| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৩. উদানসুত্তং
3. Udānasuttaṃ
৫৫. সাৰত্থিনিদানং । তত্র খো ভগৰা উদানং উদানেসি – ‘‘‘নো চস্সং, নো চ মে সিযা, নাভৰিস্স, ন মে ভৰিস্সতী’তি – এৰং অধিমুচ্চমানো ভিক্খু ছিন্দেয্য ওরম্ভাগিযানি সংযোজনানী’’তি। এৰং ৰুত্তে, অঞ্ঞতরো ভিক্খু ভগৰন্তং এতদৰোচ – ‘‘যথা কথং পন, ভন্তে, ‘নো চস্সং, নো চ মে সিযা, নাভৰিস্স, ন মে ভৰিস্সতী’তি – এৰং অধিমুচ্চমানো ভিক্খু ছিন্দেয্য ওরম্ভাগিযানি সংযোজনানী’’তি?
55. Sāvatthinidānaṃ . Tatra kho bhagavā udānaṃ udānesi – ‘‘‘no cassaṃ, no ca me siyā, nābhavissa, na me bhavissatī’ti – evaṃ adhimuccamāno bhikkhu chindeyya orambhāgiyāni saṃyojanānī’’ti. Evaṃ vutte, aññataro bhikkhu bhagavantaṃ etadavoca – ‘‘yathā kathaṃ pana, bhante, ‘no cassaṃ, no ca me siyā, nābhavissa, na me bhavissatī’ti – evaṃ adhimuccamāno bhikkhu chindeyya orambhāgiyāni saṃyojanānī’’ti?
‘‘ইধ, ভিক্খু, অস্সুতৰা পুথুজ্জনো অরিযানং অদস্সাৰী…পে॰… সপ্পুরিসধম্মে অৰিনীতো রূপং অত্ততো সমনুপস্সতি, রূপৰন্তং ৰা অত্তানং; অত্তনি ৰা রূপং, রূপস্মিং ৰা অত্তানং। ৰেদনং… সঞ্ঞং… সঙ্খারে… ৰিঞ্ঞাণং অত্ততো সমনুপস্সতি, ৰিঞ্ঞাণৰন্তং ৰা অত্তানং; অত্তনি ৰা ৰিঞ্ঞাণং, ৰিঞ্ঞাণস্মিং ৰা অত্তানং।
‘‘Idha, bhikkhu, assutavā puthujjano ariyānaṃ adassāvī…pe… sappurisadhamme avinīto rūpaṃ attato samanupassati, rūpavantaṃ vā attānaṃ; attani vā rūpaṃ, rūpasmiṃ vā attānaṃ. Vedanaṃ… saññaṃ… saṅkhāre… viññāṇaṃ attato samanupassati, viññāṇavantaṃ vā attānaṃ; attani vā viññāṇaṃ, viññāṇasmiṃ vā attānaṃ.
‘‘সো অনিচ্চং রূপং ‘অনিচ্চং রূপ’ন্তি যথাভূতং নপ্পজানাতি, অনিচ্চং ৰেদনং ‘অনিচ্চা ৰেদনা’তি যথাভূতং নপ্পজানাতি, অনিচ্চং সঞ্ঞং ‘অনিচ্চা সঞ্ঞা’তি যথাভূতং নপ্পজানাতি, অনিচ্চে সঙ্খারে ‘অনিচ্চা সঙ্খারা’তি যথাভূতং নপ্পজানাতি, অনিচ্চং ৰিঞ্ঞাণং ‘অনিচ্চং ৰিঞ্ঞাণ’ন্তি যথাভূতং নপ্পজানাতি।
‘‘So aniccaṃ rūpaṃ ‘aniccaṃ rūpa’nti yathābhūtaṃ nappajānāti, aniccaṃ vedanaṃ ‘aniccā vedanā’ti yathābhūtaṃ nappajānāti, aniccaṃ saññaṃ ‘aniccā saññā’ti yathābhūtaṃ nappajānāti, anicce saṅkhāre ‘aniccā saṅkhārā’ti yathābhūtaṃ nappajānāti, aniccaṃ viññāṇaṃ ‘aniccaṃ viññāṇa’nti yathābhūtaṃ nappajānāti.
‘‘দুক্খং রূপং ‘দুক্খং রূপ’ন্তি যথাভূতং নপ্পজানাতি, দুক্খং ৰেদনং… দুক্খং সঞ্ঞং… দুক্খে সঙ্খারে… দুক্খং ৰিঞ্ঞাণং ‘দুক্খং ৰিঞ্ঞাণ’ন্তি যথাভূতং নপ্পজানাতি।
‘‘Dukkhaṃ rūpaṃ ‘dukkhaṃ rūpa’nti yathābhūtaṃ nappajānāti, dukkhaṃ vedanaṃ… dukkhaṃ saññaṃ… dukkhe saṅkhāre… dukkhaṃ viññāṇaṃ ‘dukkhaṃ viññāṇa’nti yathābhūtaṃ nappajānāti.
