| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၄. ဥဒပာနဒာယကတ္ထေရအပဒာနဝဏ္ဏနာ
4. Udapānadāyakattheraapadānavaṇṇanā
ဝိပသ္သိနော ဘဂဝတောတိအာဒိကံ အာယသ္မတော ဥဒပာနဒာယကတ္ထေရသ္သ အပဒာနံ။ အယမ္ပိ ထေရော ပုရိမမုနိဝရေသု ကတာဓိကာရော အနေကေသု ဘဝေသု ကတပုညသဉ္စယော ဝိပသ္သိသ္သ ဘဂဝတော ကာလေ ကုလဂေဟေ နိဗ္ဗတ္တော ဝုဒ္ဓိပ္ပတ္တော ‘‘ပာနီယဒာနံ မယာ ဒာတဗ္ဗံ, တဉ္စ နိရန္တရံ ကတ္ဝာ ပဝတ္တေတုံ ဝဋ္ဋတီ’’တိ စိန္တေတ္ဝာ ဧကံ ကူပံ ခနာပေတ္ဝာ ဥဒကသမ္ပတ္တကာလေ ဣဋ္ဌကာဟိ စိနာပေတ္ဝာ ထိရံ ကတ္ဝာ တတ္ထ ဥဋ္ဌိတေန ဥဒကေန ပုဏ္ဏံ တံ ဥဒပာနံ ဝိပသ္သိသ္သ ဘဂဝတော နိယ္ယာဒေသိ။ ဘဂဝာ ပာနီယဒာနာနိသံသဒီပကံ အနုမောဒနံ အကာသိ ။ သော တေန ပုညေန ဒေဝမနုသ္သေသု သံသရန္တော နိဗ္ဗတ္တနိဗ္ဗတ္တဋ္ဌာနေ ပောက္ခရဏီဥဒပာနပာနီယာဒိသမ္ပန္နော သုခမနုဘဝိတ္ဝာ ဣမသ္မိံ ဗုဒ္ဓုပ္ပာဒေ ဧကသ္မိံ ကုလေ နိဗ္ဗတ္တော ဝုဒ္ဓိမန္ဝာယ သဒ္ဓော ပသန္နော ပဗ္ဗဇိတ္ဝာ နစိရသ္သေဝ အရဟာ အဟောသိ။
Vipassino bhagavatotiādikaṃ āyasmato udapānadāyakattherassa apadānaṃ. Ayampi thero purimamunivaresu katādhikāro anekesu bhavesu katapuññasañcayo vipassissa bhagavato kāle kulagehe nibbatto vuddhippatto ‘‘pānīyadānaṃ mayā dātabbaṃ, tañca nirantaraṃ katvā pavattetuṃ vaṭṭatī’’ti cintetvā ekaṃ kūpaṃ khanāpetvā udakasampattakāle iṭṭhakāhi cināpetvā thiraṃ katvā tattha uṭṭhitena udakena puṇṇaṃ taṃ udapānaṃ vipassissa bhagavato niyyādesi. Bhagavā pānīyadānānisaṃsadīpakaṃ anumodanaṃ akāsi . So tena puññena devamanussesu saṃsaranto nibbattanibbattaṭṭhāne pokkharaṇīudapānapānīyādisampanno sukhamanubhavitvā imasmiṃ buddhuppāde ekasmiṃ kule nibbatto vuddhimanvāya saddho pasanno pabbajitvā nacirasseva arahā ahosi.
၁၈. သော အပရဘာဂေ အတ္တနော ပုဗ္ဗကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော ဝိပသ္သိနော ဘဂဝတောတိအာဒိမာဟ။ တတ္ထ ဥဒပာနော ကတော မယာတိ ဥဒကံ ပိဝန္တိ ဧတ္ထာတိ ဥဒပာနော, ကူပပောက္ခရဏီတဠာကာနမေတံ အဓိဝစနံ။ သော ဥဒပာနော ကူပော ဝိပသ္သိသ္သ ဘဂဝတော အတ္ထာယ ကတော ခနိတောတိ အတ္ထော။ သေသံ ဥတ္တာနတ္ထမေဝာတိ။
18. So aparabhāge attano pubbakammaṃ saritvā somanassajāto pubbacaritāpadānaṃ pakāsento vipassino bhagavatotiādimāha. Tattha udapāno kato mayāti udakaṃ pivanti etthāti udapāno, kūpapokkharaṇītaḷākānametaṃ adhivacanaṃ. So udapāno kūpo vipassissa bhagavato atthāya kato khanitoti attho. Sesaṃ uttānatthamevāti.
ဥဒပာနဒာယကတ္ထေရအပဒာနဝဏ္ဏနာ သမတ္တာ။
Udapānadāyakattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၄. ဥဒပာနဒာယကတ္ထေရအပဒာနံ • 4. Udapānadāyakattheraapadānaṃ
