| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. உத³கஸுத்தவண்ணனா
10. Udakasuttavaṇṇanā
103. த³ஸமே உத³கோ ஸுத³ந்தி எத்த² ஸுத³ந்தி நிபாதமத்தங். உத³கோதி தஸ்ஸ நாமங். இத³ங் ஜாது வேத³கூ³தி எத்த² இத³ந்தி நிபாதமத்தங். அத² வா இத³ங் மம வசனங் ஸுணாதா²தி தீ³பெந்தோ ஏவமாஹ. ஜாது வேத³கூ³தி அஹங் ஏகங்ஸேனேவ வேத³கூ³, வேத³ஸங்கா²தேன ஞாணேன நெய்யேஸு க³தோ, வேத³ங் வா க³தோ அதி⁴க³தோ, பண்டி³தோஹமஸ்மீதி அத்தோ². ஸப்³ப³ஜீதி ஏகங்ஸேன ஸப்³ப³வட்டங் ஜினித்வா அபி⁴ப⁴வித்வா டி²தொஸ்மீதி வத³தி. அபலிக²தங் க³ண்ட³மூலந்தி அபலிக²தங் து³க்க²மூலங். பலிக²ணிந்தி பலிக²தங் மயா, க²னித்வா டி²தொஸ்மீதி தீ³பேதி.
103. Dasame udako sudanti ettha sudanti nipātamattaṃ. Udakoti tassa nāmaṃ. Idaṃ jātu vedagūti ettha idanti nipātamattaṃ. Atha vā idaṃ mama vacanaṃ suṇāthāti dīpento evamāha. Jātu vedagūti ahaṃ ekaṃseneva vedagū, vedasaṅkhātena ñāṇena neyyesu gato, vedaṃ vā gato adhigato, paṇḍitohamasmīti attho. Sabbajīti ekaṃsena sabbavaṭṭaṃ jinitvā abhibhavitvā ṭhitosmīti vadati. Apalikhataṃ gaṇḍamūlanti apalikhataṃ dukkhamūlaṃ. Palikhaṇinti palikhataṃ mayā, khanitvā ṭhitosmīti dīpeti.
மாதாபெத்திகஸம்ப⁴வஸ்ஸாதி மாதிதோ ச பிதிதோ ச நிப்³ப³த்தேன மாதாபெத்திகேன ஸுக்கஸோணிதேன ஸம்பூ⁴தஸ்ஸ. ஓத³னகும்மாஸூபசயஸ்ஸாதி ஓத³னேன சேவ கும்மாஸேன ச உபசிதஸ்ஸ வட்³டி⁴தஸ்ஸ. அனிச்சுச்சா²த³னபரிமத்³த³னபே⁴த³னவித்³த⁴ங்ஸனத⁴ம்மஸ்ஸாதி எத்த² அயங் காயோ ஹுத்வா அபா⁴வட்டே²ன அனிச்சத⁴ம்மோ , து³க்³க³ந்த⁴விகா⁴தத்தா²ய தனுவிலேபனேன உச்சா²த³னத⁴ம்மோ, அங்க³பச்சங்கா³பா³த⁴வினோத³னத்தா²ய கு²த்³த³கஸம்பா³ஹனேன பரிமத்³த³னத⁴ம்மோ, த³ஹரகாலே வா ஊரூஸு ஸயாபெத்வா க³ப்³ப⁴வாஸேன து³ஸ்ஸண்டி²தானங் தேஸங் தேஸங் அங்கா³னங் ஸண்டா²னஸம்பாத³னத்த²ங் அஞ்ச²னபீளனாதீ³னங் வஸேன பரிமத்³த³னத⁴ம்மோ, ஏவங் பரிஹரிதோபி ச பே⁴த³னவித்³த⁴ங்ஸனத⁴ம்மோ பி⁴ஜ்ஜதி சேவ விகிரதி ச, ஏவங் ஸபா⁴வோதி அத்தோ².
Mātāpettikasambhavassāti mātito ca pitito ca nibbattena mātāpettikena sukkasoṇitena sambhūtassa. Odanakummāsūpacayassāti odanena ceva kummāsena ca upacitassa vaḍḍhitassa. Aniccucchādanaparimaddanabhedanaviddhaṃsanadhammassāti ettha ayaṃ kāyo hutvā abhāvaṭṭhena aniccadhammo , duggandhavighātatthāya tanuvilepanena ucchādanadhammo, aṅgapaccaṅgābādhavinodanatthāya khuddakasambāhanena parimaddanadhammo, daharakāle vā ūrūsu sayāpetvā gabbhavāsena dussaṇṭhitānaṃ tesaṃ tesaṃ aṅgānaṃ saṇṭhānasampādanatthaṃ añchanapīḷanādīnaṃ vasena parimaddanadhammo, evaṃ pariharitopi ca bhedanaviddhaṃsanadhammo bhijjati ceva vikirati ca, evaṃ sabhāvoti attho.
தத்த² மாதாபெத்திகஸம்ப⁴வஓத³னகும்மாஸூபசயபரிமத்³த³னபதே³ஹி வட்³டி⁴ கதி²தா, அனிச்சபே⁴த³னவித்³த⁴ங்ஸனபதே³ஹி பரிஹானி. புரிமேஹி வா தீஹி ஸமுத³யோ, பச்சி²மேஹி அத்த²ங்க³மோதி. ஏவங் சாதுமஹாபூ⁴திகஸ்ஸ காயஸ்ஸ வட்³டி⁴பரிஹானினிப்³ப³த்திபே⁴தா³ த³ஸ்ஸிதா. ஸேஸங் உத்தானத்த²மேவாதி.
Tattha mātāpettikasambhavaodanakummāsūpacayaparimaddanapadehi vaḍḍhi kathitā, aniccabhedanaviddhaṃsanapadehi parihāni. Purimehi vā tīhi samudayo, pacchimehi atthaṅgamoti. Evaṃ cātumahābhūtikassa kāyassa vaḍḍhiparihāninibbattibhedā dassitā. Sesaṃ uttānatthamevāti.
ஸளவக்³கோ³ த³ஸமோ.
Saḷavaggo dasamo.
து³தியோ பண்ணாஸகோ.
Dutiyo paṇṇāsako.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. உத³கஸுத்தங் • 10. Udakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. உத³கஸுத்தவண்ணனா • 10. Udakasuttavaṇṇanā
