| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༣. ཨུདཱནསུཏྟཾ
3. Udānasuttaṃ
༥༥. སཱཝཏྠིནིདཱནཾ ། ཏཏྲ ཁོ བྷགཝཱ ཨུདཱནཾ ཨུདཱནེསི – ‘‘‘ནོ ཙསྶཾ, ནོ ཙ མེ སིཡཱ, ནཱབྷཝིསྶ, ན མེ བྷཝིསྶཏཱི’ཏི – ཨེཝཾ ཨདྷིམུཙྩམཱནོ བྷིཀྑུ ཚིནྡེཡྻ ཨོརམྦྷཱགིཡཱནི སཾཡོཛནཱནཱི’’ཏི། ཨེཝཾ ཝུཏྟེ, ཨཉྙཏརོ བྷིཀྑུ བྷགཝནྟཾ ཨེཏདཝོཙ – ‘‘ཡཐཱ ཀཐཾ པན, བྷནྟེ, ‘ནོ ཙསྶཾ, ནོ ཙ མེ སིཡཱ, ནཱབྷཝིསྶ, ན མེ བྷཝིསྶཏཱི’ཏི – ཨེཝཾ ཨདྷིམུཙྩམཱནོ བྷིཀྑུ ཚིནྡེཡྻ ཨོརམྦྷཱགིཡཱནི སཾཡོཛནཱནཱི’’ཏི?
55. Sāvatthinidānaṃ . Tatra kho bhagavā udānaṃ udānesi – ‘‘‘no cassaṃ, no ca me siyā, nābhavissa, na me bhavissatī’ti – evaṃ adhimuccamāno bhikkhu chindeyya orambhāgiyāni saṃyojanānī’’ti. Evaṃ vutte, aññataro bhikkhu bhagavantaṃ etadavoca – ‘‘yathā kathaṃ pana, bhante, ‘no cassaṃ, no ca me siyā, nābhavissa, na me bhavissatī’ti – evaṃ adhimuccamāno bhikkhu chindeyya orambhāgiyāni saṃyojanānī’’ti?
‘‘ཨིདྷ, བྷིཀྑུ, ཨསྶུཏཝཱ པུཐུཛྫནོ ཨརིཡཱནཾ ཨདསྶཱཝཱི…པེ॰… སཔྤུརིསདྷམྨེ ཨཝིནཱིཏོ རཱུཔཾ ཨཏྟཏོ སམནུཔསྶཏི, རཱུཔཝནྟཾ ཝཱ ཨཏྟཱནཾ; ཨཏྟནི ཝཱ རཱུཔཾ, རཱུཔསྨིཾ ཝཱ ཨཏྟཱནཾ། ཝེདནཾ… སཉྙཾ… སངྑཱརེ… ཝིཉྙཱཎཾ ཨཏྟཏོ སམནུཔསྶཏི, ཝིཉྙཱཎཝནྟཾ ཝཱ ཨཏྟཱནཾ; ཨཏྟནི ཝཱ ཝིཉྙཱཎཾ, ཝིཉྙཱཎསྨིཾ ཝཱ ཨཏྟཱནཾ།
‘‘Idha, bhikkhu, assutavā puthujjano ariyānaṃ adassāvī…pe… sappurisadhamme avinīto rūpaṃ attato samanupassati, rūpavantaṃ vā attānaṃ; attani vā rūpaṃ, rūpasmiṃ vā attānaṃ. Vedanaṃ… saññaṃ… saṅkhāre… viññāṇaṃ attato samanupassati, viññāṇavantaṃ vā attānaṃ; attani vā viññāṇaṃ, viññāṇasmiṃ vā attānaṃ.
