| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
உத³கட்ட²கதா²வண்ணனா
Udakaṭṭhakathāvaṇṇanā
98. உத³கட்ட²கதா²யங் ஸந்த³மானஉத³கே நிக்கி²த்தங் ந திட்ட²தீதி ஆஹ ‘‘அஸந்த³னகே உத³கே’’தி. அனாபத்தீதி ஹத்த²வாரபத³வாரேஸு து³க்கடாபத்தியா அபா⁴வங் ஸந்தா⁴ய வுத்தங். கட்³ட⁴தீதி ஹெட்ட²தோ ஓஸாரேதி. உப்பலாதீ³ஸூதி ஆதி³-ஸத்³தே³ன பது³மபுண்ட³ரீகாதி³ங் ஸங்க³ண்ஹாதி. ரத்தங் பது³மங், ஸேதங் புண்ட³ரீகங். ஸேதங் வா பது³மங், ரத்தங் புண்ட³ரீகங். அத² வா ரத்தங் வா ஹோது ஸேதங் வா ஸதபத்தங் பது³மங், ஊனஸதபத்தங் புண்ட³ரீகங். வத்து² பூரதீதி பாராஜிகவத்து² பஹோதி. தஸ்மிங் சி²ன்னமத்தே பாராஜிகந்தி உத³கதோ அச்சுக்³க³தஸ்ஸ உத³கவினிமுத்தட்டா²னதோ சே²த³னங் ஸந்தா⁴ய வுத்தங். யங் வத்து²ங் பூரேதீதி யங் புப்ப²ங் பாராஜிகவத்து²ங் பூரேதி. த³ஸஹி புப்பே²ஹி கதகலாபோ ஹத்த²கோ, மஹந்தங் கலாபங் கத்வா ப³த்³த⁴ங் பா⁴ரப³த்³த⁴ங். ரஜ்ஜுகேஸு திணானி ஸந்த²ரித்வாதி எத்த² ‘‘த்³வே ரஜ்ஜுகானி உத³கபிட்டே² ட²பெத்வா தேஸங் உபரி திரியதோ திணானி ஸந்த²ரித்வா தேஸங் உபரி ப³ந்தி⁴த்வா வா அப³ந்தி⁴த்வா வா திரியதோயேவ புப்பா²னி ட²பெத்வா ஹெட்ட²தோ க³தானி த்³வே ரஜ்ஜுகானி உக்கி²பித்வா புப்ப²மத்த²கே ட²பெந்தீ’’தி வத³ந்தி.
98. Udakaṭṭhakathāyaṃ sandamānaudake nikkhittaṃ na tiṭṭhatīti āha ‘‘asandanake udake’’ti. Anāpattīti hatthavārapadavāresu dukkaṭāpattiyā abhāvaṃ sandhāya vuttaṃ. Kaḍḍhatīti heṭṭhato osāreti. Uppalādīsūti ādi-saddena padumapuṇḍarīkādiṃ saṅgaṇhāti. Rattaṃ padumaṃ, setaṃ puṇḍarīkaṃ. Setaṃ vā padumaṃ, rattaṃ puṇḍarīkaṃ. Atha vā rattaṃ vā hotu setaṃ vā satapattaṃ padumaṃ, ūnasatapattaṃ puṇḍarīkaṃ. Vatthu pūratīti pārājikavatthu pahoti. Tasmiṃ chinnamatte pārājikanti udakato accuggatassa udakavinimuttaṭṭhānato chedanaṃ sandhāya vuttaṃ. Yaṃ vatthuṃ pūretīti yaṃ pupphaṃ pārājikavatthuṃ pūreti. Dasahi pupphehi katakalāpo hatthako, mahantaṃ kalāpaṃ katvā baddhaṃ bhārabaddhaṃ. Rajjukesu tiṇāni santharitvāti ettha ‘‘dve rajjukāni udakapiṭṭhe ṭhapetvā tesaṃ upari tiriyato tiṇāni santharitvā tesaṃ upari bandhitvā vā abandhitvā vā tiriyatoyeva pupphāni ṭhapetvā heṭṭhato gatāni dve rajjukāni ukkhipitvā pupphamatthake ṭhapentī’’ti vadanti.
