| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၉. ဥဒကသတ္တဇီဝပဉ္ဟော
9. Udakasattajīvapañho
၉. ‘‘ဘန္တေ နာဂသေန, ဣမံ ဥဒကံ အဂ္ဂိမ္ဟိ တပ္ပမာနံ စိစ္စိဋာယတိ စိဋိစိဋာယတိ သဒ္ဒာယတိ ဗဟုဝိဓံ, ကိံ နု ခော, ဘန္တေ နာဂသေန, ဥဒကံ ဇီဝတိ, ကိံ ကီဠမာနံ သဒ္ဒာယတိ, ဥဒာဟု အညေန ပဋိပီဠိတံ သဒ္ဒာယတီ’’တိ? ‘‘န ဟိ, မဟာရာဇ, ဥဒကံ ဇီဝတိ, နတ္ထိ ဥဒကေ ဇီဝော ဝာ သတ္တော ဝာ, အပိ စ, မဟာရာဇ, အဂ္ဂိသန္တာပဝေဂသ္သ မဟန္တတာယ ဥဒကံ စိစ္စိဋာယတိ စိဋိစိဋာယတိ သဒ္ဒာယတိ ဗဟုဝိဓ’’န္တိ။
9. ‘‘Bhante nāgasena, imaṃ udakaṃ aggimhi tappamānaṃ cicciṭāyati ciṭiciṭāyati saddāyati bahuvidhaṃ, kiṃ nu kho, bhante nāgasena, udakaṃ jīvati, kiṃ kīḷamānaṃ saddāyati, udāhu aññena paṭipīḷitaṃ saddāyatī’’ti? ‘‘Na hi, mahārāja, udakaṃ jīvati, natthi udake jīvo vā satto vā, api ca, mahārāja, aggisantāpavegassa mahantatāya udakaṃ cicciṭāyati ciṭiciṭāyati saddāyati bahuvidha’’nti.
‘‘ဘန္တေ နာဂသေန, ဣဓေကစ္စေ တိတ္ထိယာ ဥဒကံ ဇီဝတီတိ သီတောဒကံ ပဋိက္ခိပိတ္ဝာ ဥဒကံ တာပေတ္ဝာ ဝေကတိကဝေကတိကံ ပရိဘုဉ္ဇန္တိ, တေ တုမ္ဟေ ဂရဟန္တိ ပရိဘဝန္တိ ‘ဧကိန္ဒ္ရိယံ သမဏာ သက္ယပုတ္တိယာ ဇီဝံ ဝိဟေဌေန္တီ’တိ, တံ တေသံ ဂရဟံ ပရိဘဝံ ဝိနောဒေဟိ အပနေဟိ နိစ္ဆာရေဟီ’’တိ။ ‘‘န ဟိ, မဟာရာဇ, ဥဒကံ ဇီဝတိ, နတ္ထိ, မဟာရာဇ, ဥဒကေ ဇီဝော ဝာ သတ္တော ဝာ, အပိ စ, မဟာရာဇ, အဂ္ဂိသန္တာပဝေဂသ္သ မဟန္တတာယ ဥဒကံ စိစ္စိဋာယတိ စိဋိစိဋာယတိ သဒ္ဒာယတိ ဗဟုဝိဓံ။
‘‘Bhante nāgasena, idhekacce titthiyā udakaṃ jīvatīti sītodakaṃ paṭikkhipitvā udakaṃ tāpetvā vekatikavekatikaṃ paribhuñjanti, te tumhe garahanti paribhavanti ‘ekindriyaṃ samaṇā sakyaputtiyā jīvaṃ viheṭhentī’ti, taṃ tesaṃ garahaṃ paribhavaṃ vinodehi apanehi nicchārehī’’ti. ‘‘Na hi, mahārāja, udakaṃ jīvati, natthi, mahārāja, udake jīvo vā satto vā, api ca, mahārāja, aggisantāpavegassa mahantatāya udakaṃ cicciṭāyati ciṭiciṭāyati saddāyati bahuvidhaṃ.