‘‘སོ ཨནིཙྩཾ རཱུཔཾ ‘ཨནིཙྩཾ རཱུཔ’ནྟི ཡཐཱབྷཱུཏཾ ནཔྤཛཱནཱཏི, ཨནིཙྩཾ ཝེདནཾ ‘ཨནིཙྩཱ ཝེདནཱ’ཏི ཡཐཱབྷཱུཏཾ ནཔྤཛཱནཱཏི, ཨནིཙྩཾ སཉྙཾ ‘ཨནིཙྩཱ སཉྙཱ’ཏི ཡཐཱབྷཱུཏཾ ནཔྤཛཱནཱཏི, ཨནིཙྩེ སངྑཱརེ ‘ཨནིཙྩཱ སངྑཱརཱ’ཏི ཡཐཱབྷཱུཏཾ ནཔྤཛཱནཱཏི, ཨནིཙྩཾ ཝིཉྙཱཎཾ ‘ཨནིཙྩཾ ཝིཉྙཱཎ’ནྟི ཡཐཱབྷཱུཏཾ ནཔྤཛཱནཱཏི།
‘‘So aniccaṃ rūpaṃ ‘aniccaṃ rūpa’nti yathābhūtaṃ nappajānāti, aniccaṃ vedanaṃ ‘aniccā vedanā’ti yathābhūtaṃ nappajānāti, aniccaṃ saññaṃ ‘aniccā saññā’ti yathābhūtaṃ nappajānāti, anicce saṅkhāre ‘aniccā saṅkhārā’ti yathābhūtaṃ nappajānāti, aniccaṃ viññāṇaṃ ‘aniccaṃ viññāṇa’nti yathābhūtaṃ nappajānāti.
‘‘དུཀྑཾ རཱུཔཾ ‘དུཀྑཾ རཱུཔ’ནྟི ཡཐཱབྷཱུཏཾ ནཔྤཛཱནཱཏི, དུཀྑཾ ཝེདནཾ… དུཀྑཾ སཉྙཾ… དུཀྑེ སངྑཱརེ… དུཀྑཾ ཝིཉྙཱཎཾ ‘དུཀྑཾ ཝིཉྙཱཎ’ནྟི ཡཐཱབྷཱུཏཾ ནཔྤཛཱནཱཏི།
‘‘Dukkhaṃ rūpaṃ ‘dukkhaṃ rūpa’nti yathābhūtaṃ nappajānāti, dukkhaṃ vedanaṃ… dukkhaṃ saññaṃ… dukkhe saṅkhāre… dukkhaṃ viññāṇaṃ ‘dukkhaṃ viññāṇa’nti yathābhūtaṃ nappajānāti.
‘‘ཨནཏྟཾ རཱུཔཾ ‘ཨནཏྟཱ རཱུཔ’ནྟི ཡཐཱབྷཱུཏཾ ནཔྤཛཱནཱཏི, ཨནཏྟཾ ཝེདནཾ ‘ཨནཏྟཱ ཝེདནཱ’ཏི ཡཐཱབྷཱུཏཾ ནཔྤཛཱནཱཏི, ཨནཏྟཾ སཉྙཾ ‘ཨནཏྟཱ སཉྙཱ’ཏི ཡཐཱབྷཱུཏཾ ནཔྤཛཱནཱཏི, ཨནཏྟེ སངྑཱརེ ‘ཨནཏྟཱ སངྑཱརཱ’ཏི ཡཐཱབྷཱུཏཾ ནཔྤཛཱནཱཏི, ཨནཏྟཾ ཝིཉྙཱཎཾ ‘ཨནཏྟཱ ཝིཉྙཱཎ’ནྟི ཡཐཱབྷཱུཏཾ ནཔྤཛཱནཱཏི།
‘‘Anattaṃ rūpaṃ ‘anattā rūpa’nti yathābhūtaṃ nappajānāti, anattaṃ vedanaṃ ‘anattā vedanā’ti yathābhūtaṃ nappajānāti, anattaṃ saññaṃ ‘anattā saññā’ti yathābhūtaṃ nappajānāti, anatte saṅkhāre ‘anattā saṅkhārā’ti yathābhūtaṃ nappajānāti, anattaṃ viññāṇaṃ ‘anattā viññāṇa’nti yathābhūtaṃ nappajānāti.