கேஸக்³க³மத்தம்பி யதா²டி²தட்டா²னதோ சாவேதீதி பாரிமந்தேன பு²ட்டோ²காஸங், ஓரிமந்தேன கேஸக்³க³மத்தங் சாவேதி. ஸகலமுத³கந்தி த³ண்டே³ன பு²ட்டோ²காஸக³தங் ஸகலமுத³கங். ந உத³கங் டா²னந்தி அத்தனா கதட்டா²னஸ்ஸ அட்டா²னத்தா. இத³ங் உப⁴யந்தி எத்த² ‘‘ப³ந்த⁴னங் அமோசெத்வா…பே॰… பாராஜிக’’ந்தி இத³மேவேகங், ‘‘பட²மங் ப³ந்த⁴னங்…பே॰… டா²னபரிச்சே²தோ³’’தி இத³ங் து³தியங். பது³மினியந்தி பது³மக³ச்சே². உப்பாடிதாயாதி பரேஹி அத்தனோ அத்தா²ய உப்பாடிதாய.
Kesaggamattampi yathāṭhitaṭṭhānato cāvetīti pārimantena phuṭṭhokāsaṃ, orimantena kesaggamattaṃ cāveti. Sakalamudakanti daṇḍena phuṭṭhokāsagataṃ sakalamudakaṃ. Na udakaṃ ṭhānanti attanā kataṭṭhānassa aṭṭhānattā. Idaṃ ubhayanti ettha ‘‘bandhanaṃ amocetvā…pe… pārājika’’nti idamevekaṃ, ‘‘paṭhamaṃ bandhanaṃ…pe… ṭhānaparicchedo’’ti idaṃ dutiyaṃ. Paduminiyanti padumagacche. Uppāṭitāyāti parehi attano atthāya uppāṭitāya.
ப³ஹி ட²பிதேதி உத³கதோ ப³ஹி ட²பிதே. ஹத்த²கவஸேன கு²த்³த³கங் கத்வா
Bahiṭhapiteti udakato bahi ṭhapite. Hatthakavasena khuddakaṃ katvā
ப³த்³த⁴ங் கலாபப³த்³த⁴ங். முளாலந்தி கந்த³ங். பத்தங் வா புப்ப²ங் வாதி இத³ங் கத்³த³மஸ்ஸ அந்தோ பவிஸித்வா டி²தங் ஸந்தா⁴ய வுத்தங். ஸகலமுத³கந்தி வாபிஆதீ³ஸு பரியாபன்னங் ஸகலமுத³கங். நித்³த⁴மனதும்ப³ந்தி வாபியா உத³கஸ்ஸ நிக்க²மனமக்³க³ங். உத³கவாஹகந்தி மஹாமாதிகங். ந அவஹாரோதி இத³ங் புப்³ப³ஸதி³ஸங் ந ஹோதீதி ஆஹ – ‘‘கஸ்மா…பே॰… ஏவரூபா ஹி தத்த² கதிகா’’தி. அவஹாரோ நத்தீ²தி ஸப்³ப³ஸாதா⁴ரணே அபரிக்³க³ஹட்டா²னே க³ஹிதத்தா. மாதிகங் ஆரோபெத்வாதி கு²த்³த³கமாதிகங் ஆரோபெத்வா. மரித்வா…பே॰… திட்ட²ந்தீதி எத்த² ‘‘மதமச்சா²னங்யேவ தேஸங் ஸந்தகத்தா அமதே க³ண்ஹந்தஸ்ஸ நத்தி² அவஹாரோ’’தி வத³ந்தி.
Baddhaṃ kalāpabaddhaṃ. Muḷālanti kandaṃ. Pattaṃ vā pupphaṃ vāti idaṃ kaddamassa anto pavisitvā ṭhitaṃ sandhāya vuttaṃ. Sakalamudakanti vāpiādīsu pariyāpannaṃ sakalamudakaṃ. Niddhamanatumbanti vāpiyā udakassa nikkhamanamaggaṃ. Udakavāhakanti mahāmātikaṃ. Na avahāroti idaṃ pubbasadisaṃ na hotīti āha – ‘‘kasmā…pe… evarūpā hi tattha katikā’’ti. Avahāro natthīti sabbasādhāraṇe apariggahaṭṭhāne gahitattā. Mātikaṃ āropetvāti khuddakamātikaṃ āropetvā. Maritvā…pe… tiṭṭhantīti ettha ‘‘matamacchānaṃyeva tesaṃ santakattā amate gaṇhantassa natthi avahāro’’ti vadanti.
உத³கட்ட²கதா²வண்ணனா நிட்டி²தா.
Udakaṭṭhakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பூ⁴மட்ட²கதா²தி³வண்ணனா • Bhūmaṭṭhakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / உத³கட்ட²கதா²வண்ணனா • Udakaṭṭhakathāvaṇṇanā