‘‘ယထာ, မဟာရာဇ, ဥဒကံ သောဗ္ဘသရသရိတဒဟတဠာကကန္ဒရပဒရဥဒပာနနိန္နပောက္ခရဏိဂတံ ဝာတာတပဝေဂသ္သ မဟန္တတာယ ပရိယာဒိယတိ ပရိက္ခယံ ဂစ္ဆတိ, အပိ နု တတ္ထ ဥဒကံ စိစ္စိဋာယတိ စိဋိစိဋာယတိ သဒ္ဒာယတိ ဗဟုဝိဓ’’န္တိ? ‘‘န ဟိ, ဘန္တေ’’တိ။ ‘‘ယဒိ, မဟာရာဇ, ဥဒကံ ဇီဝေယ္ယ, တတ္ထာပိ ဥဒကံ သဒ္ဒာယေယ္ယ, ဣမိနာပိ, မဟာရာဇ, ကာရဏေန ဇာနာဟိ ‘နတ္ထိ ဥဒကေ ဇီဝော ဝာ သတ္တော ဝာ, အဂ္ဂိသန္တာပဝေဂသ္သ မဟန္တတာယ ဥဒကံ စိစ္စိဋာယတိ စိဋိစိဋာယတိ သဒ္ဒာယတိ ဗဟုဝိဓ’န္တိ။
‘‘Yathā, mahārāja, udakaṃ sobbhasarasaritadahataḷākakandarapadaraudapānaninnapokkharaṇigataṃ vātātapavegassa mahantatāya pariyādiyati parikkhayaṃ gacchati, api nu tattha udakaṃ cicciṭāyati ciṭiciṭāyati saddāyati bahuvidha’’nti? ‘‘Na hi, bhante’’ti. ‘‘Yadi, mahārāja, udakaṃ jīveyya, tatthāpi udakaṃ saddāyeyya, imināpi, mahārāja, kāraṇena jānāhi ‘natthi udake jīvo vā satto vā, aggisantāpavegassa mahantatāya udakaṃ cicciṭāyati ciṭiciṭāyati saddāyati bahuvidha’nti.
‘‘အပရမ္ပိ , မဟာရာဇ, ဥတ္တရိံ ကာရဏံ သုဏောဟိ ‘နတ္ထိ ဥဒကေ ဇီဝော ဝာ သတ္တော ဝာ, အဂ္ဂိသန္တာပဝေဂသ္သ မဟန္တတာယ ဥဒကံ သဒ္ဒာယတီ’တိ။ ယဒာ ပန, မဟာရာဇ, ဥဒကံ တဏ္ဍုလေဟိ သမ္မိသ္သိတံ ဘာဇနဂတံ ဟောတိ ပိဟိတံ ဥဒ္ဓနေ အဌပိတံ, အပိ နု တတ္ထ ဥဒကံ သဒ္ဒာယတီ’’တိ? ‘‘န ဟိ, ဘန္တေ, အစလံ ဟောတိ သန္တသန္တ’’န္တိ။ ‘‘တံ ယေဝ ပန, မဟာရာဇ, ဥဒကံ ဘာဇနဂတံ အဂ္ဂိံ ဥဇ္ဇာလေတ္ဝာ ဥဒ္ဓနေ ဌပိတံ ဟောတိ, အပိ နု တတ္ထ ဥဒကံ အစလံ ဟောတိ သန္တသန္တ’’န္တိ? ‘‘န ဟိ, ဘန္တေ, စလတိ ခုဗ္ဘတိ လုဠတိ အာဝိလတိ ဦမိဇာတံ ဟောတိ, ဥဒ္ဓမဓော ဒိသာဝိဒိသံ ဂစ္ဆတိ, ဥတ္တရတိ ပတရတိ ဖေဏမာလီ ဟောတီတိ။ ကိသ္သ ပန တံ, မဟာရာဇ , ပာကတိကံ ဥဒကံ န စလတိ သန္တသန္တံ ဟောတိ, ကိသ္သ ပန အဂ္ဂိဂတံ စလတိ ခုဗ္ဘတိ လုဠတိ အာဝိလတိ ဦမိဇာတံ ဟောတိ, ဥဒ္ဓမဓော ဒိသာဝိဒိသံ ဂစ္ဆတိ, ဥတ္တရတိ ပတရတိ ဖေဏမာလီ ဟောတီ’’တိ? ‘‘ပာကတိကံ, ဘန္တေ, ဥဒကံ န စလတိ, အဂ္ဂိကတံ ပန ဥဒကံ အဂ္ဂိသန္တာပဝေဂသ္သ မဟန္တတာယ စိစ္စိဋာယတိ စိဋိစိဋာယတိ သဒ္ဒာယတိ ဗဟုဝိဓ’’န္တိ။ ‘‘ဣမိနာပိ မဟာရာဇ, ကာရဏေန ဇာနာဟိ ‘နတ္ထိ ဥဒကေ ဇီဝော ဝာ သတ္တော ဝာ, အဂ္ဂိသန္တာပဝေဂသ္သ မဟန္တတာယ ဥဒကံ သဒ္ဒာယတီ’တိ။
‘‘Aparampi , mahārāja, uttariṃ kāraṇaṃ suṇohi ‘natthi udake jīvo vā satto vā, aggisantāpavegassa mahantatāya udakaṃ saddāyatī’ti. Yadā pana, mahārāja, udakaṃ taṇḍulehi sammissitaṃ bhājanagataṃ hoti pihitaṃ uddhane aṭhapitaṃ, api nu tattha udakaṃ saddāyatī’’ti? ‘‘Na hi, bhante, acalaṃ hoti santasanta’’nti. ‘‘Taṃ yeva pana, mahārāja, udakaṃ bhājanagataṃ aggiṃ ujjāletvā uddhane ṭhapitaṃ hoti, api nu tattha udakaṃ acalaṃ hoti santasanta’’nti? ‘‘Na hi, bhante, calati khubbhati luḷati āvilati ūmijātaṃ hoti, uddhamadho disāvidisaṃ gacchati, uttarati patarati pheṇamālī hotīti. Kissa pana taṃ, mahārāja , pākatikaṃ udakaṃ na calati santasantaṃ hoti, kissa pana aggigataṃ calati khubbhati luḷati āvilati ūmijātaṃ hoti, uddhamadho disāvidisaṃ gacchati, uttarati patarati pheṇamālī hotī’’ti? ‘‘Pākatikaṃ, bhante, udakaṃ na calati, aggikataṃ pana udakaṃ aggisantāpavegassa mahantatāya cicciṭāyati ciṭiciṭāyati saddāyati bahuvidha’’nti. ‘‘Imināpi mahārāja, kāraṇena jānāhi ‘natthi udake jīvo vā satto vā, aggisantāpavegassa mahantatāya udakaṃ saddāyatī’ti.
