| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၅. ဥဒကူပမာသုတ္တဝဏ္ဏနာ
5. Udakūpamāsuttavaṇṇanā
၁၅. ပဉ္စမေ ဧကန္တကာဠကေဟီတိ နတ္ထိကဝာဒအဟေတုကဝာဒအကိရိယဝာဒသင္ခာတေဟိ နိယတမိစ္ဆာဒိဋ္ဌိဓမ္မေဟိ။ တေနာဟ ‘‘နိယတမိစ္ဆာဒိဋ္ဌိံ သန္ဓာယ ဝုတ္တ’’န္တိ။ ဧဝံ ပုဂ္ဂလောတိ ဣမိနာ ကာရဏေန ဧကဝာရံ နိမုဂ္ဂော နိမုဂ္ဂောယေဝ သော ဟောတိ။ ဧတသ္သ ဟိ ပုန ဘဝတော ဝုဋ္ဌာနံ နာမ နတ္ထီတိ ဝဒန္တိ မက္ခလိဂောသာလာဒယော ဝိယ။ ဟေဋ္ဌာ ဟေဋ္ဌာ နရကဂ္ဂီနံယေဝ အာဟာရော။ သာဓု သဒ္ဓာ ကုသလေသူတိ ကုသလဓမ္မေသု သဒ္ဓာ နာမ သာဟု လဒ္ဓကာတိ ဥမ္မုဇ္ဇတိ, သော တာဝတ္တကေနေဝ ကုသလေန ဥမ္မုဇ္ဇတိ နာမ။ သာဓု ဟိရီတိအာဒီသုပိ ဧသေဝ နယော။ စင္ကဝာရေတိ ရဇကာနံ ခာရပရိသ္သာဝနေ, သုရာပရိသ္သာဝနေ ဝာ။ ဧဝံ ပုဂ္ဂလောတိ ‘‘ဧဝံ သာဓု သဒ္ဓာ’’တိ ဣမေသံ သဒ္ဓာဒီနံ ဝသေန ဧကဝာရံ ဥမ္မုဇ္ဇိတ္ဝာ တေသံ ပရိဟာနိယာ ပုန နိမုဇ္ဇတိယေဝ ဒေဝဒတ္တာဒယော ဝိယ။ ဒေဝဒတ္တော ဟိ အဋ္ဌ သမာပတ္တိယော ပဉ္စ စ အဘိညာယော နိဗ္ဗတ္တေတ္ဝာပိ ပုန ဗုဒ္ဓာနံ ပဋိပက္ခတာယ တေဟိ ဂုဏေဟိ ပရိဟီနော ရုဟိရုပ္ပာဒကမ္မံ သင္ဃဘေဒကမ္မဉ္စ ကတ္ဝာ ကာယသ္သ ဘေဒာ ဒုတိယစိတ္တဝာရေန စုတိစိတ္တမနန္တရာ နိရယေ နိဗ္ဗတ္တော။ ကောကာလိကော ဒ္ဝေ အဂ္ဂသာဝကေ ဥပဝဒိတ္ဝာ ပဒုမနိရယေ နိဗ္ဗတ္တော။
15. Pañcame ekantakāḷakehīti natthikavādaahetukavādaakiriyavādasaṅkhātehi niyatamicchādiṭṭhidhammehi. Tenāha ‘‘niyatamicchādiṭṭhiṃ sandhāya vutta’’nti. Evaṃ puggaloti iminā kāraṇena ekavāraṃ nimuggo nimuggoyeva so hoti. Etassa hi puna bhavato vuṭṭhānaṃ nāma natthīti vadanti makkhaligosālādayo viya. Heṭṭhā heṭṭhā narakaggīnaṃyeva āhāro. Sādhu saddhā kusalesūti kusaladhammesu saddhā nāma sāhu laddhakāti ummujjati, so tāvattakeneva kusalena ummujjati nāma. Sādhu hirītiādīsupi eseva nayo. Caṅkavāreti rajakānaṃ khāraparissāvane, surāparissāvane vā. Evaṃ puggaloti ‘‘evaṃ sādhu saddhā’’ti imesaṃ saddhādīnaṃ vasena ekavāraṃ ummujjitvā tesaṃ parihāniyā puna nimujjatiyeva devadattādayo viya. Devadatto hi aṭṭha samāpattiyo pañca ca abhiññāyo nibbattetvāpi puna buddhānaṃ paṭipakkhatāya tehi guṇehi parihīno ruhiruppādakammaṃ saṅghabhedakammañca katvā kāyassa bhedā dutiyacittavārena cuticittamanantarā niraye nibbatto. Kokāliko dve aggasāvake upavaditvā padumaniraye nibbatto.
