| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
10. උදකසුත්‌තවණ්‌ණනා
10. Udakasuttavaṇṇanā
103. දසමෙ උදකො සුදන්‌ති එත්‌ථ සුදන්‌ති නිපාතමත්‌තං. උදකොති තස්‌ස නාමං. ඉදං ජාතු වෙදගූති එත්‌ථ ඉදන්‌ති නිපාතමත්‌තං. අථ වා ඉදං මම වචනං සුණාථාති දීපෙන්‌තො එවමාහ. ජාතු වෙදගූති අහං එකංසෙනෙව වෙදගූ, වෙදසඞ්‌ඛාතෙන ඤාණෙන නෙය්‍යෙසු ගතො, වෙදං වා ගතො අධිගතො, පණ්‌ඩිතොහමස්‌මීති අත්‌ථො. සබ්‌බජීති එකංසෙන සබ්‌බවට්‌ටං ජිනිත්‌වා අභිභවිත්‌වා ඨිතොස්‌මීති වදති. අපලිඛතං ගණ්‌ඩමූලන්‌ති අපලිඛතං දුක්‌ඛමූලං. පලිඛණින්‌ති පලිඛතං මයා, ඛනිත්‌වා ඨිතොස්‌මීති දීපෙති.
103. Dasame udako sudanti ettha sudanti nipātamattaṃ. Udakoti tassa nāmaṃ. Idaṃ jātu vedagūti ettha idanti nipātamattaṃ. Atha vā idaṃ mama vacanaṃ suṇāthāti dīpento evamāha. Jātu vedagūti ahaṃ ekaṃseneva vedagū, vedasaṅkhātena ñāṇena neyyesu gato, vedaṃ vā gato adhigato, paṇḍitohamasmīti attho. Sabbajīti ekaṃsena sabbavaṭṭaṃ jinitvā abhibhavitvā ṭhitosmīti vadati. Apalikhataṃ gaṇḍamūlanti apalikhataṃ dukkhamūlaṃ. Palikhaṇinti palikhataṃ mayā, khanitvā ṭhitosmīti dīpeti.
මාතාපෙත්‌තිකසම්‌භවස්‌සාති මාතිතො ච පිතිතො ච නිබ්‌බත්‌තෙන මාතාපෙත්‌තිකෙන සුක්‌කසොණිතෙන සම්‌භූතස්‌ස. ඔදනකුම්‌මාසූපචයස්‌සාති ඔදනෙන චෙව කුම්‌මාසෙන ච උපචිතස්‌ස වඩ්‌ඪිතස්‌ස. අනිච්‌චුච්‌ඡාදනපරිමද්‌දනභෙදනවිද්‌ධංසනධම්‌මස්‌සාති එත්‌ථ අයං කායො හුත්‌වා අභාවට්‌ඨෙන අනිච්‌චධම්‌මො , දුග්‌ගන්‌ධවිඝාතත්‌ථාය තනුවිලෙපනෙන උච්‌ඡාදනධම්‌මො, අඞ්‌ගපච්‌චඞ්‌ගාබාධවිනොදනත්‌ථාය ඛුද්‌දකසම්‌බාහනෙන පරිමද්‌දනධම්‌මො, දහරකාලෙ වා ඌරූසු සයාපෙත්‌වා ගබ්‌භවාසෙන දුස්‌සණ්‌ඨිතානං තෙසං තෙසං අඞ්‌ගානං සණ්‌ඨානසම්‌පාදනත්‌ථං අඤ්‌ඡනපීළනාදීනං වසෙන පරිමද්‌දනධම්‌මො, එවං පරිහරිතොපි ච භෙදනවිද්‌ධංසනධම්‌මො භිජ්‌ජති චෙව විකිරති ච, එවං සභාවොති අත්‌ථො.
Mātāpettikasambhavassāti mātito ca pitito ca nibbattena mātāpettikena sukkasoṇitena sambhūtassa. Odanakummāsūpacayassāti odanena ceva kummāsena ca upacitassa vaḍḍhitassa. Aniccucchādanaparimaddanabhedanaviddhaṃsanadhammassāti ettha ayaṃ kāyo hutvā abhāvaṭṭhena aniccadhammo , duggandhavighātatthāya tanuvilepanena ucchādanadhammo, aṅgapaccaṅgābādhavinodanatthāya khuddakasambāhanena parimaddanadhammo, daharakāle vā ūrūsu sayāpetvā gabbhavāsena dussaṇṭhitānaṃ tesaṃ tesaṃ aṅgānaṃ saṇṭhānasampādanatthaṃ añchanapīḷanādīnaṃ vasena parimaddanadhammo, evaṃ pariharitopi ca bhedanaviddhaṃsanadhammo bhijjati ceva vikirati ca, evaṃ sabhāvoti attho.
තත්‌ථ මාතාපෙත්‌තිකසම්‌භවඔදනකුම්‌මාසූපචයපරිමද්‌දනපදෙහි වඩ්‌ඪි කථිතා, අනිච්‌චභෙදනවිද්‌ධංසනපදෙහි පරිහානි. පුරිමෙහි වා තීහි සමුදයො, පච්‌ඡිමෙහි අත්‌ථඞ්‌ගමොති. එවං චාතුමහාභූතිකස්‌ස කායස්‌ස වඩ්‌ඪිපරිහානිනිබ්‌බත්‌තිභෙදා දස්‌සිතා. සෙසං උත්‌තානත්‌ථමෙවාති.
Tattha mātāpettikasambhavaodanakummāsūpacayaparimaddanapadehi vaḍḍhi kathitā, aniccabhedanaviddhaṃsanapadehi parihāni. Purimehi vā tīhi samudayo, pacchimehi atthaṅgamoti. Evaṃ cātumahābhūtikassa kāyassa vaḍḍhiparihāninibbattibhedā dassitā. Sesaṃ uttānatthamevāti.
සළවග්‌ගො දසමො.
Saḷavaggo dasamo.
දුතියො පණ්‌ණාසකො.
Dutiyo paṇṇāsako.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 10. උදකසුත්‌තං • 10. Udakasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 10. උදකසුත්‌තවණ්‌ණනා • 10. Udakasuttavaṇṇanā