‘‘အပရမ္ပိ, မဟာရာဇ, ဥတ္တရံ ကာရဏံ သုဏောဟိ, နတ္ထိ ဥဒကေ ဇီဝော ဝာ သတ္တော ဝာ, အဂ္ဂိသန္တာပဝေဂသ္သ မဟန္တတာယ ဥဒကံ သဒ္ဒာယတိ။ ဟောတိ တံ, မဟာရာဇ, ဥဒကံ ဃရေ ဃရေ ဥဒကဝာရကဂတံ ပိဟိတ’’န္တိ? ‘‘အာမ, ဘန္တေ’’တိ။ ‘‘အပိ နု တံ, မဟာရာဇ, ဥဒကံ စလတိ ခုဗ္ဘတိ လုဠတိ အာဝိလတိ ဦမိဇာတံ ဟောတိ, ဥဒ္ဓမဓော ဒိသာဝိဒိသံ ဂစ္ဆတိ, ဥတ္တရတိ ပတရတိ ဖေဏမာလီ ဟောတီ’’တိ။ ‘‘န ဟိ, ဘန္တေ, အစလံ တံ ဟောတိ ပာကတိကံ ဥဒကဝာရကဂတံ ဥဒက’’န္တိ။
‘‘Aparampi, mahārāja, uttaraṃ kāraṇaṃ suṇohi, natthi udake jīvo vā satto vā, aggisantāpavegassa mahantatāya udakaṃ saddāyati. Hoti taṃ, mahārāja, udakaṃ ghare ghare udakavārakagataṃ pihita’’nti? ‘‘Āma, bhante’’ti. ‘‘Api nu taṃ, mahārāja, udakaṃ calati khubbhati luḷati āvilati ūmijātaṃ hoti, uddhamadho disāvidisaṃ gacchati, uttarati patarati pheṇamālī hotī’’ti. ‘‘Na hi, bhante, acalaṃ taṃ hoti pākatikaṃ udakavārakagataṃ udaka’’nti.
‘‘သုတပုဗ္ဗံ ပန တယာ, မဟာရာဇ, ‘မဟာသမုဒ္ဒေ ဥဒကံ စလတိ ခုဗ္ဘတိ လုဠတိ အာဝိလတိ ဦမိဇာတံ ဟောတိ, ဥဒ္ဓမဓော ဒိသာဝိဒိသံ ဂစ္ဆတိ, ဥတ္တရတိ ပတရတိ ဖေဏမာလီ ဟောတိ, ဥသ္သက္ကိတ္ဝာ ဩသ္သက္ကိတ္ဝာ 1 ဝေလာယ ပဟရတိ သဒ္ဒာယတိ ဗဟုဝိဓ’’’န္တိ? ‘‘အာမ, ဘန္တေ, သုတပုဗ္ဗံ ဧတံ မယာ ဒိဋ္ဌပုဗ္ဗဉ္စ ‘မဟာသမုဒ္ဒေ ဥဒကံ ဟတ္ထသတမ္ပိ ဒ္ဝေပိ ဟတ္ထသတာနိ ဂဂနေ ဥသ္သက္ကတီ’’’တိ။ ‘‘ကိသ္သ, မဟာရာဇ, ဥဒကဝာရကဂတံ ဥဒကံ န စလတိ န သဒ္ဒာယတိ, ကိသ္သ ပန မဟာသမုဒ္ဒေ ဥဒကံ စလတိ သဒ္ဒာယတီ’’တိ? ‘‘ဝာတဝေဂသ္သ မဟန္တတာယ, ဘန္တေ, မဟာသမုဒ္ဒေ ဥဒကံ စလတိ သဒ္ဒာယတိ, ဥဒကဝာရကဂတံ ဥဒကံ အဃဋ္ဋိတံ ကေဟိစိ န စလတိ န သဒ္ဒာယတီ’’တိ။ ‘‘ယထာ, မဟာရာဇ, ဝာတဝေဂသ္သ မဟန္တတာယ မဟာသမုဒ္ဒေ ဥဒကံ စလတိ သဒ္ဒာယတိ ဧဝမေဝ အဂ္ဂိသန္တာပဝေဂသ္သ မဟန္တတာယ ဥဒကံ သဒ္ဒာယတီ’’တိ။
‘‘Sutapubbaṃ pana tayā, mahārāja, ‘mahāsamudde udakaṃ calati khubbhati luḷati āvilati ūmijātaṃ hoti, uddhamadho disāvidisaṃ gacchati, uttarati patarati pheṇamālī hoti, ussakkitvā ossakkitvā 2 velāya paharati saddāyati bahuvidha’’’nti? ‘‘Āma, bhante, sutapubbaṃ etaṃ mayā diṭṭhapubbañca ‘mahāsamudde udakaṃ hatthasatampi dvepi hatthasatāni gagane ussakkatī’’’ti. ‘‘Kissa, mahārāja, udakavārakagataṃ udakaṃ na calati na saddāyati, kissa pana mahāsamudde udakaṃ calati saddāyatī’’ti? ‘‘Vātavegassa mahantatāya, bhante, mahāsamudde udakaṃ calati saddāyati, udakavārakagataṃ udakaṃ aghaṭṭitaṃ kehici na calati na saddāyatī’’ti. ‘‘Yathā, mahārāja, vātavegassa mahantatāya mahāsamudde udakaṃ calati saddāyati evameva aggisantāpavegassa mahantatāya udakaṃ saddāyatī’’ti.
