| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
24. උදකාසනවග්‌ගො
24. Udakāsanavaggo
1-10.උදකාසනදායකත්‌ථෙරඅපදානාදිවණ්‌ණනා
1-10.Udakāsanadāyakattheraapadānādivaṇṇanā
චතුවීසතිමෙ වග්‌ගෙ පඨමදුතියාපදානානි උත්‌තානානෙව.
Catuvīsatime vagge paṭhamadutiyāpadānāni uttānāneva.
9. තතියාපදානෙ අරුණවතියා නගරෙති ආ සමන්‌තතො ආලොකං කරොන්‌තො උණති උග්‌ගච්‌ඡතීති අරුණො, සො තස්‌මිං විජ්‌ජතීති අරුණවතී, තස්‌මිං නගරෙ ආලොකං කරොන්‌තො සූරියො උග්‌ගච්‌ඡතීති අත්‌ථො. සෙසනගරෙසුපි සූරියුග්‌ගමනෙ විජ්‌ජමානෙපි විසෙසවචනං සබ්‌බචතුප්‌පදානං මහියං සයනෙපි සති මහියං සයතීති මහිංසොති වචනං විය රූළ්‌හිවසෙන වුත්‌තන්‌ති වෙදිතබ්‌බං. අථ වා පාකාරපාසාදහම්‌මියාදීසු සුවණ්‌ණරජතමණිමුත්‌තාදිසත්‌තරතනපභාහි අරුණුග්‌ගමනං විය පභාවතී අරුණවතී නාම, තස්‌මිං අරුණවතියා නගරෙ, පූපිකො පූපවික්‌කයෙන ජීවිකං කප්‌පෙන්‌තො අහොසින්‌ති අත්‌ථො.
9. Tatiyāpadāne aruṇavatiyā nagareti ā samantato ālokaṃ karonto uṇati uggacchatīti aruṇo, so tasmiṃ vijjatīti aruṇavatī, tasmiṃ nagare ālokaṃ karonto sūriyo uggacchatīti attho. Sesanagaresupi sūriyuggamane vijjamānepi visesavacanaṃ sabbacatuppadānaṃ mahiyaṃ sayanepi sati mahiyaṃ sayatīti mahiṃsoti vacanaṃ viya rūḷhivasena vuttanti veditabbaṃ. Atha vā pākārapāsādahammiyādīsu suvaṇṇarajatamaṇimuttādisattaratanapabhāhi aruṇuggamanaṃ viya pabhāvatī aruṇavatī nāma, tasmiṃ aruṇavatiyā nagare, pūpiko pūpavikkayena jīvikaṃ kappento ahosinti attho.
14. චතුත්‌ථාපදානෙ තිවරායං පුරෙ රම්‌මෙති තීහි පාකාරෙහි පරිවාරිතා පරික්‌ඛිත්‌තාති තිවරා, ඛජ්‌ජභොජ්‌ජාදිඋපභොගවත්‌ථාභරණාදිනච්‌චගීතාදීහි රමණීයන්‌ති රම්‌මං, තස්‌මිං තිවරායං පුරෙ නගරෙ රම්‌මෙ නළකාරො අහං අහොසින්‌ති සම්‌බන්‌ධො.
14. Catutthāpadāne tivarāyaṃ pure rammeti tīhi pākārehi parivāritā parikkhittāti tivarā, khajjabhojjādiupabhogavatthābharaṇādinaccagītādīhi ramaṇīyanti rammaṃ, tasmiṃ tivarāyaṃ pure nagare ramme naḷakāro ahaṃ ahosinti sambandho.
පඤ්‌චමාපදානං උත්‌තානත්‌ථමෙව.
Pañcamāpadānaṃ uttānatthameva.
23. ඡට්‌ඨාපදානෙ වණ්‌ණකාරො අහං තදාති නීලපීතරත්‌තාදිවණ්‌ණවසෙන වත්‌ථානි කරොති රඤ්‌ජෙතීති වණ්‌ණකාරො. වත්‌ථරජකො හුත්‌වා චෙතියෙ වත්‌ථෙහි අච්‌ඡාදනසමයෙ නානාවණ්‌ණෙහි දුස්‌සානි රඤ්‌ජෙසින්‌ති අත්‌ථො.
