| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. উদকসুত্তং
10. Udakasuttaṃ
১০৩. ‘‘উদকো 1 সুদং, ভিক্খৰে, রামপুত্তো এৰং ৰাচং ভাসতি – ‘ইদং জাতু ৰেদগূ, ইদং জাতু সব্বজী 2, ইদং জাতু অপলিখতং গণ্ডমূলং পলিখণি’ন্তি। তং খো পনেতং, ভিক্খৰে, উদকো রামপুত্তো অৰেদগূযেৰ সমানো ‘ৰেদগূস্মী’তি ভাসতি, অসব্বজীযেৰ সমানো ‘সব্বজীস্মী’তি ভাসতি, অপলিখতংযেৰ গণ্ডমূলং পলিখতং মে ‘গণ্ডমূল’ন্তি ভাসতি। ইধ খো তং, ভিক্খৰে, ভিক্খু সম্মা ৰদমানো ৰদেয্য – ‘ইদং জাতু ৰেদগূ, ইদং জাতু সব্বজী, ইদং জাতু অপলিখতং গণ্ডমূলং পলিখণি’’’ন্তি।
103. ‘‘Udako 3 sudaṃ, bhikkhave, rāmaputto evaṃ vācaṃ bhāsati – ‘idaṃ jātu vedagū, idaṃ jātu sabbajī 4, idaṃ jātu apalikhataṃ gaṇḍamūlaṃ palikhaṇi’nti. Taṃ kho panetaṃ, bhikkhave, udako rāmaputto avedagūyeva samāno ‘vedagūsmī’ti bhāsati, asabbajīyeva samāno ‘sabbajīsmī’ti bhāsati, apalikhataṃyeva gaṇḍamūlaṃ palikhataṃ me ‘gaṇḍamūla’nti bhāsati. Idha kho taṃ, bhikkhave, bhikkhu sammā vadamāno vadeyya – ‘idaṃ jātu vedagū, idaṃ jātu sabbajī, idaṃ jātu apalikhataṃ gaṇḍamūlaṃ palikhaṇi’’’nti.
‘‘কথঞ্চ, ভিক্খৰে, ৰেদগূ হোতি? যতো খো, ভিক্খৰে, ভিক্খু ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং পজানাতি; এৰং খো, ভিক্খৰে, ভিক্খু ৰেদগূ হোতি।
‘‘Kathañca, bhikkhave, vedagū hoti? Yato kho, bhikkhave, bhikkhu channaṃ phassāyatanānaṃ samudayañca atthaṅgamañca assādañca ādīnavañca nissaraṇañca yathābhūtaṃ pajānāti; evaṃ kho, bhikkhave, bhikkhu vedagū hoti.
‘‘কথঞ্চ, ভিক্খৰে, ভিক্খু সব্বজী হোতি? যতো খো, ভিক্খৰে, ভিক্খু ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং ৰিদিত্ৰা অনুপাদাৰিমুত্তো হোতি; এৰং খো, ভিক্খৰে, ভিক্খু সব্বজী হোতি।
‘‘Kathañca, bhikkhave, bhikkhu sabbajī hoti? Yato kho, bhikkhave, bhikkhu channaṃ phassāyatanānaṃ samudayañca atthaṅgamañca assādañca ādīnavañca nissaraṇañca yathābhūtaṃ viditvā anupādāvimutto hoti; evaṃ kho, bhikkhave, bhikkhu sabbajī hoti.