‘‘နနု, မဟာရာဇ, ဘေရိပောက္ခရံ သုက္ခံ သုက္ခေန ဂောစမ္မေန ဩနန္ဓန္တီ’’တိ? ‘‘အာမ, ဘန္တေ’’။ ‘‘အပိ နု, မဟာရာဇ, ဘေရိယာ ဇီဝော ဝာ သတ္တော ဝာ အတ္ထီ’’တိ။ ‘‘န ဟိ, ဘန္တေ’’တိ။ ‘‘ကိသ္သ ပန, မဟာရာဇ, ဘေရီ သဒ္ဒာယတီ’’တိ? ‘‘ဣတ္ထိယာ ဝာ, ဘန္တေ, ပုရိသသ္သ ဝာ တဇ္ဇေန ဝာယာမေနာ’’တိ။ ‘‘ယထာ, မဟာရာဇ, ဣတ္ထိယာ ဝာ ပုရိသသ္သ ဝာ တဇ္ဇေန ဝာယာမေန ဘေရီ သဒ္ဒာယတိ, ဧဝမေဝ အဂ္ဂိသန္တာပဝေဂသ္သ မဟန္တတာယ ဥဒကံ သဒ္ဒာယတိ။ ဣမိနာပိ, မဟာရာဇ , ကာရဏေန ဇာနာဟိ ‘နတ္ထိ ဥဒကေ ဇီဝော ဝာ သတ္တော ဝာ, အဂ္ဂိသန္တာပဝေဂသ္သ မဟန္တတာယ ဥဒကံ သဒ္ဒာယတီ’တိ။
‘‘Nanu, mahārāja, bheripokkharaṃ sukkhaṃ sukkhena gocammena onandhantī’’ti? ‘‘Āma, bhante’’. ‘‘Api nu, mahārāja, bheriyā jīvo vā satto vā atthī’’ti. ‘‘Na hi, bhante’’ti. ‘‘Kissa pana, mahārāja, bherī saddāyatī’’ti? ‘‘Itthiyā vā, bhante, purisassa vā tajjena vāyāmenā’’ti. ‘‘Yathā, mahārāja, itthiyā vā purisassa vā tajjena vāyāmena bherī saddāyati, evameva aggisantāpavegassa mahantatāya udakaṃ saddāyati. Imināpi, mahārāja , kāraṇena jānāhi ‘natthi udake jīvo vā satto vā, aggisantāpavegassa mahantatāya udakaṃ saddāyatī’ti.