23. Chaṭṭhāpadāne vaṇṇakāro ahaṃ tadāti nīlapītarattādivaṇṇavasena vatthāni karoti rañjetīti vaṇṇakāro. Vattharajako hutvā cetiye vatthehi acchādanasamaye nānāvaṇṇehi dussāni rañjesinti attho.
27. සත්‌තමාපදානෙ පියාලං පුප්‌ඵිතං දිස්‌වාති සුපුප්‌ඵිතං පියාලරුක්‌ඛං දිස්‌වා. ගතමග්‌ගෙ ඛිපිං අහන්‌ති අහං මිගලුද්‌දො නෙසාදො හුත්‌වා පියාලපුප්‌ඵං ඔචිනිත්‌වා බුද්‌ධස්‌ස ගතමග්‌ගෙ ඛිපිං පූජෙසින්‌ති අත්‌ථො.
27. Sattamāpadāne piyālaṃ pupphitaṃ disvāti supupphitaṃ piyālarukkhaṃ disvā. Gatamagge khipiṃahanti ahaṃ migaluddo nesādo hutvā piyālapupphaṃ ocinitvā buddhassa gatamagge khipiṃ pūjesinti attho.
30. අට්‌ඨමාපදානෙ සකෙ සිප්‌පෙ අපත්‌ථද්‌ධොති අත්‌තනො තක්‌කබ්‍යාකරණාදිසිප්‌පස්‌මිං අපත්‌ථද්‌ධො පතිට්‌ඨිතො ඡෙකො අහං කානනං අගමං ගතො සම්‌බුද්‌ධං යන්‌තං දිස්‌වානාති වනන්‌තරෙ ගච්‌ඡන්‌තං විපස්‌සිං සම්‌බුද්‌ධං පස්‌සිත්‌වා. අම්‌බයාගං අදාසහන්‌ති අහං අම්‌බදානං අදාසින්‌ති අත්‌ථො.
30. Aṭṭhamāpadāne sake sippe apatthaddhoti attano takkabyākaraṇādisippasmiṃ apatthaddho patiṭṭhito cheko ahaṃ kānanaṃ agamaṃ gato sambuddhaṃ yantaṃ disvānāti vanantare gacchantaṃ vipassiṃ sambuddhaṃ passitvā. Ambayāgaṃ adāsahanti ahaṃ ambadānaṃ adāsinti attho.
33. නවමාපදානෙ ජගතී කාරිතා මය්‌හන්‌ති අත්‌ථදස්‌සිස්‌ස භගවතො සරීරධාතුනිධාපිතචෙතියෙ ජගති ඡින්‌නභින්‌නආලින්‌දපුප්‌ඵාධානසඞ්‌ඛාතා ජගති මයා කාරිතා කාරාපිතාති අත්‌ථො.
33. Navamāpadāne jagatī kāritā mayhanti atthadassissa bhagavato sarīradhātunidhāpitacetiye jagati chinnabhinnaālindapupphādhānasaṅkhātā jagati mayā kāritā kārāpitāti attho.
දසමාපදානං උත්‌තානත්‌ථමෙවාති.
Dasamāpadānaṃ uttānatthamevāti.
චතුවීසතිමවග්‌ගවණ්‌ණනා සමත්‌තා.
Catuvīsatimavaggavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi
3. සාලපුප්‌ඵියත්‌ථෙරඅපදානං • 3. Sālapupphiyattheraapadānaṃ
4. කිලඤ්‌ජදායකත්‌ථෙරඅපදානං • 4. Kilañjadāyakattheraapadānaṃ
6. වණ්‌ණකාරත්‌ථෙරඅපදානං • 6. Vaṇṇakārattheraapadānaṃ
7. පියාලපුප්‌ඵියත්‌ථෙරඅපදානං • 7. Piyālapupphiyattheraapadānaṃ
8. අම්‌බයාගදායකත්‌ථෙරඅපදානං • 8. Ambayāgadāyakattheraapadānaṃ
9. ජගතිකාරකත්‌ථෙරඅපදානං • 9. Jagatikārakattheraapadānaṃ