‘‘কথঞ্চ , ভিক্খৰে, ভিক্খুনো অপলিখতং গণ্ডমূলং পলিখতং হোতি? গণ্ডোতি খো, ভিক্খৰে, ইমস্সেতং চাতুমহাভূতিকস্স কাযস্স অধিৰচনং মাতাপেত্তিকসম্ভৰস্স ওদনকুম্মাসূপচযস্স অনিচ্চুচ্ছাদনপরিমদ্দনভেদনৰিদ্ধংসনধম্মস্স । গণ্ডমূলন্তি খো, ভিক্খৰে, তণ্হাযেতং অধিৰচনং। যতো খো, ভিক্খৰে, ভিক্খুনো তণ্হা পহীনা হোতি উচ্ছিন্নমূলা তালাৰত্থুকতা অনভাৰঙ্কতা আযতিং অনুপ্পাদধম্মা; এৰং খো, ভিক্খৰে, ভিক্খুনো অপলিখতং গণ্ডমূলং পলিখতং হোতি।
‘‘Kathañca , bhikkhave, bhikkhuno apalikhataṃ gaṇḍamūlaṃ palikhataṃ hoti? Gaṇḍoti kho, bhikkhave, imassetaṃ cātumahābhūtikassa kāyassa adhivacanaṃ mātāpettikasambhavassa odanakummāsūpacayassa aniccucchādanaparimaddanabhedanaviddhaṃsanadhammassa . Gaṇḍamūlanti kho, bhikkhave, taṇhāyetaṃ adhivacanaṃ. Yato kho, bhikkhave, bhikkhuno taṇhā pahīnā hoti ucchinnamūlā tālāvatthukatā anabhāvaṅkatā āyatiṃ anuppādadhammā; evaṃ kho, bhikkhave, bhikkhuno apalikhataṃ gaṇḍamūlaṃ palikhataṃ hoti.
‘‘উদকো সুদং, ভিক্খৰে, রামপুত্তো এৰং ৰাচং ভাসতি – ‘ইদং জাতু ৰেদগূ, ইদং জাতু সব্বজী, ইদং জাতু অপলিখতং গণ্ডমূলং পলিখণি’ন্তি। তং খো পনেতং, ভিক্খৰে, উদকো রামপুত্তো অৰেদগূযেৰ সমানো ‘ৰেদগূস্মী’তি ভাসতি, অসব্বজীযেৰ সমানো ‘সব্বজীস্মী’তি ভাসতি; অপলিখতংযেৰ গণ্ডমূলং ‘পলিখতং মে গণ্ডমূল’ন্তি ভাসতি। ইধ খো তং, ভিক্খৰে, ভিক্খু সম্মা ৰদমানো ৰদেয্য – ‘ইদং জাতু ৰেদগূ, ইদং জাতু সব্বজী, ইদং জাতু অপলিখতং গণ্ডমূলং পলিখণি’’’ন্তি। দসমং।
‘‘Udako sudaṃ, bhikkhave, rāmaputto evaṃ vācaṃ bhāsati – ‘idaṃ jātu vedagū, idaṃ jātu sabbajī, idaṃ jātu apalikhataṃ gaṇḍamūlaṃ palikhaṇi’nti. Taṃ kho panetaṃ, bhikkhave, udako rāmaputto avedagūyeva samāno ‘vedagūsmī’ti bhāsati, asabbajīyeva samāno ‘sabbajīsmī’ti bhāsati; apalikhataṃyeva gaṇḍamūlaṃ ‘palikhataṃ me gaṇḍamūla’nti bhāsati. Idha kho taṃ, bhikkhave, bhikkhu sammā vadamāno vadeyya – ‘idaṃ jātu vedagū, idaṃ jātu sabbajī, idaṃ jātu apalikhataṃ gaṇḍamūlaṃ palikhaṇi’’’nti. Dasamaṃ.
সল়ৰগ্গো দসমো।
Saḷavaggo dasamo.
তস্সুদ্দানং –
Tassuddānaṃ –
দ্ৰে সংগয্হা পরিহানং, পমাদৰিহারী চ সংৰরো।
Dve saṃgayhā parihānaṃ, pamādavihārī ca saṃvaro;
সমাধি পটিসল্লানং, দ্ৰে নতুম্হাকেন উদ্দকোতি॥
Samādhi paṭisallānaṃ, dve natumhākena uddakoti.
সল়াযতনৰগ্গে দুতিযপণ্ণাসকো সমত্তো।
Saḷāyatanavagge dutiyapaṇṇāsako samatto.
তস্স ৰগ্গুদ্দানং –
Tassa vagguddānaṃ –
অৰিজ্জা মিগজালঞ্চ, গিলানং ছন্নং চতুত্থকং।
Avijjā migajālañca, gilānaṃ channaṃ catutthakaṃ;
সল়ৰগ্গেন পঞ্ঞাসং, দুতিযো পণ্ণাসকো অযন্তি॥
Saḷavaggena paññāsaṃ, dutiyo paṇṇāsako ayanti.
পঠমসতকং।
Paṭhamasatakaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. উদকসুত্তৰণ্ণনা • 10. Udakasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১০. উদকসুত্তৰণ্ণনা • 10. Udakasuttavaṇṇanā