နေဝ ဟာယတိ နော ဝဍ္ဎတီတိ အပ္ပဟောနကကာလေပိ န ဟာယတိ, ပဟောနကကာလေပိ န ဝဍ္ဎတိ။ ဥဘယမ္ပိ ပနေတံ အဂာရိကေနပိ အနဂာရိကေနပိ ဒီပေတဗ္ဗံ။ ဧကစ္စော ဟိ အဂာရိကော အပ္ပဟောနကကာလေ ပက္ခိကဘတ္တံ ဝသ္သိကံ ဝာ ဥပနိဗန္ဓာပေသိ, သော ပစ္ဆာ ပဟောနကကာလေပိ ပက္ခိကဘတ္တာဒိမတ္တမေဝ ပဝတ္တေတိ။ အနဂာရိကောပိ အာဒိမ္ဟိ အပ္ပဟောနကကာလေ ဥဒ္ဒေသံ ဓုတင္ဂံ ဝာ ဂဏ္ဟာတိ, မေဓာဝီ ဗလဝီရိယသမ္ပတ္တိယာ ပဟောနကကာလေ တတော ဥတ္တရိံ န ကရောတိ။ ဧဝံ ပုဂ္ဂလောတိ ဧဝံ ဣမာယ သဒ္ဓာဒီနံ ဌိတိယာ ပုဂ္ဂလော ဥမ္မုဇ္ဇိတ္ဝာ ဌိတော နာမ ဟောတိ။ ဥမ္မုဇ္ဇိတ္ဝာ ပတရတီတိ သကဒာဂာမိပုဂ္ဂလော ကိလေသတနုတာယ ဥဋ္ဌဟိတ္ဝာ ဂန္တဗ္ဗဒိသာဘိမုခော တရတိ နာမ။
Neva hāyati no vaḍḍhatīti appahonakakālepi na hāyati, pahonakakālepi na vaḍḍhati. Ubhayampi panetaṃ agārikenapi anagārikenapi dīpetabbaṃ. Ekacco hi agāriko appahonakakāle pakkhikabhattaṃ vassikaṃ vā upanibandhāpesi, so pacchā pahonakakālepi pakkhikabhattādimattameva pavatteti. Anagārikopi ādimhi appahonakakāle uddesaṃ dhutaṅgaṃ vā gaṇhāti, medhāvī balavīriyasampattiyā pahonakakāle tato uttariṃ na karoti. Evaṃ puggaloti evaṃ imāya saddhādīnaṃ ṭhitiyā puggalo ummujjitvā ṭhito nāma hoti. Ummujjitvā pataratīti sakadāgāmipuggalo kilesatanutāya uṭṭhahitvā gantabbadisābhimukho tarati nāma.
ပဋိဂာဓပ္ပတ္တော ဟောတီတိ အနာဂာမိပုဂ္ဂလံ သန္ဓာယ ဝဒတိ။ ဣမေ ပန သတ္တ ပုဂ္ဂလာ ဥဒကောပမေန ဒီပိတာ။ သတ္တ ကိရ ဇင္ဃဝာဏိဇာ အဒ္ဓာနမဂ္ဂပ္ပဋိပန္နာ အန္တရာမဂ္ဂေ ဧကံ ပုဏ္ဏနဒိံ ပာပုဏိံသု။ တေသု ပဌမံ ဩတိဏ္ဏော ဥဒကဘီရုကော ပုရိသော ဩတိဏ္ဏဋ္ဌာနေယေဝ နိမုဇ္ဇိတ္ဝာ ပုန သဏ္ဌာတုံ နာသက္ခိ, အဝသ္သံဝ မစ္ဆကစ္ဆပဘတ္တံ ဇာတော။ ဒုတိယော ဩတိဏ္ဏဋ္ဌာနေ နိမုဇ္ဇိတ္ဝာ သကိံ ဥဋ္ဌဟိတ္ဝာ ပုန နိမုဂ္ဂော ဥဋ္ဌာတုံ နာသက္ခိ, အန္တောယေဝ မစ္ဆကစ္ဆပဘတ္တံ ဇာတော။ တတိယော နိမုဇ္ဇိတ္ဝာ ဥဋ္ဌိတော မဇ္ဈေ နဒိယာ ဌတ္ဝာ နေဝ ဩရတော အာဂန္တုံ, န ပာရံ ဂန္တုံ အသက္ခိ။ စတုတ္ထော ဥဋ္ဌာယ ဌိတော ဥတ္တရဏတိတ္ထံ ဩလောကေသိ။ ပဉ္စမော ဥတ္တရဏတိတ္ထံ ဩလောကေတ္ဝာ ပတရတိ။ ဆဋ္ဌော တံ ဒိသ္ဝာ ပာရိမတီရံ ဂန္တ္ဝာ ကဋိပ္ပမာဏေ ဥဒကေ ဌိတော။ သတ္တမော ပာရိမတီရံ ဂန္တ္ဝာ ဂန္ဓစုဏ္ဏာဒီဟိ န္ဟတ္ဝာ ဝရဝတ္ထာဒီနိ နိဝာသေတ္ဝာ သုရဘိဝိလေပနံ ဝိလိမ္ပိတ္ဝာ နီလုပ္ပလမာလာဒီနိ ပိလန္ဓိတ္ဝာ နာနာလင္ကာရပ္ပဋိမဏ္ဍိတော မဟာနဂရံ ပဝိသိတ္ဝာ ပာသာဒမာရုဟိတ္ဝာ ဥတ္တမဘောဇနံ ဘုဉ္ဇတိ။
Paṭigādhappatto hotīti anāgāmipuggalaṃ sandhāya vadati. Ime pana satta puggalā udakopamena dīpitā. Satta kira jaṅghavāṇijā addhānamaggappaṭipannā antarāmagge ekaṃ puṇṇanadiṃ pāpuṇiṃsu. Tesu paṭhamaṃ otiṇṇo udakabhīruko puriso otiṇṇaṭṭhāneyeva nimujjitvā puna saṇṭhātuṃ nāsakkhi, avassaṃva macchakacchapabhattaṃ jāto. Dutiyo otiṇṇaṭṭhāne nimujjitvā sakiṃ uṭṭhahitvā puna nimuggo uṭṭhātuṃ nāsakkhi, antoyeva macchakacchapabhattaṃ jāto. Tatiyo nimujjitvā uṭṭhito majjhe nadiyā ṭhatvā neva orato āgantuṃ, na pāraṃ gantuṃ asakkhi. Catuttho uṭṭhāya ṭhito uttaraṇatitthaṃ olokesi. Pañcamo uttaraṇatitthaṃ oloketvā patarati. Chaṭṭho taṃ disvā pārimatīraṃ gantvā kaṭippamāṇe udake ṭhito. Sattamo pārimatīraṃ gantvā gandhacuṇṇādīhi nhatvā varavatthādīni nivāsetvā surabhivilepanaṃ vilimpitvā nīluppalamālādīni pilandhitvā nānālaṅkārappaṭimaṇḍito mahānagaraṃ pavisitvā pāsādamāruhitvā uttamabhojanaṃ bhuñjati.
တတ္ထ ဇင္ဃဝာဏိဇာ ဝိယ ဣမေ သတ္တ ပုဂ္ဂလာ, နဒီ ဝိယ ဝဋ္ဋံ, ပဌမသ္သ ဥဒကဘီရုကသ္သ ပုရိသသ္သ ဩတိဏ္ဏဋ္ဌာနေယေဝ နိမုဇ္ဇနံ ဝိယ မိစ္ဆာဒိဋ္ဌိကသ္သ ဝဋ္ဋေ နိမုဇ္ဇနံ, ဥမ္မုဇ္ဇိတ္ဝာ နိမုဇ္ဇနပုရိသော ဝိယ သဒ္ဓာဒီနံ ဥပ္ပတ္တိမတ္ထကေန ဥမ္မုဇ္ဇိတ္ဝာ တာသံ ဟာနိယာ နိမုဂ္ဂပုဂ္ဂလော, မဇ္ဈေ နဒိယာ ဌတ္ဝာ ဝိယ သဒ္ဓာဒီနံ ဌိတိယာ ဌိတိပုဂ္ဂလော, ဥတ္တရဏတိတ္ထံ ဩလောကေန္တော ဝိယ သောတာပန္နော, ပတရန္တပုရိသော ဝိယ ကိလေသကာမာဝဋ္ဋတာယ ပတရန္တော သကဒာဂာမီ, တရိတ္ဝာ ကဋိမတ္တေ ဥဒကေ ဌိတပုရိသော ဝိယ အနာဝဋ္ဋဓမ္မတ္တာ အနာဂာမီ, န္ဟတ္ဝာ ပာရိမတီရံ ဥတ္တရိတ္ဝာ ထလေ ဌိတပုရိသော ဝိယ စတ္တာရော ဩဃေ အတိက္ကမိတ္ဝာ နိဗ္ဗာနထလေ ဌိတော ခီဏာသဝဗ္ရာဟ္မဏော, ထလေ ဌိတပုရိသသ္သ နဂရံ ပဝိသိတ္ဝာ ပာသာဒံ အာရုယ္ဟ ဥတ္တမဘောဇနဘုဉ္ဇနံ ဝိယ ခီဏာသဝသ္သ နိဗ္ဗာနာရမ္မဏသမာပတ္တိံ အပ္ပေတ္ဝာ ဝီတိနာမနံ ဝေဒိတဗ္ဗံ။
Tattha jaṅghavāṇijā viya ime satta puggalā, nadī viya vaṭṭaṃ, paṭhamassa udakabhīrukassa purisassa otiṇṇaṭṭhāneyeva nimujjanaṃ viya micchādiṭṭhikassa vaṭṭe nimujjanaṃ, ummujjitvā nimujjanapuriso viya saddhādīnaṃ uppattimatthakena ummujjitvā tāsaṃ hāniyā nimuggapuggalo, majjhe nadiyā ṭhatvā viya saddhādīnaṃ ṭhitiyā ṭhitipuggalo, uttaraṇatitthaṃ olokento viya sotāpanno, patarantapuriso viya kilesakāmāvaṭṭatāya pataranto sakadāgāmī, taritvā kaṭimatte udake ṭhitapuriso viya anāvaṭṭadhammattā anāgāmī, nhatvā pārimatīraṃ uttaritvā thale ṭhitapuriso viya cattāro oghe atikkamitvā nibbānathale ṭhito khīṇāsavabrāhmaṇo, thale ṭhitapurisassa nagaraṃ pavisitvā pāsādaṃ āruyha uttamabhojanabhuñjanaṃ viya khīṇāsavassa nibbānārammaṇasamāpattiṃ appetvā vītināmanaṃ veditabbaṃ.
ဥဒကူပမာသုတ္တဝဏ္ဏနာ နိဋ္ဌိတာ။
Udakūpamāsuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၅. ဥဒကူပမာသုတ္တံ • 5. Udakūpamāsuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၅. ဥဒကူပမာသုတ္တဝဏ္ဏနာ • 5. Udakūpamāsuttavaṇṇanā
