Library / Tipiṭaka / तिपिटक • Tipiṭaka / अङ्गुत्तरनिकाय • Aṅguttaranikāya

    ५. उदकूपमासुत्तं

    5. Udakūpamāsuttaṃ

    १५. ‘‘सत्तिमे, भिक्खवे, उदकूपमा पुग्गला सन्तो संविज्‍जमाना लोकस्मिं। कतमे सत्त? 1 इध, भिक्खवे, एकच्‍चो पुग्गलो सकिं निमुग्गो निमुग्गोव होति; इध पन, भिक्खवे, एकच्‍चो पुग्गलो उम्मुज्‍जित्वा निमुज्‍जति; इध पन, भिक्खवे, एकच्‍चो पुग्गलो उम्मुज्‍जित्वा ठितो होति; इध पन, भिक्खवे, एकच्‍चो पुग्गलो उम्मुज्‍जित्वा विपस्सति विलोकेति; इध पन, भिक्खवे, एकच्‍चो पुग्गलो उम्मुज्‍जित्वा पतरति; इध पन, भिक्खवे, एकच्‍चो पुग्गलो उम्मुज्‍जित्वा पतिगाधप्पत्तो होति; इध पन, भिक्खवे, एकच्‍चो पुग्गलो उम्मुज्‍जित्वा तिण्णो होति पारङ्गतो 2 थले तिट्ठति ब्राह्मणो।

    15. ‘‘Sattime, bhikkhave, udakūpamā puggalā santo saṃvijjamānā lokasmiṃ. Katame satta? 3 Idha, bhikkhave, ekacco puggalo sakiṃ nimuggo nimuggova hoti; idha pana, bhikkhave, ekacco puggalo ummujjitvā nimujjati; idha pana, bhikkhave, ekacco puggalo ummujjitvā ṭhito hoti; idha pana, bhikkhave, ekacco puggalo ummujjitvā vipassati viloketi; idha pana, bhikkhave, ekacco puggalo ummujjitvā patarati; idha pana, bhikkhave, ekacco puggalo ummujjitvā patigādhappatto hoti; idha pana, bhikkhave, ekacco puggalo ummujjitvā tiṇṇo hoti pāraṅgato 4 thale tiṭṭhati brāhmaṇo.

    ‘‘कथञ्‍च, भिक्खवे, पुग्गलो सकिं निमुग्गो निमुग्गोव होति? इध भिक्खवे, एकच्‍चो पुग्गलो समन्‍नागतो होति एकन्तकाळकेहि अकुसलेहि धम्मेहि। एवं खो, भिक्खवे, पुग्गलो सकिं निमुग्गो निमुग्गोव होति।

    ‘‘Kathañca, bhikkhave, puggalo sakiṃ nimuggo nimuggova hoti? Idha bhikkhave, ekacco puggalo samannāgato hoti ekantakāḷakehi akusalehi dhammehi. Evaṃ kho, bhikkhave, puggalo sakiṃ nimuggo nimuggova hoti.

    ‘‘कथञ्‍च, भिक्खवे, पुग्गलो उम्मुज्‍जित्वा निमुज्‍जति? इध, भिक्खवे, एकच्‍चो पुग्गलो उम्मुज्‍जति साधु सद्धा कुसलेसु धम्मेसु, साधु हिरी…पे॰… साधु ओत्तप्पं… साधु वीरियं 5 … साधु पञ्‍ञा कुसलेसु धम्मेसूति। तस्स सा सद्धा नेव तिट्ठति नो वड्ढति हायतियेव, तस्स सा हिरी…पे॰… तस्स तं ओत्तप्पं… तस्स तं वीरियं… तस्स सा पञ्‍ञा नेव तिट्ठति नो वड्ढति हायतियेव। एवं खो, भिक्खवे, पुग्गलो उम्मुज्‍जित्वा निमुज्‍जति।

    ‘‘Kathañca, bhikkhave, puggalo ummujjitvā nimujjati? Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī…pe… sādhu ottappaṃ… sādhu vīriyaṃ 6 … sādhu paññā kusalesu dhammesūti. Tassa sā saddhā neva tiṭṭhati no vaḍḍhati hāyatiyeva, tassa sā hirī…pe… tassa taṃ ottappaṃ… tassa taṃ vīriyaṃ… tassa sā paññā neva tiṭṭhati no vaḍḍhati hāyatiyeva. Evaṃ kho, bhikkhave, puggalo ummujjitvā nimujjati.