‘‘မယ္ဟမ္ပိ တာဝ, မဟာရာဇ, တဝ ပုစ္ဆိတဗ္ဗံ အတ္ထိ, ဧဝမေသော ပဉ္ဟော သုဝိနိစ္ဆိတော ဟောတိ, ကိံ နု ခော, မဟာရာဇ, သဗ္ဗေဟိပိ ဘာဇနေဟိ ဥဒကံ တပ္ပမာနံ သဒ္ဒာယတိ, ဥဒာဟု ဧကစ္စေဟိ ယေဝ ဘာဇနေဟိ တပ္ပမာနံ သဒ္ဒာယတီ’’တိ? ‘‘န ဟိ, ဘန္တေ, သဗ္ဗေဟိပိ ဘာဇနေဟိ ဥဒကံ တပ္ပမာနံ သဒ္ဒာယတိ, ဧကစ္စေဟိ ယေဝ ဘာဇနေဟိ ဥဒကံ တပ္ပမာနံ သဒ္ဒာယတီ’’တိ။ ‘‘တေန ဟိ, မဟာရာဇ, ဇဟိတောသိ သကသမယံ, ပစ္စာဂတောသိ မမ ဝိသယံ, နတ္ထိ ဥဒကေ ဇီဝော ဝာ သတ္တော ဝာ။ ယဒိ, မဟာရာဇ, သဗ္ဗေဟိပိ ဘာဇနေဟိ ဥဒကံ တပ္ပမာနံ သဒ္ဒာယေယ္ယ, ယုတ္တမိဒံ ‘ဥဒကံ ဇီဝတီ’တိ ဝတ္တုံ။ န ဟိ, မဟာရာဇ, ဥဒကံ ဒ္ဝယံ ဟောတိ, ယံ သဒ္ဒာယတိ, တံ ဇီဝတိ, ယံ န သဒ္ဒာယတိ, တံ န ဇီဝတီတိ။ ယဒိ, မဟာရာဇ, ဥဒကံ ဇီဝေယ္ယ, မဟန္တာနံ ဟတ္ထိနာဂာနံ ဥသ္သန္နကာယာနံ ပဘိန္နာနံ သောဏ္ဍာယ ဥသ္သိဉ္စိတ္ဝာ မုခေ ပက္ခိပိတ္ဝာ ကုစ္ဆိံ ပဝေသယန္တာနံ, တမ္ပိ ဥဒကံ တေသံ ဒန္တန္တရေ စိပ္ပိယမာနံ သဒ္ဒာယေယ္ယ။ ဟတ္ထသတိကာပိ မဟာနာဝာ ဂရုကာ ဘာရိကာ အနေကသတသဟသ္သဘာရပရိပူရာ မဟာသမုဒ္ဒေ ဝိစရန္တိ, တာဟိပိ စိပ္ပိယမာနံ ဥဒကံ သဒ္ဒာယေယ္ယ။ မဟတိမဟန္တာပိ မစ္ဆာ အနေကသတယောဇနိကကာယာ တိမီ တိမိင္ဂလာ တိမိရပိင္ဂလာ အဗ္ဘန္တရေ နိမုဂ္ဂာ မဟာသမုဒ္ဒေ နိဝာသဋ္ဌာနတာယ ပဋိဝသန္တာ မဟာဥဒကဓာရာ အာစမန္တိ ဓမန္တိ စ, တေသမ္ပိ တံ ဒန္တန္တရေပိ ဥဒရန္တရေပိ စိပ္ပိယမာနံ ဥဒကံ သဒ္ဒာယေယ္ယ။ ယသ္မာ စ ခော, မဟာရာဇ, ဧဝရူပေဟိ ဧဝရူပေဟိ မဟန္တေဟိ ပဋိပီဠနေဟိ ပဋိပီဠိတံ ဥဒကံ န သဒ္ဒာယတိ တသ္မာပိ နတ္ထိ ဥဒကေ ဇီဝော ဝာ သတ္တော ဝာတိ, ဧဝမေတံ, မဟာရာဇ, ဓာရေဟီ’’တိ။
‘‘Mayhampi tāva, mahārāja, tava pucchitabbaṃ atthi, evameso pañho suvinicchito hoti, kiṃ nu kho, mahārāja, sabbehipi bhājanehi udakaṃ tappamānaṃ saddāyati, udāhu ekaccehi yeva bhājanehi tappamānaṃ saddāyatī’’ti? ‘‘Na hi, bhante, sabbehipi bhājanehi udakaṃ tappamānaṃ saddāyati, ekaccehi yeva bhājanehi udakaṃ tappamānaṃ saddāyatī’’ti. ‘‘Tena hi, mahārāja, jahitosi sakasamayaṃ, paccāgatosi mama visayaṃ, natthi udake jīvo vā satto vā. Yadi, mahārāja, sabbehipi bhājanehi udakaṃ tappamānaṃ saddāyeyya, yuttamidaṃ ‘udakaṃ jīvatī’ti vattuṃ. Na hi, mahārāja, udakaṃ dvayaṃ hoti, yaṃ saddāyati, taṃ jīvati, yaṃ na saddāyati, taṃ na jīvatīti. Yadi, mahārāja, udakaṃ jīveyya, mahantānaṃ hatthināgānaṃ ussannakāyānaṃ pabhinnānaṃ soṇḍāya ussiñcitvā mukhe pakkhipitvā kucchiṃ pavesayantānaṃ, tampi udakaṃ tesaṃ dantantare cippiyamānaṃ saddāyeyya. Hatthasatikāpi mahānāvā garukā bhārikā anekasatasahassabhāraparipūrā mahāsamudde vicaranti, tāhipi cippiyamānaṃ udakaṃ saddāyeyya. Mahatimahantāpi macchā anekasatayojanikakāyā timī timiṅgalā timirapiṅgalā abbhantare nimuggā mahāsamudde nivāsaṭṭhānatāya paṭivasantā mahāudakadhārā ācamanti dhamanti ca, tesampi taṃ dantantarepi udarantarepi cippiyamānaṃ udakaṃ saddāyeyya. Yasmā ca kho, mahārāja, evarūpehi evarūpehi mahantehi paṭipīḷanehi paṭipīḷitaṃ udakaṃ na saddāyati tasmāpi natthi udake jīvo vā satto vāti, evametaṃ, mahārāja, dhārehī’’ti.
‘‘သာဓု , ဘန္တေ နာဂသေန, ဒောသာဂတော ပဉ္ဟော အနုစ္ဆဝိကာယ ဝိဘတ္တိယာ ဝိဘတ္တော, ယထာ နာမ, ဘန္တေ နာဂသေန, မဟဂ္ဃံ မဏိရတနံ ဆေကံ အာစရိယံ ကုသလံ သိက္ခိတံ မဏိကာရံ ပာပုဏိတ္ဝာ ကိတ္တိံ လဘေယ္ယ ထောမနံ ပသံသံ, မုတ္တာရတနံ ဝာ မုတ္တိကံ ဒုသ္သရတနံ ဝာ ဒုသ္သိကံ, လောဟိတစန္ဒနံ ဝာ ဂန္ဓိကံ ပာပုဏိတ္ဝာ ကိတ္တိံ လဘေယ္ယ ထောမနံ ပသံသံ။ ဧဝမေဝ ခော, ဘန္တေ နာဂသေန, ဒောသာဂတော 3 ပဉ္ဟော အနုစ္ဆဝိကာယ ဝိဘတ္တိယာ ဝိဘတ္တော, ဧဝမေတံ တထာ သမ္ပဋိစ္ဆာမီ’’တိ။
‘‘Sādhu , bhante nāgasena, dosāgato pañho anucchavikāya vibhattiyā vibhatto, yathā nāma, bhante nāgasena, mahagghaṃ maṇiratanaṃ chekaṃ ācariyaṃ kusalaṃ sikkhitaṃ maṇikāraṃ pāpuṇitvā kittiṃ labheyya thomanaṃ pasaṃsaṃ, muttāratanaṃ vā muttikaṃ dussaratanaṃ vā dussikaṃ, lohitacandanaṃ vā gandhikaṃ pāpuṇitvā kittiṃ labheyya thomanaṃ pasaṃsaṃ. Evameva kho, bhante nāgasena, dosāgato 4 pañho anucchavikāya vibhattiyā vibhatto, evametaṃ tathā sampaṭicchāmī’’ti.
ဥဒကသတ္တဇီဝပဉ္ဟော နဝမော။
Udakasattajīvapañho navamo.
ဗုဒ္ဓဝဂ္ဂော ပဌမော။
Buddhavaggo paṭhamo.
ဣမသ္မိံ ဝဂ္ဂေ နဝ ပဉ္ဟာ။
Imasmiṃ vagge nava pañhā.
Footnotes:
