| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5. உத³கூபமாஸுத்தவண்ணனா
5. Udakūpamāsuttavaṇṇanā
15. பஞ்சமே ஏகந்தகாளகேஹீதி நத்தி²கவாத³அஹேதுகவாத³அகிரியவாத³ஸங்கா²தேஹி நியதமிச்சா²தி³ட்டி²த⁴ம்மேஹி. தேனாஹ ‘‘நியதமிச்சா²தி³ட்டி²ங் ஸந்தா⁴ய வுத்த’’ந்தி. ஏவங் புக்³க³லோதி இமினா காரணேன ஏகவாரங் நிமுக்³கோ³ நிமுக்³கோ³யேவ ஸோ ஹோதி. ஏதஸ்ஸ ஹி புன ப⁴வதோ வுட்டா²னங் நாம நத்தீ²தி வத³ந்தி மக்க²லிகோ³ஸாலாத³யோ விய. ஹெட்டா² ஹெட்டா² நரகக்³கீ³னங்யேவ ஆஹாரோ. ஸாது⁴ ஸத்³தா⁴ குஸலேஸூதி குஸலத⁴ம்மேஸு ஸத்³தா⁴ நாம ஸாஹு லத்³த⁴காதி உம்முஜ்ஜதி, ஸோ தாவத்தகேனேவ குஸலேன உம்முஜ்ஜதி நாம. ஸாது⁴ ஹிரீதிஆதீ³ஸுபி ஏஸேவ நயோ. சங்கவாரேதி ரஜகானங் கா²ரபரிஸ்ஸாவனே, ஸுராபரிஸ்ஸாவனே வா. ஏவங் புக்³க³லோதி ‘‘ஏவங் ஸாது⁴ ஸத்³தா⁴’’தி இமேஸங் ஸத்³தா⁴தீ³னங் வஸேன ஏகவாரங் உம்முஜ்ஜித்வா தேஸங் பரிஹானியா புன நிமுஜ்ஜதியேவ தே³வத³த்தாத³யோ விய. தே³வத³த்தோ ஹி அட்ட² ஸமாபத்தியோ பஞ்ச ச அபி⁴ஞ்ஞாயோ நிப்³ப³த்தெத்வாபி புன பு³த்³தா⁴னங் படிபக்க²தாய தேஹி கு³ணேஹி பரிஹீனோ ருஹிருப்பாத³கம்மங் ஸங்க⁴பே⁴த³கம்மஞ்ச கத்வா காயஸ்ஸ பே⁴தா³ து³தியசித்தவாரேன சுதிசித்தமனந்தரா நிரயே நிப்³ப³த்தோ. கோகாலிகோ த்³வே அக்³க³ஸாவகே உபவதி³த்வா பது³மனிரயே நிப்³ப³த்தோ.
15. Pañcame ekantakāḷakehīti natthikavādaahetukavādaakiriyavādasaṅkhātehi niyatamicchādiṭṭhidhammehi. Tenāha ‘‘niyatamicchādiṭṭhiṃ sandhāya vutta’’nti. Evaṃ puggaloti iminā kāraṇena ekavāraṃ nimuggo nimuggoyeva so hoti. Etassa hi puna bhavato vuṭṭhānaṃ nāma natthīti vadanti makkhaligosālādayo viya. Heṭṭhā heṭṭhā narakaggīnaṃyeva āhāro. Sādhu saddhā kusalesūti kusaladhammesu saddhā nāma sāhu laddhakāti ummujjati, so tāvattakeneva kusalena ummujjati nāma. Sādhu hirītiādīsupi eseva nayo. Caṅkavāreti rajakānaṃ khāraparissāvane, surāparissāvane vā. Evaṃ puggaloti ‘‘evaṃ sādhu saddhā’’ti imesaṃ saddhādīnaṃ vasena ekavāraṃ ummujjitvā tesaṃ parihāniyā puna nimujjatiyeva devadattādayo viya. Devadatto hi aṭṭha samāpattiyo pañca ca abhiññāyo nibbattetvāpi puna buddhānaṃ paṭipakkhatāya tehi guṇehi parihīno ruhiruppādakammaṃ saṅghabhedakammañca katvā kāyassa bhedā dutiyacittavārena cuticittamanantarā niraye nibbatto. Kokāliko dve aggasāvake upavaditvā padumaniraye nibbatto.