‘‘སངྑཏཾ རཱུཔཾ ‘སངྑཏཾ རཱུཔ’ནྟི ཡཐཱབྷཱུཏཾ ནཔྤཛཱནཱཏི, སངྑཏཾ ཝེདནཾ… སངྑཏཾ སཉྙཾ… སངྑཏེ སངྑཱརེ… སངྑཏཾ ཝིཉྙཱཎཾ ‘སངྑཏཾ ཝིཉྙཱཎ’ནྟི ཡཐཱབྷཱུཏཾ ནཔྤཛཱནཱཏི། རཱུཔཾ ཝིབྷཝིསྶཏཱིཏི ཡཐཱབྷཱུཏཾ ནཔྤཛཱནཱཏི། ཝེདནཱ ཝིབྷཝིསྶཏི… སཉྙཱ ཝིབྷཝིསྶཏི… སངྑཱརཱ ཝིབྷཝིསྶནྟི… ཝིཉྙཱཎཾ ཝིབྷཝིསྶཏཱིཏི ཡཐཱབྷཱུཏཾ ནཔྤཛཱནཱཏི།
‘‘Saṅkhataṃ rūpaṃ ‘saṅkhataṃ rūpa’nti yathābhūtaṃ nappajānāti, saṅkhataṃ vedanaṃ… saṅkhataṃ saññaṃ… saṅkhate saṅkhāre… saṅkhataṃ viññāṇaṃ ‘saṅkhataṃ viññāṇa’nti yathābhūtaṃ nappajānāti. Rūpaṃ vibhavissatīti yathābhūtaṃ nappajānāti. Vedanā vibhavissati… saññā vibhavissati… saṅkhārā vibhavissanti… viññāṇaṃ vibhavissatīti yathābhūtaṃ nappajānāti.
‘‘སུཏཝཱ ཙ ཁོ, བྷིཀྑུ, ཨརིཡསཱཝཀོ ཨརིཡཱནཾ དསྶཱཝཱི ཨརིཡདྷམྨསྶ ཀོཝིདོ ཨརིཡདྷམྨེ སུཝིནཱིཏོ སཔྤུརིསཱནཾ དསྶཱཝཱི སཔྤུརིསདྷམྨསྶ ཀོཝིདོ སཔྤུརིསདྷམྨེ སུཝིནཱིཏོ ན རཱུཔཾ ཨཏྟཏོ སམནུཔསྶཏི…པེ॰… ན ཝེདནཾ… ན སཉྙཾ… ན སངྑཱརེ… ན ཝིཉྙཱཎཾ ཨཏྟཏོ སམནུཔསྶཏི།
‘‘Sutavā ca kho, bhikkhu, ariyasāvako ariyānaṃ dassāvī ariyadhammassa kovido ariyadhamme suvinīto sappurisānaṃ dassāvī sappurisadhammassa kovido sappurisadhamme suvinīto na rūpaṃ attato samanupassati…pe… na vedanaṃ… na saññaṃ… na saṅkhāre… na viññāṇaṃ attato samanupassati.
‘‘སོ ཨནིཙྩཾ རཱུཔཾ ‘ཨནིཙྩཾ རཱུཔ’ནྟི ཡཐཱབྷཱུཏཾ པཛཱནཱཏི། ཨནིཙྩཾ ཝེདནཾ… ཨནིཙྩཾ སཉྙཾ… ཨནིཙྩེ སངྑཱརེ… ཨནིཙྩཾ ཝིཉྙཱཎཾ ‘ཨནིཙྩཾ ཝིཉྙཱཎ’ནྟི ཡཐཱབྷཱུཏཾ པཛཱནཱཏི། དུཀྑཾ རཱུཔཾ…པེ॰… དུཀྑཾ ཝིཉྙཱཎཾ… ཨནཏྟཾ རཱུཔཾ…པེ॰… ཨནཏྟཾ ཝིཉྙཱཎཾ… སངྑཏཾ རཱུཔཾ…པེ॰… སངྑཏཾ ཝིཉྙཱཎཾ ‘སངྑཏཾ ཝིཉྙཱཎ’ནྟི ཡཐཱབྷཱུཏཾ པཛཱནཱཏི། རཱུཔཾ ཝིབྷཝིསྶཏཱིཏི ཡཐཱབྷཱུཏཾ པཛཱནཱཏི། ཝེདནཱ… སཉྙཱ… སངྑཱརཱ… ཝིཉྙཱཎཾ ཝིབྷཝིསྶཏཱིཏི ཡཐཱབྷཱུཏཾ པཛཱནཱཏི།
‘‘So aniccaṃ rūpaṃ ‘aniccaṃ rūpa’nti yathābhūtaṃ pajānāti. Aniccaṃ vedanaṃ… aniccaṃ saññaṃ… anicce saṅkhāre… aniccaṃ viññāṇaṃ ‘aniccaṃ viññāṇa’nti yathābhūtaṃ pajānāti. Dukkhaṃ rūpaṃ…pe… dukkhaṃ viññāṇaṃ… anattaṃ rūpaṃ…pe… anattaṃ viññāṇaṃ… saṅkhataṃ rūpaṃ…pe… saṅkhataṃ viññāṇaṃ ‘saṅkhataṃ viññāṇa’nti yathābhūtaṃ pajānāti. Rūpaṃ vibhavissatīti yathābhūtaṃ pajānāti. Vedanā… saññā… saṅkhārā… viññāṇaṃ vibhavissatīti yathābhūtaṃ pajānāti.
‘‘སོ རཱུཔསྶ ཝིབྷཝཱ, ཝེདནཱཡ ཝིབྷཝཱ, སཉྙཱ ཝིབྷཝཱ, སངྑཱརཱནཾ ཝིབྷཝཱ, ཝིཉྙཱཎསྶ ཝིབྷཝཱ, ཨེཝཾ ཁོ, བྷིཀྑུ, ‘ནོ ཙསྶཾ, ནོ ཙ མེ སིཡཱ, ནཱབྷཝིསྶ, ན མེ བྷཝིསྶཏཱི’ཏི – ཨེཝཾ ཨདྷིམུཙྩམཱནོ བྷིཀྑུ ཚིནྡེཡྻ ཨོརམྦྷཱགིཡཱནི སཾཡོཛནཱནཱི’’ཏི། ‘‘ཨེཝཾ ཨདྷིམུཙྩམཱནོ, བྷནྟེ, བྷིཀྑུ ཚིནྡེཡྻ ཨོརམྦྷཱགིཡཱནི སཾཡོཛནཱནཱི’’ཏི།
‘‘So rūpassa vibhavā, vedanāya vibhavā, saññā vibhavā, saṅkhārānaṃ vibhavā, viññāṇassa vibhavā, evaṃ kho, bhikkhu, ‘no cassaṃ, no ca me siyā, nābhavissa, na me bhavissatī’ti – evaṃ adhimuccamāno bhikkhu chindeyya orambhāgiyāni saṃyojanānī’’ti. ‘‘Evaṃ adhimuccamāno, bhante, bhikkhu chindeyya orambhāgiyāni saṃyojanānī’’ti.
‘‘ཀཐཾ པན, བྷནྟེ, ཛཱནཏོ ཀཐཾ པསྶཏོ ཨནནྟརཱ ཨཱསཝཱནཾ ཁཡོ ཧོཏཱི’’ཏི? ‘‘ཨིདྷ, བྷིཀྑུ, ཨསྶུཏཝཱ པུཐུཛྫནོ ཨཏསིཏཱཡེ ཋཱནེ ཏཱསཾ ཨཱཔཛྫཏི། ཏཱསོ ཧེསོ 1 བྷིཀྑུ ཨསྶུཏཝཏོ པུཐུཛྫནསྶ – ‘ནོ ཙསྶཾ, ནོ ཙ མེ སིཡཱ, ནཱབྷཝིསྶ, ན མེ བྷཝིསྶཏཱི’’’ཏི།
‘‘Kathaṃ pana, bhante, jānato kathaṃ passato anantarā āsavānaṃ khayo hotī’’ti? ‘‘Idha, bhikkhu, assutavā puthujjano atasitāye ṭhāne tāsaṃ āpajjati. Tāso heso 2 bhikkhu assutavato puthujjanassa – ‘no cassaṃ, no ca me siyā, nābhavissa, na me bhavissatī’’’ti.