    ‘‘कथञ्‍च , भिक्खवे, पुग्गलो उम्मुज्‍जित्वा ठितो होति? इध , भिक्खवे, एकच्‍चो पुग्गलो उम्मुज्‍जति साधु सद्धा कुसलेसु धम्मेसु, साधु हिरी…पे॰… साधु ओत्तप्पं… साधु वीरियं… साधु पञ्‍ञा कुसलेसु धम्मेसूति। तस्स सा सद्धा नेव हायति नो वड्ढति ठिता होति। तस्स सा हिरी…पे॰… तस्स तं ओत्तप्पं… तस्स तं वीरियं… तस्स सा पञ्‍ञा नेव हायति नो वड्ढति ठिता होति। एवं खो, भिक्खवे, पुग्गलो उम्मुज्‍जित्वा ठितो होति।

    ‘‘Kathañca , bhikkhave, puggalo ummujjitvā ṭhito hoti? Idha , bhikkhave, ekacco puggalo ummujjati sādhu saddhā kusalesu dhammesu, sādhu hirī…pe… sādhu ottappaṃ… sādhu vīriyaṃ… sādhu paññā kusalesu dhammesūti. Tassa sā saddhā neva hāyati no vaḍḍhati ṭhitā hoti. Tassa sā hirī…pe… tassa taṃ ottappaṃ… tassa taṃ vīriyaṃ… tassa sā paññā neva hāyati no vaḍḍhati ṭhitā hoti. Evaṃ kho, bhikkhave, puggalo ummujjitvā ṭhito hoti.

    ‘‘कथञ्‍च, भिक्खवे, पुग्गलो उम्मुज्‍जित्वा विपस्सति विलोकेति? इध, भिक्खवे, एकच्‍चो पुग्गलो उम्मुज्‍जति साधु सद्धा कुसलेसु धम्मेसु, साधु हिरी…पे॰… साधु ओत्तप्पं… साधु वीरियं… साधु पञ्‍ञा कुसलेसु धम्मेसूति। सो तिण्णं संयोजनानं परिक्खया सोतापन्‍नो होति अविनिपातधम्मो नियतो सम्बोधिपरायणो। एवं खो, भिक्खवे, पुग्गलो उम्मुज्‍जित्वा विपस्सति विलोकेति।

    ‘‘Kathañca, bhikkhave, puggalo ummujjitvā vipassati viloketi? Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī…pe… sādhu ottappaṃ… sādhu vīriyaṃ… sādhu paññā kusalesu dhammesūti. So tiṇṇaṃ saṃyojanānaṃ parikkhayā sotāpanno hoti avinipātadhammo niyato sambodhiparāyaṇo. Evaṃ kho, bhikkhave, puggalo ummujjitvā vipassati viloketi.

    ‘‘कथञ्‍च, भिक्खवे, पुग्गलो उम्मुज्‍जित्वा पतरति? इध, भिक्खवे, एकच्‍चो पुग्गलो उम्मुज्‍जति साधु सद्धा कुसलेसु धम्मेसु, साधु हिरी…पे॰… साधु ओत्तप्पं… साधु वीरियं… साधु पञ्‍ञा कुसलेसु धम्मेसूति। सो तिण्णं संयोजनानं परिक्खया रागदोसमोहानं तनुत्ता सकदागामी होति, सकिदेव 7 इमं लोकं आगन्त्वा दुक्खस्सन्तं करोति 8। एवं खो, भिक्खवे, पुग्गलो उम्मुज्‍जित्वा पतरति।

    ‘‘Kathañca, bhikkhave, puggalo ummujjitvā patarati? Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī…pe… sādhu ottappaṃ… sādhu vīriyaṃ… sādhu paññā kusalesu dhammesūti. So tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmī hoti, sakideva 9 imaṃ lokaṃ āgantvā dukkhassantaṃ karoti 10. Evaṃ kho, bhikkhave, puggalo ummujjitvā patarati.

