಾನೇಪಿ ವಿಸೇಸವಚನಂ ಸಬ್ಬಚತುಪ್ಪದಾನಂ ಮಹಿಯಂ ಸಯನೇಪಿ ಸತಿ ಮಹಿಯಂ ಸಯತೀತಿ ಮಹಿಂಸೋತಿ ವಚನಂ ವಿಯ ರೂಳ್ಹಿವಸೇನ ವುತ್ತನ್ತಿ ವೇದಿತಬ್ಬಂ। ಅಥ ವಾ ಪಾಕಾರಪಾಸಾದಹಮ್ಮಿಯಾದೀಸು ಸುವಣ್ಣರಜತಮಣಿಮುತ್ತಾದಿಸತ್ತರತನಪಭಾಹಿ ಅರುಣುಗ್ಗಮನಂ ವಿಯ ಪಭಾವತೀ ಅರುಣವತೀ ನಾಮ, ತಸ್ಮಿಂ ಅರುಣವತಿಯಾ ನಗರೇ, ಪೂಪಿಕೋ ಪೂಪವಿಕ್ಕಯೇನ ಜೀವಿಕಂ ಕಪ್ಪೇನ್ತೋ ಅಹೋಸಿನ್ತಿ ಅತ್ಥೋ।
9. Tatiyāpadāne aruṇavatiyā nagareti ā samantato ālokaṃ karonto uṇati uggacchatīti aruṇo, so tasmiṃ vijjatīti aruṇavatī, tasmiṃ nagare ālokaṃ karonto sūriyo uggacchatīti attho. Sesanagaresupi sūriyuggamane vijjamānepi visesavacanaṃ sabbacatuppadānaṃ mahiyaṃ sayanepi sati mahiyaṃ sayatīti mahiṃsoti vacanaṃ viya rūḷhivasena vuttanti veditabbaṃ. Atha vā pākārapāsādahammiyādīsu suvaṇṇarajatamaṇimuttādisattaratanapabhāhi aruṇuggamanaṃ viya pabhāvatī aruṇavatī nāma, tasmiṃ aruṇavatiyā nagare, pūpiko pūpavikkayena jīvikaṃ kappento ahosinti attho.
೧೪. ಚತುತ್ಥಾಪದಾನೇ ತಿವರಾಯಂ ಪುರೇ ರಮ್ಮೇತಿ ತೀಹಿ ಪಾಕಾರೇಹಿ ಪರಿವಾರಿತಾ ಪರಿಕ್ಖಿತ್ತಾತಿ ತಿವರಾ, ಖಜ್ಜಭೋಜ್ಜಾದಿಉಪಭೋಗವತ್ಥಾಭರಣಾದಿನಚ್ಚಗೀತಾದೀಹಿ ರಮಣೀಯನ್ತಿ ರಮ್ಮಂ, ತಸ್ಮಿಂ ತಿವರಾಯಂ ಪುರೇ ನಗರೇ ರಮ್ಮೇ ನಳಕಾರೋ ಅಹಂ ಅಹೋಸಿನ್ತಿ ಸಮ್ಬನ್ಧೋ।
14. Catutthāpadāne tivarāyaṃ pure rammeti tīhi pākārehi parivāritā parikkhittāti tivarā, khajjabhojjādiupabhogavatthābharaṇādinaccagītādīhi ramaṇīyanti rammaṃ, tasmiṃ tivarāyaṃ pure nagare ramme naḷakāro ahaṃ ahosinti sambandho.
ಪಞ್ಚಮಾಪದಾನಂ ಉತ್ತಾನತ್ಥಮೇವ।
Pañcamāpadānaṃ uttānatthameva.
೨೩. ಛಟ್ಠಾಪದಾನೇ ವಣ್ಣಕಾರೋ ಅಹಂ ತದಾತಿ ನೀಲಪೀತರತ್ತಾದಿವಣ್ಣವಸೇನ ವತ್ಥಾನಿ ಕರೋತಿ ರಞ್ಜೇತೀತಿ ವಣ್ಣಕಾರೋ। ವತ್ಥರಜಕೋ ಹುತ್ವಾ ಚೇತಿಯೇ ವತ್ಥೇಹಿ ಅಚ್ಛಾದನಸಮಯೇ ನಾನಾವಣ್ಣೇಹಿ ದುಸ್ಸಾನಿ ರಞ್ಜೇಸಿನ್ತಿ ಅತ್ಥೋ।
23. Chaṭṭhāpadāne vaṇṇakāro ahaṃ tadāti nīlapītarattādivaṇṇavasena vatthāni karoti rañjetīti vaṇṇakāro. Vattharajako hutvā cetiye vatthehi acchādanasamaye nānāvaṇṇehi dussāni rañjesinti attho.