‘‘སུཏཝཱ ཙ ཁོ, བྷིཀྑུ, ཨརིཡསཱཝཀོ ཨཏསིཏཱཡེ ཋཱནེ ན ཏཱསཾ ཨཱཔཛྫཏི། ན ཧེསོ 3, བྷིཀྑུ, ཏཱསོ སུཏཝཏོ ཨརིཡསཱཝཀསྶ – ‘ནོ ཙསྶཾ, ནོ ཙ མེ སིཡཱ, ནཱབྷཝིསྶ, ན མེ བྷཝིསྶཏཱི’ཏི། རཱུཔུཔཡཾ ཝཱ, བྷིཀྑུ, ཝིཉྙཱཎཾ ཏིཊྛམཱནཾ ཏིཊྛེཡྻ, རཱུཔཱརམྨཎཾ རཱུཔཔྤཏིཊྛཾ ནནྡཱུཔསེཙནཾ ཝུདྡྷིཾ ཝིརཱུལ༹ྷིཾ ཝེཔུལླཾ ཨཱཔཛྫེཡྻ། ཝེདནུཔཡཾ ཝཱ, བྷིཀྑུ… སཉྙུཔཡཾ ཝཱ, བྷིཀྑུ… སངྑཱརུཔཡཾ ཝཱ, བྷིཀྑུ, ཝིཉྙཱཎཾ ཏིཊྛམཱནཾ ཏིཊྛེཡྻ, སངྑཱརཱརམྨཎཾ སངྑཱརཔྤཏིཊྛཾ ནནྡཱུཔསེཙནཾ ཝུདྡྷིཾ ཝིརཱུལ༹ྷིཾ ཝེཔུལླཾ ཨཱཔཛྫེཡྻ།
‘‘Sutavā ca kho, bhikkhu, ariyasāvako atasitāye ṭhāne na tāsaṃ āpajjati. Na heso 4, bhikkhu, tāso sutavato ariyasāvakassa – ‘no cassaṃ, no ca me siyā, nābhavissa, na me bhavissatī’ti. Rūpupayaṃ vā, bhikkhu, viññāṇaṃ tiṭṭhamānaṃ tiṭṭheyya, rūpārammaṇaṃ rūpappatiṭṭhaṃ nandūpasecanaṃ vuddhiṃ virūḷhiṃ vepullaṃ āpajjeyya. Vedanupayaṃ vā, bhikkhu… saññupayaṃ vā, bhikkhu… saṅkhārupayaṃ vā, bhikkhu, viññāṇaṃ tiṭṭhamānaṃ tiṭṭheyya, saṅkhārārammaṇaṃ saṅkhārappatiṭṭhaṃ nandūpasecanaṃ vuddhiṃ virūḷhiṃ vepullaṃ āpajjeyya.
‘‘ཡོ 5 བྷིཀྑུ ཨེཝཾ ཝདེཡྻ – ‘ཨཧམཉྙཏྲ རཱུཔཱ, ཨཉྙཏྲ ཝེདནཱཡ, ཨཉྙཏྲ སཉྙཱཡ, ཨཉྙཏྲ སངྑཱརེཧི ཝིཉྙཱཎསྶ ཨཱགཏིཾ ཝཱ གཏིཾ ཝཱ ཙུཏིཾ ཝཱ ཨུཔཔཏྟིཾ ཝཱ ཝུདྡྷིཾ ཝཱ ཝིརཱུལ༹ྷིཾ ཝཱ ཝེཔུལླཾ ཝཱ པཉྙཱཔེསྶཱམཱི’ཏི, ནེཏཾ ཋཱནཾ ཝིཛྫཏི།
‘‘Yo 6 bhikkhu evaṃ vadeyya – ‘ahamaññatra rūpā, aññatra vedanāya, aññatra saññāya, aññatra saṅkhārehi viññāṇassa āgatiṃ vā gatiṃ vā cutiṃ vā upapattiṃ vā vuddhiṃ vā virūḷhiṃ vā vepullaṃ vā paññāpessāmī’ti, netaṃ ṭhānaṃ vijjati.