    ‘‘कथञ्‍च, भिक्खवे, पुग्गलो उम्मुज्‍जित्वा पतिगाधप्पत्तो होति? इध, भिक्खवे, एकच्‍चो पुग्गलो उम्मुज्‍जति साधु सद्धा कुसलेसु धम्मेसु, साधु हिरी…पे॰… साधु ओत्तप्पं… साधु वीरियं… साधु पञ्‍ञा कुसलेसु धम्मेसूति। सो पञ्‍चन्‍नं ओरम्भागियानं संयोजनानं परिक्खया ओपपातिको होति तत्थ परिनिब्बायी अनावत्तिधम्मो तस्मा लोका। एवं खो, भिक्खवे, पुग्गलो उम्मुज्‍जित्वा पतिगाधप्पत्तो होति।

    ‘‘Kathañca, bhikkhave, puggalo ummujjitvā patigādhappatto hoti? Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī…pe… sādhu ottappaṃ… sādhu vīriyaṃ… sādhu paññā kusalesu dhammesūti. So pañcannaṃ orambhāgiyānaṃ saṃyojanānaṃ parikkhayā opapātiko hoti tattha parinibbāyī anāvattidhammo tasmā lokā. Evaṃ kho, bhikkhave, puggalo ummujjitvā patigādhappatto hoti.

    ‘‘कथञ्‍च, भिक्खवे, पुग्गलो उम्मुज्‍जित्वा तिण्णो होति पारङ्गतो थले तिट्ठति ब्राह्मणो। इध , भिक्खवे, एकच्‍चो पुग्गलो उम्मुज्‍जति साधु सद्धा कुसलेसु धम्मेसु, साधु हिरी…पे॰… साधु ओत्तप्पं… साधु वीरियं… साधु पञ्‍ञा कुसलेसु धम्मेसूति। सो आसवानं खया अनासवं चेतोविमुत्तिं पञ्‍ञाविमुत्तिं दिट्ठेव धम्मे सयं अभिञ्‍ञा सच्छिकत्वा उपसम्पज्‍ज विहरति। एवं खो, भिक्खवे, पुग्गलो उम्मुज्‍जित्वा तिण्णो होति पारङ्गतो थले तिट्ठति ब्राह्मणो।

    ‘‘Kathañca, bhikkhave, puggalo ummujjitvā tiṇṇo hoti pāraṅgato thale tiṭṭhati brāhmaṇo. Idha , bhikkhave, ekacco puggalo ummujjati sādhu saddhā kusalesu dhammesu, sādhu hirī…pe… sādhu ottappaṃ… sādhu vīriyaṃ… sādhu paññā kusalesu dhammesūti. So āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Evaṃ kho, bhikkhave, puggalo ummujjitvā tiṇṇo hoti pāraṅgato thale tiṭṭhati brāhmaṇo.

    ‘‘इमे खो, भिक्खवे, सत्त उदकूपमा पुग्गला सन्तो संविज्‍जमाना लोकस्मि’’न्ति। पञ्‍चमं।

    ‘‘Ime kho, bhikkhave, satta udakūpamā puggalā santo saṃvijjamānā lokasmi’’nti. Pañcamaṃ.




    Next: ६. अनिच्‍चानुपस्सीसुत्तं • 6. Aniccānupassīsuttaṃ




    Footnotes:
    1. पु॰ प॰ २०३; कथा॰ ८५२
    2. पारगतो (सी॰ स्या॰ कं॰)
    3. pu. pa. 203; kathā. 852
    4. pāragato (sī. syā. kaṃ.)
    5. विरियं (सी॰ स्या॰ कं॰ पी॰)
    6. viriyaṃ (sī. syā. kaṃ. pī.)
    7. सकिंदेव (क॰)
    8. दुक्खस्सन्तकरो होति (क॰)
    9. sakiṃdeva (ka.)
    10. dukkhassantakaro hoti (ka.)



    Related texts:



    अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / ५. उदकूपमासुत्तवण्णना • 5. Udakūpamāsuttavaṇṇanā

    टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ५. उदकूपमासुत्तवण्णना • 5. Udakūpamāsuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact