| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၅. ဥဒကူပမာသုတ္တဝဏ္ဏနာ
5. Udakūpamāsuttavaṇṇanā
၁၅. ပဉ္စမေ ဥဒကူပမာတိ နိမုဇ္ဇနာဒိအာကာရံ ဂဟေတ္ဝာ ဥဒကေန ဥပမိတာ။ သကိံ နိမုဂ္ဂောတိ ဧကဝာရမေဝ နိမုဂ္ဂော။ ဧကန္တကာဠကေဟီတိ နိယတမိစ္ဆာဒိဋ္ဌိံ သန္ဓာယ ဝုတ္တံ။ ဥမ္မုဇ္ဇတီတိ ဥဋ္ဌဟတိ။ သာဓူတိ သောဘနာ ဘဒ္ဒကာ။ ဟာယတိယေဝာတိ စင္ကဝာရေ အာသိတ္တဥဒကံ ဝိယ ပရိဟာယတေဝ ။ ဥမ္မုဇ္ဇိတ္ဝာ ဝိပသ္သတိ ဝိလောကေတီတိ ဥဋ္ဌဟိတ္ဝာ ဂန္တဗ္ဗဒိသံ ဝိပသ္သတိ ဝိလောကေတိ။ ပတရတီတိ ဂန္တဗ္ဗဒိသာဘိမုခော တရတိ နာမ။ ပဋိဂာဓပ္ပတ္တော ဟောတီတိ ဥဋ္ဌာယ ဝိလောကေတ္ဝာ ပတရိတ္ဝာ ဧကသ္မိံ ဌာနေ ပတိဋ္ဌာပတ္တော နာမ ဟောတိ, တိဋ္ဌတိ န ပုနာဂစ္ဆတိ။ တိဏ္ဏော ပာရင္ဂတော ထလေ တိဋ္ဌတီတိ သဗ္ဗကိလေသောဃံ တရိတ္ဝာ ပရတီရံ ဂန္တ္ဝာ နိဗ္ဗာနထလေ ပတိဋ္ဌိတော နာမ ဟောတိ။ ဣမသ္မိံ သုတ္တေ ဝဋ္ဋဝိဝဋ္ဋံ ကထိတံ။
15. Pañcame udakūpamāti nimujjanādiākāraṃ gahetvā udakena upamitā. Sakiṃ nimuggoti ekavārameva nimuggo. Ekantakāḷakehīti niyatamicchādiṭṭhiṃ sandhāya vuttaṃ. Ummujjatīti uṭṭhahati. Sādhūti sobhanā bhaddakā. Hāyatiyevāti caṅkavāre āsittaudakaṃ viya parihāyateva . Ummujjitvā vipassati viloketīti uṭṭhahitvā gantabbadisaṃ vipassati viloketi. Pataratīti gantabbadisābhimukho tarati nāma. Paṭigādhappatto hotīti uṭṭhāya viloketvā pataritvā ekasmiṃ ṭhāne patiṭṭhāpatto nāma hoti, tiṭṭhati na punāgacchati. Tiṇṇopāraṅgato thale tiṭṭhatīti sabbakilesoghaṃ taritvā paratīraṃ gantvā nibbānathale patiṭṭhito nāma hoti. Imasmiṃ sutte vaṭṭavivaṭṭaṃ kathitaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၅. ဥဒကူပမာသုတ္တံ • 5. Udakūpamāsuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၅. ဥဒကူပမာသုတ္တဝဏ္ဏနာ • 5. Udakūpamāsuttavaṇṇanā