‘‘རཱུཔདྷཱཏུཡཱ ཙེ, བྷིཀྑུ, བྷིཀྑུནོ རཱགོ པཧཱིནོ ཧོཏི། རཱགསྶ པཧཱནཱ ཝོཙྪིཛྫཏཱརམྨཎཾ པཏིཊྛཱ ཝིཉྙཱཎསྶ ན ཧོཏི། ཝེདནཱདྷཱཏུཡཱ ཙེ, བྷིཀྑུ, བྷིཀྑུནོ… སཉྙཱདྷཱཏུཡཱ ཙེ, བྷིཀྑུ, བྷིཀྑུནོ… སངྑཱརདྷཱཏུཡཱ ཙེ, བྷིཀྑུ, བྷིཀྑུནོ… ཝིཉྙཱཎདྷཱཏུཡཱ ཙེ, བྷིཀྑུ, བྷིཀྑུནོ རཱགོ པཧཱིནོ ཧོཏི། རཱགསྶ པཧཱནཱ ཝོཙྪིཛྫཏཱརམྨཎཾ པཏིཊྛཱ ཝིཉྙཱཎསྶ ན ཧོཏི། ཏདཔྤཏིཊྛིཏཾ ཝིཉྙཱཎཾ ཨཝིརཱུལ༹ྷཾ ཨནབྷིསངྑཱརཉྩ ཝིམུཏྟཾ། ཝིམུཏྟཏྟཱ ཋིཏཾ། ཋིཏཏྟཱ སནྟུསིཏཾ། སནྟུསིཏཏྟཱ ན པརིཏསྶཏི། ཨཔརིཏསྶཾ པཙྩཏྟཉྙེཝ པརིནིབྦཱཡཏི། ‘ཁཱིཎཱ ཛཱཏི…པེ॰… ནཱཔརཾ ཨིཏྠཏྟཱཡཱ’ཏི པཛཱནཱཏི། ཨེཝཾ ཁོ, བྷིཀྑུ, ཛཱནཏོ ཨེཝཾ པསྶཏོ ཨནནྟརཱ ཨཱསཝཱནཾ ཁཡོ ཧོཏཱི’’ཏི། ཏཏིཡཾ།
‘‘Rūpadhātuyā ce, bhikkhu, bhikkhuno rāgo pahīno hoti. Rāgassa pahānā vocchijjatārammaṇaṃ patiṭṭhā viññāṇassa na hoti. Vedanādhātuyā ce, bhikkhu, bhikkhuno… saññādhātuyā ce, bhikkhu, bhikkhuno… saṅkhāradhātuyā ce, bhikkhu, bhikkhuno… viññāṇadhātuyā ce, bhikkhu, bhikkhuno rāgo pahīno hoti. Rāgassa pahānā vocchijjatārammaṇaṃ patiṭṭhā viññāṇassa na hoti. Tadappatiṭṭhitaṃ viññāṇaṃ avirūḷhaṃ anabhisaṅkhārañca vimuttaṃ. Vimuttattā ṭhitaṃ. Ṭhitattā santusitaṃ. Santusitattā na paritassati. Aparitassaṃ paccattaññeva parinibbāyati. ‘Khīṇā jāti…pe… nāparaṃ itthattāyā’ti pajānāti. Evaṃ kho, bhikkhu, jānato evaṃ passato anantarā āsavānaṃ khayo hotī’’ti. Tatiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༣. ཨུདཱནསུཏྟཝཎྞནཱ • 3. Udānasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༣. ཨུདཱནསུཏྟཝཎྞནཱ • 3. Udānasuttavaṇṇanā