೨೭. ಸತ್ತಮಾಪದಾನೇ ಪಿಯಾಲಂ ಪುಪ್ಫಿತಂ ದಿಸ್ವಾತಿ ಸುಪುಪ್ಫಿತಂ ಪಿಯಾಲರುಕ್ಖಂ ದಿಸ್ವಾ। ಗತಮಗ್ಗೇ ಖಿಪಿಂ ಅಹನ್ತಿ ಅಹಂ ಮಿಗಲುದ್ದೋ ನೇಸಾದೋ ಹುತ್ವಾ ಪಿಯಾಲಪುಪ್ಫಂ ಓಚಿನಿತ್ವಾ ಬುದ್ಧಸ್ಸ ಗತಮಗ್ಗೇ ಖಿಪಿಂ ಪೂಜೇಸಿನ್ತಿ ಅತ್ಥೋ।
27. Sattamāpadāne piyālaṃ pupphitaṃ disvāti supupphitaṃ piyālarukkhaṃ disvā. Gatamagge khipiṃahanti ahaṃ migaluddo nesādo hutvā piyālapupphaṃ ocinitvā buddhassa gatamagge khipiṃ pūjesinti attho.
೩೦. ಅಟ್ಠಮಾಪದಾನೇ ಸಕೇ ಸಿಪ್ಪೇ ಅಪತ್ಥದ್ಧೋತಿ ಅತ್ತನೋ ತಕ್ಕಬ್ಯಾಕರಣಾದಿಸಿಪ್ಪಸ್ಮಿಂ ಅಪತ್ಥದ್ಧೋ ಪತಿಟ್ಠಿತೋ ಛೇಕೋ ಅಹಂ ಕಾನನಂ ಅಗಮಂ ಗತೋ ಸಮ್ಬುದ್ಧಂ ಯನ್ತಂ ದಿಸ್ವಾನಾತಿ ವನನ್ತರೇ ಗಚ್ಛನ್ತಂ ವಿಪಸ್ಸಿಂ ಸಮ್ಬುದ್ಧಂ ಪಸ್ಸಿತ್ವಾ। ಅಮ್ಬಯಾಗಂ ಅದಾಸಹನ್ತಿ ಅಹಂ ಅಮ್ಬದಾನಂ ಅದಾಸಿನ್ತಿ ಅತ್ಥೋ।
30. Aṭṭhamāpadāne sake sippe apatthaddhoti attano takkabyākaraṇādisippasmiṃ apatthaddho patiṭṭhito cheko ahaṃ kānanaṃ agamaṃ gato sambuddhaṃ yantaṃ disvānāti vanantare gacchantaṃ vipassiṃ sambuddhaṃ passitvā. Ambayāgaṃ adāsahanti ahaṃ ambadānaṃ adāsinti attho.
೩೩. ನವಮಾಪದಾನೇ ಜಗತೀ ಕಾರಿತಾ ಮಯ್ಹನ್ತಿ ಅತ್ಥದಸ್ಸಿಸ್ಸ ಭಗವತೋ ಸರೀರಧಾತುನಿಧಾಪಿತಚೇತಿಯೇ ಜಗತಿ ಛಿನ್ನಭಿನ್ನಆಲಿನ್ದಪುಪ್ಫಾಧಾನಸಙ್ಖಾತಾ ಜಗತಿ ಮಯಾ ಕಾರಿತಾ ಕಾರಾಪಿತಾತಿ ಅತ್ಥೋ।
33. Navamāpadāne jagatī kāritā mayhanti atthadassissa bhagavato sarīradhātunidhāpitacetiye jagati chinnabhinnaālindapupphādhānasaṅkhātā jagati mayā kāritā kārāpitāti attho.
ದಸಮಾಪದಾನಂ ಉತ್ತಾನತ್ಥಮೇವಾತಿ।
Dasamāpadānaṃ uttānatthamevāti.
ಚತುವೀಸತಿಮವಗ್ಗವಣ್ಣನಾ ಸಮತ್ತಾ।
Catuvīsatimavaggavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi
೩. ಸಾಲಪುಪ್ಫಿಯತ್ಥೇರಅಪದಾನಂ • 3. Sālapupphiyattheraapadānaṃ
೪. ಕಿಲಞ್ಜದಾಯಕತ್ಥೇರಅಪದಾನಂ • 4. Kilañjadāyakattheraapadānaṃ
೬. ವಣ್ಣಕಾರತ್ಥೇರಅಪದಾನಂ • 6. Vaṇṇakārattheraapadānaṃ
೭. ಪಿಯಾಲಪುಪ್ಫಿಯತ್ಥೇರಅಪದಾನಂ • 7. Piyālapupphiyattheraapadānaṃ
೮. ಅಮ್ಬಯಾಗದಾಯಕತ್ಥೇರಅಪದಾನಂ • 8. Ambayāgadāyakattheraapadānaṃ
೯. ಜಗತಿಕಾರಕತ್ಥೇರಅಪದಾನಂ • 9. Jagatikārakattheraapadānaṃ