நேவ ஹாயதி நோ வட்³ட⁴தீதி அப்பஹோனககாலேபி ந ஹாயதி, பஹோனககாலேபி ந வட்³ட⁴தி. உப⁴யம்பி பனேதங் அகா³ரிகேனபி அனகா³ரிகேனபி தீ³பேதப்³ப³ங். ஏகச்சோ ஹி அகா³ரிகோ அப்பஹோனககாலே பக்கி²கப⁴த்தங் வஸ்ஸிகங் வா உபனிப³ந்தா⁴பேஸி, ஸோ பச்சா² பஹோனககாலேபி பக்கி²கப⁴த்தாதி³மத்தமேவ பவத்தேதி. அனகா³ரிகோபி ஆதி³ம்ஹி அப்பஹோனககாலே உத்³தே³ஸங் து⁴தங்க³ங் வா க³ண்ஹாதி, மேதா⁴வீ ப³லவீரியஸம்பத்தியா பஹோனககாலே ததோ உத்தரிங் ந கரோதி. ஏவங் புக்³க³லோதி ஏவங் இமாய ஸத்³தா⁴தீ³னங் டி²தியா புக்³க³லோ உம்முஜ்ஜித்வா டி²தோ நாம ஹோதி. உம்முஜ்ஜித்வா பதரதீதி ஸகதா³கா³மிபுக்³க³லோ கிலேஸதனுதாய உட்ட²ஹித்வா க³ந்தப்³ப³தி³ஸாபி⁴முகோ² தரதி நாம.
Neva hāyati no vaḍḍhatīti appahonakakālepi na hāyati, pahonakakālepi na vaḍḍhati. Ubhayampi panetaṃ agārikenapi anagārikenapi dīpetabbaṃ. Ekacco hi agāriko appahonakakāle pakkhikabhattaṃ vassikaṃ vā upanibandhāpesi, so pacchā pahonakakālepi pakkhikabhattādimattameva pavatteti. Anagārikopi ādimhi appahonakakāle uddesaṃ dhutaṅgaṃ vā gaṇhāti, medhāvī balavīriyasampattiyā pahonakakāle tato uttariṃ na karoti. Evaṃ puggaloti evaṃ imāya saddhādīnaṃ ṭhitiyā puggalo ummujjitvā ṭhito nāma hoti. Ummujjitvā pataratīti sakadāgāmipuggalo kilesatanutāya uṭṭhahitvā gantabbadisābhimukho tarati nāma.
படிகா³த⁴ப்பத்தோ ஹோதீதி அனாகா³மிபுக்³க³லங் ஸந்தா⁴ய வத³தி. இமே பன ஸத்த புக்³க³லா உத³கோபமேன தீ³பிதா. ஸத்த கிர ஜங்க⁴வாணிஜா அத்³தா⁴னமக்³க³ப்படிபன்னா அந்தராமக்³கே³ ஏகங் புண்ணனதி³ங் பாபுணிங்ஸு. தேஸு பட²மங் ஓதிண்ணோ உத³கபீ⁴ருகோ புரிஸோ ஓதிண்ணட்டா²னேயேவ நிமுஜ்ஜித்வா புன ஸண்டா²துங் நாஸக்கி², அவஸ்ஸங்வ மச்ச²கச்ச²பப⁴த்தங் ஜாதோ. து³தியோ ஓதிண்ணட்டா²னே நிமுஜ்ஜித்வா ஸகிங் உட்ட²ஹித்வா புன நிமுக்³கோ³ உட்டா²துங் நாஸக்கி², அந்தோயேவ மச்ச²கச்ச²பப⁴த்தங் ஜாதோ. ததியோ நிமுஜ்ஜித்வா உட்டி²தோ மஜ்ஜே² நதி³யா ட²த்வா நேவ ஓரதோ ஆக³ந்துங், ந பாரங் க³ந்துங் அஸக்கி². சதுத்தோ² உட்டா²ய டி²தோ உத்தரணதித்த²ங் ஓலோகேஸி. பஞ்சமோ உத்தரணதித்த²ங் ஓலோகெத்வா பதரதி. ச²ட்டோ² தங் தி³ஸ்வா பாரிமதீரங் க³ந்த்வா கடிப்பமாணே உத³கே டி²தோ. ஸத்தமோ பாரிமதீரங் க³ந்த்வா க³ந்த⁴சுண்ணாதீ³ஹி ந்ஹத்வா வரவத்தா²தீ³னி நிவாஸெத்வா ஸுரபி⁴விலேபனங் விலிம்பித்வா நீலுப்பலமாலாதீ³னி பிலந்தி⁴த்வா நானாலங்காரப்படிமண்டி³தோ மஹானக³ரங் பவிஸித்வா பாஸாத³மாருஹித்வா உத்தமபோ⁴ஜனங் பு⁴ஞ்ஜதி.
Paṭigādhappatto hotīti anāgāmipuggalaṃ sandhāya vadati. Ime pana satta puggalā udakopamena dīpitā. Satta kira jaṅghavāṇijā addhānamaggappaṭipannā antarāmagge ekaṃ puṇṇanadiṃ pāpuṇiṃsu. Tesu paṭhamaṃ otiṇṇo udakabhīruko puriso otiṇṇaṭṭhāneyeva nimujjitvā puna saṇṭhātuṃ nāsakkhi, avassaṃva macchakacchapabhattaṃ jāto. Dutiyo otiṇṇaṭṭhāne nimujjitvā sakiṃ uṭṭhahitvā puna nimuggo uṭṭhātuṃ nāsakkhi, antoyeva macchakacchapabhattaṃ jāto. Tatiyo nimujjitvā uṭṭhito majjhe nadiyā ṭhatvā neva orato āgantuṃ, na pāraṃ gantuṃ asakkhi. Catuttho uṭṭhāya ṭhito uttaraṇatitthaṃ olokesi. Pañcamo uttaraṇatitthaṃ oloketvā patarati. Chaṭṭho taṃ disvā pārimatīraṃ gantvā kaṭippamāṇe udake ṭhito. Sattamo pārimatīraṃ gantvā gandhacuṇṇādīhi nhatvā varavatthādīni nivāsetvā surabhivilepanaṃ vilimpitvā nīluppalamālādīni pilandhitvā nānālaṅkārappaṭimaṇḍito mahānagaraṃ pavisitvā pāsādamāruhitvā uttamabhojanaṃ bhuñjati.
தத்த² ஜங்க⁴வாணிஜா விய இமே ஸத்த புக்³க³லா, நதீ³ விய வட்டங், பட²மஸ்ஸ உத³கபீ⁴ருகஸ்ஸ புரிஸஸ்ஸ ஓதிண்ணட்டா²னேயேவ நிமுஜ்ஜனங் விய மிச்சா²தி³ட்டி²கஸ்ஸ வட்டே நிமுஜ்ஜனங், உம்முஜ்ஜித்வா நிமுஜ்ஜனபுரிஸோ விய ஸத்³தா⁴தீ³னங் உப்பத்திமத்த²கேன உம்முஜ்ஜித்வா தாஸங் ஹானியா நிமுக்³க³புக்³க³லோ, மஜ்ஜே² நதி³யா ட²த்வா விய ஸத்³தா⁴தீ³னங் டி²தியா டி²திபுக்³க³லோ, உத்தரணதித்த²ங் ஓலோகெந்தோ விய ஸோதாபன்னோ, பதரந்தபுரிஸோ விய கிலேஸகாமாவட்டதாய பதரந்தோ ஸகதா³கா³மீ, தரித்வா கடிமத்தே உத³கே டி²தபுரிஸோ விய அனாவட்டத⁴ம்மத்தா அனாகா³மீ, ந்ஹத்வா பாரிமதீரங் உத்தரித்வா த²லே டி²தபுரிஸோ விய சத்தாரோ ஓகே⁴ அதிக்கமித்வா நிப்³பா³னத²லே டி²தோ கீ²ணாஸவப்³ராஹ்மணோ, த²லே டி²தபுரிஸஸ்ஸ நக³ரங் பவிஸித்வா பாஸாத³ங் ஆருய்ஹ உத்தமபோ⁴ஜனபு⁴ஞ்ஜனங் விய கீ²ணாஸவஸ்ஸ நிப்³பா³னாரம்மணஸமாபத்திங் அப்பெத்வா வீதினாமனங் வேதி³தப்³ப³ங்.
Tattha jaṅghavāṇijā viya ime satta puggalā, nadī viya vaṭṭaṃ, paṭhamassa udakabhīrukassa purisassa otiṇṇaṭṭhāneyeva nimujjanaṃ viya micchādiṭṭhikassa vaṭṭe nimujjanaṃ, ummujjitvā nimujjanapuriso viya saddhādīnaṃ uppattimatthakena ummujjitvā tāsaṃ hāniyā nimuggapuggalo, majjhe nadiyā ṭhatvā viya saddhādīnaṃ ṭhitiyā ṭhitipuggalo, uttaraṇatitthaṃ olokento viya sotāpanno, patarantapuriso viya kilesakāmāvaṭṭatāya pataranto sakadāgāmī, taritvā kaṭimatte udake ṭhitapuriso viya anāvaṭṭadhammattā anāgāmī, nhatvā pārimatīraṃ uttaritvā thale ṭhitapuriso viya cattāro oghe atikkamitvā nibbānathale ṭhito khīṇāsavabrāhmaṇo, thale ṭhitapurisassa nagaraṃ pavisitvā pāsādaṃ āruyha uttamabhojanabhuñjanaṃ viya khīṇāsavassa nibbānārammaṇasamāpattiṃ appetvā vītināmanaṃ veditabbaṃ.
உத³கூபமாஸுத்தவண்ணனா நிட்டி²தா.
Udakūpamāsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. உத³கூபமாஸுத்தங் • 5. Udakūpamāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. உத³கூபமாஸுத்தவண்ணனா • 5. Udakūpamāsuttavaṇṇanā
