| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
5. උදකූපමාසුත්‌තං
5. Udakūpamāsuttaṃ
15. ‘‘සත්‌තිමෙ, භික්‌ඛවෙ, උදකූපමා පුග්‌ගලා සන්‌තො සංවිජ්‌ජමානා ලොකස්‌මිං. කතමෙ සත්‌ත? 1 ඉධ, භික්‌ඛවෙ, එකච්‌චො පුග්‌ගලො සකිං නිමුග්‌ගො නිමුග්‌ගොව හොති; ඉධ පන, භික්‌ඛවෙ, එකච්‌චො පුග්‌ගලො උම්‌මුජ්‌ජිත්‌වා නිමුජ්‌ජති; ඉධ පන, භික්‌ඛවෙ, එකච්‌චො පුග්‌ගලො උම්‌මුජ්‌ජිත්‌වා ඨිතො හොති; ඉධ පන, භික්‌ඛවෙ, එකච්‌චො පුග්‌ගලො උම්‌මුජ්‌ජිත්‌වා විපස්‌සති විලොකෙති; ඉධ පන, භික්‌ඛවෙ, එකච්‌චො පුග්‌ගලො උම්‌මුජ්‌ජිත්‌වා පතරති; ඉධ පන, භික්‌ඛවෙ, එකච්‌චො පුග්‌ගලො උම්‌මුජ්‌ජිත්‌වා පතිගාධප්‌පත්‌තො හොති; ඉධ පන, භික්‌ඛවෙ, එකච්‌චො පුග්‌ගලො උම්‌මුජ්‌ජිත්‌වා තිණ්‌ණො හොති පාරඞ්‌ගතො 2 ථලෙ තිට්‌ඨති බ්‍රාහ්‌මණො.
15. ‘‘Sattime, bhikkhave, udakūpamā puggalā santo saṃvijjamānā lokasmiṃ. Katame satta? 3 Idha, bhikkhave, ekacco puggalo sakiṃ nimuggo nimuggova hoti; idha pana, bhikkhave, ekacco puggalo ummujjitvā nimujjati; idha pana, bhikkhave, ekacco puggalo ummujjitvā ṭhito hoti; idha pana, bhikkhave, ekacco puggalo ummujjitvā vipassati viloketi; idha pana, bhikkhave, ekacco puggalo ummujjitvā patarati; idha pana, bhikkhave, ekacco puggalo ummujjitvā patigādhappatto hoti; idha pana, bhikkhave, ekacco puggalo ummujjitvā tiṇṇo hoti pāraṅgato 4 thale tiṭṭhati brāhmaṇo.
‘‘කථඤ්‌ච, භික්‌ඛවෙ, පුග්‌ගලො සකිං නිමුග්‌ගො නිමුග්‌ගොව හොති? ඉධ භික්‌ඛවෙ, එකච්‌චො පුග්‌ගලො සමන්‌නාගතො හොති එකන්‌තකාළකෙහි අකුසලෙහි ධම්‌මෙහි. එවං ඛො, භික්‌ඛවෙ, පුග්‌ගලො සකිං නිමුග්‌ගො නිමුග්‌ගොව හොති.
‘‘Kathañca, bhikkhave, puggalo sakiṃ nimuggo nimuggova hoti? Idha bhikkhave, ekacco puggalo samannāgato hoti ekantakāḷakehi akusalehi dhammehi. Evaṃ kho, bhikkhave, puggalo sakiṃ nimuggo nimuggova hoti.
‘‘කථඤ්‌ච, භික්‌ඛවෙ, පුග්‌ගලො උම්‌මුජ්‌ජිත්‌වා නිමුජ්‌ජති? ඉධ, භික්‌ඛවෙ, එකච්‌චො පුග්‌ගලො උම්‌මුජ්‌ජති සාධු සද්‌ධා කුසලෙසු ධම්‌මෙසු, සාධු හිරී…පෙ.… සාධු ඔත්‌තප්‌පං… සාධු වීරියං 5 … සාධු පඤ්‌ඤා කුසලෙසු ධම්‌මෙසූති. තස්‌ස සා සද්‌ධා නෙව තිට්‌ඨති නො වඩ්‌ඪති හායතියෙව, තස්‌ස සා හිරී…පෙ.… තස්‌ස තං ඔත්‌තප්‌පං… තස්‌ස තං වීරියං… තස්‌ස සා පඤ්‌ඤා නෙව තිට්‌ඨති නො වඩ්‌ඪති හායතියෙව. එවං ඛො, භික්‌ඛවෙ, පුග්‌ගලො උම්‌මුජ්‌ජිත්‌වා නිමුජ්‌ජති.
‘‘Kathañca, bhikkhave, puggalo ummujjitvā nimujjati? Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī…pe… sādhu ottappaṃ… sādhu vīriyaṃ 6 … sādhu paññā kusalesu dhammesūti. Tassa sā saddhā neva tiṭṭhati no vaḍḍhati hāyatiyeva, tassa sā hirī…pe… tassa taṃ ottappaṃ… tassa taṃ vīriyaṃ… tassa sā paññā neva tiṭṭhati no vaḍḍhati hāyatiyeva. Evaṃ kho, bhikkhave, puggalo ummujjitvā nimujjati.
‘‘කථඤ්‌ච , භික්‌ඛවෙ, පුග්‌ගලො උම්‌මුජ්‌ජිත්‌වා ඨිතො හොති? ඉධ , භික්‌ඛවෙ, එකච්‌චො පුග්‌ගලො උම්‌මුජ්‌ජති සාධු සද්‌ධා කුසලෙසු ධම්‌මෙසු, සාධු හිරී…පෙ.… සාධු ඔත්‌තප්‌පං… සාධු වීරියං… සාධු පඤ්‌ඤා කුසලෙසු ධම්‌මෙසූති. තස්‌ස සා සද්‌ධා නෙව හායති නො වඩ්‌ඪති ඨිතා හොති. තස්‌ස සා හිරී…පෙ.… තස්‌ස තං ඔත්‌තප්‌පං… තස්‌ස තං වීරියං… තස්‌ස සා පඤ්‌ඤා නෙව හායති නො වඩ්‌ඪති ඨිතා හොති. එවං ඛො, භික්‌ඛවෙ, පුග්‌ගලො උම්‌මුජ්‌ජිත්‌වා ඨිතො හොති.
‘‘Kathañca , bhikkhave, puggalo ummujjitvā ṭhito hoti? Idha , bhikkhave, ekacco puggalo ummujjati sādhu saddhā kusalesu dhammesu, sādhu hirī…pe… sādhu ottappaṃ… sādhu vīriyaṃ… sādhu paññā kusalesu dhammesūti. Tassa sā saddhā neva hāyati no vaḍḍhati ṭhitā hoti. Tassa sā hirī…pe… tassa taṃ ottappaṃ… tassa taṃ vīriyaṃ… tassa sā paññā neva hāyati no vaḍḍhati ṭhitā hoti. Evaṃ kho, bhikkhave, puggalo ummujjitvā ṭhito hoti.
‘‘කථඤ්‌ච, භික්‌ඛවෙ, පුග්‌ගලො උම්‌මුජ්‌ජිත්‌වා විපස්‌සති විලොකෙති? ඉධ, භික්‌ඛවෙ, එකච්‌චො පුග්‌ගලො උම්‌මුජ්‌ජති සාධු සද්‌ධා කුසලෙසු ධම්‌මෙසු, සාධු හිරී…පෙ.… සාධු ඔත්‌තප්‌පං… සාධු වීරියං… සාධු පඤ්‌ඤා කුසලෙසු ධම්‌මෙසූති. සො තිණ්‌ණං සංයොජනානං පරික්‌ඛයා සොතාපන්‌නො හොති අවිනිපාතධම්‌මො නියතො සම්‌බොධිපරායණො. එවං ඛො, භික්‌ඛවෙ, පුග්‌ගලො උම්‌මුජ්‌ජිත්‌වා විපස්‌සති විලොකෙති.
‘‘Kathañca, bhikkhave, puggalo ummujjitvā vipassati viloketi? Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī…pe… sādhu ottappaṃ… sādhu vīriyaṃ… sādhu paññā kusalesu dhammesūti. So tiṇṇaṃ saṃyojanānaṃ parikkhayā sotāpanno hoti avinipātadhammo niyato sambodhiparāyaṇo. Evaṃ kho, bhikkhave, puggalo ummujjitvā vipassati viloketi.
‘‘කථඤ්‌ච, භික්‌ඛවෙ, පුග්‌ගලො උම්‌මුජ්‌ජිත්‌වා පතරති? ඉධ, භික්‌ඛවෙ, එකච්‌චො පුග්‌ගලො උම්‌මුජ්‌ජති සාධු සද්‌ධා කුසලෙසු ධම්‌මෙසු, සාධු හිරී…පෙ.… සාධු ඔත්‌තප්‌පං… සාධු වීරියං… සාධු පඤ්‌ඤා කුසලෙසු ධම්‌මෙසූති. සො තිණ්‌ණං සංයොජනානං පරික්‌ඛයා රාගදොසමොහානං තනුත්‌තා සකදාගාමී හොති, සකිදෙව 7 ඉමං ලොකං ආගන්‌ත්‌වා දුක්‌ඛස්‌සන්‌තං කරොති 8. එවං ඛො, භික්‌ඛවෙ, පුග්‌ගලො උම්‌මුජ්‌ජිත්‌වා පතරති.
‘‘Kathañca, bhikkhave, puggalo ummujjitvā patarati? Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī…pe… sādhu ottappaṃ… sādhu vīriyaṃ… sādhu paññā kusalesu dhammesūti. So tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmī hoti, sakideva 9 imaṃ lokaṃ āgantvā dukkhassantaṃ karoti 10. Evaṃ kho, bhikkhave, puggalo ummujjitvā patarati.
‘‘කථඤ්‌ච, භික්‌ඛවෙ, පුග්‌ගලො උම්‌මුජ්‌ජිත්‌වා පතිගාධප්‌පත්‌තො හොති? ඉධ, භික්‌ඛවෙ, එකච්‌චො පුග්‌ගලො උම්‌මුජ්‌ජති සාධු සද්‌ධා කුසලෙසු ධම්‌මෙසු, සාධු හිරී…පෙ.… සාධු ඔත්‌තප්‌පං… සාධු වීරියං… සාධු පඤ්‌ඤා කුසලෙසු ධම්‌මෙසූති. සො පඤ්‌චන්‌නං ඔරම්‌භාගියානං සංයොජනානං පරික්‌ඛයා ඔපපාතිකො හොති තත්‌ථ පරිනිබ්‌බායී අනාවත්‌තිධම්‌මො තස්‌මා ලොකා. එවං ඛො, භික්‌ඛවෙ, පුග්‌ගලො උම්‌මුජ්‌ජිත්‌වා පතිගාධප්‌පත්‌තො හොති.
‘‘Kathañca, bhikkhave, puggalo ummujjitvā patigādhappatto hoti? Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī…pe… sādhu ottappaṃ… sādhu vīriyaṃ… sādhu paññā kusalesu dhammesūti. So pañcannaṃ orambhāgiyānaṃ saṃyojanānaṃ parikkhayā opapātiko hoti tattha parinibbāyī anāvattidhammo tasmā lokā. Evaṃ kho, bhikkhave, puggalo ummujjitvā patigādhappatto hoti.
‘‘කථඤ්‌ච, භික්‌ඛවෙ, පුග්‌ගලො උම්‌මුජ්‌ජිත්‌වා තිණ්‌ණො හොති පාරඞ්‌ගතො ථලෙ තිට්‌ඨති බ්‍රාහ්‌මණො. ඉධ , භික්‌ඛවෙ, එකච්‌චො පුග්‌ගලො උම්‌මුජ්‌ජති සාධු සද්‌ධා කුසලෙසු ධම්‌මෙසු, සාධු හිරී…පෙ.… සාධු ඔත්‌තප්‌පං… සාධු වීරියං… සාධු පඤ්‌ඤා කුසලෙසු ධම්‌මෙසූති. සො ආසවානං ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරති. එවං ඛො, භික්‌ඛවෙ, පුග්‌ගලො උම්‌මුජ්‌ජිත්‌වා තිණ්‌ණො හොති පාරඞ්‌ගතො ථලෙ තිට්‌ඨති බ්‍රාහ්‌මණො.
‘‘Kathañca, bhikkhave, puggalo ummujjitvā tiṇṇo hoti pāraṅgato thale tiṭṭhati brāhmaṇo. Idha , bhikkhave, ekacco puggalo ummujjati sādhu saddhā kusalesu dhammesu, sādhu hirī…pe… sādhu ottappaṃ… sādhu vīriyaṃ… sādhu paññā kusalesu dhammesūti. So āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Evaṃ kho, bhikkhave, puggalo ummujjitvā tiṇṇo hoti pāraṅgato thale tiṭṭhati brāhmaṇo.
‘‘ඉමෙ ඛො, භික්‌ඛවෙ, සත්‌ත උදකූපමා පුග්‌ගලා සන්‌තො සංවිජ්‌ජමානා ලොකස්‌මි’’න්‌ති. පඤ්‌චමං.
‘‘Ime kho, bhikkhave, satta udakūpamā puggalā santo saṃvijjamānā lokasmi’’nti. Pañcamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5. උදකූපමාසුත්‌තවණ්‌ණනා • 5. Udakūpamāsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5. උදකූපමාසුත්‌තවණ්‌ණනා • 5. Udakūpamāsuttavaṇṇanā