‘‘অনত্তং রূপং ‘অনত্তা রূপ’ন্তি যথাভূতং নপ্পজানাতি, অনত্তং ৰেদনং ‘অনত্তা ৰেদনা’তি যথাভূতং নপ্পজানাতি, অনত্তং সঞ্ঞং ‘অনত্তা সঞ্ঞা’তি যথাভূতং নপ্পজানাতি, অনত্তে সঙ্খারে ‘অনত্তা সঙ্খারা’তি যথাভূতং নপ্পজানাতি, অনত্তং ৰিঞ্ঞাণং ‘অনত্তা ৰিঞ্ঞাণ’ন্তি যথাভূতং নপ্পজানাতি।
‘‘Anattaṃ rūpaṃ ‘anattā rūpa’nti yathābhūtaṃ nappajānāti, anattaṃ vedanaṃ ‘anattā vedanā’ti yathābhūtaṃ nappajānāti, anattaṃ saññaṃ ‘anattā saññā’ti yathābhūtaṃ nappajānāti, anatte saṅkhāre ‘anattā saṅkhārā’ti yathābhūtaṃ nappajānāti, anattaṃ viññāṇaṃ ‘anattā viññāṇa’nti yathābhūtaṃ nappajānāti.
‘‘সঙ্খতং রূপং ‘সঙ্খতং রূপ’ন্তি যথাভূতং নপ্পজানাতি, সঙ্খতং ৰেদনং… সঙ্খতং সঞ্ঞং… সঙ্খতে সঙ্খারে… সঙ্খতং ৰিঞ্ঞাণং ‘সঙ্খতং ৰিঞ্ঞাণ’ন্তি যথাভূতং নপ্পজানাতি। রূপং ৰিভৰিস্সতীতি যথাভূতং নপ্পজানাতি। ৰেদনা ৰিভৰিস্সতি… সঞ্ঞা ৰিভৰিস্সতি… সঙ্খারা ৰিভৰিস্সন্তি… ৰিঞ্ঞাণং ৰিভৰিস্সতীতি যথাভূতং নপ্পজানাতি।
‘‘Saṅkhataṃ rūpaṃ ‘saṅkhataṃ rūpa’nti yathābhūtaṃ nappajānāti, saṅkhataṃ vedanaṃ… saṅkhataṃ saññaṃ… saṅkhate saṅkhāre… saṅkhataṃ viññāṇaṃ ‘saṅkhataṃ viññāṇa’nti yathābhūtaṃ nappajānāti. Rūpaṃ vibhavissatīti yathābhūtaṃ nappajānāti. Vedanā vibhavissati… saññā vibhavissati… saṅkhārā vibhavissanti… viññāṇaṃ vibhavissatīti yathābhūtaṃ nappajānāti.
‘‘সুতৰা চ খো, ভিক্খু, অরিযসাৰকো অরিযানং দস্সাৰী অরিযধম্মস্স কোৰিদো অরিযধম্মে সুৰিনীতো সপ্পুরিসানং দস্সাৰী সপ্পুরিসধম্মস্স কোৰিদো সপ্পুরিসধম্মে সুৰিনীতো ন রূপং অত্ততো সমনুপস্সতি…পে॰… ন ৰেদনং… ন সঞ্ঞং… ন সঙ্খারে… ন ৰিঞ্ঞাণং অত্ততো সমনুপস্সতি।
‘‘Sutavā ca kho, bhikkhu, ariyasāvako ariyānaṃ dassāvī ariyadhammassa kovido ariyadhamme suvinīto sappurisānaṃ dassāvī sappurisadhammassa kovido sappurisadhamme suvinīto na rūpaṃ attato samanupassati…pe… na vedanaṃ… na saññaṃ… na saṅkhāre… na viññāṇaṃ attato samanupassati.
‘‘সো অনিচ্চং রূপং ‘অনিচ্চং রূপ’ন্তি যথাভূতং পজানাতি। অনিচ্চং ৰেদনং… অনিচ্চং সঞ্ঞং… অনিচ্চে সঙ্খারে… অনিচ্চং ৰিঞ্ঞাণং ‘অনিচ্চং ৰিঞ্ঞাণ’ন্তি যথাভূতং পজানাতি। দুক্খং রূপং…পে॰… দুক্খং ৰিঞ্ঞাণং… অনত্তং রূপং…পে॰… অনত্তং ৰিঞ্ঞাণং… সঙ্খতং রূপং…পে॰… সঙ্খতং ৰিঞ্ঞাণং ‘সঙ্খতং ৰিঞ্ঞাণ’ন্তি যথাভূতং পজানাতি। রূপং ৰিভৰিস্সতীতি যথাভূতং পজানাতি। ৰেদনা… সঞ্ঞা… সঙ্খারা… ৰিঞ্ঞাণং ৰিভৰিস্সতীতি যথাভূতং পজানাতি।
‘‘So aniccaṃ rūpaṃ ‘aniccaṃ rūpa’nti yathābhūtaṃ pajānāti. Aniccaṃ vedanaṃ… aniccaṃ saññaṃ… anicce saṅkhāre… aniccaṃ viññāṇaṃ ‘aniccaṃ viññāṇa’nti yathābhūtaṃ pajānāti. Dukkhaṃ rūpaṃ…pe… dukkhaṃ viññāṇaṃ… anattaṃ rūpaṃ…pe… anattaṃ viññāṇaṃ… saṅkhataṃ rūpaṃ…pe… saṅkhataṃ viññāṇaṃ ‘saṅkhataṃ viññāṇa’nti yathābhūtaṃ pajānāti. Rūpaṃ vibhavissatīti yathābhūtaṃ pajānāti. Vedanā… saññā… saṅkhārā… viññāṇaṃ vibhavissatīti yathābhūtaṃ pajānāti.
‘‘সো রূপস্স ৰিভৰা, ৰেদনায ৰিভৰা, সঞ্ঞা ৰিভৰা, সঙ্খারানং ৰিভৰা, ৰিঞ্ঞাণস্স ৰিভৰা, এৰং খো, ভিক্খু, ‘নো চস্সং, নো চ মে সিযা, নাভৰিস্স, ন মে ভৰিস্সতী’তি – এৰং অধিমুচ্চমানো ভিক্খু ছিন্দেয্য ওরম্ভাগিযানি সংযোজনানী’’তি। ‘‘এৰং অধিমুচ্চমানো, ভন্তে, ভিক্খু ছিন্দেয্য ওরম্ভাগিযানি সংযোজনানী’’তি।
‘‘So rūpassa vibhavā, vedanāya vibhavā, saññā vibhavā, saṅkhārānaṃ vibhavā, viññāṇassa vibhavā, evaṃ kho, bhikkhu, ‘no cassaṃ, no ca me siyā, nābhavissa, na me bhavissatī’ti – evaṃ adhimuccamāno bhikkhu chindeyya orambhāgiyāni saṃyojanānī’’ti. ‘‘Evaṃ adhimuccamāno, bhante, bhikkhu chindeyya orambhāgiyāni saṃyojanānī’’ti.
‘‘কথং পন, ভন্তে, জানতো কথং পস্সতো অনন্তরা আসৰানং খযো হোতী’’তি? ‘‘ইধ, ভিক্খু, অস্সুতৰা পুথুজ্জনো অতসিতাযে ঠানে তাসং আপজ্জতি। তাসো হেসো 1 ভিক্খু অস্সুতৰতো পুথুজ্জনস্স – ‘নো চস্সং, নো চ মে সিযা, নাভৰিস্স, ন মে ভৰিস্সতী’’’তি।
‘‘Kathaṃ pana, bhante, jānato kathaṃ passato anantarā āsavānaṃ khayo hotī’’ti? ‘‘Idha, bhikkhu, assutavā puthujjano atasitāye ṭhāne tāsaṃ āpajjati. Tāso heso 2 bhikkhu assutavato puthujjanassa – ‘no cassaṃ, no ca me siyā, nābhavissa, na me bhavissatī’’’ti.
‘‘সুতৰা চ খো, ভিক্খু, অরিযসাৰকো অতসিতাযে ঠানে ন তাসং আপজ্জতি। ন হেসো 3, ভিক্খু, তাসো সুতৰতো অরিযসাৰকস্স – ‘নো চস্সং, নো চ মে সিযা, নাভৰিস্স, ন মে ভৰিস্সতী’তি। রূপুপযং ৰা, ভিক্খু, ৰিঞ্ঞাণং তিট্ঠমানং তিট্ঠেয্য, রূপারম্মণং রূপপ্পতিট্ঠং নন্দূপসেচনং ৰুদ্ধিং ৰিরূল়্হিং ৰেপুল্লং আপজ্জেয্য। ৰেদনুপযং ৰা, ভিক্খু… সঞ্ঞুপযং ৰা, ভিক্খু… সঙ্খারুপযং ৰা, ভিক্খু, ৰিঞ্ঞাণং তিট্ঠমানং তিট্ঠেয্য, সঙ্খারারম্মণং সঙ্খারপ্পতিট্ঠং নন্দূপসেচনং ৰুদ্ধিং ৰিরূল়্হিং ৰেপুল্লং আপজ্জেয্য।
‘‘Sutavā ca kho, bhikkhu, ariyasāvako atasitāye ṭhāne na tāsaṃ āpajjati. Na heso 4, bhikkhu, tāso sutavato ariyasāvakassa – ‘no cassaṃ, no ca me siyā, nābhavissa, na me bhavissatī’ti. Rūpupayaṃ vā, bhikkhu, viññāṇaṃ tiṭṭhamānaṃ tiṭṭheyya, rūpārammaṇaṃ rūpappatiṭṭhaṃ nandūpasecanaṃ vuddhiṃ virūḷhiṃ vepullaṃ āpajjeyya. Vedanupayaṃ vā, bhikkhu… saññupayaṃ vā, bhikkhu… saṅkhārupayaṃ vā, bhikkhu, viññāṇaṃ tiṭṭhamānaṃ tiṭṭheyya, saṅkhārārammaṇaṃ saṅkhārappatiṭṭhaṃ nandūpasecanaṃ vuddhiṃ virūḷhiṃ vepullaṃ āpajjeyya.
‘‘যো 5 ভিক্খু এৰং ৰদেয্য – ‘অহমঞ্ঞত্র রূপা, অঞ্ঞত্র ৰেদনায, অঞ্ঞত্র সঞ্ঞায, অঞ্ঞত্র সঙ্খারেহি ৰিঞ্ঞাণস্স আগতিং ৰা গতিং ৰা চুতিং ৰা উপপত্তিং ৰা ৰুদ্ধিং ৰা ৰিরূল়্হিং ৰা ৰেপুল্লং ৰা পঞ্ঞাপেস্সামী’তি, নেতং ঠানং ৰিজ্জতি।
‘‘Yo 6 bhikkhu evaṃ vadeyya – ‘ahamaññatra rūpā, aññatra vedanāya, aññatra saññāya, aññatra saṅkhārehi viññāṇassa āgatiṃ vā gatiṃ vā cutiṃ vā upapattiṃ vā vuddhiṃ vā virūḷhiṃ vā vepullaṃ vā paññāpessāmī’ti, netaṃ ṭhānaṃ vijjati.
‘‘রূপধাতুযা চে, ভিক্খু, ভিক্খুনো রাগো পহীনো হোতি। রাগস্স পহানা ৰোচ্ছিজ্জতারম্মণং পতিট্ঠা ৰিঞ্ঞাণস্স ন হোতি। ৰেদনাধাতুযা চে, ভিক্খু, ভিক্খুনো… সঞ্ঞাধাতুযা চে, ভিক্খু, ভিক্খুনো… সঙ্খারধাতুযা চে, ভিক্খু, ভিক্খুনো… ৰিঞ্ঞাণধাতুযা চে, ভিক্খু, ভিক্খুনো রাগো পহীনো হোতি। রাগস্স পহানা ৰোচ্ছিজ্জতারম্মণং পতিট্ঠা ৰিঞ্ঞাণস্স ন হোতি। তদপ্পতিট্ঠিতং ৰিঞ্ঞাণং অৰিরূল়্হং অনভিসঙ্খারঞ্চ ৰিমুত্তং। ৰিমুত্তত্তা ঠিতং। ঠিতত্তা সন্তুসিতং। সন্তুসিতত্তা ন পরিতস্সতি। অপরিতস্সং পচ্চত্তঞ্ঞেৰ পরিনিব্বাযতি। ‘খীণা জাতি…পে॰… নাপরং ইত্থত্তাযা’তি পজানাতি। এৰং খো, ভিক্খু, জানতো এৰং পস্সতো অনন্তরা আসৰানং খযো হোতী’’তি। ততিযং।
‘‘Rūpadhātuyā ce, bhikkhu, bhikkhuno rāgo pahīno hoti. Rāgassa pahānā vocchijjatārammaṇaṃ patiṭṭhā viññāṇassa na hoti. Vedanādhātuyā ce, bhikkhu, bhikkhuno… saññādhātuyā ce, bhikkhu, bhikkhuno… saṅkhāradhātuyā ce, bhikkhu, bhikkhuno… viññāṇadhātuyā ce, bhikkhu, bhikkhuno rāgo pahīno hoti. Rāgassa pahānā vocchijjatārammaṇaṃ patiṭṭhā viññāṇassa na hoti. Tadappatiṭṭhitaṃ viññāṇaṃ avirūḷhaṃ anabhisaṅkhārañca vimuttaṃ. Vimuttattā ṭhitaṃ. Ṭhitattā santusitaṃ. Santusitattā na paritassati. Aparitassaṃ paccattaññeva parinibbāyati. ‘Khīṇā jāti…pe… nāparaṃ itthattāyā’ti pajānāti. Evaṃ kho, bhikkhu, jānato evaṃ passato anantarā āsavānaṃ khayo hotī’’ti. Tatiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. উদানসুত্তৰণ্ণনা • 3. Udānasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. উদানসুত্তৰণ্ণনা • 3. Udānasuttavaṇṇanā
